SANTIAGO 3

1Hex wuẍtaj hex wanab', oẍimi mat caw tx'ihaloj hex cheyoche chex oc cuywaomal, haxca hayon̈ chon̈ cuywa ti'an, k'a' ec'b'alto chu yil-laxoj tzet chon̈ tan̈ojan. 2Co hunilon̈ ẍtic'a on̈ semc'o yin̈ tzet ẍju. Ta ay mac mach semc'oj yin̈ tzet chala, hune' tu' telan sc'ulal b'oj ẍc'oji scachni sunil snimanil yuni xtx'ojal. 3Ta ẍjactoj ch'en freno yul sti' no' cheh yun̈e syijyen no' sto b'ay chal co c'ul, sunil snimanil no' ẍyijyeni. 4Hactu' ye te' barco. Caw nimej te' b'oj caw ay yip cak'e' ch'inic'oj te', yaja' hune'n̈e ni'an sb'ak'ob'anil te' tzab'b'il yu naj i'n̈e te' cat yinitoj naj te' b'ay chal sc'ul. 5Hactu' ye co ti', caw ni'anch'an yecoj yin̈ co nimanil, yaja' caw can̈ ye chab'e. Haca' hune' ni'an tz'it k'a' chu sn̈usniloj hune' niman k'eb'taj, hactu' ye co ti'. 6Lahan ye co ti' b'oj k'a' k'a', mach sb'ih hantaj xtx'ojal aycoj yin̈. Stz'aj co nimanil yeyi, yuxin sunil co nimanil ch'etaxtoj yu. Haca'tic'a yul infierno ẍtit sk'ak'al, stzujb'antoj sunil co k'inal yettax x'ichitij. 7Hayon̈ anmaon̈ ti', chon̈ c'oji co cuyni sunil hej no' xoltelajil nok', no' ch'ic, no' lab'ah, b'oj hej no' nok' ay yul ha' mar. 8Yaja' machon̈ c'oji co cachni co ti'. Machon̈ c'oji co cachni xtx'ojal chala, lahan b'oj howla tzetet chon̈ potx'ni. 9Ha'tic'a co ti' ch'anicoj smay Comam Jahaw, ha' Comam Dios Padre, ha'tic'a co ti' ẍhalni pax tx'oj yin̈ jet-anmail watx'eb'il yu Comam yecheloj. 10Ha'tic'a co ti' ẍhalni tzoti' c'ul. Ha'tic'a co ti' ẍhalni pax tzoti' tx'oj. Hex wuẍtaj hex wanab', mat yetoj aya hactu' ẍjute co b'a. 11Yul hune' snuk' ha' ha', machu yahiloj ha' ha' chi' juc'ni b'oj ha' ha' c'achi' juc'ni. 12Pax hune' yoj te' higo tox mansan sat te' cha' xin, pax hunuj yoj te uva tox higo sat te' cha' xin. Hactu' hune' snuk' ha' ha' c'achi', machu spaq'ui hune' ha' tu' chi'al. 13Ta ay hunujon̈ ay stz'ajanil co c'ul, co yeb'iloj yin̈ sc'ulch'anil ẍju yin̈ mach lolo'al yetb'i. 14Yaja' ta ẍchiwacoj co c'ul yin̈ jet-anmail, b'oj ta hayon̈n̈e ẍjoche ch'oc co may, yin̈ hactu' ẍjacoj lek'ti'al ta ẍco lolo'n̈e co b'a yin̈ stz'ajanil co c'ul tu'. 15Matxataj tz'ajanc'uleal cha' Comam Dios ye hune' tu'; to yet-xa satyib'an̈k'inal ti' yeyi, anman̈e ay stz'ajanil sc'ul yeyi, b'oj tet naj matzwalil ẍtita. 16Yet ẍchiwacoj co c'ul yin̈ jetb'i b'oj hayon̈n̈e ẍjoche ch'oc co may, ha' tu' b'ay ch'ichi somchatoj st'in̈anil b'oj ch'ichican̈ sunil hej tx'ojal. 17Wal ta yin̈ Comam Dios ẍtit stz'ajanil co c'ul, matxa chon̈ ec' yin̈ tx'ojal, ak'anc'ulal ẍjute co b'a, c'ulch'an ẍjute co c'ul, huncuentan̈e ẍjute co b'a, stz'a' co c'ul yin̈ jetb'i, ha' hej tzetet c'ul ha' ẍju, lahan syail anma yul co sat, b'oj st'in̈anil ẍjala. 18Ta ẍja' janma co watx'eniloj tzetet yin̈ ak'anc'ulal, stzujchaojapnoj hune' stoholal choche Comam Dios ta ẍju.


Copyright
Learn More

will be added

X\