SANTIAGO 3

1Hex wuẍtaj, hex wanab, mach comono cheyocheco heyoc cuywawomal, yuto heyohtaj ta han̈on̈ chon̈cuywahi caw ec'balto chiilax yin̈ tzet chicowatx'e. 2Cosunil ayto niẍtexa cotx'ojal yin̈ tzet chicowatx'e, yaja' ta ay mac mach ch'aycay yin̈ istzoteli, ha' hune' mac tu' caw c'ul, yuto chupaxo isk'oji iscachni sunil isnimanil yin̈ej istx'ojal. 3Chijacto ch'en freno yul isti' no' cheh yun̈e isyijen no' tzet chijoche. Hac tu' xin sunil isnimanil no' chito bay chal coc'ul. 4Hactic'apax tu' te' barco caw nimej te' yaj waxan̈ca chul tin̈na jak'ek' yin̈ te' yaj han̈ech'an nich'an timón chisbak'o naj piloto ha' bay chisyije te', cat isto te' bay chal isc'ul naj. 5Hac tu' ye nich'an jak' ti', caw nich'anch'an yaj caw can̈ye sic'lebil, haca' hunu nich'an tz'it k'a' chu isn̈usnilo huno niman k'eptalaj. 6Hac tu' ye jak' ti', lahan yeb k'a k'a', mach isbi hanta istx'ojal ayco yin̈; yetbi conimanil yehi yuxin sunil conimanil chu yetaxto yu. Hune' k'a k'a' tu', haca'tic'a yul hune' niman k'a' mach istan̈bal chitit isk'ak'al, hac tu' xin chu yetaxcanto sunil cobeybal. 7Han̈on̈ anma hon̈ ti' chon̈k'oji cocuyni sunilej no' xol telajil nok'; no' ch'ic, no' laba yebej no nok' ay xol ha' mar. 8Yaja' wal jak' ti' xin, mach chon̈k'oji cocuyni. Lahan yeb huno istx'ojal mach chak' cacha' isba, lahan haca' veneno chon̈ak'ni camoj. 9Ha'tic'a jak' ti' xin, chalni c'ulla tzoti' yin̈ Comam Dios Mame, ha'tic'a xin chihalni tzoti' tx'oj yin̈ jet anmahil watx'ebil yu Comam Dios. Ha' anma tu' xin, yechel Comam yehi. 10Yul coti' ch'elti tzoti' c'ul, yultic'apaxo coti', ch'elpaxti tzoti' tx'oj. Wal xin wuẍtaj, wanab, mach cheyute heba haca' tu'. 11Haca' hunu isnuk' ha ha' tinan̈, mach chiahilo ha ha' chi' yeb xin ha ha' c'ah. 12Hacpax tu' hunu yoj te' higo, mach chu yak'ni te' sat te' aceituna, yeb hunu yoj te' uva mach chu yak'ni te' sat te' higo. Hac tu' ye isnuk' hunu ha ha', mach chu yahilo ha ha' chi' yeb xin ha' c'achi'. 13Ta ay hunu mac texol caw ay isnabal yeb xin caw ay ishelanil, isyebabilo yin̈ isc'ulal chiswatx'e, yik'abayo isba yu hune' ishelanil tu'. 14Yaj ta ayn̈etic'aco chichonc'ulal caw c'ah yul heyanma, yeb xin chewatx'e istx'ojal yin̈ heyet anmahil, cat xin heyalnipaxo heba c'ulal, wal xin caw lek'ti' hex. 15Matxa taj tet Comam Dios chitit hune' yitz'atil wi'e tu', to yetxa sat yiban̈k'inal ti' yehi, yetxa anma ye hune' yitz'atil hewi' tu', yin̈ naj matzwalil chitita. 16Ta aytoco chichonc'ulal jin̈, yeb xin ta han̈on̈n̈e chijoche ch'oc cowinajil, ta hac tu' mach lan̈ano cobelwi yin̈ istxolal, caw xin ayto sunil istx'ojal jin̈. 17Ta tet Comam Dios chitit cohelanil, matxa chon̈ec' yin̈ istx'ojal, wal xin chon̈ec' yin̈ ak'anc'ulal. C'ulch'an chijute coc'ul, cat istz'ay coc'ul yin̈ jet anmahil, lahanpaxo jet anmahil yul cosat, yeb xin ist'in̈aniln̈etic'a chijala. 18Ta ak'anc'ulal chicowatx'e, chicochah ispaj, ha' ton istoholal.

will be added

X\