SANTIAGO 2

1Hex wuẍtaj, hex wanab, hex xahechah Comam Jesucristo yul heyanma, Comam caw ay yelapno yehi, lahann̈ehojab hexahann̈en heba hesunil. 2K'inalo ta cutxanexicoj cat yapni hunu naj k'alom, caw c'ul yehico xil isk'ap yeb xin ayco hunu isjolk'ab naba oro. Caw xin c'ul chu hechahni naj, cat heyalni tet naj: “Tz'on̈yan̈ yiban̈ hune' ẍila caw c'ul ti',” ta quexchi. Lahwi tu' xin cat yocpaxapno hunu naj caw meba', caw xilxa xil isk'ap aycoj, cat xin heyalni tet naj: 3“Wal halin̈i bey tu',” maca “Ayan̈ tz'on̈no sat tx'otx',” ta quexchi. 4Ta hac tu' cheyute, mach lahano chexahann̈e ebnaj juẍtaj yeb ebix janab. Ha' xin chalniloj ta tx'oj chenaco yin̈ heyet anmahil. 5Hex wuẍtaj, hex wanab, txumweloj tato ha' Comam Dios sic'nican̈ anma meba' ay yul sat yiban̈k'inal ti' yu yak'ni Comam isk'alomal tet yin̈ yanayto yul yanma yin̈ Comam, cat ischahnipaxo yehobal bay ch'oc Comam Yahawil, hune' yalte Comam tet mac ch'ocheni. 6Walexpaxo xin cheyah ebnaj meba', machi yelapno ebnaj yul hesat. ¿Mac anmahil chexetani, cat quexyinito sata naj alcal? Ha' ton ebnaj k'alom. 7¿Tom mach heyohtajoj tato ha' ebnaj tu' tx'oj istzotel yin̈ Comam Jesucristo ayxaco yul janma? 8Ta caw yeli cheyije isley Comam Dios haca' yalni Yum Comam bay chala: “Xahan cheyil heyet anmahil haca' heya'iln̈en heba,” ẍicanoj. Ta hac tu' cheyute caw c'ul heyecoj. 9Yaj ta mach lahano chexahann̈e heba, cheyaco hemul, cat hecanpaxcano tx'ojal tet isley Comam Dios. 10Ta chijala ta sunil ley chicoyije, yaja' ta ay hunuxa chejbanile mach chicoyije, chijaco comul yin̈ sunil ley haca' tu'. 11Yuto ha'tic'a Comam Dios halni: “Mach chexixli, mach chexpotx'wipaxo camo anma,” ẍi Comam. Yuxin ta ay mac mach chiec' ixloj, yaja' ta chispotx' camo yet anmahil, chiyaco ismul tet ley haca' tu'. 12Yuxin nann̈e heyu yin̈ tzet cheyala', yeb yin̈ tzet chewatx'e, yuto yilal yixtan̈witi yu hune' ley yet Comam Jesucristo. Hune' ley xacon̈bejtzonico yin̈ cowatx'en tzet choche Comam Dios. 13Ta mach chitz'ay coc'ul yin̈ jet anmahil, mach chitz'aypaxo isc'ul Comam jin̈ yin̈ hune' tz'ayic yet chiyilni Comam Dios yin̈ tzet chielico anma. Yaj tato chitz'ay coc'ul yin̈ jet anmahil, chitz'aypaxo isc'ul Comam jin̈. 14Hex wuẍtaj, hex wanab, tzet chaliloj ta ay mac ayco yanma yin̈ Comam yalni, yaj ta machi nich'ano isc'ulal tzet chiswatx'e, ¿tom xin chicolchahi yu ayxa yanma yin̈ Comam yalni? ¡Machoj! 15K'inalo ta ay hunu juẍtaj maca hunu janab machi xil isk'ap, maca matzet chislo, 16cat heyalni tet: “Chawil haba, c'ul chawute hak'uxni haba, wa'an yin̈ caw c'ul,” ta quexchi. Matzet xin cheyak'paxo tet, ¿tzettaxca chalilo hune' tu'? 17Yuxin ta ayex cheyala ta ayco heyanma yin̈ Comam, machi xin chewatx'e isc'ulal, nabn̈e cheyala ta ayco heyanma yin̈ Comam Dios. Ha' xin chalniloj ta camomex yul sat Comam. 18K'inalo ta ay hunu mac chihalni: “Ayco wanmahan yin̈ Comam.” Haxa hunxa mac xin chalpaxoj: “Isc'ulaln̈e chinwatx'e'an.” Chiwalan teyet, mach ayoco Comam Dios yipo heyanma ta mach chewatx'e isc'ulal. Wal xin chinyehan teyet ta ayco Comam Dios yipo wanmahan yu chinwatx'ehan isc'ulal. 19Hex ti', cheyayto yul heyanma tato hune'n̈ech'an Comam Dios. Caw c'ul hune' tu', yaj maẍn̈etaj hune' tu' yilal yehi. Hacpax tu' ebnaj ischejab naj matzwalil, yohta ebnaj tato hune'n̈ech'an Comam Dios. Caw xin chiluyluncan̈ ebnaj xiwquilal yet chisnaniti ebnaj Comam. 20¡Tzet hesucal! Cheyala ta ayco heyanma yin̈ Comam, machi xin chebeybaln̈e tzet choche Comam. Ha' xin chalniloj ta machi heyanma yin̈ Comam. 21Naweti yin̈ jichmam Abraham; isyije icham yinito isc'ahol yin̈ xahanbalil. Yu tzet iswatx'e icham tu', yuxin occano icham c'ulal yul sat Comam Dios. 22Hac tu' xin chu johtan̈eniloj ta yaco yanma icham Abraham yin̈ Comam Dios, yuto isyije icham tzet ak'lax iswatx'e, hac tu' xin yu isyenicanilo isba ta ayco yanma icham yin̈ Comam Dios. 23Hac tu' yu yijni isba yin̈ tzet halbilcano yul Yum Comam Dios bay chala: “Caw yaco yanma icham Abraham yin̈ tzet yal Comam Dios, yu hune' tu' xin cancano icham c'ulal yul sat Comam,” ẍicanoj. Yuxin yacanico Comam icham Abraham tu' yamigohoj. 24Yuxin nachaojabilo heyu tato chon̈cancano c'ulal yul sat Comam Dios yu tzet chicowatx'e, maẍn̈etaj yu janico janma yin̈. 25Hac tu' yupaxo hune' ix ix tx'oj ye iswi', Rahab isbi. Cancano ix c'ulal yul sat Comam Dios yu yak' ix bay way ebnaj ischejab Comam, yeb xin nanxa behal bay ischejto ix ebnaj yun̈e mach chitzabcha ebnaj. 26Haca' hunu nimanile matxa yanma ayictoj, camomxa, hac tu' ye hunu mac chihalni ta ayco yanma yin̈ Comam Dios, mach chisyijepaxo tzet chal Comam, naban̈e hune' tu'.

will be added

X\