SANTIAGO 1

1Hayin Santiago hin ti'an, schejab' Comam Dios b'oj Jahaw Jesucristo wean, ẍwatoj he cawil hex yic'al cab'lan̈wan̈ wetcon̈ob' israel pujantoj sunil b'aytualicoj. 2Hex wuẍtaj hex wanab', caw ayojab' co tzalalal yet ayon̈coj yin̈ hej tzantzet ilweb'al. 3Johtaj ta yet ẍcawxi co c'ul yin̈ Comam Dios yet chon̈ ilwelaxi, b'elay k'a' lin̈anon̈. 4Yilal ja'ni jip co lin̈b'an co b'a masanto chon̈ yihlan yin̈ yet Comam, haxin̈wal matzet chon̈ mahlanoj. 5Ta ay hunujon̈ mach stz'ajanil co c'ul ẍjab'e, co k'ana' tet Comam, cha'a' Comam jet, hasta mach yecheb'anil ya'ni Comam jet ta ẍco k'ana. Machca chalicoj Comam yin̈ co sat yet cha'ni. 6Yaja' caw ẍja' yuluj co c'ul yin̈ Comam chala, machon̈ cab'coni ẍco k'anni, haxca ta ẍcab'con co c'ul ẍco k'anni hunuj tzetet, lahanon̈ mi b'oj ha' mar ch'ec' jeb'la yu cak'e', nanann̈e b'ay ẍca yiottoj. 7Ta hactu' ẍjute, mach ẍco na ta ay tzet ẍco chab' tet Comam Jahaw. 8Haxca ta nan ch'ec' yin̈ co c'ul tinan̈, nanxa ch'ec' yin̈ co c'ul hecal, mach st'in̈anil ye yul co wi' yin̈ hactu'. 9Hune' juẍtaj, mato janab' meb'a' yin̈b'al, tzalaojab'i haxca ayxa yelapnoj ye yul sat Comam Dios. 10Hactu' hune' mac k'alom, tzalaojab'i ta ch'ilaxiloj spixan yu syailoj Comam. Haxca mac k'alom, haca'n̈e xumac telaj yeyi, pet ch'ay honayi. 11Yet ch'ahiloj tz'ayic cat spohcan̈ k'a', ẍtajiloj telaj cat yay hona xumac, matxa c'ulch'anoj jilni. Hactu' chu sc'ayojcan̈ anma k'alom yulb'al ch'ahcan̈ sk'alomal. 12Sak'al jet yet ẍtecha ilweb'al ju, haxca ta lawi jilweot, maẍtic'a chon̈ ayi, cha'a' Comam k'inal mach stan̈b'al jet spajoj, ha' hune' tu' halteb'il jet yu Comam ta ẍjoche Comam. 13Yet chul ilweb'al jin̈ yu juni xtx'ojal, mach ẍco na ta Comam Dios chon̈ ilweni, haxca machu yilweot Comam yuni xtx'ojal, machca chon̈ yacoj Comam yin̈ ilweb'al yu juni xtx'ojal tu'. 14Ha' ch'elicoj to hatic'a co tx'ojal aycoj jin̈, ha' chon̈ iptzen juni xtx'ojal tu'. 15Yu jochen hej tzetet tx'oj, hat ẍwayican̈ mule jin̈, haxa chi'nican̈ yip xin, chul camical mach stan̈b'al jin̈. 16Hex wuẍtaj hex wanab' caw ocheb'il wuan, mach ja' sub'u' co b'a. 17Sunil tzet c'ul b'oj tz'ajan lahan ye ch'a'lax jet, tet Comam Dios ẍtita, Comam xwatx'en sajilk'inal, hune'n̈etic'a ye Comam, mach shel sb'a, mach ninoj ta shec' sb'a tzet yeyi. 18Haxca hactu' x'el yin̈ sc'ul Comam, xcon̈ yican̈ yuninaloj yu stzoti' st'in̈anil yeyi, yun̈e hayon̈ k'a' ay yelapnoj je yin̈ hej tzetet watx'eb'il yu. 19Hex wuẍtaj hex wanab' caw ocheb'il wuan, nawejtij hunk'aan tzet ẍwalti'an, tz'ajan ẍjute co c'ul jab'eni. Yaja' mat tzetoj co tzoteli mat can̈oj stit co howal. 20Haxca yet somil co howal ẍjuni hej tzetet, mataj tzetet ẍju tu', mataj tu' choche Comam Dios. 21Yuxin ja'a'xacan tzetet quistal b'oj sunil hej tzetet tx'oj, huncuentan̈e ẍjute co c'ul ẍco yijyen stzoti' Comam xax tz'unlax yin̈ janma, haxca hune' tzoti' tu' ẍc'oji hon̈ scolni. 22Yaja' mat ton̈eoj ẍjab'e stzoti' Comam, to yilal joc co yijyenoj, haxca ta ton̈e ẍjab'e, ton̈e ẍjeta-ab'ix co b'a. 23Ta ton̈e ẍjab'e stzoti' Comam, yaja' mach ẍco yijye, lahanon̈ b'oj mac chil sat yul ch'en espejo. 24Chil sb'a yul ch'en, yaja' lawi yanican ch'en, lemb'il ẍto nahul yu tzet yilot, hactu' jeyi. 25Wal ta mach ẍco nahuln̈etoj scuywab'al Comam Dios tz'ajan lahan yeyi, to caw ẍjacoj yin̈ co c'ul yin̈ tzetet ẍjab'e tu', cat co yijyeni, caw sak'al jet, haxca ha' scuywab'al Comam tu' ha' chon̈ iniloj tet hunk'aan tzetet mat st'in̈aniloj yeyi. 26Ta ẍjala ta ẍco hak'e Comam, yaja' mach ẍco cach co ti', ton̈e ẍjeta-ab'ix co b'a b'oj matzet chaliloj. 27Ha' hune' hak'eb'al caw st'in̈anil choche Comam Dios co Mamwej ta ẍju, ha': Co colwa yin̈ niẍtej unin camnajxa smam, b'oj yin̈ heb'ix camnajxa yichamil, b'oj ẍco pohiloj co b'a yin̈ xtx'ojal chu anma satyib'an̈k'inal ti'.


Copyright
Learn More

will be added

X\