HEBREOS 9

1Hune' babel trato tu' ay chejbanile chihalni yin̈ tzet chu isyijen ebnaj sacerdote ismunil tet Comam Dios, yaja' yul hune' yatut Comam sat tx'otx'al ti'. 2Hune' yatut Comam tu', hac ti' yehi: Cabeb cuarto yul, pohbilayo yu hune' k'ap k'ap litx'ancan̈ yictabal. Hune' babel cuarto chihallax Txahulal, ha' tu' ayicto ch'en lámpara yeb te' meẍa, yeb ixim pan chihaltelax tet Comam Dios. 3Haxa hune' cuarto yintac'to k'ap litx'ancan̈ tu' caw Ec'na txahul chihallax yin̈. 4Ha' bey tu' ay hune' altar naba oro bay chin̈uslax pom, yulicto cuarto tu' aypaxicto te' caẍa yet istrato Comam Dios, sunil yin̈ te' ayco ch'en oro. Yul te' caẍa tu' ayayto hune' ẍalu naba oro bay ayayto maná, aypaxayto isk'ojoch naj Aarón, hune' te' k'ojoch elilo iswol; aypaxayto ch'en ch'en pak'an yehi bay tz'ibn̈ebiloco ley. 5Yiban̈ te' caẍa tu' ayahto yechel cawan̈ ebnaj ángel chiyij querubín, ha' chaliloj ta ayayo Comam Dios bey tu', leyanilto xic' ebnaj yiban̈ ismajil te' caẍa tu'. Yaja' wal tinan̈, mach caw yilalo chon̈oc jala' yin̈ tzet caw ye huntek'an tu'. 6Hac ton tu' ye iswatx'ebanil yatut Comam Dios tu'. Yul hune' babel cuarto hunun tz'ayic yocto ebnaj sacerdote isyijeno ismunil tet Comam. 7Wal yul hune' cuarto caw ec'na txahul xin, han̈c'an̈e naj yahawil sacerdote chiocto yul, yaja' xin huneln̈ech'an chiocto naj yulbal habil. Hayet chiocto naj, ik'bil ischiq'uil no nok' yu naj yu yalten naj yin̈ ismul, yeb yin̈ ismul sunil anma mach nano yu chanic'o ismul. 8Hac tu' chu yak'ni Comam Espíritu johtan̈eloj ta hayet yocnico hune' babel cuarto tu' maẍto chihajlax beh japni yin̈ sat Comam Dios. 9Hune' babel cuarto tu' yecheln̈e yin̈ hune' tiempo bay ayon̈ ti', yuto huntek'an sabehal yeb xahanbal chihaltelaxi, mach chiswatx'eco isnabal anma chiyiyo isba bey tu' yin̈ istoholal. 10Huntek'an chejbanile tu' yin̈n̈e tzet chilolaxi yeb tzet chiuc'lax bay chitzoteli, yin̈ issajn̈elax tzettaj ye tu'; huntek'an tu' yetn̈e conimanil yehi. Ocnico huntek'an chejbanil tu' yin̈ ismunil masanto yet yapni istiempohal ishelni Comam tzettaj ye tu'. 11Yaja' xahulic'o Comam Cristo, ha' Comam Yahawil sacerdote xayak' isc'ulal jet, huntek'an yilaltic'a yuli. Haxa hune' yatut Comam Dios bay ayco Comam Jesús sacerdotehal caw ec'bal isc'ulal yeb tz'ajan yehi, maẍtaj ebnaj winaj watx'en̈e, mach yeto yul sat yiban̈k'inal ti' yehi. 12Xaapni Comam Jesús sata Comam Dios satcan̈, yaja' maẍtaj ischiq'uil no' chiw maca ischiq'uil no' niẍte wacax yalte Comam, walxinto ha' caw ischiq'uil Comam yalte. Xaapni Comam sata Comam Dios yin̈ huneln̈e yeb yin̈ sunilbal tiempo, hac tu' yu isk'oji Comam yak'nicano colbanil mach istan̈bal. 13Yin̈ caw yeli ischiq'uil no' winaj wacax yeb ischiq'uil no' chiw yeb istan̈il no' k'opo wacax chitxihlaxico yiban̈ anma mulum, ay yip issajn̈encano isnimanil anma yet payxa tu'. 14Hajxam ischiq'uil Comam Jesucristo to caw ec'balto ay yip issajn̈en janma yin̈ istx'ojal, yun̈e coyijen yin̈ tzet chal Comam Dios, Comam itzitzn̈etic'a, yuto yu Comam Espíritu mach istan̈bal, yuxin yaco isba Comam Cristo xahanbalil tet Comam Dios, caw xin machi nino istx'ojal Comam. 15Ha' iscamical Comam Jesucristo ak'ni tan̈o sunil mule alaxico yalan̈ hune' babel istrato Comam Dios, yuxin tinan̈ ha' Comam Jesús chitzotel jin̈ tet Comam Dios yin̈ hune' iscab trato ti', yun̈e han̈on̈ awtebilon̈ yu Comam chicochah comajul mach istan̈bal haltebilcano yu Comam. 16Haca' hunu testamento watx'ebilcanoj, machi yip te' tato maẍto chicam naj an̈ecano te'. 17Machi yip hune' testamento tu' tato itzitzto naj an̈ecanoj, wal ta xacam naj wal tu' ay yip. 18Yuxin ha' hune' babel istrato Comam Dios yilal malto ischiq'uil no nok' yijnicano isba. 19Yuto hayet lahwi yawten naj Moisés chejbanil chal ley tet anma Israel, issomni naj ischiq'ul no' tzehla wacax yeb ischiq'uil no' chiw xol ha ha', yanico naj no' lana caj yin̈ iswi' isk'ab te' hisopo islahbanayto naj xol chic' tu', istxihnico naj yin̈ yumal ley yeb yiban̈ sunil anma Israel. 20Yalni naj Moisés tu' xin: “Ha' chic' ti' chit'in̈bancano istrato Comam Dios chak' teyet. Yilal xin heyijen tzet chala,” ẍi naj. 21Istxihnipaxico naj Moisés chic' yin̈ yatut Comam tu', yeb yin̈ sunil munlabal chiocnico yu ebnaj sacerdote yul yatut Comam tu'. 22Haca' yalni ley ta sunil tzettaj ye tu' masanto chic' chisajn̈eni, machi xin nimanc'ulal yin̈ ismul anma ta machi chic' chimaltoj. 23Huntek'an yecheln̈e yeco yin̈ tzet ay yul satcan̈ yilal issajn̈elax yu xahanbal, yaja' wal tzet ay satcan̈ choche xahanbal ec'na c'ul sata huntek'an tu'. 24Yuto Comam Cristo maẍtaj yul hune' yatut Comam Dios watx'ebil yu ebnaj winaj bay octoj, hune' yecheln̈e yeco yin̈ yatut Comam ay yul satcan̈, walxinto caw apni Comam sata Comam Dios yul satcan̈, ha' xin Comam chitzotel jin̈ tet Comam Dios tinan̈. 25Comam Jesucristo mach hayelta yaco isba xahanbalil haca' yute ebnaj yahawil sacerdote, yet yanico ebnaj ischiq'uil no nok' xahanbalil. Ebnaj tu' hunun habil yocto ebnaj yul yatut Comam Dios yalteno ischiq'uil no nok' yin̈ xahanbalil, maẍtaj ischiq'uil ebnaj chalte. 26Ta hac tu', tx'i'alxam el chicam Comam yichitax iswatx'i yul sat yiban̈k'inal ti'. Wal xin ha' caw yehi to ha' yin̈ islahobal tiempo ti' ha' caw Comam hul yak'aco isba xahanbalil yin̈ huneln̈e yu yinilo Comam comul. 27Yuto sunil anma yilal hunelch'an chicami, lahwi tu' cat yillaxi yin̈ tzet chielico yul sat Comam Dios. 28Hac tu' xin Comam Jesucristo huneln̈ech'an yak' isba xahanbalil yu yinilo Comam ismul tzetc'a anma. Wal xin chul Comam yin̈ iscayelal, yaja' matxataj yu yinilo ismul anma, to yu iscolni Comam macta chiechmani.

will be added

X\