HEBREOS 9

1Hune' b'ab'el lahc'ulal tu', ay hej sleyal tzet chu yec'tzelax hak'eb'al yul hune' yatut Comam Dios ay sat tx'otx'otx' ti'. 2Hune' b'ay ch'ehojc'oj Comam lan̈an jalni ti', pohb'ilay yictaj yu hune' cortina. Hune' b'ab'el majan yet Comam yeyi. Hat ayictoj hune' ch'en b'ay ch'ahtoj candil b'oj meẍa b'ay ch'ahtoj ixim pan ch'a'lax tet Comam. 3Yulictoj cortina tu', hat ay hunxa majan yetn̈e Comam yeyi. 4Yul hune' ti', hat ay hune' txahb'al nab'a' oro b'oj te' caẍa yet lahc'ulal, sunil yin̈ te' lac'b'ilcoj oro yelawoj. Yul te' ahaytoj hune' netb'al nab'a' oro b'ay ahaytoj maná, ahaytoj sk'ojoch ya' Aarón elnajiloj xumac, b'oj ch'en ch'en pak'an ye b'ay tz'ib'n̈eb'ilcoj slahc'ulal Comam Dios. 5Yib'an̈ te' caẍa tu' ahatoj yechel cawan̈ querubín, ẍyeni to hunel ye smay Comam Dios. Xic' querubín tu' ch'en̈len smajil te' b'ay stan̈tzelax mule. Yaja' tinan̈ mach yeẍtooj chon̈ oc jala' tzet caw yeyi. 6Hactu' ye swatx'eb'anil hune' tu'. Yul b'ab'el majan tu' ch'octoj heb'naj sacerdote hunun tz'ayic yu syijyen schejb'anil yin̈ hak'eb'al. 7Hununto hab'il ch'octoj naj swi'al sacerdote yul hune'xa majan yulictoj tu' haxca han̈c'a naj yetwanoj yoctoj b'etu'. Mat chu yoctoj naj ta mat ib'iloj schiq'uil no' nok' yu naj, yu ya'ni xahanb'al yu smul, b'oj yu smul con̈ob' mat hun nanoj yu chanicoj. 8Hactu' chu ya'ni Comam Espíritu Santo johtajn̈e' to yulb'al lan̈an yocnicoj b'ab'el majan tu', maẍto ẍhajlo sb'elal japni yin̈ caw sat Comam Dios. 9Hunk'aan tzetet xmunla b'et hune' majan tu', lan̈an syeni tzet ye tinan̈; haxca hantaj ofrenda b'oj xahanb'al ẍ'a'lax tet Comam b'etu', machu ya'ni xewoj yanma anma ẍhak'en Comam yin̈ hactu'. 10Hunk'aan chejb'anil tu' yin̈n̈e tzet ẍlolaxi b'oj tzet ch'uc'laxi b'oj tzet chu sajn̈elax hunuj tzetet, ha' chala, yetn̈e co nimanil yeyi. Hunk'aan tu' x'ocnicoj masanto xhul stz'ayicalil b'ay shel Comam Dios hej tzetet. 11Yaja' tinan̈ xax hul Comam Cristo. Ha' Comam Swi'al Sacerdote yin̈ hunk'aan tzetet c'ul ch'ehojc'oj yin̈ stohb'alk'inal. X'octoj Comam munlaoj ju yul hune' b'ay yehob'al Comam Dios k'a' c'ul b'oj k'a' tz'ajan lahan yeyi, hune' tu' mataj anma xwatx'eni, mataj satyib'an̈k'inal ti' xwatx'i. 12Ha' yet x'octoj Comam Cristo yin̈ sat Comam Dios yin̈ huneln̈e, mataj schiq'uil no' caplaẍ b'oj no' niẍtej wacax xictoj Comam, to ha' caw schiq'uil Comam xictoj xa'ni xahanb'alil. Yin̈ huneln̈ecanoj x'apni yin̈ sat Comam Dios, yu st'in̈b'ancan co colb'anil mach stan̈b'al. 13Ta sajb'ican snimanil anma yu schiq'uil no' toro, no' caplaẍ b'oj stan̈il no' k'opo wacax ẍtiẍlaxcoj yib'an̈ anma, 14hajxam schiq'uil Comam Cristo to ha' sajn̈ecan janma yin̈ hej tzetet tx'oj ẍju chon̈ initoj yul camb'al. Yin̈ hactu' chu co hak'en Comam Dios itzitz. Ha' Comam Espíritu ay yin̈ stohb'alk'inal. Yu Comam Espíritu tu' xa' sb'a Comam Cristo xahanb'alil tet Comam Dios yin̈ mach ninoj xtx'ojal. 15Yuxin xt'in̈ican scab' lahc'ulal yu Comam Cristo, yun̈e schani mactaj awteb'il yu Comam Dios hantaj sc'ulal mach stan̈b'al halteb'il yu Comam. Haxca scamical Comam Cristo, xcolni anma yin̈ smul x'oc yul sk'ab' b'ab'el lahc'ulal. 16K'inaloj ay hune' testamento ẍwatx'i, ay tzet chaliloj ta yeli xax cam naj x'anicanoj. 17Haxca matzet chaliloj hune' testamento ta itzitzto naj watx'en̈e, han̈c'a ti' ta xax cam naj, wal tu' ayxa tzet chaliloj. 18Yuxin yet xt'in̈i b'ab'el lahc'ulal, xmaltoj chic'. 19Lawi yalniltij ya' Moisés hej mandamiento i'n̈e ley yin̈ sat con̈ob' israel, scalni ya' schiq'uil no' wacax b'oj no' caplaẍ xol ha' ha', slab'an ya' no' lana caj b'oj hune' te' hisopo xol chic' tu', stzihn̈icoj ya' yin̈ yumal lahc'ulal, b'oj yib'an̈ sunil anma. 20Xalni ya': Ha' ti' chic' ẍt'in̈b'ancan lahc'ulal schej Comam Dios heyijye'. 21Stzihnipaxcoj ya' chic' yin̈ yatut Comam, b'oj yin̈ sunil hej tzetet ch'ocnicoj b'ay ẍhak'elax Comam. 22Haca' yalni ley, etza sunil tzetet xtx'ahlocanoj yu chic'. Machu sb'ut'laxtan̈oj mule ta mach chic' ẍmaltoj. 23Ta yilal sajn̈elax hunk'aan yecheln̈e tzetet ay satcan̈ yu xahanb'al yet no' nok', hajxam hej tzetet caw yeli ay b'ay ay Comam Dios, ha' xahanb'al k'a' c'ul sajn̈eni. 24Yuxin mataj yul yatut Comam Dios watx'eb'il yu anma x'octoj Comam Cristo haxca hune' tu' yecheln̈e yatut Comam Dios yeyi, to ha' caw yin̈ sat Comam Dios x'apni Comam b'ay aycoj tzoteloj jin̈. 25Heb'naj swi'al sacerdote hununn̈etic'a hab'il yoctoj heb'naj yul hune' majan yetn̈e Comam yeyi, ib'il schiq'uil no' nok' yu naj, mataj caw schiq'uil naj chictoj. Wal Comam Cristo mach hayelta x'octoj Comam b'ay ay Comam Dios ya'a'coj sb'a xahanb'alil. 26Ta haca' xute heb'naj tu', hactu' xute Comam Cristo, tx'ihalmi el xax cam Comam yichotax yichitij satyib'an̈k'inal ti'. Yaja' machoj, to ha' yeyi to yin̈ slahub'al ti', ha' caw Comam xhul ya'a' camoj sb'a xahanb'alil yin̈ huneln̈e yu yiniloj co mul. 27Halb'ilcanoj ta huneln̈e ẍcam anma, lawitu' cat stij cuenta yin̈. 28Hactu' Comam Cristo huneln̈e xacoj sb'a xahanb'alil, yun̈e yiniloj smul tx'ihal anma. Yet chuluj Comam hunecxa, matxataj yu yiniloj smul anma chuli, to yu scolni mactaj ch'echman yuli.


Copyright
Learn More

will be added

X\