HEBREOS 8

1Ha' hune' caw yilal yin̈ huntek'an chijal ti' to ay hune' mac yahawil sacerdote jin̈, tz'on̈an yin̈ iswatx'k'ab Comam Dios yul satcan̈. 2Tinan̈ xin lan̈an istzotel Comam jin̈ yul yatut Comam Dios ay satcan̈, hune' n̈a tu' ha' caw Comam Dios watx'en̈e, mach anmahoj. 3Sunil ebnaj yahawil sacerdote ak'bil ismunil ebnaj yalten sabehal yeb xahanbal tet Comam Dios, hacpax tu' Comam Jesús yilaltic'a ay tzet chalte Comam tet Comam Dios. 4Ta aytoc'o Comam yul sat yiban̈k'inal ti' matxam yilalo chioc Comam sacerdotehal, yuto ay ebnaj sacerdote ak'bil ismunil yak'ni xahanbal haca' yalni isley naj Moisés. 5Ismunil ebnaj sacerdote yul yatut Comam Dios tu' yecheln̈e ye yin̈ tzettaj ay yul satcan̈. Caw johtaj tato yecheln̈e yehi yuto hayet yalan̈to maẍto chiswatx'e naj Moisés yatut Comam Dios, yalni Comam tet naj haca' ti': “Abe tzet chiwalti'an, caw haca' yechel inyehan tawet bey iswi' witz, hac tu' chawute,” ẍi Comam. 6Yaja' wal tinan̈ ayxaco Comam Jesús yin̈ hune' munil ec'bal isc'ulal sata ismunil ebnaj sacerdote, yuto ha' Comam chitzotel yin̈ anma tet Comam Dios yin̈ hune' iscab trato ec'bal isc'ulal sata hune' yet babelal. Hune' iscab trato tu' caw ec'bal isc'ulal chalte Comam Dios jet ik'bil yu. 7K'inalo ta can anma c'ulal yu hune' babel trato matxam yilalo yak' Comam hune' iscab trato ti'. 8Yaja' yil Comam Dios ta mach c'ulu elico huntek'an anma tu' yul sat, yuxin yalcano Comam yul Yum: Ha' Comam Dios Jahawil, chalni haca' ti': Chul hune' tiempohal bay chiwak'an hune' iscab trato tet anma Israel yeb tet anma Judá. 9Ha' hune' iscab trato ti' mach lahano yeb haca' hune' wak'an tet yichmam ebnaj yet winilojan yul tx'otx' Egipto, haca'tan̈e xin inxequiltijan ebnaj. Yaja' yu mach isyije ebnaj intratotu'an, yuxin inbejcanojan ebnaj. 10Ha' xin hune' trato chiwak'an tet anma Israel yin̈ tzujanilxa tu', ha' ton hune' ti': Chiwacojan inchejbanilan yin̈ isnabal ebnaj cat intz'ibn̈enicojan yin̈ yanma ebnaj. Haninan xin chinocan isDiosalo ebnaj cat yoc ebnaj incon̈obojan. 11Yin̈ hune' tiempohal tu', matxa yilalo chiscuy hunu mac yet con̈obal, maca hunu mac ayto yu isba yebi yu quinyohtan̈enan. Wal xin sunil mac chinohtan̈enan, sunil niẍte unin yeb ichamta anma. 12Chiwak'nicanojan nimanc'ulal yin̈ istx'ojal, matxa xin chinnatijan ismul, ẍi Comam. 13Hayet chalni Comam ac' yin̈ hune' iscab trato lan̈an yalni tato ichamxa hune' babel trato, yuto sunil tzet xaichambiloj chilahwi ismunil, hanic'xan̈e xin cat istan̈iloj.

will be added

X\