HEBREOS 8

1Ha' ti' k'a' yilal ye yin̈ hantaj xax jal ti', to ayxa hune' swi'al sacerdote caw ch'ocnicoj ju. Hat-xa tz'on̈an yin̈ swatx' Comam Dios satcan̈ 2b'ay cha' sacerdoteal yul yatut Comam. Hune' yatut tu' mataj anma ẍwatx'eni, to ha' caw Comam Jahaw watx'en̈e. 3Hantaj heb'naj swi'al sacerdote, ab'il ẍchejb'anil heb'naj yu ya'ni xahanb'al b'oj tzet sa anma tet Comam Dios, hactu' Comam Jesús yilal xa' xahanb'al. 4K'inaloj ta aytoc'oj Comam Jesús satyib'an̈k'inal ti', matxam cha' sacerdoteal, haxca ayxa heb'naj sacerdote ch'a'ni xahanb'al haca' yalni sley ya' Moisés. 5Yaja' heb'naj sacerdote tu', syeb'aniln̈e hej tzetet ay satcan̈ chu heb'naj, haxca yet toxa ch'ocoj ya' Moisés swatx'e hune' yatut Comam Dios, xalni Comam tet ya': Ab'e tzet ẍwal ti'an, haca' xu hin yeni tawet swi' witzan, hactu' chawute. 6Yaja' tinan̈, aycoj Comam Jesús yin̈ hune' chejb'anile ec'b'al yelapnoj ye sataj yet heb'naj sacerdote tu', haxca ha' Comam ẍhunb'ancoj anma yin̈ Comam Dios yu hune' scab' lahc'ulal, ec'b'al yelapnoj ye sataj hune' b'ab'el, haxca tzet x'eltoj yul sti' Comam Dios yin̈, k'a' c'ulto sataj hune'xa tu'. 7K'inaloj ta tz'ajan lahan ye hune' b'ab'el lahc'ulal tu', mach mi yeẍtooj saylax hunujxa shelel. 8Yaja' tacnaj sc'ul Comam Dios yu squewa'il heb'jetb'i aycoj yalan̈ hune' b'ab'el lahc'ulal tu', yuxin xala: Ch'apnoj stz'ayical b'ay chin watx'e' hune' scab' lahc'ulal b'oj anma ah Israelan b'oj anma ah Judá. 9Hune' scab' lahc'ulal ti', mat lahanoj ch'elojcoj b'oj hune' xin watx'e b'oj yichmam anma Israel tu'an yet xwiniloj b'et Egiptoan haca' to xecb'il anma tu' wuan. Haxca mach syijye hunk'aan tu' hin lahc'ulal xwa' b'ojan, yuxin xin tin̈chacanojan. 10Ha' lahc'ulal chin watx'e' b'oj anma ah Israel yet stzujanxa ti'an, to ẍwa'a'coj hin ley yul swi'an, b'oj chin tz'ib'n̈e'coj yin̈ yanmaan. Hayinn̈e chin ocoj sDiosojan, cat yocoj heb'naj hin con̈ob'ojan. 11Matxa yeẍtooj ta ay mac ẍcuynuj anma yu hunujxa yetcon̈ob', mato hunujxa mac ayto yu sb'a yin̈ hin yohtajn̈enan, haxca sunil anma chin ohtajn̈enojan, ch'ichitoj yin̈ niẍtej unin, masanto ch'apni yin̈ anma ichamxa. 12Ẍwa'a'can tan̈oj xtx'ojalan, matxa b'ak'in̈ chin nab'tij smulan. 13Yet chalni Comam scab' lahc'ulal, lan̈an yalni to xilxa hune' b'ab'el lahc'ulal tu'. B'aytet xilxa, scanxa yin̈tajiloj, hanic'xan̈e cat sc'ayojcaniloj.


Copyright
Learn More

will be added

X\