HEBREOS 7

1Ya' Melquisedec tu', rey ya' yul con̈ob' Salem yet payxa, b'oj sacerdote ya' yin̈ Comam Dios Ec'b'al Yib'an̈ Sunil Tzetet. Yet xmeltzo ya' jichmam Abraham sb'ey ya'noj howal, yet x'ay heb'naj can̈wan̈ rey yu ya', x'eltij ya' Melquisedec chawal yin̈ ya', xalniltoj ya' tzoti' c'ul yin̈ ya'. 2Xa'ni ya' Abraham tu', sdiezmoal hantaj xi' yin̈ howal tu' tet ya'. Hune' b'ihe Melquisedec, ha' chaliloj rey tohol ya'ni. Rey yet ak'anc'ulal pax ya', haxca rey ya' b'et Salem. Salem ak'anc'ulal chaliloj. 3Ya' Melquisedec tu', haca' ye Sc'ahol Comam Dios hactu' ye ya', sacerdote ya' yin̈ stohb'alk'inal. Ya' Melquisedec tu' mach b'ay ch'ilcha yul Yum Comam Dios mac smam smi ya', mac ay yic'al ye ya', b'ak'in̈ xpitzc'a ya', b'oj tzet xu scam ya'. 4Ilwej c'anab'i yin̈ hantaj smay ya' Melquisedec tu', yuxin hasta ya' jichmam Abraham tu' xa' ya' sdiezmoal hantaj xi' yin̈ howal tet ya'. 5Haca' yalni sley ya' Moisés, heb'naj sacerdote titnaj yin̈ yic'al ya' Leví, ẍtic'a sk'an heb'naj sdiezmoal hej tzetet ay tet hej yetcon̈ob', waxamca lahan ay yu sb'a heb'naj. Waxamca yic'al ya' Abraham ye heb'ya', yaja' xtic'a sk'an heb'naj diezmo tet hej yetcon̈ob'. 6Ya' Melquisedec mat yic'aloj ya' Leví ye ya', yaja' x'a'ot diezmo tet ya' yu ya' Abraham tu' yin̈ hantaj xi' yin̈ howal. Yet hunec tu' xaliltoj ya' Melquisedec tzoti' c'ul yin̈ ya' b'ay ya'najxa Comam Dios stzoti'. 7Ixtan̈ yeyi to naj ẍhalniltoj tzoti' c'ul yib'an̈ hunujxa maca, ec'b'al naj yib'an̈ naj b'ay chaliltoj tu'. 8Heb'naj yic'al ya' Leví ẍk'anni sdiezmoal tzetet tet anma, ẍtic'a cam heb'naj. Yaja' chal yum Comam Dios to ya' Melquisedec tu' itzitzto ya', ya' b'ay ya'naj ya' jichmam tu' diezmo. 9Hasta chu jalni ta heb'naj yic'al ya' Leví tu', heb'naj ẍto k'anni diezmo tet anma tinan̈, ha'hun heb'naj x'a'ni diezmo tet ya' Melquisedec yet xa'ni ya' jichmam tu' diezmo tu' tet ya'. 10Yin̈ caw st'in̈anil, yet x'eltoj ya' Melquisedec chawal yin̈ ya' jichmam tu', aytocoj ya' Isaac, smam icham ya' Leví tu' yin̈ snimanil ya' Abraham tu'. 11Ha' ley ẍchanaj hej jichmam, chij sb'a yul sk'ab' heb'naj sacerdote yic'al ya' Aarón xtit yin̈ ya' Leví. K'inaloj ta yu tzet chec'tze heb'naj tu' xu st'in̈k'ocoj anma yul sat Comam, matxam yeẍtooj ch'alaxcoj hune'xa sacerdote haca' ya' Melquisedec yu yoc shelb'aloj yic'al ya' Aarón. 12Ta ẍheli hunmajan sacerdote tu', yilal ẍheli sleyal tzet ye hej sacerdote chaltu'. 13Wal Comam Jesús lan̈an jalni ti', nantic'a ic'ale b'ay xtita. Yin̈ yic'al tu' mach hunuj mac xa' sacerdoteal. 14Haxca ohtajb'il yin̈ hab'an to Comam Jahaw Jesús, yin̈ yic'al ya' Judá elnaj, yaja' mach ninoj tzet xal sley ya' Moisés tu' ta chu yoc yic'al ya' Judá tu' sacerdoteal. 15K'a' hab'an co txumni to hune' ya' sacerdote xwayican̈ ti', k'a' nanto slow ye ya' sataj heb'naj x'ec'le payxa. Lahan ya' b'oj ya' Melquisedec mat haca'oj ya' Aarón ye ya'. 16X'oc ya' sacerdoteal, mat yuuj ley yet ic'ale yuxin x'oqui, to yu sk'inal ib'il yu, hune' k'inal machu stan̈iloj. 17Haxca chal Comam Dios yin̈ tzet ye Comam Jahaw tu': Hachti' sacerdote ach yin̈ stohb'alk'inal, haca' xu ya'ni ya' Melquisedec sacerdoteal. 18Yuxin hune' ley x'a'lax yalan̈to xcan yin̈tajiloj haxca mach yip, mach xc'oji ya'ni colb'anil. 19Haxca hune' ley tu', machu swatx'encoj anma, yuxin ay hune' tzet x'oc seleloj. Ha' hune' tu', k'a' c'ul scawxi co c'ul yin̈; chu co hitzicoj sc'atan̈ Comam Dios yu. 20Ha' hune' b'ay ẍcawxi co c'ul tu', ha' ta'web'il yu Comam Dios yin̈. 21Heb'naj sacerdote yic'al ya' Leví, mach hunuj tzet xta'we Comam yul sti' yet x'a'lax schejb'anil heb'naj. Wal yet x'a'lax schejb'anil Comam Jesús, ha' caw Comam Dios Jahaw xta'wen yul sti', haca' yalni Yum Comam: Ha' Comam xta'wen yul sti', matxa shec'a' tzet xala: Hachti' sacerdote ach yin̈ stohb'alk'inal, ẍi Comam, 22Yu hune' tu', scawxencanoj Comam Jesús scab' lahc'ulal ec'b'al sc'ulal sataj hune'xa b'ab'el lahc'ulal. 23B'oj hune'xa, heb'naj sacerdote x'ec'le yalan̈to, caw tx'ihal heb'naj x'ec'toj yin̈, haxca camb'eal ye heb'naj, yuxin mat huneln̈eoj xcan heb'naj yin̈ schejb'anil tu'. 24Yaja' wal Comam Jesús ch'ehc'oj yin̈ stohb'alk'inal, yuxin hune' schejb'anil yin̈ sacerdoteal tu' machu yec'toj tet hunujxa maca. 25Yuxin chu scolni Comam Jesús anma yin̈ stohb'alk'inal, hunk'aan mac ẍhitzicoj sc'atan̈ Comam Dios yu. Haxca itzitzn̈etic'a Comam Jesús, yuxin chu stzotel yin̈ anma tu' tet Comam Dios yin̈ stohb'alk'inal. 26Yuxin yin̈ caw st'in̈anil ha' Comam Jesús ti', swi'al sacerdote caw ch'ocnicoj ju, haxca sic'leb'il yu Comam Dios, mach ninoj xtx'ojal, mach ninoj smul, pohb'ililoj sb'a xol anma ahmul, b'oj han̈c'a ec'b'al yib'an̈ sunil tzet ay satcan̈. 27Heb'naj swi'al sacerdote masan yilal cha' heb'naj no' nok' xahanb'alil hunun tz'ayic, b'ab'el yu smul heb'naj, lawitu' yu smul anma. Yaja' mat hacojtu' xute Comam Jesús, haxca hunecn̈e xa' sb'a Comam xahanb'alil. 28Heb'naj x'a'lax smunil yoc swi'aloj sacerdote yu sley ya' Moisés mat tz'ajan lahanoj ye heb'naj. Yaja' lawi stan̈can smunil ley tu' sta'wencan Comam Dios yul sti' yanicoj hune'xa swi'al sacerdote. A hune' tu' ha' caw Sc'ahol Comam tz'ajan lahan ye yin̈ stohb'alk'inal.


Copyright
Learn More

will be added

X\