HEBREOS 7

1Naj Melquisedec tu', ha' naj isreyal con̈ob Salem yet payat tiempo, yeb xin issacerdote Comam caw aycano yip ye naj. Yet hunel xin yet isbeyc'o naj Abraham yin̈ hune' howal, isk'oji naj yin̈ huntek'an ebnaj rey. Haxa yet ismeltzo naj Abraham, yul chalaxo naj yul beh yu naj Melquisedec; isk'anni naj isc'ulal Comam Dios yiban̈ naj Abraham tu'. 2Yak'ni naj Abraham isdiezmohal sunil tzet yik' naj yin̈ howal tu' tet naj. Hune' bihe Melquisedec chal yelapnoj: Yahawil yin̈ caw istoholal, yeb xin Yahawil yin̈ ak'anc'ulal, yuto naj Melquisedec tu' yahaw con̈ob Salem ye naj, Salem chal yelapnoj: ak'anc'ulal. 3Naj Melquisedec tu' mach ohtabilo mac ismam naj yeb mac ismi' naj, yebpaxo mac yichmam naj. Machipaxo mac chalni yin̈ yet ispitzc'a naj yebpaxo yin̈ iscamical naj yuxin yechel yeco naj yin̈ Comam Jesucristo Isc'ahol Comam Dios, yuto machi isbi bak'in lahwi ismunil naj. 4Tinan̈ xin txumweloj ta caw niman yelapno ye naj Melquisedec tu', yuto ha' caw naj jichmam Abraham ak'ni isdiezmo tet naj yin̈ sunil tzet yik' naj yet isbey naj yin̈ howal. 5Haca' yalni isley naj Moisés, ebnaj sacerdote titna yin̈ naj Leví, ay yip ebnaj isk'anni tet yet con̈ob isdiezmohal yin̈ sunil tzet aya, waxan̈ca xin yuẍta isba ebnaj, yeb yichmam ebnaj ye naj Abraham. 6Yaja' wal naj Melquisedec tu', mach titnajo naj yin̈ naj Leví, yaja' yak' naj Abraham isdiezmo tet naj. Isk'annicano naj isc'ulal Comam Dios yiban̈ naj Abraham tu', naj bay yalte Comam Dios isc'ulal isc'ul. 7Caw johtaj tato naj chik'anni isc'ulal Comam Dios yiban̈ hunu maca, ec'bal yelapno naj yiban̈ hune' mac tu'. 8Ebnaj yuninal yuninal naj Leví k'anni isdiezmohal sunil tzet ye tu' tet yet con̈ob, ebnaj tu' le-camto ebnaj, yaja' wal naj Melquisedec xin chal Yum Comam Dios tato itzitzto naj, yuto machi bay chal yin̈ iscamical naj. 9Chu jalni tato ebnaj titna yin̈ naj Leví, ebnaj k'anni ch'en diezmo, ha' hun ebnaj ak'ni isdiezmo tet naj Melquisedec yet yak'ni naj Abraham isdiezmo. 10Yuto waxan̈ca maẍto naj Leví yul sat yiban̈k'inal ti' yet yul chahlaxo naj Abraham yu naj Melquisedec, yaja' ayxatic'a naj Leví yin̈ naj Abraham, yuto ichmame ye naj Abraham yin̈ naj Leví tu'. 11K'inalo tato yu ebnaj sacerdote levita watx'ico anma Israel yul sat Comam Dios yuto ha' ebnaj ak'ni ley tet con̈ob Israel, matxam yilalo oc hune'xa mac tzotelo yin̈ anma, hune' mac haca' naj Melquisedec mach haca'o naj Aarón, naj titna yin̈ naj Leví. 12Yuxin hayet chihellax hun majan ebnaj sacerdote, yilal ishellaxpaxo ley. 13Comam Jesucristo, Comam bay chitzotel hune' ti', mach yic'alo naj Leví ye Comam, walxinto yin̈ hunmajanxa ebnaj Israel bay tit Comam, yin̈ yic'al Comam tu' xin machi hunu mac oclena sacerdotehal. 14Caw johtaj tato Comam Jesucristo yin̈ naj Judá titna Comam, yaja' xin matzet yalcano naj Moisés tato ebnaj chitit yin̈ yuninal naj Judá tu' ay ebnaj chioc sacerdotehal xol anma Israel. 15Yin̈ hune' ti' caw habanto cotxumni ta hune' mac alaxico sacerdotehal jin̈, lahan yeb naj Melquisedec. 16Oc sacerdotehal yaja' maẍtaj yu hune' ley chalni tato yilal istit yin̈ hune' majan ic'ale, machoj, to yu yip isk'inal Comam mach istan̈bal. 17Yuto yal Comam Dios tet Comam Jesús: Hach ti' sacerdote, chachoc tzotelo yin̈ anma wetan yin̈ sunilbal tiempo haca' naj Melquisedec, ẍi Comam. 18Huntek'an chejbanile ak'lax yu naj Moisés yet yalan̈tocano tu' xalahwi ismunil yuto machi yip yeb xin matzet iswatx'e. 19Huntek'an chejbanile tu' machi hunu mac oc c'ulal yul sat Comam Dios yu, yaja' ay hune'xa caw c'ul occano seleloj, ha' ton Comam Jesucristo hune' ayco yipo janma, yu hune' tu' yuxin chon̈hitzico isc'atan̈ Comam Dios. 20Hune' ayco yipo janma ti', yak' binaho Comam Dios isbi yin̈ yet yaltencano Comam. Ebnaj sacerdote Israel mach yak' binaho Comam Dios isbi yet yak'laxcano ismunil ebnaj yu Comam. 21Wal Comam Jesucristo Jahawil yak' binaho Comam Dios isbi yet yak'nicano Comam ismunil Comam, haca' yalni yul Yum Comam Dios bay chala: Yak' binaho Comam Dios isbi, machi xin chishel isba tzet chala yet yalni haca' ti': “Hach ti' sacerdote hach, chachoc tzotelo yin̈ anma wetan yin̈ sunilbal tiempo, haca' naj Melquisedec,” ẍiayoj. 22Yuxin ha' Comam Jesús t'in̈bancano hune' iscab trato caw ec'bal c'ul sata hune' babel. 23Ebnaj sacerdote yet yalan̈tocano tu' machi yu iscancano ebnaj yin̈ ismunil yin̈ huneln̈e yuto chi-la-camto ebnaj, yuxin caw tx'i'al ebnaj ec'lena yin̈ hune' munil tu'. 24Walpaxo Comam Jesucristo machi bak'inal chicami, yuxin mach chiec'to ismunil tu' tet hunuxa maca, wal xin sacerdote Comam yin̈ sunilbal tiempo. 25Yuxin ch'ak' Comam colbanile mach istan̈bal tet macta chihitzico isc'atan̈ Comam Dios yu Comam Jesús. Ha' Comam xin chitzotel jin̈ tet Comam Dios yin̈ sunilbal tiempo yu mach chicam Comam. 26Ha' Comam Jesucristo tu' ha'n̈ech'an Comam chu yoc tzotelo jin̈ tet Comam Dios; yahawil sacerdote Comam, caw c'ulcano Comam, machi nino istx'ojal ayco yin̈, machi nich'ano ismul, pohbililo isba xol anma mulum. Ilaxto Comam isc'atan̈ Comam Dios satato satcan̈. 27Mach lahano Comam haca' ebnaj yahawil yin̈ ebnaj sacerdote, titna yin̈ yuninal naj Leví yuto ebnaj tu' hunun tz'ayic yalten ebnaj no nok' yin̈ xahanbalil. Yin̈ babelal chak' ebnaj isxahanbal yin̈ ismul, lahwi tu' cat yalten ebnaj xahanbal yin̈ ismul anma. Wal Comam Jesús hunelch'an yaco isba Comam xahanbalil yu comul. 28Ebnaj ak'lax ismunil yoc yahawil sacerdote yu isley naj Moisés masantic'a ay istx'ojal ebnaj, yaja' wal Isc'ahol Comam Dios, hune' mac bay yak' binaho Comam isbi yet yak'ni ismunil yoc yahawil sacerdote yet tzujanilxa, hune' mac tu' maẍtic'a nich'ano istx'ojal yin̈ sunilbal tiempo.

will be added

X\