HEBREOS 6

1- 2Yuxin tinan̈, ji'a'tij janma jin̈ co to co sataj, haxin̈wal ẍyihlanb'i co nab'al. Ay hunk'aan cuywab'al yin̈ yet Comam Cristo xco cuy yet b'ab'elal, haca'na hunk'aan ti': Co tin̈chacan tzetet x'initij camical jib'an̈, tzet chu ja'ni yuluj co c'ul yin̈ Comam Dios, yin̈ tzet chu ji'ni ha', tzet chu janicoj co k'ab' yin̈ swi' heb'ya' ẍchani hune' schejb'anil, tzet chu spitzc'aojcan̈ hej camom, b'oj yin̈ sya'tajil mach stan̈b'al. Yaja' tinan̈, matxa ẍco cayec'n̈e hunk'aan tu'. 3Stzujchaoj hune' co yihlan tu' ju, ta hactu' ch'el yin̈ sc'ul Comam. 4- 6Ay mac xaxtic'a scha' sajilk'inal yin̈ yanma, xax scha' sc'ulch'anil sc'ul Comam Dios xa' jet, xax scha' sc'ulal Comam Espíritu Santo yin̈, xax yab'le schi'al stzoti' Comam yin̈ yanma, yohtajxa scan̈il ye tzetet ẍto huluj. K'inaloj chiloj sb'a hune' mac tu' yin̈ Comam, ta hactu' snab'al, matxam chu smeltzolaxcoj yin̈ Comam hunecxa, haxca caw ẍiloj spixan Sc'ahol Comam yin̈ tx'ixwilal yin̈ sat anma, haca'tic'a lan̈an yanican̈ Comam yin̈ culus hunecxa. 7Yin̈ tx'otx'otx' ẍjiloj jet: Ha' cha'ni ha' n̈ab' sak'al ẍch'ib' tz'unub', ẍwa'oj naj ẍmunlan̈en tx'otx' b'oj stzala Comam yin̈ tx'otx'. 8Yaja' ta tx'ixn̈e te' ch'ahiloj sat tx'otx' b'oj howla telaj, matzet ch'oc tx'otx' yin̈ hactu', ch'elojtoj stz'acti' Comam Dios yib'an̈ tx'otx' cat sn̈uslaxojtoj tx'otx'. 9Hex caw xahan ay ju ti'an, waxan̈ca hactu' co tzotelan, yaja' ẍcawxi co c'ulan ta lahanex haca' tx'otx'otx' ay syaxil, ẍyenojiltoj sb'a teyin̈ to ayexcoj yin̈ sb'elal colb'anile. 10Haxca tohol yanma Comam, mach snahuln̈etoj Comam hej tzetet c'ul xeyu, xe yeni heyochen Comam yet quex colwa yin̈ heb'ya' yet-xa Comam, hune' ti' yehn̈e heyuni tinan̈. 11Han̈c'a ti' ẍjochean ta chilan hexn̈etic'a heyinitij heyanma teyin̈ hununex masanto chija'can sb'a hune' scawxob'al he c'ul ti'. 12Mach sje co c'ulan ta chex isab'i, to ẍjochean, ta chex ehojc'oj haca' ẍu yehc'oj heb'ya' ẍa' yuluj sc'ul yin̈ Comam x'ijcha sunil sya'tajil yu heb'ya' yuxin scha heb'ya' tzetet halteb'ilcan yu Comam. 13Yet xa'ni Comam stzoti' tet ya' Abraham, sb'ihtic'a Comam xawte yin̈, haxca mach hunujxa mac ec'b'al sataj Comam, yuxin hatic'a sb'ih Comam xawte yin̈. 14Xalni Comam: Yin̈ caw yeli caw tx'ihal sc'ulal hin c'ul ẍwa'a' tawetan, ẍwa'a' ch'ib'ojiloj sb'isil hawic'alan. 15Caw nahatil xtecha yu ya' Abraham yechmani, xto schani ya' tzet halteb'il yu Comam. 16Yet ẍjoche ja'a b'inaoj sb'ih hunuj anma yin̈ hunuj tzetet, sb'ih hunuj mac ec'b'alto co sataj, ha' ẍja' b'inaoj sb'ih. Yet ẍjoche ẍt'in̈ican hune' tzetet, sb'ih hunuj mac ec'b'al co sataj tu' ẍjawte jin̈, yun̈e matxa mac ay tzet stz'aj yala'. 17Yuxin xta'wecanoj Comam yin̈, haxca xoche syeb' tet mac b'ay xa' stzoti' to mach shec' tzet nab'il yu. 18Ha' cab' tzetet ti' mach shec' sb'a, haxca machu yanicoj Comam lek'ti'al. Ha' cab' tzetet ti', ha' stzoti' Comam xa'a, b'oj xta'wecanoj Comam yul sti'. Ha' tu' chon̈ iptzeni yun̈e scawxi co c'ul yin̈ tzet halteb'il jet yu Comam, hayon̈ xcon̈ hitzicoj yin̈ Comam yu hon̈ scolni. 19Haxca yu hune' scawxob'al co c'ul ti', slin̈b'a janma haca' hune' barco tzutancoj stzab'ob'al yul ha' mar. Hune' scawxob'al co c'ul ti' ayxaictoj yin̈ hune' mac xoctoj satajictoj k'ap cortina yictajb'al stemplo Comam Dios b'et satcan̈. 20Hactu' jeyi, haxca xb'ab'ictoj Comam Jesús co sataj yulictoj cortina yin̈ sat Comam Dios, haxca swi'al sacerdote ye Comam yin̈ stohb'alk'inal haca' xu ya' Melquisedec.


Copyright
Learn More

will be added

X\