HEBREOS 5

1Sunil heb'naj swi'al sacerdote, sic'leb'il xu heb'naj co xol, x'a'lax schejb'anil heb'naj stzotel jin̈ yin̈ sat Comam Dios, b'oj ya'ni heb'naj sab'eal b'oj xahanb'al tet Comam yu co mul. 2Haxca ha'hun heb'naj swi'al sacerdote tu', chu yay yin̈ hunuj xtx'ojal, yuxin niman sc'ul heb'naj jin̈ yin̈ co quewa'il xju yu co sucal. 3B'oj haxca ha'hun heb'naj yin̈ hune' tu', yilal yalten heb'naj xahanb'al yin̈ smul, haca' yalten heb'naj yu smul sunil con̈ob'. 4Mach hunuj mac ton̈c'a sti'n̈e sb'a chanicoj sb'a yin̈ hune' chejb'anil caw ay smay ti', to ha' Comam ch'awtencoj yin̈ hune' munil tu' haca' xu yalaxcoj ya' Aarón. 5Hactu' xa'le Comam Cristo, mat ton̈c'aoj sti'n̈e sb'a xanicoj sb'a swi'al sacerdoteal, to ha' caw Comam Dios x'a'ni hune' smay tu' yet xalni yin̈ hacti': Hachti' hach hin C'aholan; yin̈ hune' tz'ayic ti' xcach wa' ohtajn̈elaxojan to hach hin C'aholan. 6Ay hune'xa b'ay xal Comam: Hachti' sacerdote ach yin̈ stohb'alk'inal, haca' xu ya'ni ya' Melquisedec sacerdoteal yet payxa. 7Yet ayc'oj Comam Jesús satyib'an̈k'inal ti', xa' Comam yoración yin̈ caw ip, hasta x'ok'i yet sk'anni tet Comam Dios, Comam ay scan̈il ye scolni tet camical. X'ab'elax yoración Comam Jesús haxca ahay yin̈ ni'anb'ail yin̈ sat Comam Dios. 8Waxan̈ca Sc'ahol Comam Dios yeyi, yaja' yu sya'tajil xila', xohtajn̈eloj tzet caw chaliloj co yijyeni. 9Haxca tz'ajan x'utelaxi, stzujcha yu ya'ni colb'anil yin̈ stohb'alk'inal tet anma yijyom tet. 10Xanicoj Comam Sc'ahol tu' swi'al sacerdoteal, haca' xu ya'ni ya' Melquisedec sacerdoteal yet payxa. 11Yin̈ hune' tzet lan̈anto jalniloj ti' caw tx'ihalto tzet ay walni teyetan, han̈c'a ti' caw ya'taj hin tihniloj teyetan haxca lan̈o che txumu. 12Haca'xa heyichitij heya'ni yuluj he c'ul ti', yet aya cuywaom hexxa; yaja' haca' wilni ti'an, yocheb'al chexto cam cuylax yin̈ yichob'anil scuywab'al Comam Dios. Haca' niẍtej unin imeto i'n̈e, ẍto puk'lax yoch, hactotu' heyeyi. 13Mac maẍto ẍc'oji ẍtxumni yin̈ hej tzetet stoholal chu, haca'to niẍtej tz'ul unin imeto i'n̈e, hactu' heyeyi. 14Wal cuywab'al ya'taj co txumni, lahan b'oj hunuj ita slo yihla anma, yuxin mac xtxumcha hune' cuywab'al ti' yu, yihxa snab'al chaltu', haxca coc'n̈e snanitij yin̈ yanma, yuxin helanxa sic'leni b'aytet c'ul b'oj b'aytet tx'oj.


Copyright
Learn More

will be added

X\