1 Yuxin yak' isba chito haltelax joc yin̈ hune' xewilal chak' Comam Dios, hune' haltebilcano yu Comam, yuxin caw yilal cheyil heba, tajca ayex mach chexoc yin̈ hune' xewilal tu'. 2 Yuto hallaxpaxo Tzoti' yet colbanile jet haca' yu yallax tet ebnaj tu', yaja' xin matzet iswatx'e yin̈ ebnaj yet yaben ebnaj, yuto mach yaco yanma ebnaj yin̈. 3 Wal han̈on̈ xajayto yul janma yin̈ Comam chon̈oc yin̈ hune' xewilal chal Comam tu'. Yu chal yul Yum Comam haca' ti': Walan yin̈ inbihan yu inhowalan tato maẍtic'a chiocto huntek'an anma ti' yul hune' xewbal chiwak'an, ẍi Comam, ẍiayoj. Yin̈ caw yeli hataxtic'a yet iswatx'encano Comam Dios sat yiban̈k'inal ti' isxew Comam yin̈ ismunil, 4 yuto chal yul Yum Comam Dios yin̈ ishuj tz'ayic haca' ti': Xew Comam yin̈ ishuj tz'ayic yin̈ sunil tzet iswatx'e, ẍiayoj. 5 Chalnipaxo yul Yum Comam: Huntek'an anma ti' mach chiocto yin̈ hune' xewbal chiwak'an, ẍiayoj. 6 Yaja' yilal ayto mac chiocto yin̈ hune' xewilal tu' tinan̈, yuto tet ebnaj Israel bay babel hallax Tzoti' yet colbanile, yaja' mach octo ebnaj yin̈ hune' xewbal tu' yu isman̈c'omal. 7 Yuxin ay hune' tiempohal yebilcano yu Comam Dios, ha' ton hune' tiempohal bay ayon̈ ti' tinan̈. Payxatax halbilcano yin̈ hune' xewbal ti', yak'nipaxo Comam yala' naj David yul Yum Comam, bay chala: Tato cheyabe tzet chiwalan tinan̈ hanin heDiosal inti'an, mach hipo cheyute heba, ẍiayoj. 8 K'inalo ta oc ebnaj Israel yin̈ hune' xewbal tu' yu naj Josué machim tzotel Comam Dios yin̈ hune' tiempohal bay ayon̈ ti'. 9 Yuxin ay hune' xewbal chak' Comam tet macta yetxa Comam yehi. 10 Yuxin macta chiocto yul hune' xewbal chak' Comam ti' chixewcano yin̈ sunil ismunil, haca' yu isxew Comam yet lahwi iswatx'encano hune' yul sat yiban̈k'inal ti'. 11 Yuxin jak'aweco yin̈ coc'ul jocto yin̈ hune' xewbal chak' Comam, yun̈e machi hunujon̈ chicobeybaln̈e isbeybal ebnaj man̈c'om tu'. 12 Yuto Istzoti' Comam Dios caw itzitz sunil chisje yu, chik'axpon yul janma haca' hunu ch'en espada cabeb yeh. Istzoti' Comam tu' chiapni yin̈ janma yeb yin̈ conabal yeb yin̈ tzet jehi. Chisyenilo tzet chiec' yin̈ conabal yeb yin̈ janma, ta c'ul maca mach c'uloj. 13 Sunil tzet watx'ebil yu Comam Dios, machi hunu chu yeban isba sata Comam. Sunil tzet ye tu' haban ye yul sat Comam, Comam bay chijal tzettaj chicowatx'e. 14 Comam Jesús Isc'ahol Comam Dios, xameltzo satcan̈, ha' chitzotel jin̈ tet Comam Dios, yuto yahawil sacerdote ye Comam. Yuxin yilal colin̈ban coba yin̈ cuybanil bay ayco janma. 15 Wal Comam yahawil sacerdote tu' chu istz'ay isc'ul jin̈ yin̈ coya'tajil, yuto hayet yec' Comam yin̈ isnimanil coxol caw tx'i'al ilwebal hul yiban̈ haca' ej ilwebal chul jiban̈, yaja' machi bay yaco ismul Comam. 16 Yuxin yin̈ sunilojab janma chon̈hitzico isc'atan̈ Comam Dios Jahawil, Comam caw xahan ayon̈ yu, haxinwal chitz'aypaxo isc'ul jin̈ cat con̈iscolnilo yin̈ej isya'tajil chihul jin̈.
