HEBREOS 4

1Yuxin yak'b'en sb'a ẍto haltelax jet joc xewoj, nann̈e ju haxca taj ay hunujon̈ mach stzujcha hune' xewb'al tu' ju. 2Haxca x'al-lax tzoti' c'ul jet haca' xu yal-lax tet hej jichmam. Yaja' matzet xaliloj tet hej jichmam tu' haxca mach xacoj stzoti' tu' yin̈ yanma. 3Wal hayon̈ ẍja' yuluj co c'ul ti', chon̈ octoj xewoj yul hune' xewb'al chal Comam, b'ay chala: Yuxin yu hin howalan xwalnian: Hunk'aan anma ti', maẍtic'a b'ak'in̈ ch'ocojtoj b'ay ẍwa' xewoj walnian, quin chian. Yin̈ caw yeli xax tan̈can smunil Comam Dios yettax swatx'en satyib'an̈k'inal ti'; 4haxca chal Yum Comam: Yin̈ shuj tz'ayic, xew Comam yin̈ hantaj smunil xwatx'e. 5Chalnipaxoj: Hunk'aan anma ti', maẍtic'a ch'ocojtoj b'ay xwa' xewoj walnian. 6Yaja' heb'jetb'i b'ay b'ab'el x'a'lax tzoti' c'ul, mach octoj yin̈ hune' xewb'al xa' Comam tu', haxca sman̈c'o heb'jetb'i. Yaja' yilal ayto mac ch'ocojtoj b'ay hune' xewb'al tu', haca' xu yalni Comam. 7Yuxin ayto hune'xa stz'ayical b'ay chu yoc anma xewoj, ha' hun tu', ha' tinan̈. Haxca yet yalan̈to, halb'ilcan yu Comam tzet ye hune' tz'ayic xewb'al ti'. Xa'ni pax yala' ya' David haca' lan̈an walni ti'an, chalni ya': Ta cheyab'etoj tzet chal Comam tinan̈, macheya' cawb'oj heyanma. 8Yet xinitoj ya' Josué anma israel sat tx'otx' Canaán, mataj hune' tu' xewb'al chal Comam. Ta machoj, matxam stzote Comam yin̈ hune'xa tz'ayic xewb'al tinan̈. 9Yuxin ayto hune' xewb'al tet scon̈ob' Comam. 10Haxca mac ch'oc xewoj yin̈ Comam tinan̈, xew yin̈ sunil smunil, haca' xu xew Comam yin̈ shuj tz'ayic yet xtan̈can smunil yet swatx'en sunil hej tzetet. 11Yuxin ji'a'tij janma jin̈ joctoj yin̈ hune' xewb'al tu', yun̈e machon̈ chon̈ oc tzujnuj yin̈ swi'eal heb'jetb'i mach xyijyeni. 12Haxca stzoti' Comam Dios, itzitz yeyi b'oj ay scan̈il yeyi. K'a' sub'utaj sk'axpon sataj hune' ch'en espada ay yeh sataj b'oj yin̈taj. Sk'axpon yul hej co b'ajil, ha' yelapnoj yeyi, hasta caw ch'octoj yulictoj janma b'oj co pixan, syeniloj tzet nab'il ju b'oj tzet ib'il yu janma. 13Yin̈ hantaj tzet swatx'e Comam mach hunuj chu yeb'aniloj sb'a tet. Sunil mac hab'an yetij yin̈ sat Comam b'ay ẍjala'atij sunil tzetet. 14Ay hune' mac swi'al sacerdote jin̈ caw ay smay, x'ocapnoj yin̈ sat Comam Dios yu stzotel jin̈. Ha' hune' tu' ha' Comam Jesús Sc'ahol Comam Dios. Yuxin mach co b'ejcan hej tzetet b'ay ẍja' yuluj co c'ul. 15Haxca hune' swi'al sacerdote tu' chu stz'a' sc'ul jin̈ chon̈ snanitoj yin̈ soanil ja'ni, haxca yet x'ehc'oj yin̈ snimanil co xol ti', x'ilwelax yin̈ sunil ilweb'al yu naj matzwalil haca' ẍja'le ti', han̈c'a ti', mach syijye yanicoj smul. 16Yuxin sunil co c'ul chon̈ hitzicoj yin̈ sat Comam Jahaw chon̈ ocheni, yun̈e stzujcha sc'ulch'anil sc'ul ju, b'oj ẍcolwayi yet chul ilweb'al jin̈.


Copyright
Learn More

will be added

X\