HEBREOS 3

1Hex wuẍtaj hex wanab' hex yet-xa Comam Dios, haxca lahan awteb'ilon̈ yu Comam, yin̈n̈e Comam Jesús cheyacoj he yanma, Comam b'ab'el xpujb'anc'oj tzoti' b'ay ẍja' yuluj co c'ul, b'oj swi'al sacerdote jin̈. 2Yijyom xute sb'a Comam tet Comam Dios yin̈ hune' munil x'aot yub' haca' ya' Moisés. Yijyom xute sb'a ya' yijb'an hej yetcon̈ob' yuninalxa Comam Dios. 3Yaja' wal Comam Jesús, k'a' ec'b'al Comam sataj ya' Moisés, haca' hunuj naj aomcan̈ n̈ah tinan̈, ec'b'al naj sataj te' n̈ah chacan̈ tu'. 4Hunuj n̈ah tinan̈, yilal ay mac ch'anican̈. Hactu' ye sunil tzetet, Comam Dios xwatx'eni. 5Ya' Moisés chejab'n̈e ye ya', caw yijyom ya' yijb'an yetcon̈ob' yuninalxa Comam. Ha' smunil ya', ha' yalni ya' tet con̈ob' sunil tzetet ẍto hal-laxoj yu Comam. 6Wal Comam Cristo, Sc'ahol Comam Dios yeyi, caw yijyom chute sb'a hon̈ ya'ni cuenta hayon̈ hon̈ yuninalxa Comam Dios ti. Caw yuninalxa Comam jeyi ta sunil co c'ul lin̈anon̈ yin̈ hune' scawxob'al co c'ul yin̈ Comam yin̈ tzalalal. 7Yuxin jab'e' tzet chute Comam Espíritu Santo yalni yul Yum Comam Dios: Ta cheyab'e tzet ẍwal tinan̈, hayin he Dios ti'an, 8macheya' cawb'oj heyanma haca' xute heyichmam yet xpaq'uicoj win̈an, xquin yanicoj yin̈ ilweb'al yul tajin̈ witz ac'alan. 9Hat xquin yacoj heb'ya' heyichmam tu' yin̈ ilweb'alan, waxan̈ca xil heb'ya' tzetet c'ul xwu yulb'al cawinaj hab'ilan. 10Yuxin xtit hin howal yin̈ heb'ya'an, xwalnian: Nan b'ay chatoj hunk'aan anma ti' snab'al, maxtic'a sje sc'ul hin yohtajn̈elojan tzet wehan, quin chian. 11Yuxin yu hin howalan xwalnian: Hunk'aan anma ti', maẍtic'a b'ak'in̈ ch'ocojtoj b'ay ẍwa'a xewoj walnian, quin chian. 12Hex wuẍtaj hex wanab', nann̈e heyu taj ẍcawb'iloj heyanma, che b'ejnican heya'ni yuluj he c'ul, cheyiniloj he b'a yin̈ Comam Dios itzitz. 13To ha' heyet, hunun tz'ayic heya'ni yip heyetb'i yalan̈to maẍto sb'ejcan Comam stzotel teyet haca' yalni Yum Comam tu'. Mach hunujex cheya' sub'u he b'a he to yin̈ mule, cat scawb'iloj heyanma. 14Haxca ay joc yin̈ Comam Cristo, tan̈e lin̈anon̈ masanto chija' sb'a scawxob'al co c'ul b'ay xcon̈ ichitij. 15A'wej yip heyetb'i yak'b'en sb'a ẍto yala: Ta cheyab'e tzet ẍwal tinan̈ hayin hin he Diosal ti'an, macheya' cawb'oj heyanma haca' xute anma xpaq'uicoj win̈an. 16¿Mactaj xpaq'uicoj yin̈ Comam Dios heyalni, yet lawi yab'en tzet chal Comam? Tox mataj hunk'aan tu' xiloj ya' Moisés b'et Egipto xin. 17¿Mactaj yin̈ xtit showal Comam yulb'al cawinaj hab'il heyalni? Tox mataj yin̈ heb'jetb'i x'ec' b'ulna scam yul tajin̈ witz ac'al haxca xacoj smul yin̈ Comam. 18¿Mactaj yin̈ xal Comam ta mach ch'ocojtoj xewoj? To ha' mactaj mach xyijyen tzet chal Comam, ha' mach ch'ocojtoj. 19Hactu' chu co txumni to mach xu yoctoj heb'jetb'i xewoj, haxca mach xa' yuluj sc'ul yin̈ Comam.


Copyright
Learn More

will be added

X\