HEBREOS 3

1Yuxin hex wuẍtaj hex wanab, hex yet hexxa Comam Dios, awtebilex yu Comam yu heyoc yuninaloj. Caw cam cheyaco henabal yin̈ Comam Jesucristo, Comam chejbilti yu Comam Dios yeb chitzotel jin̈ tet Comam haca' hunu naj yahawil sacerdote, ha' yin̈ Comam tu' xin ayco janma. 2Comam Jesucristo tu' caw yijem yute isba tet Comam Dios yin̈ hune' ismunil ak'lax tet; hacpax tu' naj Moisés, caw yijem yute isba naj yin̈ ismunil ak'lax xol iscon̈ob Comam Dios. 3Yaja' Comam Jesús, ec'bal yelapno Comam sata naj Moisés tu'. Haca' hunu naj chianican̈ hunu te' n̈a, ec'bal yelapno naj yiban̈ te' n̈a chiswatx'e tu'. 4Haca' hunu te' n̈a tinan̈, yilaltic'a ay hunu mac chianican̈ te', hac tu' xin ye sunil tzettaj ye tu', ha' Comam Dios watx'en̈e. 5Hac tu' xin naj Moisés caw yijem yute isba naj ismunla xol iscon̈ob Comam Dios yuto ischejab Comam Dios ye naj. Ha' xin ismunil naj ha' yalni tet con̈ob yin̈ tzet chal Comam Dios. 6Wal Comam Jesucristo Isc'ahol Comam Dios yehi, caw yijem yin̈ ismunil yul yatut Comam Dios. Hune' yatut Comam tu' xin ha' ton han̈on̈ ti', yaja' ta t'in̈an iscawxi coc'ul yin̈ tzet ayco yipo janma yin̈ caw tzalahilal. 7Yuxin yal Comam Espíritu yul Yum Comam Dios haca' ti': Tato cheyabe tzet chiwalti'an hanin Dios inti'an, 8mach cheyak' cawxo heyanma haca' yu yoc anma man̈c'omal wetan bey tx'otx' desierto, quinyanicojan yin̈ ilwebal. 9Ha' bey tu' quinyacojan heyichmam yin̈ ilwebal, waxan̈ca yil ebnaj huntek'an isc'ulal inwatx'ehan yulbal cawina habil. 10Yuxin tit inhowalan yin̈ huntek'an anma tu', walnihan: “Nanantan̈etic'a bay chato huntek'an anma tu' isnabal, maẍtic'a chohtan̈elo inbehan,” quinchiyan. 11Walnihan yu inhowalan haca' ti': “Huntek'an anma ti' maẍtic'a chischah hune' xewilal chiwak'an,” quinchiyan, ẍi Comam yul Yum. 12Yuxin hex wuẍtaj hex wanab, caw cheyil heba, machojab hunujex cheyak' cawxolo heyanma, machojab hunujex chebej heyanico heyanma yin̈ Comam, cat heyinilo heba yin̈ Comam Dios itzitz. 13Wal xin hununojab tz'ayic heyiptzen heba hununex, yak' isba lan̈an istzotel Comam jet haca' yalni yul Yum, yun̈e machi hunujex chexsubcha yu mule cat iscawbilo heyanma. 14Yuxin ta lin̈anon̈ yin̈ sunilbal tiempo yin̈ tzet jaco yipo janma yet yalan̈tocanoj, ay comajul isc'atan̈ Comam Jesucristo. 15Yuto chal yul Yum Comam Dios: Tato cheyabe tzet chiwalan tinan̈ hanin heDiosal inti'an, mach cheyak' cawbolo heyanma haca' yute anma man̈c'on yin̈ tzet walan, ẍiayoj. 16¿Mac xin anmahil huntek'an ebnaj lahwi yaben Istzoti' Comam Dios isman̈c'on yin̈ tzet yal Comam tu'? Ha' ton ebnaj jet con̈ob Israel yilti naj Moisés yul con̈ob Egipto. 17¿Mac yin̈ xin tit ishowal Comam Dios yulbal cawina habil? Ha' ton huntek'an mac yaco ismul tet Comam bey tx'otx' desierto, iscamcano bey tu'. 18Yeb xin, ¿mac tet yak' binaho Comam isbi yet yalni tato mach chiocto yul hune' xewbal chak' Comam? Ha' ton tet macta man̈c'on yin̈ tzet yal Comam. 19Hac tu' chu cotxumni ta mach octo anma yin̈ hune' xewbal chak' Comam tu', yuto mach yayto ebnaj yul yanma yin̈ Comam.

will be added

X\