HEBREOS 2

1Hab'an chucanoj to ec'b'al Sc'ahol Comam sataj hej ángel, yuxin nann̈e ẍcan ju ẍco yijyen cuyb'anil x'a'ot jet ti', haxca taj ha' ẍjab'entij, nanxa b'ehal ib'il ju. 2Ha' stzoti' Comam Dios x'a'lax yala hej ángel yet payxa, caw st'in̈anil yeyi. Yuxin hantaj mac xman̈c'oni, x'a'ot ec'oj ya' yanma yin̈ haca' caw yeyi. 3Ta hactu' xu syijyelax hune' chejb'anil tu', hajxam tinan̈, tzic'anab' chu co colchayi ta ẍco nahuln̈e hune' tzoti' yet colb'anil caw ay yelapnoj ye ti'. Haxca ha' caw Comam Jahaw b'ab'el xhalni hune' tzoti' yet colb'anil ti', haxa heb'ya' x'ab'eni, haxa heb'ya' xcam t'in̈b'an yalni jet. 4Syenipax Comam st'in̈anil hune' tzoti' ti' yu hej c'ayb'alc'ule xu heb'ya' yu scan̈il ye Comam, b'oj yu hej tzetet x'a'lax yub' heb'ya' yu Comam Espíritu Santo, haca' x'el yin̈ sc'ul ya'ni. 5Mat yuluj sk'ab' hej ángel xacoj Comam Dios hunk'aan tzetet ẍto huhuj lan̈an co tzoten ti'an. 6Haxca ay hune' b'ay chal Yum Comam: ¿Tzet yelapnoj je hayon̈ anma hon̈ ti'an, yuxin chon̈ ha natijan? ¿Tzet yelapnoj jean yuxin chon̈ a b'isc'uln̈ean? 7Ayto mach'apni xcon̈ hawute hunip k'inanil sataj hej ángelan, yaja' xawahtoj co telan, xawanicoj smay co pixanan, 8sunil xawacoj yalan̈ co chejb'anilan. Yet chalni yin̈ hactu', mach hunuj ta mach xcan yalan̈ co chejb'anil. Yaja' maẍto chaliloj sb'a tinan̈ ta aycoj sunil yalan̈ co chejb'anil. 9Wal Comam Jesús chij sb'a yin̈. Comonaln̈e x'utelax hunip k'inanil sataj hej ángel, yaja' tinan̈ ab'ilxa smay spixan yu sya'tajil xila yet xcami, haxca yu sc'ulch'anil sc'ul Comam Dios xcam Comam Jesús yu sc'ulaloj jet co hunil. 10Ha' Comam Dios swatx'en sunil tzetet smayoj, xoche Comam ta Comam Jesús stz'ajb'ancan yu hej sya'tajil xila. Haxca yetwanoj Comam yinitoj tx'ihal anma schani scolb'anil yun̈e yoc yuninaloj Comam Dios cat yehc'oj yin̈ yeltich'anil ye Comam. 11Hantajon̈ ab'ilon̈xacoj yetoj Comam Dios, hune'xan̈e mac co Mam b'oj mac xcon̈ anicoj yetoj, yuxin Comam Jesús mach xtx'ixwi hon̈ yalni yuẍtajoj, b'oj yalni heb'ix ix yanab'oj. 12Hactu' yalni Yum Comam Dios yin̈ tzet xute yalni tet Comam: Chach hin tzote' tet hej wuẍtajan, wanab'an, chachin b'itn̈enoj xolan yet syamb'anoj sb'a. 13Ay hune'xa b'ay chalayoj: Yin̈ Comam Dios ẍcawxoj hin c'ulan. Ayto hune'xa b'ay chalayoj: Ayin b'eti' b'oj wuninal xa' Comam Dios wetan. 14Hayon̈ chon̈ oc yuninaloj Comam Dios, camb'eal ye hune' co nimanil ti'. Yuxin hactu' xa'le pax Comam Jesús x'ec' yi'a' hune' nimanile haca' co nimanil ti', yuxin yet xcami, sc'ayiloj scan̈il ye naj yahaw camical, ha' naj tu', naj matzwalil. 15Ha' yet yalan̈to, haca' sc'amte' naj matzwalil jeyi, haxca chon̈ xiw tet naj camical tu', yaja' Comam xcon̈ colnicanoj. 16Haxca mach xhul Comam colwaoj yin̈ hej ángel, to hayon̈ hon̈ yic'al ya' Abraham xhul hon̈ scolo'. 17Yuxin yilal x'ec' Comam Jesús yi'a' snimanil b'oj sunil tzet je hayon̈ hon̈ yuẍtajxa ti', yun̈e chu hon̈ snanitoj cat stzotel jin̈ haca' hune' naj swi'al sacerdote yijyom tet Comam Dios. X'ec' pax Comam yi'a' snimanil yun̈e chu ya'ni xahanb'al ch'a'ni tan̈oj co mul co hunil. 18Haxca ha' caw Comam x'ec' ya' yanma yilwelax yu naj matzwalil, yuxin chu scolwa jin̈ yet chul ilweb'al jin̈ yu naj.


Copyright
Learn More

will be added

X\