HEBREOS 13

1Mach co nahuln̈etoj jochen heb'ya' jetb'i, haxca juẍtaj janab'xa heb'ya'. 2Mat chuntaloj ẍjute co b'a yet chul anma co c'atan̈, haxca mat johtajoj mac ch'ec' co c'atan̈. Ay mac xchani hej ángeles, yaja' mat yohtajoj ta ángeles ch'ec' sc'atan̈. 3Colwaojon̈ yin̈ mactaj ayictoj yul presu, hacojtam hayon̈ hun ayon̈ictoj. Colwaojon̈ pax yin̈ mactaj ch'a'lax ec'oj ya' yanma, haxca ay co nimanil chu yec'pax ya'. 4Johtajn̈e'loj to c'ul mohilal; co yijye' haca' caw yeyi, haxca chi'a'tij Comam Dios cuenta yin̈ mactaj ch'ixli, mactaj ẍsayni swinaj. 5Mach ẍjute pek'melyual. Tzalajon̈ yin̈ tzet ayon̈, haxca chal Comam Dios: Mach b'ak'in̈ chex hin tin̈cha'canan, machca b'ak'in̈ chex hin nahuln̈e'tojan. 6Yuxin sunil co c'ul ẍjalni:Ha' Comam Jahaw chul hon̈ colnoj, machon̈ xiw tet mac chal hon̈ etanoj. 7Co nab'tij mactaj con̈ ijb'ani b'oj x'a'ni stzoti' Comam Dios jet. Ji'a'loj jet yin̈ tzet x'elicoj heb'ya' yin̈ sk'inal, cat joc tzujnuj yin̈ tzet xu yehc'oj heb'ya' yin̈ ya'ni yuluj sc'ul yin̈ Comam. 8Haca' ye Comam Jesucristo yet x'ec'can tu', hactu' ye tinan̈, b'oj hactu' yehojc'oj stohb'alk'inal. 9Mach ja' i'a'toj co b'a tet hunmajanxa cuywab'al nan yeyi. K'a' c'ul ta ẍco lin̈b'a janma yin̈ sc'ulch'anil sc'ul Comam Dios, sataj scawxi co c'ul yin̈ cuywab'al ch'aot yin̈ tzet ẍco lo, haxca hunk'aan cuywab'al tu' matzet cha' jet. 10Wal hayon̈ ti', nantic'a ye hune' co xahanb'al. Ha' heb'naj sacerdote xmunla yul yatut Comam haca' yalni sley ya' Moisés machu sloni heb'naj hune' xahanb'al ti'. 11Naj swi'al sacerdote, ta chactoj naj schiq'uil no' nok' yul hune' majan yetn̈e Comam yeyi yu stan̈ smul anma, machu sc'uxni naj schib'eal no', to ẍn̈uslaxtoj yin̈taj con̈ob'. 12Yuxin hactu' xa'le Comam Jesús, hat xcam Comam yin̈taj con̈ob' Jerusalén yun̈e sajn̈encan yanma anma yu schiq'uil. 13Yuxin ton̈wej yin̈ Comam yin̈taj con̈ob'. Ha' ch'aliloj hune' ti' to chon̈ to yin̈ Comam yun̈e hayon̈ hun ẍjil tx'ixwilal yin̈. 14Haxca satyib'an̈k'inal ti' mach co con̈ob' ch'ehc'oj stohb'alk'inal, to yin̈ hune' con̈ob' ẍto huluj, hat aytoj janma. 15Yuxin ja'a'coj smay Comam Dios stohb'alk'inal yu Comam Jesucristo. Ha' co xahanb'al ẍja' tet Comam ha' tzetet c'ul ẍjal tet Comam yet ẍhalni ta ha' Yahaw ye jin̈. 16Mach co nahuln̈etoj juni tzetet c'ul, ja'a' tz'aojtoj anma yin̈ tzet ayon̈, haxca ha' hune' tu' xahanb'al choche Comam ta ẍja' tet. 17Co yijye' juni tzet chal heb'ya' chon̈ ijb'ani, haxca heb'ya' ch'ilni tzet ye janma, b'oj ẍta'woj heb'ya' tet Comam yin̈ tzet chon̈ elojcoj. Yuxin c'ul ẍjute co b'a yun̈e tzalalal chu sta'woj heb'ya' jin̈ mat yin̈oj b'isc'ulal, haxca ta machoj, matzet c'ul ẍco chab'. 18Txahlan̈wej jin̈an, saj co sat ẍjab'ean, haxca ẍjochean ta c'uln̈etic'a co b'elwi yin̈ sunilan. 19Ha' ti' k'a' ẍwochean, ta che k'an tet Comam yin̈ heyoración ta chal sc'ul Comam chin apni hex wila' yin̈ lemb'ilan. 20Comam Dios a'om ak'anc'ulal, xpitzc'ancan̈ Jahaw Jesús xol hej camom, Comam Jesús stan̈eomal jet caw ay yelapnoj yeyi, xtin̈b'ancan lahc'ulal mach stan̈b'al yu schiq'uil. 21Ya'ab' Comam Dios sunil sc'ulal teyet yun̈e heyuni b'aytet chal sc'ul Comam, cat hex swatx'eniloj Comam haca' choche yu Comam Jesucristo. A'laxojab' smay Comam yin̈ stohb'alk'inal. Amén. 22Hex wuẍtaj hex wanab', niman cheyute he c'ul haxca c'otzan xwute yoj hune' wum ti'an chex wiptzenan. 23Ẍwal teyetan ta ya' juẍtaj Timoteo xax colchaltij ya'. Ta pet chul ya' ẍwi'a'toj ya' win̈an yet chin toj hex wilnojan. 24A'wej scawil sc'ul heb'ya' chex ijb'ani, b'oj sunil heb'ya' jetb'i yet-xa Comam. Chapaxtoj heb'ya' ay Italia ti' scawil he c'ul. 25Ya'ab' Comam Dios sc'ulch'anil sc'ul teyet te hunil.


Copyright
Learn More

will be added

X\