HEBREOS 12

1Yuxin cotxumuloj ta haca' hoybilon̈ yu sunil macta yayto yul yanma yin̈ Comam Dios, yuxin cobeja'wecano sunil tzet chon̈etantoj yeb mule chon̈ak'ni ayc'ayoj; cat jak'ni janma colahnico yin̈ hune' an̈e bay ayon̈icoj. 2Jak'aweco conabal yin̈ Comam Jesús, yuto ha' Comam ak'ni pitzc'aho janayto yul janma yin̈ Comam Dios, ha' Comam xin chitz'ajbancanoj. Yaco isba Comam yul isk'ab camical yin̈ te' culus, machi xin yoc yin̈ waxan̈ca caw tx'ixobal hune' camical tu', yuto yohta Comam ta lahwi yec'ya' yanma tu' cat ischahni tzalahilal. Tinan̈ xin tz'on̈an Comam yin̈ iswatx'k'ab Comam Dios. 3Yuxin txumwe yin̈ tzet yu yak'ni techaho Comam Jesús isya'tajil yu anma mulum, haxinwal mach chitibayo heyu yeb xin mach chexpax teyintaj. 4Waxan̈ca ayco ip heyu hek'oji yin̈ istx'ojal, yaja' maẍto hunujex ti' cheyabe isya'il camical. 5Yaja' xin xato nahul heyu yin̈ tzet chal Comam Dios jet yul Yum han̈on̈ con̈yuninal, bay chala: C'ahol, machojab chiscaj hawi' yet chachiscuyni Comam Dios Jahawil. Machojab xin chaẍmeltzo tawintaj yet chaẍiscachni Comam. 6Yuto ha' mac xahan ay yu Comam chaco Comam yin̈ istoholal. Haxa mac chischah Comam yuninaloj chayo Comam isya'tajil yiban̈ yu iscuychahi, ẍi yul Yum Comam. 7Chahwe isya'tajil chati Comam Dios teyiban̈ yu hecuychahi, yuto quexyuninalxa Comam yuxin hac tu' chexyute. ¿Tom ay hunu naj c'ahole ti' mach chicuylax yu ismam? 8Yaja' ta mach chayo Comam isya'tajil yu hecuychahi haca' chu Comam yin̈ macta yuninalxa, chal yelapno chal tu' ta mach quexyuninaloj, lahanex haca' niẍte unin machi ismam. 9Conabawetij haca' yet niẍte uninon̈ ak'lax cocachbanil yu comam yeb yu comi' caw xin jabe yin̈ tzet yala, ¿hatom xin tzet chal Comam Dios ay yul satcan̈, mach chicoyije yun̈e cochahni cok'inal? 10Comam comi' tu' con̈iscach hanic' tiempohal haca' yoche isc'ul, hajxam Comam Dios chon̈iscach Comam yu isc'ulalo jin̈, yun̈e jelcanico haca' Comam, Comam machi nino istx'ojal yin̈. 11Yin̈ caw yeli yet chihul isya'tajil jiban̈ yu cocuychahi, mach chitzala coc'ul yet chihul jiban̈, walxinto bisc'ulal chulo coc'ul, yaja' lahwi tu' chak'ni istoholal jet yeb ak'anc'ulal macon̈ bay chialaxayo isya'tajil tu'. 12Walex haca'tan̈e paxna yip hek'ab yeb heyoj, ak'we heyanma yoc yip hek'ab yeb heyoj tu'. 13Saywelo hune' beybale caw tohol haxinwal chian̈cha heyoj, hac tu' xin matxa caw chiahcan̈ iscotxk'ahi. 14Aweco yin̈ hec'ul heyec' yin̈ ak'anc'ulal yeb sunil anma, machojab chebeybaln̈e istx'ojal, yuto ha' mac chibeybaln̈en istx'ojal mach chiyil yin̈ Comam Dios. 15Caw cheyil heba, tajca ayex chebej hechahni isc'ulch'anil isc'ul Comam Dios chak' jet, yuto ta hac tu' tx'i'al mac chietaxto heyu, lahan haca' te' howla telaj chicam anma yu. 16Machojab hunujex ti' chexec' yin̈ ixloj, yeb xin machojab hunujex cheyah isc'ulal chak' Comam Dios teyet haca' yute naj Esaú; ishelto naj issabehal yet babel c'ahole yin̈ hune' sec' itah. 17Caw heyohtaj ta haxa yet tzujanilxa yet yochen naj ischab ismajul yeb isc'ulal Comam Dios, haca' chiak'lax tet ebnaj babel c'ahole, matxa ak'lax tet naj, waxan̈ca caw ok' naj sic'lebil, yaja' matxa tzet tz'aj yute' isba naj. 18Hex ti' mach hitzanojexico yin̈ hunu tzet ye tu' chisje cotzabni, haca' yu ishitzico ebnaj jichmam Israel yin̈ witz Sinaí, hune' witz bay caw ah xaj k'a k'a' yin̈, bay caw k'ejholiloj yeb bay caw n̈irla c'uh. 19Machi xin heyabe yok' ch'en trompeta yeb istzotelpaxo Comam Dios. Hayet yaben ebnaj istzotel Comam tu', yalni ebnaj ta matxa chitzotel Comam, 20yuto machi techa hune' chejbanile yu ebnaj, hune' chalni haca' ti': “Tato ay hunu mac chayo yoj yiban̈ witz ti' maca hunu no nok', yilal isk'ojlaxcamoj maca chitejlaxcamo yu ch'en lanza,” ẍi. 21Caw xiwquilta tzet yil ebnaj tu', yuxin ha' hun naj Moisés halni haca' ti': “Caw chinluyluncan̈an yu xiwquilal,” ẍi naj. 22Walex ti' xaquexhitzico yin̈ witz Sión, ha' iscon̈ob Comam Dios itzitz, ha' ton hune' Jerusalén ay satcan̈. Xaquexhitzico isc'atan̈ ismilal ebnaj ángel cutxanico yanico ismay Comam Dios, 23yeb isc'atan̈ macta babel yuninal Comam Dios tz'ibn̈ebil isbi yul satcan̈. Xaquexhitzico isc'atan̈ Comam Dios, Comam juez yeco yin̈ sunil anma, yeb bay ay yanma anma c'ulxa yeb tz'ajanxa ye yu Comam Dios. 24Xaquexhitzico yin̈ Comam Jesús, Comam watx'en̈eyo iscab trato Comam Dios. Ha' ischiq'uil Comam Jesús tu' con̈sajn̈en yin̈ comul, ha' chik'anni nimanc'ulal jin̈ tet Comam Dios. Mach haca'ho ischiq'uil naj Abel, to ha' yanayo Comam isya'tajil yiban̈ mac potx'ni naj, ha' isk'ana. 25Yuxin nann̈e heyu tajca cheman̈c'oto Comam Dios chitzotel jet, yuto ta huntek'an mac man̈c'onto Comam Dios yet istzotel tet sat tx'o tx'otx' ti' mach colchahi, ¿ha' tom xin han̈on̈ chon̈colchahi ta chicoman̈c'oto Comam Dios chitzotel jet yul satcan̈? Machoj. 26Yet istzotel Comam Dios yet payxa tu' caw bili tx'o tx'otx', yaja' tinan̈ xin chal Comam haca' ti': “Hunelxan̈ech'an chintzotelan maẍn̈etaj xin tx'o tx'otx' ti' chiwak'bilojan, wal xin ha' hun satcan̈ chibilipaxoj,” ẍi Comam. 27Hayet chalni Comam, hunelxan̈ech'an, chal yelapnoj tato huntek'an tzet chu ishec'lax yul yehobal watx'ebil yu Comam Dios, chihec'laxiloj cat istan̈tzelaxiloj, yun̈e iscancano huntek'an tzet mach chu ishec'laxi. 28Hac tu' tzet ak'bil jet yu Comam Dios, hune' yet joc yul isk'ab, mach chu ishec'laxi. Yuxin jak'awe yuch'andiosal tet Comam Dios yin̈ hune' tu', cat jinayo coba tet Comam yin̈ sunil janma, haca' caw choche Comam. Xiwojon̈wepaxo tet Comam. 29Yuto Comam Dios lahan haca' k'a k'a' chisje istan̈ilo sunil tzet ye tu' yu.

will be added

X\