HEBREOS 12

1Sunil hantaj heb'ya' xb'inah ti' aycoj heb'ya' co hoyanil, ha' heb'ya' xyeni scawxob'al sc'ul yin̈ Comam Dios jet. Yuxin ji'a'tij janma jin̈ yin̈ hantajto co k'inal ẍto jila'. Yilal co b'ejnicanoj janicoj co mul cat janicanoj hantaj tzetet ch'iniloj scawxob'al co c'ul yin̈ Comam Dios. Haxca co k'inal lahan haca' hune' an̈ewoj. Mule xin, ha' chon̈ c'alniayoj, yuxin machu jan̈ewi. 2Yin̈ Comam Jesús ẍjacoj janma, Comam x'a'ni ja'a' yuluj co c'ul yin̈ b'oj chon̈ stz'ajb'ancan yin̈. Maẍtic'a snane Comam scam yin̈ culus waxan̈ca caw tx'ixwilal hune' camical tu', haxca yohtaj Comam ta lawi yec'ojiloj ya' yanma, ch'ehojc'oj yin̈ tzalalal. Tz'on̈an Comam tinan̈ yin̈ swatx' Comam Dios. 3Tijab' yin̈ he c'ul tzet xu stecha sya'tajil yu Comam Jesús yul sk'ab' anma tx'oj, yun̈e mach ẍtib'ay heyu, machca chex pax teyin̈taj. 4Waxan̈ca yeli lan̈an he lichlen he b'a b'oj xtx'ojal, yaja' maẍto hunujex cheyab'e sya'il co cami. 5Tinan̈ mache nahuln̈etoj tzet chal Comam Dios jet, chon̈ yiptzen haca' hune' mame stzotel tet yuninal. Chalni Yum Comam: C'ahol, ab'etoj tzet chal Comam Jahaw yet chach scuyni, machca chach pax tawin̈taj yet chach smayni. 6Haxca stoholb'an̈e Comam Jahaw mac xahan ay yu, cha'ni Comam tz'um yija' mac xax scha yuninaloj. 7Co chab' sya'tajil chatij Comam jib'an̈ co cuyb'aniloj, haxca haca' uninale chon̈ yute Comam. ¿Tom ay hunuj naj mame mach scuy yuninal? 8Haxca ta macha' Comam co cuyb'anil haca' chu ya'ni tet mac yuninalxa, mat mi hon̈ yuninaloj Comam, to haca'n̈em comon anma jeyi. 9Tijab' pax yin̈ co c'ul, yet niẍtejon̈to xcon̈ scuy co mam co mi', xa'ni tz'um jija' co cuyb'aniloj, yaja' yehn̈e co nanon tet. Hajxam Comam ay satcan̈: ¿Tox mach ẍco chab' co cuyb'anil cha' Comam jet, yun̈e co chani co k'inal? 10Co mam co mi' tu', hanic'ch'ann̈e xcon̈ scuyu' haca' chal sc'ul, hajxam Comam Dios chon̈ stoholb'an̈e Comam yin̈ b'aytet caw sc'ulaloj jet yun̈e haca' sc'ulal Comam, hactu' chon̈ elojc'oj. 11Yin̈ caw yeli mach scha co wi' yet lan̈an ya'lax co cuyb'anil haxca ya' ch'oc ẍjab'e, yaja' ta ẍco cha co cuyb'anil, chon̈ k'ayiloj juni stoholal b'oj chon̈ ehc'oj yin̈ ak'anc'ulal. 12Yuxin hex paxnaj heyip, haca' siquinajxa he k'ab' b'oj he witx'i', awejcoj yip. 13Saywej b'eh tohol, yun̈e mac haca' tx'oj ye yoj, ẍwatx'oj, matxa ẍcam cotxk'atoj. 14Ja'a' yilal jehc'oj yin̈ ak'anc'ulal xol anma. Ja'a' pax yilal jehc'oj haca' mac ab'ilxacoj sb'a tet Comam Jahaw, haxca ta machoj, maẍtic'a b'ak'in̈ ẍjila' yin̈ Comam. 15Nann̈e ju taj ay hunuj hon̈ ẍco pohiloj co b'a yin̈ sc'ulal sc'ul Comam, mach hunuj hon̈ ẍjetatoj co b'a, taj haca' howla telaj ẍjuluj, cat co tzujb'antoj tx'ihal anma. 16Mach hunuj hon̈ chon̈ to yin̈ ixloj maca sayni heb'ix ix swinaj, matca comonaln̈e ye hej tzetet yet Comam yul co sat, haxca hactu' xa'le naj Esaú. Yun̈e mach'ijcha n̈ohchalal yu naj, yuxin xatoj naj tzetet yet ay ẍchani b'ab'el uninale yu hune' pulato ita. 17Haxa yet schani naj tzoti' c'ul yib'an̈ tet smam yalni, xax can naj yin̈tajiloj. Ch'ok' naj, schilb'an naj sk'anni tet smam, yaja' matxa yan̈al. 18Hayon̈ ti' mat lahanoj ẍjute haca' xa'le heb'ya' jichmam yet payxa. Xb'ey heb'ya' switzal Sinaí. Hune' witz tu' chu co tzab'ni. Hune' witz tu' caw ẍchaw k'a' yin̈, xk'ejtxuk'iloj hanic', b'oj ch'ec' tz'ito c'uh xol asun. 19Xab'en heb'ya' yok' ch'en trompeta b'oj stzotel Comam. Yet xab'en heb'ya' tzoti' tu', sk'anni heb'ya' ta matxa stzotel Comam tet heb'ya'. 20Xal heb'ya' hune' tu' haxca mach xtecha chejb'anile xhalot tet heb'ya', chalni: Mac chul lin̈noj yin̈ sc'ul hune' witz ti', ẍc'ojlaxcamoj, mach yoc yin̈ maca, waxan̈ca hunuj no' nok'. 21Caw nimej xiwquilal hune' tu', hasta ya' Moisés xal ya': Xan̈e chin c'uyc'un xiwquilalan. 22- 23Yaja' walon̈ mat hacoj tu' ẍja'le, to sc'atan̈ switzal Sión b'ay ay scon̈ob' Comam Dios itzitz, hat scon̈ hitzicoj. Ha' hune' switzal Sión tu' ha' hune' Jerusalén ay satcan̈, b'ay ay hej ángel matxa chu jalni hantaj sb'isil yamancoj yin̈ tzalalal b'oj mactaj yuninal Comam tz'ib'n̈eb'ilxa sb'ih b'et satcan̈. Chon̈ hitzpaxcoj sc'atan̈ Comam sJuezal sunil anma b'oj sc'atan̈ spixan mactaj c'ulxa, tz'ajanxa ye yu scan̈il ye Comam. 24Chon̈ hitzpaxcoj sc'atan̈ Comam Jesús x'a'ni yija' sb'a scab' lahc'ulal yu schiq'uil xcon̈ tx'ahni, hune' chic' ẍk'anni nimanc'ulal jin̈, mat haca'oj schiq'uil ya' Abel xk'anni ta ẍpajni Comam Dios. 25Yuxin nann̈e ju co majchen co txiquin tet tzetet chal Comam jet. Haxca heb'ya' jichmam swi'en̈e sb'a heb'ya', smajchen heb'ya' xtxiquin yet lan̈an ya'ni Comam scuyb'anil sat tx'otx'otx' ti', mach x'ec'toj yet scam heb'ya'. Hajxam hayon̈, mach mi chon̈ colchaoj ta ẍjin̈tajn̈e stzoti' Comam stzoteltij jet b'ay satcan̈. 26Yet stzotel Comam payxa, caw xb'ili tx'otx'otx', yaja' chal Comam tinan̈: Hunecxan̈e chin b'ile'an, yaja' matn̈etaj tx'otx'otx', to sunil yib'an̈k'inal ẍb'iloj. 27Yet chalni Comam “hunecxan̈e”, ha' chaliloj ta ch'eloj hantaj tzet ec'omn̈e ye watx'eb'il yu Comam, cat scanoj tzet machu shec'laxi. 28Hune' con̈ob' cha'a Comam jet machu shec'laxi, yuxin ja'a'wej yuch'antioẍ tet Comam. Chon̈ nanon tet Comam chon̈ ay ni'anb'ail, ẍco hak'en haca' choche, 29haxca co Diosal ti' lahan b'oj hune' k'a' k'a' ẍtan̈tzeniloj tzetet.


Copyright
Learn More

will be added

X\