HEBREOS 11

1Ha' ja'ni yuluj co c'ul yin̈ Comam Dios chaliloj to ẍcawxi co c'ul ta ẍco chab' tzet ẍjechmac'oj, to t'in̈an jecoj ta hune' tzet maẍto ẍjil yin̈ aya. 2C'ul yalni Comam yin̈ heb'ya' jichmam haxca xa' heb'ya' yuluj sc'ul yin̈ Comam. 3Ẍja' yuluj co c'ul yin̈ tzet chal Comam yuxin johtaj to xwatx'i yib'an̈k'inal b'oj satyib'an̈k'inal yu stzoti' Comam. Sunil hej tzetet ẍjil ti' matzet yin̈ b'ay x'eli. 4Yu ya'ni ya' Abel yuluj sc'ul yin̈ Comam xa' ya' xahanb'al k'a' c'ul tet Comam sataj xahanb'al xa' naj Caín. Xal Comam ta xcan ya' c'ulal yul sat, haxca scha Comam tzet xa' ya'. Yuxin waxan̈ca xcam ya', haca'to ha' ya' yehn̈e stzotel jet tinan̈ haxca ya'naj ya' yuluj sc'ul yin̈ Comam. 5Yu ya'ni ya' Enoc yuluj sc'ul yin̈ Comam, mach scam ya'. Itzitz ya' x'iottoj ya' yu Comam, yuxin matxa x'ilot ya' yu anma. Chal Yum Comam ta yet aytoc'oj ya' caw stzala Comam yin̈ ya'. 6Ta mach ẍja' yuluj co c'ul yin̈ Comam, mach stzala Comam jin̈, haxca ta ẍjoche chon̈ hitzicoj sc'atan̈ Comam, yilal ẍja' yuluj co c'ul to yeli aya, cha' Comam spaj jet mactajon̈ chon̈ hitzicoj sc'atan̈. 7Xa' ya' Noé yuluj sc'ul yin̈ tzet xal Comam, yuxin yet xalni Comam ta ay huchan matto ohtajb'iloj chuluj yib'an̈ anma, syijyen ya' tzet xal Comam, x'oc ya' swatx'enoj te' barco b'ay ẍcolchaoj ya' b'oj sfamilia haxca xiw ya' tet Comam. Yu syijyomal ya' tu', ha' xyeniloj ta aycoj hunk'aanxa anma tu' yalan̈ sowal sc'ul Comam Dios. Wal ya' xa' ya' yuluj sc'ul yin̈ Comam, yuxin xcan ya' c'ulal yul sat Comam. 8Yu ya'ni ya' Abraham yuluj sc'ul yin̈ Comam, yuxin yet x'awtelax ya' yu Comam, syijyen ya' yanican scon̈ob', xto ya' sat hune' tx'otx'otx' xal Comam ta ch'ocoj yetoj. X'el ya' yul scon̈ob', xto ya', waxan̈ca maẍto yohtajoj ya' b'ay ch'apni ya'. 9Haxca caw cha' ya' yuluj sc'ul yin̈ Comam, x'ehc'oj ya' haca' con̈ob'laj sat tx'otx'otx' xalte Comam tet. Yul mantiadon̈e x'ehc'oj ya'. Hactu' ya' Isaac, b'oj ya' Jacob, haxca ha'hun heb'ya' yin̈ tzet xalte Comam tu'. 10Hactu' xu yehc'oj ya' Abraham haxca chechma ya' yehojc'oj yul hune' con̈ob' k'a c'ul yeyoj scawxeb'anil, ha' caw Comam Dios xwatx'en hune' con̈ob' tu' haca' nab'il yu Comam. 11Yu ya'ni ya' Abraham yuluj sc'ul yin̈ Comam Dios, xto ẍcha' ya' yip x'eh yuninal ya' b'oj ya' Sara. Waxan̈ca caw ayxa sk'inal heb'ya' b'oj maẍtic'a xu yilni ya' Sara tu' yin̈ hunuj yunin, yaja' xaot yip ya' haxca ẍcawxi sc'ul ya' Abraham tu' to chij sb'a tzet chalte Comam. 12Waxan̈ca matxa yetoj ay yilni ya' Abraham yin̈ yuninal, haxca caw ichamxa ya', yaja' caw tx'ihalto sb'isil yic'al ya' xpohchayi. Haca'xan̈e jilniatoj tx'umel satcan̈, b'oj haca'xan̈e yetoj arena sti' ha' mar, hactu' yic'al ya' x'eltoj, matxa sb'ischa ju. 13Sunil heb'ya' xax jal ti', xa' heb'ya' yuluj sc'ul yin̈ Comam yulb'al ayc'oj heb'ya' satyib'an̈k'inal ti'. Matzet scha heb'ya' yin̈ tzet xalte Comam, yaja' yehn̈e ya'ni heb'ya' yuluj sc'ul. Ẍtic'a cawxi sc'ul heb'ya' to chij sb'a tzet xalte Comam, yuxin caw stzala heb'ya' yin̈. Hactu' xu sta'wen heb'ya' to ec'om ye heb'ya' sat tx'otx'otx' ti'. 14Mactaj hactu' yalni, sye to lan̈an sayni hune' b'ay caw ch'ehoj. 15Haxca ta ha' tx'otx'otx' b'ay xtit heb'ya', ha' aycoj yin̈ sc'ul heb'ya', xmam yu smeltzo heb'ya' b'etu' hunecxa. 16Yaja' xochetoj heb'ya' hune' con̈ob' k'a' c'ul, hune' ay b'et satcan̈. Yuxin mach xtx'ixwi Comam ta chal heb'ya' sDiosoj, haxca yin̈ caw yeli watx'eb'ilxa hune' scon̈ob' heb'ya' tu' yu Comam. 17- 18Xa' ya' Abraham yuluj sc'ul yin̈ Comam, yuxin ha' yet x'ilweot ya' yu Comam, syijyen ya' yanicoj yiptzil sc'ahol Isaac tu' xahanb'alil, waxan̈ca yalnaj Comam tet ya', ta yin̈ naj Isaac tu' ch'elojtoj yic'al ya'. 19Xa' ya' yiptzil sc'ahol tu' xahanb'alil, haxca ẍtxumiloj ya' to ay scan̈il ye Comam spitzc'ancan̈ sc'ahol tu' xol hej camom, yuxin haca'tic'a xol hej camom tu', xmeltzo naj Isaac tu'. 20Yu ya'ni ya' Isaac yuluj sc'ul yin̈ Comam Dios, xalni ya' tet sc'ahol Jacob b'oj sc'ahol Esaú ta ẍchab' heb'ya' hej tzetet c'ul halteb'il yu Comam. 21Yu ya'ni ya' Jacob tu' yuluj sc'ul yin̈ Comam, yet toxa ẍcam ya', xalni ya' tet cawan̈ sc'ahol ya' José, ta schab' heb'naj hej tzetet c'ul halteb'il yu Comam. Hactu' xal ya' yet pajancoj ya' yib'an̈ swi' sk'ojoch shak'en ya' Comam Dios. 22Yu ya'ni ya' José yuluj sc'ul yin̈ Comam, yet toxa ẍcam ya', xalnicanoj ya' ta yilal yeloj heb'ya' b'et Egipto tu', xalni ya' ta ch'ilaxojtoj sb'ajil ya' yet ch'eloj heb'ya' b'etu'. 23Yu ya'ni smam smi' ya' Moisés yuluj sc'ul yin̈ Comam, oxeb' x'ahaw xeb'a heb'ya' ya' Moisés tu' yet tz'ul ya', haxca xil heb'ya' to caw eltich'an ya'. Maxtic'a yoc heb'ya' yin̈ tzet xal naj sreyal Egipto yin̈ tzet chu spotx'lax niẍtej unin. 24Yu ya'ni ya' Moisés yuluj sc'ul yin̈ Comam, yuxin yet ayxa sk'inal ya', matxa sje sc'ul ya' ta ẍhal-lax ya' yuninoj ix scutz'in naj rey. 25Mach xochetoj ya' hej tzetet tx'oj ec'omn̈e yeyi, to yin̈ scon̈ob' Comam Dios xacoj sb'a ya', waxan̈ca chila' ya' sya'tajil b'oj con̈ob' tu'. 26Ha' b'aytet sic'le ya', ta yilal yilni ya' sya'tajil syailoj hune' mac Sic'leb'il yu Comam Dios ha' Comam Cristo. Mataj ẍchani ya' k'alomal ay b'et Egipto. Aycoj yin̈ sc'ul to ha' hune' tzet cha' Comam tet ya' aycoj yin̈ sc'ul ya' chanoj. 27Yu ya'ni ya' yuluj sc'ul yin̈ Comam, x'el ya' b'oj scon̈ob' b'et Egipto tu', maẍtic'a xiw ya' tet naj rey. Lin̈ann̈etic'a ya' yin̈ tzet nab'il yu, hacatic'a caw chil ya' yin̈ Comam Dios maẍtic'a b'ay ẍjil yin̈. 28Yu ya'ni ya' yuluj sc'ul yin̈ Comam Dios, xec'tze ya' hune' k'in̈ chejb'il yub' yu Comam. Xchejni ya' alaxojcoj chic' yin̈ shoyanil hej te' pulta, yun̈e mach'ec' ángel potx'waom spotx'o'loj sunil hej sb'ab'el c'ahol heb'naj israel tu'. 29Yu ya'ni anma israel yuluj sc'ul yin̈ Comam Dios, yuxin xu yec'toj heb'ya' yictajb'al ha' Mar Rojo yu xtajcan yich ha'. Haxa x'ec'toj heb'naj soldado ah Egipto yalni, shunb'an sb'a ha', xhik'wican heb'naj. 30- 31Yu ya'ni ix Rahab tx'oj ye swi' yuluj sc'ul yin̈ Comam Dios mach xcam ix yin̈ mac mach yijyomoj chute sb'a, haxca c'ul xu schani ix heb'naj xatoj heb'naj swi' con̈ob' israel yila' tzet ye b'etu'.Yu ya'ni heb'ya' Israel yuluj sc'ul yin̈ Comam, x'ec' wejna tapial hoyn̈e con̈ob' Jericó, lawi shoyni heb'ya' yulb'al hujeb' tz'ayic. 32¡Aytom tzet chu walnian yaja' matxa hin hamanilan! Haca'na ya' Gedeón, ya' Barac, ya' Sansón, ya' Jefté, ya' David, ya' Samuel, b'oj sunil heb'ya' schejab'lom Comam Dios. 33Yu ya'ni heb'ya' yuluj sc'ul yin̈ Comam Dios, ay heb'ya' x'ay nimejtaj con̈ob' yu. Ay heb'ya' caw c'ul xu yijb'an con̈ob' israel. Ay heb'ya' ẍchani tzet halteb'ilcan yu Comam. Ay heb'ya' xmajchen sti' no' b'alam. 34Ay heb'ya' xb'ut'nitan̈oj k'a k'a' ẍpalc'on scajil. Ay heb'ya' c'ultajn̈e xu scolcha scam yu ch'en espada. Ay heb'ya' soan ya'ni, yaja' xi' heb'ya' yip yuxin k'a' can̈ ye x'elcoj yin̈ howal yuxin tx'ihal heb'naj soldado nancon̈ob'al x'ay yu heb'ya'. 35Ay heb'ya' co mi', xpitzc'acan̈ scamom.Yaja' ay hunk'aanxa heb'ya' yu ya'ni yuluj sc'ul yin̈ Comam Dios x'aot ec'oj ya' yanma. Ya'taj xu scami, yaja' mach xa' yilal heb'ya' scolni sb'a, haxca choche heb'ya' pitzc'aojcan̈ yin̈ hune' k'inal k'a' c'ul. 36Ayto pax heb'ya' x'ec' ya' yanma, sb'ahot b'oj xhateot, ay b'ay x'aotcoj scadenail heb'ya' mato x'aotictoj yul presu. 37Ay heb'ya' xc'ojot camoj, ay heb'ya' xc'uputtoj yu ch'en cierra, mato xpotx'ot yu ch'en espada. Ay heb'ya' xa' elilal, nanann̈e b'ehal xi'cantoj heb'ya', stz'umal caneluxan̈e aycoj yin̈, mato stz'umal caplaẍ, yin̈xa sc'antajil aya, tz'ab'alc'ulexa jilni tzet xu yetaot. 38Yin̈ caw yeli, mat yetoj aya ch'ehc'oj hunk'aan anma c'ul ti' xol heb'jetb'i. Haxca xcajot heb'ya' maẍtic'a sb'ih b'ay lin̈an heb'ya', elilaln̈etic'a yeyi, x'ec' yulaj tajin̈ witz ac'al, swi'laj witz, yulaj n̈ach'en b'oj yulaj holan sat hune' tx'otx'otx' ti'. 39C'ul yalni Comam Dios yin̈ hunk'aan heb'ya' ti' haxca xa' heb'ya' yuluj sc'ul yin̈, yaja' mach hunuj heb'ya' ẍchani tzet halteb'il yu Comam. 40Haxca ay hune' tzet k'a' c'ul nab'ilxatic'a yu Comam jin̈, yuxin mach xijna sb'a tzet nab'il yu Comam yin̈ heb'ya' schuquil, to masanto chon̈ hunujcoj b'oj heb'ya' catto yijnoj sb'a.


Copyright
Learn More

will be added

X\