HEBREOS 11

1Hayet chijanayto yul janma yin̈ Comam Dios, ha' chal yelapnoj ta ayco yin̈ janma cochahni tzet echmabil ju, yeb xin t'in̈an jecoj ta chijil yin̈ huntek'an tzet maẍto chijilico yin̈. 2Ebnaj ischejab Comam ec'lena yet payxa can ebnaj c'ulal yu yayto ebnaj yul yanma yin̈ Comam. 3Yu chijayto yul janma yin̈ Comam Dios, yuxin t'in̈an jecoj ta yu Istzoti' Comam xin iswatx'e sunil tzet ay yul sat yiban̈k'inal ti' yeb satcan̈. Yuxin sunil tzet watx'ebil chijil tinan̈, mach yin̈o tzet watx'ebilxa titnaj. 4Yu yayto naj Abel yul yanma yin̈ Comam Dios yuxin yalte naj hune' xahanbal ec'bal c'ul sata yet naj Caín. Hac tu' yu iscancano naj c'ulal yul sat Comam Dios, ischahni Comam isxahanbal naj. Waxan̈ca camnaxa naj Abel tu', yaja' yexn̈e istzotel naj jet yu yayto naj yul yanma yin̈ Comam Dios. 5Yu yayto naj Enoc yul yanma yin̈ Comam Dios yuxin ilaxto naj satcan̈ yu Comam, mach yil naj camical, matxa xin hunu mac ilni naj. Chal yul Yum Comam Dios tato yet yalan̈to maẍto chiilaxto naj satcan̈ tu' caw tzala Comam Dios yin̈ tzet iswatx'e naj. 6Yuto ta machi jayto yul janma yin̈ Comam Dios mach chitzala Comam yin̈ tzet chicowatx'e, yuto ha' mac choche chihitzico isc'atan̈ Comam Dios yilal yanayto yul yanma tato ay Comam Dios yeb ta chak' Comam ispaj tet macta yin̈ sunil yanma chisayni Comam. 7Yu yayto naj Noé yul yanma yin̈ Comam Dios, yuxin hayet yalni Comam ta chak' hune' niman yaxn̈ab isyijen naj tzet yal Comam, yoc naj iswatx'eno hune' barco bay chicolcha naj yeb yixal yeb oxwan̈ isc'ahol yeb ebix alibe, waxan̈ca xin maẍto ixtan̈o hune' n̈ab tu'. Yu yayto naj Noé yul yanma yin̈ Comam Dios yuxin colcha naj, wal anma xin tan̈ilo sunil. Iscancano naj c'ulal yul sat Comam Dios, yu yayto naj yul yanma yin̈ Comam. 8Yu yayto naj Abraham yul yanma yin̈ Comam Dios, yuxin hayet yawtenilo Comam naj, caw yijem yute isba naj, isto naj sat hune' tx'o tx'otx' halbilcano yu Comam Dios ta chak'lax ismajulo naj. Waxan̈ca xin mach yohtajo naj bay ay tx'otx', yaja' isbejcano naj iscon̈ob, isto naj. 9Caw yayto naj yul yanma yin̈ Comam Dios, isto naj ehoyo sat tx'o tx'otx' yalte Comam Dios; yaja' haca' wayan̈bal yu yec' naj sat tx'otx', iswatx'en naj k'ap mantiado yatutoj. Hacpax tu' xin ebnaj c'ahole, naj Isaac yeb naj Jacob, ha' hun ebnaj yin̈ tzet yalte Comam tu' tet naj Abraham. 10Yuto naj Abraham tu' ha' hune' con̈ob caw c'ul yehayto isxe', ha' echmabil yu naj. Hune' con̈ob tu', ha' caw Comam Dios anayo ismalil, ha'tic'a xin Comam watx'eni. 11Hacpax tu' ix Sara yayto ix yul yanma yin̈ Comam Dios, yuxin waxan̈ca caw ixnamxa ix yeb xin maẍtic'a hunu yunin ix, yaja' ak'lax yip ix yuninwi. Ispitzc'a nich'an yunin ix yeb yichamil yuto yayto ix yul yanma ta ha' tzet chalte Comam Dios masan chiyij isba. 12Waxan̈ca caw ichamxa naj Abraham, yaj caw hantan̈e anma pohchacan̈ yin̈. Caw haca' isbisil tx'umel yeb arena ay isti' ha' mar, machi hunu mac chu isbisni. 13Sunil huntek'an ebnaj tu' mach ischah ebnaj tzet haltebil yu Comam yet iscamto ebnaj; yaja' yu yayto ebnaj yul yanma yin̈ Comam yuxinto haca'tan̈e yilto ebnaj yin̈ tzet haltebilcano yu Comam tu' yin̈ nahat, caw xin tzala ebnaj yin̈. Istxumnilo ebnaj tato ton̈e chiec' ebnaj yul sat yiban̈k'inal ti'. 14Yuxin ha' mac chitxumni haca' tu', chisyeloj ta lan̈an issayni hune' yehobal bay chiehi. 15Yaja' ta ha' bay titna ebnaj ha' bay ayco isnabal ebnaj, meltzomi ebnaj yintaj. 16Yaja' wal xin, ha' hune' ehobal ec'na c'ul ay yul satcan̈, ha' ayco yin̈ isnabal ebnaj. Yuxin mach chitx'ixwi Comam Dios yet chalni ebnaj Comam isDiosaloj, yuto ay hune' iscon̈ob ebnaj watx'ebil yu Comam. 17Yu yayto naj Abraham yul yanma yin̈ Comam Dios, yuxin isyije naj yak'ni hunpilan isc'ahol yin̈ xahanbalil yet yilwelax naj yu Comam Dios; waxan̈ca xin halbil tet naj yu Comam haca' ti': 18“Yin̈ naj Isaac chipohcha hawuninal,” ẍi Comam. 19Yuto yohta naj Abraham tu' ta chu ispitzc'ancan̈ Comam Dios camom, yuxin haca'tic'a ak'bil itzitzbocan̈ naj Isaac, yak'lax naj tet ismam. 20Yu yayto naj Isaac yul yanma yin̈ Comam Dios, yuxin yalan̈to yalni naj yin̈ huntek'an isc'ulal chischah naj Jacob yeb naj Esaú yu Comam Dios. 21Yu yayto icham Jacob yul yanma yin̈ Comam Dios, yuxin hayet toxa chicam icham, yalnicano icham yin̈ huntek'an isc'ulal chischah isc'ahol, ha' ton naj José, yay xulno icham yiban̈ iswi' isk'ojoch, yak'ni tzalaho isc'ul icham yin̈ Comam Dios. 22Yu yayto naj José yul yanma yin̈ Comam Dios, yuxin yet yalan̈to maẍto chicam naj, yalnicano naj tato ay hune' tz'ayical ti' bay chiel ebnaj Israel sat tx'otx' Egipto. Yalnipaxo naj tato chito ebnaj Israel tu' isbajil isnimanil naj yet chiel ebnaj sat tx'otx' Egipto tu'. 23Yu yayto ismam yeb ismi' naj Moisés yul yanma yin̈ Comam Dios yuxin hayet ispitzc'a naj yebalaxilo naj oxeb ixahaw, yuto caw c'ulch'an jilni naj. Mach xin xiw ismam naj yeb ismi' naj tet chejbanile yak' naj isreyal Egipto tato chipotx'lax niẍte winaj unin. 24Yu yayto naj Moisés yul yanma yin̈ Comam Dios, yuxin hayet icham tzeh naj matxa yoche naj oco yunino ix iscutz'in naj rey Egipto tu'. 25Walxinto ha' yec'ya' yanma naj yinta iscon̈ob Comam Dios, ha' issayilo naj sata yak'ni tzalaho yanma naj yin̈ huntek'an tzalahilal yet yul sat yiban̈k'inal ti', huntek'an pet chitan̈iloj. 26Istxumnilo naj tato ec'balto c'ul yec'ya' yanma naj yu Comam Cristo sata yochen naj isk'alomal tx'otx' Egipto tu', yuto ha' yin̈ tzet chak' Comam ispajo tet naj, ha' bay ayco yanma naj. 27Yu yayto naj Moisés yul yanma yin̈ Comam Dios, yuxin el naj yeb ebnaj Israel sat tx'otx' Egipto, machi xin xiw naj ta chitit ishowal naj rey tu' yin̈ naj. Caw yin̈n̈e Comam Dios yaco isnabal naj, haca'tan̈e caw yilico naj yin̈ Comam, Comam machi jilico yin̈. 28Yu yayto naj Moisés yul yanma yin̈ Comam Dios, yuxin yec'tze naj k'in̈ Pascua, ischejni naj txihlaxoco ischiq'uil no' me' yin̈ iswi' yeb yin̈ isc'ul ispultahil yatut ebnaj Israel, yun̈e mach ispotx' naj ángel ak'om camo anma isbabel c'ahol ebnaj Israel tu'. 29Yu yayto ebnaj Israel yul yanma yin̈ Comam Dios, yuxin ispoh isba ha' mar Rojo, yec'to ebnaj yictabal ha', caw xin tajin bay ec'to ebnaj. Haxa yet yec'to ebnaj Egipto yalni, ishunban isba ha', ishik'nito ebnaj ha', iscamilo ebnaj. 30Yu yayto ebnaj Israel yul yanma yin̈ Comam Dios, yuxin hayet lahwi hujeb tz'ayic yec' hoyon ebnaj yin̈ con̈ob Jericó yay buyna isc'ubal hune' con̈ob tu'. 31Yu yayto ix Rahab, ix tx'oj ye iswi', yul yanma yin̈ Comam Dios, yuxin mach cam ix yinta macta man̈c'om, yuto c'ul yu ischahni ix ebnaj Israel beyc'o ilwal yin̈ con̈ob tu'. 32¿Mactaxca hunuxa chiwalan tinan̈? Caw matxam tiempo ta chinocan tzotelo yin̈ naj Gedeón, naj Barac, naj Sansón, naj Jefté, naj David yeb naj Samuel yebpaxo ebnaj ischejab Comam Dios yet payat. 33Yu yayto ebnaj yul yanma yin̈ Comam Dios, yuxin ay ebnaj k'oji yin̈ nimeta con̈ob, aypaxo ebnaj watx'en istoholal yet yoc yahawil, ay ebnaj ischah tzet haltebil yu Comam Dios, ay ebnaj majchen isti' no' balam. 34Ay ebnaj k'oji isbutni nimeta k'a', ay ebnaj colcha tet ch'en espada, ay ebnaj machi yip yaj hul yip ebnaj, caw xin c'ul elcanico ebnaj yin̈ howal, isk'oji ebnaj yin̈ ebnaj ak'om howal tit yul hune'xa nan con̈obal. 35Aypaxo ebix ix itzitzbican̈ yunin yu yayto yul yanma yin̈ Comam Dios. Ay ebnaj caw ya'ta yu iscami, yu mach chisje ebnaj isman̈c'o' tzet chal Comam Dios yuto choche ebnaj chiak'lax itzitzbocan̈ yin̈ hune' k'inale mach istan̈bal. 36Ay ebnaj ec'ya' isbahlaxi ishatelaxpaxoj, ay ebnaj c'albalax yu ch'en cadena, ay ebnaj alaxicto yul preso. 37Aypaxo ebnaj k'ojlax camoj, ay ebnaj c'uplaxayo yicta yu ch'en serrucho, ay ebnaj alaxico yin̈ ilwebal, aypaxo ebnaj ak'lax camo yu ch'en espada. Ay ebnaj nananta bay ec'le, xil no' me' yeb xil no' chiw ayco xilo isk'ap ebnaj, yak'len ebnaj meba'il yeb isya'tajil, isbahlaxpaxo ebnaj. 38Anma yul sat yiban̈k'inal ti' mach yeto ay ebnaj yec' xol, machi hunu bay caw ehayo ebnaj, walxinto ha' sat tx'otx' desierto ec' ebnaj yeb iswi'la witz yeb yulaj ch'en n̈ach'en, yeb yulaj tx'o tx'otx' holan ec' ebnaj. 39Sunil ebnaj ti', waxan̈ca caw c'ul isbeybal ebnaj yu yayto ebnaj yul yanma yin̈ Comam Dios, yaja' machi hunu ebnaj chahni tzet haltebil yu Comam Dios. 40Yuto ayon̈ico yin̈ isnabal Comam Dios yin̈ hune' tzet ec'bal c'ul tu', yuxin mach yij isba tzet nabil yu Comam yin̈ ebnaj ischuquil, walxinto chihunico ebnaj jinta yin̈ istoholal.

will be added

X\