1 Yuto ha' huntek'an xahanbal chal isley naj Moisés maẍtaj ha' tzet caw ay yul satcan̈, wal xin yecheln̈e yeco yin̈ huntek'an isc'ulal yilal yuli. Huntek'an xahanbal chalte ebnaj hunun habil mach chu istz'ajban isc'ul anma choche ishitzaco isba isc'atan̈ Comam Dios. 2 Yuto ta huntek'an xahanbal chal isley naj Moisés tu' chu issajn̈encano anma yin̈ ismul, chimisbej yalten xahanbal, yuto matxa ismul chabe. 3 Wal xin ha' isxahanbal anma chi-la-yak' hunun habil tu', ha' chak'ni isnab anma isnaniti ismul. 4 Yuto ischiq'uil no' winaj wacax yeb no' chiw, mach chik'oji yinilo ismul anma. 5 Yuxin yet yul Comam Jesucristo yul sat yiban̈k'inal ti' yalni tet Comam Dios haca' ti': Matxa chisje hac'ul ch'ak'lax xahanbal yeb sabehal tawet, yuxin ak'bil innimanilan hawu, ha' chiwak'an yin̈ xahanbalil tawet. 6 Mach chitzala hac'ul yin̈ xahanbal chin̈uslaxi yeb sabehal chiak'lax tawet yu yinilo mule. 7 Yuxinto chiwalan tawet: Mamin, hach inDiosalan, ayinan lah yu inyijenan tzet chawala, haca' yu istz'ibn̈elaxcano win̈an yul Hawum. ẍi Comam. 8 Yin̈ babelal, yal Comam Cristo ta mach isje isc'ul yeb mach chitzala Comam Dios tato chiak'lax xahanbal yeb sabehal tet, yeb no nok' chin̈uslaxi yu yel ismul anma, waxan̈ca xin hac tu' yalni ley. 9 Lahwi tu' yalnipaxo Comam: “Mamin, hach inDiosalan, ayinan lah yu inyijenan tzet chawala,” ẍi Comam. Chal yelapno tu' ta chilo huntek'an babel xahanbal tu' cat yanico hune' ac'. 10 Xacon̈yaco Comam Dios yetoj yuto isyije Comam Jesucristo tzet yal isc'ul Comam Dios yet yalten isba yin̈ xahanbalil yin̈ huneln̈e. 11 Sunil ebnaj sacerdote Israel hununn̈etic'a tz'ayic ayco ebnaj yin̈ ismunil yalten xahanbal yeb xin hune'n̈etic'a ha' xahanbal chalte ebnaj, waxan̈ca xin mach chu yinilo mule. 12 Yaja' wal Comam Cristo huneln̈ech'an yaco isba xahanbalil yin̈ comul yin̈ sunilbal tiempo, lahwi tu' yoc tz'on̈no Comam yin̈ iswatx'k'ab Comam Dios. 13 Ha' tu' ay Comam yechman yalaxico sunil mac ayco ishowal yin̈ yalan̈ yoj. 14 Yuto hune'n̈e xahanbal yak' Comam con̈yanico yin̈ istoholal yin̈ huneln̈e han̈on̈ yeton̈xa Comam ti'. 15 Chak'paxo isba Comam Espíritu Santo yin̈ huntek'an ti' yet chalni: 16 Hune' intratohan chiwak'an tet anma Israel yet tzujanilxa, ha' ton hune' ti': Chiwacojan inchejbanilan yul yanma yeb yin̈ isnabal, ẍi. 17 Lahwi tu' yalnipaxoj: Matxa bak'inal xin chinnatijan ismul yeb istx'ojal, ẍi Comam. 18 Yuxinto ayxa nimanc'ulal yin̈ mule, matxa yilalo chiak'lax xahanbal hunelxa. 19 Yuxin tinan̈ hex wuẍtaj hex wanab, yin̈xa sunil janma chon̈apni yin̈ sat Comam Dios bay ay yehobal caw ay yelapnoj, yaj yu ischiq'uil Comam Jesucristo. 20 Chu japni yu hune' ac' beh chiak'ni k'inale iswatx'e Comam yet istzilmoyo k'ap k'ap aycan̈ yul yatut Comam Dios yet iscam Comam Jesús. 21 Ha' Comam Jesús ha' yahawil sacerdote, chitzotel jin̈ tet Comam Dios, ha' caw ay yelapnoj, chimunla yul yatut Comam Dios yul satcan̈. 22 Yuxin hitzojon̈weco yin̈ sunil janma sata Comam Dios, jak'aweyto yul janma yin̈ caw isyelal yuto sajxa ye janma yu ischiq'uil Comam, matxa istx'ojal chietanto conabal; yeb xin sajxa ye conimanil yu ha ha' caw saj. 23 Colin̈bawe coba yin̈ cuybanile xajabe ti', machojab chicabcon coc'ul yin̈ tzet ayco yipo janma, hune' bay tzujanon̈icoj, yuto chij isba tzet haltebil jet yu Comam Dios. 24 Cosaya'we yin̈ tzet chu cocolwa jin̈ hununon̈, haxinwal chicolahico coxahann̈en coba cat cowatx'en isc'ulal jin̈ hununon̈. 25 Machojab chicobej cocutxban coba yin̈ culto, haca' chute huntek'an ebnaj, wal xin jiptzewe coba hununon̈, yuto lan̈an isyenilo isba tato lan̈an ishitzti tiempo bay chihul Comam Jesucristo. 26 Yuto ta lahwi johtan̈enilo isyelal hune'n̈etic'a ha' xin janico comul, matxa hunuxa xahanbal chu yak'ni tan̈o comul chijaco tu'. 27 Ta hac tu' toxan̈e chijechma yul hune' niman isya'tajil jiban̈ yeb k'a k'a' chitan̈tzenilo sunil macta ayco ishowal yin̈ Comam Dios. 28 Yet chisman̈c'on hunu mac isley naj Moisés, ta ay xin cawan̈ maca oxwan̈ mac chalni tato yeli man̈c'om hune' mac tu', mak'bil ismak'lax camoj, matxa nimanc'ulal yin̈. 29 Hajxam mac chiyahni Isc'ahol Comam Dios yeb matzet chalilo ischiq'uil Comam yul sat, chinilo ispixan Comam Espíritu Santo, Comam chon̈ocheni. Huntek'an mac tu' caw ec'balto isya'tajil chiay yiban̈, yuto ha' ischiq'uil Comam Jesucristo t'in̈bancano istrato Comam Dios, con̈yanipaxico yeto Comam. 30 Caw johtaj tato halbilcano yu Comam Dios, haca' ti': “Haninn̈ehan chiwilan yin̈ tzet chielico anma, haninan chiwak'an ispaj selel tet,” ẍi Comam. Chalnipaxo yul Yum Comam: “Ha' Comam Dios Jahawil chiilni yin̈ tzet chielico iscon̈ob,” ẍiayoj. 31 ¡Caw ay ismay yet chanayo Comam Dios itzitz isya'tajil jiban̈! 32 Naweti yet yalan̈tocanoj yet hechahni issajilk'inal yul heyanma caw heyak' techaho isya'tajil hul teyiban̈. 33 Hex ti' quexbahlaxi, heyetalax sata anma, ayex xin hul isya'tajil teyiban̈ yu quexcolwa yin̈ mac ak'lax ec'oya' yanma tu'. 34 Caw tz'aypaxo hec'ul yin̈ ebnaj alaxicto yul preso, machi xin oc bisc'ulal yin̈ hec'ul yet yilaxilo tzet ayex yuto heyohtaj ta ec'balto isc'ulal chiak'lax teyet yul satcan̈, huntek'an machi bak'inal chilahwi. 35 Yuxin machojab chebej iscawxi hec'ul, yuto niman ispaj selel chak'lax teyet. 36 Niman cheyute hec'ul heyak'ni techaho isya'tajil, haxinwal chu hewatx'en tzet choche isc'ul Comam Dios cat hechahnipaxo tzet haltebilcano yul Yum Comam, 37 yuto chal yul Yum Comam Dios: Caw hanic'xan̈e bay chul Comam, Comam yilal yuli, caw mach chiec'to yet yuli. 38 Ha' mac xacan c'ulal yul sat Comam Dios ha' ton mac maẍtic'a chisbej iscawxi isc'ul yin̈ Comam, yaja' wal mac chimeltzo yintaj mach chitzala isc'ul Comam yin̈, ẍi yul Yum Comam. 39 Yaja' wal han̈on̈ ti' mach chon̈meltzo jintaj haca' ebnaj chimeltzo yintaj cat istocano yin̈ isya'tajil. Wal han̈on̈ ti' chicochah cocolbanil yuto xajayto yul janma yin̈ Comam.
