G'ALATAS 6

1Hex wuẍtaj, hex wanab, tato cheyila ta ay huno ebnaj juẍta chiayc'ay yin̈ hunu mule, haxa hex yijomex tet Comam Espíritu Santo, colwahan̈we yin̈ heyinican̈. Yaj chewchotan̈e chu hetzotel tet, caw nann̈e heyu, c'uxantaxca heyalaxpaxico yin̈ hunu ilwebal. 2Wal xin colwahan̈we teyin̈ yin̈ ej isya'tajil chul teyiban̈, hac tu' xin chu heyijen isley Comam Jesucristo. 3Tato ay mac chihalni ta caw ay yelapno yehi, yaja' xin machi nino yelapnoj, caw ha'tic'a chak' subchaho isba ischuquil. 4Yuxin yilal jilni yin̈ tzet chicobeybaln̈e hununon̈, ta c'ul tzet chicobeybaln̈e tu' jak'a' tzalaho coc'ul, machojab tzet chalico coc'ul yin̈ hunuxa maca. 5Wal xin caw nananta jalni tet Comam yin̈ tzet chicowatx'e hununon̈. 6Ha' mac chichahni cuybanile yin̈ Istzoti' Comam Dios, yak'ab hanic'o tzet ay yul isk'ab tet mac chicuyni tu'. 7Mach cheyak' subchaho heba, yuto machi hunu mac chu yetlico yin̈ Comam Dios. Ha' tzet chicotz'unu, ha' chicohatx'paxoj. 8Tato ha' istx'ojal tzet choche janma chicowatx'e, ha'tic'a camical chicochah ispajoj. Wal tato ha' tzet chal Comam Espíritu Santo chicowatx'e, ha' k'inal mach istan̈bal chicochah tet Comam Espíritu. 9Yuxin caw machojab chon̈siquilo cowatx'en sunil isc'ulal, yuto ta mach chon̈pax jintaj caw chi-tic'a-cochah ispaj sunil isc'ulal chicowatx'e. 10Yuxin cowatx'ewe isc'ulal yin̈ jet anmahil hatatic'a hanta chon̈k'oji, yaj ec'balto yilal cocolwa yin̈ macta ayxaco yul isk'ab Comam Dios. 11¡Ilwec'anabi, han-caw-inan chintz'ibn̈etojan ichamta tz'ib ti' teyet! 12Ebnaj chischilba yalni teyet tato caw yilal heyak'ni circuncidar heba, to yun̈e yoccano ebnaj c'ulal yul sat anma yuxin chal ebnaj, yeb yun̈e mach chiak'lax ec'oya' yanma ebnaj yinta ebnaj chihalnic'o iscamical Comam Jesucristo. 13Ebnaj chichahni circuncisión tu', caw maẍtic'a chik'oji ebnaj isyijen tzet chal ley, yaja' chischilba ebnaj yalni teyet tato yilal heyak'ni circuncidar heba, yun̈e yoc iswinajil ebnaj yet cheyijen yechel circuncisión yin̈ henimanil. 14Walinan xin, caw matxa hunuxa baytet yin̈ wal wanico inwinajilan, cachann̈ech'an yin̈ iscamical Comam Jesucristo yin̈ te' culus. Yuxin caw camominxahan yin̈ sunil ismachiswalilal yul sat yiban̈k'inal ti'. Haxa hune' sat yiban̈k'inal ti', camnaxapaxilo win̈an yu iscamical Comam Cristo. 15Caw matxa tzet chal yelapnoj ta chahbilxa circuncisión ju maca machoj, ha' hune' caw aycano yip to pitzc'anajon̈xa yin̈ iscayelal yin̈ Comam Jesucristo. 16Yak'ab Comam Dios ak'anc'ulal, yeb xin tz'ayojab isc'ul Comam yin̈ sunil mac tzujan yinta hune' cuybanile ti', ha' ton huntek'an mac tu' caw Israel, iscon̈ob Comam Dios yin̈ caw isyelal. 17Wal yin̈ tiempo chito insatati'an xin, matxa chiwochehan chinetalaxan, yuto ayxaco islut'al innimanilan yu anma. Ha' xin chiyeniloj tato caw ischejab Comam Jesucristo wehan. 18Hex wuẍtaj, hex wanab, yak'abayo Comam Jesucristo isc'ulch'anil isc'ul teyiban̈ hesunil. ¡Hacojab tu'!

will be added

X\