G'ALATAS 6

1Hex wuẍtaj hex wanab', ta ay hunuj jetb'i ch'ay yin̈ hunuj smul, hex xa che yijye Comam Espíritu, colwaan̈wej yin̈ snani sb'a sc'ul cat smeltzocoj yin̈ Comam. Yaja' huncuentan̈e cheyute he b'a yet chex tzotel b'oj. Nann̈e heyu, taj hex hun chex ay yin̈ hej tx'ojal. 2Colquewej he b'a yin̈ stecha sya'tajil heyeyi, yin̈ hactu' che yijye sley Comam Cristo. 3Ta ay mac can̈ye chab'e, waxan̈ca matzet chaliloj, hunk'aan tu' hatic'a caw sub'ni sb'a. 4Nanan co txumni co b'a ta t'in̈an jecoj, mato machoj. Ta ay ninoj co c'ulal sje co tzalayi, yaja' tan̈e mat ec'b'aloj ẍjute co b'a sataj hunuj jetb'i. 5Haxca nanan jinitoj jijatz xac'oj Comam yul co k'ab' hununon̈. 6Ayto hunk'aan tzet ẍwal teyetan: Mac ẍchani scuyb'anil yin̈ stzoti' Comam Dios, ya'ab' hanic'oj tzet ay tet mac ẍcuyni tu'. 7Mach ẍja' sub'u' co b'a, machu jeb'an sat Comam Dios, haca'tic'a hunuj tzet ẍco tz'unu, ẍco maja' sat cha'a jet, hactu' tzet ẍco watx'e hununon̈, ẍco chab' spaj tzet xco watx'e tu'. 8Hactu' ye ti', ta hej tzetet tx'oj haca' choche yec'najil janma ha' ẍju, camical ẍco chab' spajoj. Wal ta ha' tzet chal Comam Espíritu, ha' ẍju, k'inal mach stan̈b'al ẍco chab' tet Comam. 9Yuxin mach ẍcab'con co c'ul juni hej tzetet c'ul, haxca yet ch'apnoj stz'ayical, ẍco chab' spaj tzetet c'ul ẍju ta mach on̈ pax jin̈taj. 10Jub' tzetet c'ul yin̈ anma yet chuapnoj ju, yaja' k'a' yilalto ye jetb'i tzujanxa yin̈ Comam. 11Ilwejc'anab' ichamtaj tz'ib' hayin caw chin tz'ib'n̈eayojan. 12Heb'naj chex chilb'an he chani circuncisión tu', yun̈e scan heb'naj c'ulal yul sat anma, yuxin hactu' chute heb'naj, b'oj yun̈e mach ẍcajot heb'naj sya'iloj scamical Comam Cristo yin̈ culus. 13Heb'naj chab'ilxa circuncisión yu, mach syijye heb'naj sley ya' Moises. Ton̈e chex schilb'a heb'naj heyijeni yun̈e yanicoj heb'naj smay, haxca che yijye he chani hune' yechel tu' yin̈ he nimanil. 14Yaja' walinan, matxa hunuj tzet b'ay ẍcawxi hin c'ulan, to haxan̈e scamical Jahaw Jesucristo yin̈ culus. Yuxin matxa tzet chaliloj hej tzetet ay satyib'an̈k'inal ti' wetan, hune' b'ay ẍcawxi sc'ul anma chanicoj smayoj. Haca'tic'a camnajinxa tet satyib'an̈k'inal ti'an. Ha' satyib'an̈k'inal ti' haca'tic'a camnajxa wetan. 15Waxan̈ca co chanaj circuncisión mato machoj, matxa tzet chaliloj. Han̈c'a ti' caw ay tzet chaliloj, to xax con̈ pitzc'a yin̈ scayel. 16Ya'ab' Comam Dios ak'anc'ulal, b'oj tz'a'ojab' sc'ul Comam yin̈ mactaj tzujan yin̈ hune' cuywab'al ti'. Ha' hunk'aan anma tu' caw israel scon̈ob' Comam Dios yeyi. 17Yin̈ schab'toj ti' mach sje hin c'ulan ta ayto mac chin uchnian, haxca hunk'aan tzipinal aycoj yin̈ hin nimanilan, ha' ẍyeni ta schejab' Comam Jesús wean. 18Hex wuẍtaj hex wanab', ya'ab' Jahaw Jesucristo sc'ulal sc'ul teyet te hunil. Amén.


Copyright
Learn More

will be added

X\