1 Comam Jesucristo coln̈ehon̈ilo yalan̈ yip isley naj Moisés, yuxin colbilon̈xa. Yuxin tinan̈ lin̈bawe heba yin̈ hecolbanil tu', caw matxa chexmeltzo heyak'acto heba yalan̈ ley tu' hunelxa. 2 Wal hanin Pablo inti'an, caw chiwalcanojan teyet tato cheyije hechahni hune' circuncisión, caw matzet chal yelapno Comam Jesucristo teyin̈. 3 Caw chiwalpaxcanojan teyet, macxan̈etic'a chiyijen ischahni hune' circuncisión tu', caw yilal isyijenpaxo sunil tzet chal isley naj Moisés. 4 Maquex chesayilo heyoc c'ulal yul sat Comam Dios yu heyijen tzet chal ley, xaheheq'uilo heba yin̈ Comam Cristo yeb yin̈ isc'ulch'anil isc'ul Comam Dios. 5 Wal han̈on̈ ti', yu Yespíritu Comam Dios ayco jin̈, yuxinto caw chijaco yin̈ janma tato chon̈oc c'ulal yul sat Comam Dios, yu chijaco janma yin̈ Comam. 6 Yuto han̈on̈ ayon̈xaco yul isk'ab Comam Jesucristo, caw matxa tzet chaliloj ta ayco maca mach ayco hune' circuncisión jin̈, wal xin ha' hune' caw yilal ha' ton janayto yul janma yin̈ Comam, hac tu' xin caw xahan chijil jet anmahil. 7 Hex ti', caw t'in̈anxatic'a heyehicoj. ¿Mac oc ak'oc'ule teyet yuxinto matxa cheyije sunil cuybanile caw tohol yehicoj? 8 Ha' hune' montebal oc teyet tu', mach yeto Comam Dios yehi. 9 Naweti hune' chihallax haca' ti': “Caw hanic'n̈ech'an yan̈al ixim pan chiak'ni sipc'aho sunil ixim harina,” ẍi. 10 Haninti'an chicawxi inc'ulan yin̈ Comam Dios tato mach nano chiyu hetxumnilo sunil cuybanile chiwaltoti'an. Wal mac chioc ak'oc'ule teyet yin̈ heyetanto heba tu' xin, caw chiay isya'tajil yiban̈ yu Comam Dios, mach chiyoc yin̈ macxan̈etic'a anmahil. 11 Hex wuẍtaj, hex wanab, ta ha' jak'ni circuncidar coba chinec'an wala'c'ojan, caw machim chitit ishowal ebnaj Israel win̈an. Caw matxam xin yelapno chucano iscamical Comam Jesucristo wuhan, hac tu' xin matxam chioc ebnaj iscaja' isba yin̈. Wal xin ha' hune' cuybanile yin̈ iscamical Comam ha' chiak'ni chiwaho isc'ul ebnaj win̈an. 12 ¡Ha' ebnaj ch'ec' ak'oc'ule ta cheyak' circuncidar heba, k'a'c'ulmi ta wiyom ishosnilo ebnaj yetbi isnimanil tu' yin̈ huneln̈e! 13 Hex wuẍtaj, hex wanab, caw awtebilex yu hecollaxcanoj, yaja' maẍtaj yu hewatx'en sunil ismachiswalilal choche isc'ul henimanil. Ha' wal heyuten heba to cheyak'le cheja' heba teyet hununex, yun̈e heyeniloj tato caw xahan cheyil heba. 14 Wal xin sunil tzet chal ley hunxan̈ech'an chejbanilehal chucanoj, chalni haca' ti': “Xahan chawil hawet anmahil, haca' haya'iln̈en haba,” ẍiayoj. 15 Caw nann̈e heyu, yuto ta chexoc hechile heba cat hec'utxlenayto heba, hex cawex cheyetato heba yin̈ haca' tu'. 16 Chiwalan teyet hex wuẍtaj, hex wanab, beybaln̈ewe haca' tzet choche Comam Espíritu. Mach cheyak' yub istx'ojal choche henimanil. 17 Sunil istx'ojal choche conimanil iswatx'e', chicajwa yin̈ tzet choche Comam Espíritu Santo, hacpax tu' Comam Espíritu chicajwa yin̈ istx'ojal choche conimanil iswatx'e'. Yuxin chiscajle isba Comam Espíritu Santo yeb sunil istx'ojal choche conimanil iswatx'e'. Chiscajle isba hunun, yuxinto mach chu hewatx'en tzet choche hec'ul. 18 Yaj tato ha' Comam Espíritu Santo chexijbani, caw matxa ayexocto yalan̈ yip ley tu'. 19 Caw ixtan̈ ye sunil istx'ojal chi-to-iswatx'e anma tzujan yinta tzet choche isnimanil; chiixli, chiwinajli, chiswatx'en tzettaj tx'ixobal, chisk'aytzenico istx'ojal jin̈. 20 Chiay jahno sata tioẍ, chiscunn̈e yet anmahil, caw chichiwa isc'ul yin̈ yet anmahil, howaln̈etic'a chu, ton̈etic'a chichichon isc'ul, chaco ishowal yin̈ yet anmahil. Tx'ojn̈etic'a chu istxumni, chaco pohlebahil cat isbosnilo isba. 21 Mach choche yila' tzet ay yet anmahil, chismak'camo yet anmahil, uc'um te', istzann̈etic'a yanico isba xol huntek'an k'in̈ machiswalil, yeb pek' chute isba. Caw xin aytopaxo huntek'an lahan yeb huntek'an ti' chito iswatx'e. Caw xa-tic'a-walan teyet yet yalan̈tocanoj, mac chiuten huntek'an ti', mach chiapni isc'atan̈ Comam Dios. 22 Wal sunil tzet chak' Comam Espíritu Santo cowatx'e'; ha' coxahann̈en coba, tzalahilal, ak'anc'ulal, nimanc'ulal, huncuentan̈e coc'ul, isc'ulch'anil coc'ul, yeb xin janayto yul janma yin̈ Comam. 23 Jinayo coba, cocachni coba yin̈ istx'ojal. Ha' huntek'an ti' machi ley chu iscachwa yin̈. 24 Yuxinto sunil mac ayxaco yul isk'ab Comam Jesucristo, caw xa'isbejcano beybale ik'biltic'a yu, yeb tzet choche yanma, yeb sunil istx'ojal choche isnimanil, huntek'an tu' xaelcano yu iscamical Comam yin̈ culus. 25 Wal xin yu ayxaco Comam Espíritu Santo jin̈, yuxin caw ec'ojon̈we haca' choche isc'ul Comam. 26 Mach lolo'o chijute coba, mach chon̈buchwa jin̈ hununon̈, yeb xin machojab chichiwa coc'ul jin̈.
