G'ALATAS 5

1Comam Cristo xcon̈ colni tet sley ya' Moises yun̈e huneln̈e chon̈ colchacanoj. Yuxin tinan̈ lin̈b'awej he b'a yin̈ he colb'anil tu', matxa chex meltzo heya'a'coj he b'a yalan̈ ley tu'. 2Ab'ewej tzet ẍwalan: Hayin Pablo hin ti'an ẍwal teyetan, ta yin̈ he chani circuncisión ẍcawxi he c'ul, matzet ch'a'a Comam Cristo teyet. 3Ẍwalni pax teyetan, mac ẍyijyen schani circuncisión tu', yilal mi syijyen sunil sley ya' Moisés. 4Matxa heyoc yin̈ Comam Cristo ta che say he can c'ulal yul sat Comam Dios yu he yijyen ley tu'. Xam quex el yin̈ sc'ulch'anil sc'ul Comam Dios yin̈ hactu'. 5Wal xin, yu Yespíritu Comam Dios ẍcawxi co c'ul co can c'ulal yul sat Comam yu ja'ni yuluj co c'ul yin̈. 6Hayon̈ huninaj hon̈coj yin̈ Comam Cristo Jesús, mach yoc yin̈ ta chab'il circuncisión ju mato machoj, to ha' k'a yilal, ha' ja'ni yuluj co c'ul yin̈ Comam, cat co yeniloj ta caw ẍjoche jet-anmail. 7Hexti' t'in̈anxatic'a heyecoj, yaja' ¿mac x'a'ni he c'uluj yuxin matxa cheyijye' cuyb'anil st'in̈anil yeyi? 8Haxca mataj Comam Dios xquex awtencoj yin̈, mataj Comam x'a'ni he c'uluj. 9Tijab' yin̈ he c'ul to ni'ann̈e yan̈al pan ch'a'ni howb'oj sunil ixim harina, ẍi. 10Yin̈ Comam Jahaw ẍcawxi hin c'ulan ta mat nanoj chu he txumni tzet ye co colb'anil lan̈an walni ti'an. Yaja' naj ch'a'ni he c'uluj he yetantoj he b'a ti', ch'a'laxoj sya'tajil tet naj yu Comam, mach yoc yin̈ maca. 11Hex wuẍtaj hex wanab', k'inaloj ta yehn̈e hin pujb'anc'ojan ta yilal co chani circuncisión, machmi chin scaj heb'jetb'i israelan. Yin̈ hactu', matxam ẍchiwacoj sc'ul heb'jetb'i yet xjalnic'oj scamical Comam Cristo yin̈ culus. 12Heb'naj chex etan tu', k'a' c'ul mi ta ma'kb'il scupniltoj heb'naj hune' stz'aj swinajil tu'. 13Hexti', quex awtelaxi yu he colchacan yul sk'ab' ley, yaja' matoj yu, cat heyuten xtx'ojal chal he c'ul. Machoj, to ha' heyet yu heyochen he b'a colwan̈wej teyin̈ hunun hex. 14Haxca sunil tzet chal ley, hune'xan̈e chejb'anileal chucanoj, chalni: Haca' he yan̈en he b'a, hactu' he xahann̈en mactaj aycoj he cawilal. 15Caw nann̈e heyu, taj yehn̈e he ya'ni howal, che cajquen he b'a, taj hex che tan̈tzeloj he b'a. 16Yuxin ẍwal teyetan, wuẍtaj wanab', haca' chal Yespíritu Comam Dios cheyute he b'a, matxa haca'oj chal yec'najil heyanma. 17Haxca hej tzetet tx'oj choche yec'najil janma, paq'uinajcoj yin̈ tzet chal Comam Espíritu. A tzet chal Comam Espíritu paq'uinajpaxcoj yin̈ tx'oj chochetoj yec'najil janma. Ẍpaq'uicoj hune' yin̈ hune'xa, yuxin machu heyuni b'aytet chal he c'ul. 18Yaja' ta ha' tzet sye Comam Espíritu jet, ha' ẍco yijye, yin̈ hactu' matxaon̈coj yalan̈ ley. 19Ixtan̈ jilni hej tzetet chu anma choche yub' tzet chal snimanil: Ẍto ixli, say swinaj, chu hej tzetet quistal yin̈ snimanil, ẍpalc'on yib'an̈ sleyal, 20shak'e hej tioẍ, ẍcunli, ẍchiwacoj sc'ul yin̈ yetb'i, ch'a'wi howal, caw sawen. Caw lemb'il ẍtit lemna chila, ch'oc spohotoj anma, 21ẍchiwa sc'ul haxca ay tzet ay hunujxa anma, uc'um te', tzet swa'i, ayto pax lahan b'oj ti' matxa ẍwalan. Ẍwal teyet hunecxaan, mac ch'uten hactu', mach'ocoj yul sk'ab' Comam Dios. 22Wal sc'ulch'anil cha' Comam Espíritu jet, ha' jochen co b'a, tzalalal ẍjute co b'a, ak'anc'ulal chon̈ ehc'oj, ch'ijcha sya'tajil ju, sc'ulch'anil ẍjute co b'a xol jet-anmail, sc'ulaln̈etic'a ẍju yin̈ jet-anmail, yijyom ẍjute co b'a yin̈ tzetet ẍco ta'we juni, 23ayojon̈ ni'anb'ail b'oj co cacha' co b'a. Yin̈ hunk'aan ti' mach ley scachni juni. 24Yuxin hayon̈ hon̈ yet-xa Comam Cristo Jesús, xax jacan yec'najil janma b'oj hej tzet tx'oj ẍjoche jub', haca'tic'a xax jacan̈ yin̈ culus. 25Haxca ib'il sk'inal Comam Espíritu ju, ehojon̈c'oj haca' chal sc'ul Comam. 26Mach ẍjute lolo'al, mach ẍco b'uchb'e co b'a, machca ẍchiwacoj co c'ul yin̈ jetb'i.


Copyright
Learn More

will be added

X\