G'ALATAS 4

1Ay hunxa yechel chiwalan teyet. K'inalo hunu nich'an unin chischah ismajul tet ismam, caw yahawil chuco yin̈ tzet ay ismam tu', yaj xin yet nich'anto caw maẍto yip yin̈ tzet chiak'lax ismajulo tu', to haca' to chejab yehi. 2Yet nich'anto ay mac chitan̈eni, yeb xin ilbiltopaxo hune' ismajul tu' masanto yet ch'apni istiempohal bay halbilcano yu ismam, cat yoccano yahawo yin̈ ismajul tu'. 3Caw xin hac tu' je han̈on̈ ti'; yet yalan̈tocanoj ayon̈ayo yalan̈ yip sunil tzet chal anma. 4Haxa yet yijni isba yapni istiempohal xin, yaniti Comam Dios Isc'ahol, pitzc'ana yin̈ hune' ix ix yalan̈ yip isley naj Moisés. 5Hul Comam yun̈e con̈yinilo yalan̈ ley, yeb yun̈e con̈ischahni Comam Dios yuninaloj. 6Yun̈e isyenilo Comam tato caw yuninalxa Comam jehi, yuxin yati Comam Yespíritu Isc'ahol yul janma. Yu Yespíritu Comam tu' yuxinto chijal tet Comam Dios yin̈ sunil janma haca' ti': “Mam,” con̈chi, yin̈ caw sunil coc'ul. 7Wal tinan̈ xin, matxa chejabo jehi, to caw yuninalxa Comam jehi. Yu hune' tu' xin, caw el yin̈ isc'ul Comam Dios yak'ni hune' comatan, yaj yu Comam Jesucristo, Isc'ahol Comam tu'. 8Yet yalan̈to tu' yet maẍto cheyohtan̈elo Comam Dios, caw chejab heyehico tet huntek'an chal anma diosalil. Wal xin, caw mach dioso huntek'an tu'. 9Tinan̈ xin, heyohtaxa Comam Dios sic'lebil, chiwalpaxojan teyet tato caw ohtabilexxapaxo yu Comam. ¿Tzet yin̈ yuxinto chexmeltzopaxto yin̈ huntek'anxa nan cuybanilehal caw mach t'in̈ano yehicoj, cat heyocpaxo ischejabo hunelxa? 10Walex hex ti', cheyije k'in̈ chiec'tzelax yin̈ isbi tz'ayic, yeb yin̈ isbi ixahaw, yeb yet chishelni isba tiempo, yeb k'in̈ chiec'tzelax yin̈ hunun habil. 11¡Caw chioc yin̈ inc'ulan yet chinnanitijan, wak'a tato caw nabn̈e quinmunlahan texol! 12Hex wuẍtaj, hex wanab, caw chiwalan teyet, lahanojab cheyute henabal haca' innabalan, yuto yet wec'an texol wute innabalan haca' hex. Wal xin matolo yu ay hunu istx'ojal heyute win̈an yuxin hac tu' walnitojan teyet, machoj. 13Wal xin caw heyohtaxa ta hayet babelal, yet walnic'ojan cuybanile yet colbanile teyet caw ya'ayinan yu hune' yabil. 14Ha' hune' yabil tu', caw ilwebal teyin̈, yaja' mach quinhehinc'uln̈ehan, mach xin quinheman̈c'otojan yu hune' yabil tu'. Wal xin caw haca' hunu ischejab Comam Dios satcan̈, hac tu' yu quinhechahnihan, yeb haca' caw Comam Jesucristo. 15¿Tzet yin̈ yuxin matxa hune' tzalahilal tu' yul heyanma tinan̈? Chiwalan hune' isc'ulal ti' teyin̈, hex ti' caw heyoche heyilti isbak' hesat heyak'ni wetan yu isc'ulch'anil hec'ul win̈an. 16Wal tinan̈ xin, ¿tom ayco inhowalan teyin̈ yet chiwalnitojan isyelal ti' teyet? 17Ha' huntek'an anma chexmonten tu', caw ayco yanma ebnaj teyin̈, yaja' xin caw mach c'ulo nabil teyin̈ yu ebnaj. Ton̈e choche ebnaj quexyik'alo coxolan̈ yun̈e heyanico heyanma yin̈ ebnaj. 18Caw c'ul janico anma yin̈ coc'ul, yaja' tan̈e c'ul chiconaco yin̈, yeb tato istoholal nabil ju. Aytam sak'al ta hac tu' chinheyutehan yin̈ sunilbal tiempo, maẍn̈etaj yet ayinan tec'atan̈ chinheyanicojan yin̈ hec'ul. 19Hex ti' caw haca' wuninalan heyehi, lan̈an yec'ya' wanmahan hunelxa heyu, haca' hunu ix ix chiaben isya'il yet chiwatx'i isc'ul. Yaj mach chisbej wabenan hune' isya'tajil ti' masanto chiwatx'icanico Comam Jesucristo teyin̈. 20Majal ayinan texol tinan̈ yun̈e insaynihan hunuxa tzet chiyu intzotelan teyet. Wal xin caw c'aynajilo inc'ulan teyin̈. 21Maquex chexmeltzopaxto heyijen tzet chal isley naj Moisés heyalni, halwe wetan: ¿Tom caw maẍto bay cheyabe tzet chal hune' ley tu'? 22Chal yul Yum Comam Dios tato ay cawan̈ isc'ahol icham Abraham; hune' naj yeb ix Agar, ix chejab; hune'xa naj xin yeb ix Sara, ix caw yixal icham Abraham tu'; ix Sara tu' mach chejabo ix. 23Naj Ismael, yunin ix Agar, mach c'aybalo c'ule yu ispitzc'a naj. Wal naj Isaac, yunin ix Sara, c'aybalc'ule yu ispitzc'a naj yu Comam Dios, yuto caw ixnamxa ix yet ispitzc'a naj, yun̈e yijni isba tzet haltebilcano yu Comam Dios yin̈ naj. 24Ha' cawan̈ ebix tu', yechel cabeb istrato Comam Dios ye ebix. Ix Agar, ix meba' yehi, yechel hune' trato iswatx'e Comam Dios bey iswi' witz Sinaí, yuxinto sunil macta ayco yin̈ hune' trato tu', haca' ta pitzc'ana yu yoc chejaboj. 25Ix Agar tu', yechel istrato Comam Dios yak' tet naj Moisés bey witz Sinaí yul ismajul Arabia, yechelpaxo con̈ob Jerusalén ye ix. Anma ay yul con̈ob Jerusalén tu', ayco yalan̈ ley ak'bil bey iswi' witz Sinaí. 26Wal hune'xa istrato Comam Dios xin, yechel ix Sara yixal icham Abraham yehi, yuto mach chejabo ye ix yalan̈ ley. Yaja' wal hune' Jerusalén ay yul satcan̈, mach ayoco yalan̈ chejbanile, han̈on̈ ti' xin yuninal jehi. 27Yuto chal yul Yum Comam Dios: Hach ix machi hawunin, yeb maẍtic'a chil yin̈ hunu yunin, tzalahan̈. Awan̈ yin̈ tzalahilal hach maẍtic'a hawohtajo isya'tajil ispitzc'a niẍte unin, yuto ha' ix ix hinbilcanoj caw tx'i'alto yunin ix sata ix ay yichamil, ẍiayoj. 28Hex wuẍtaj, hex wanab, hex ti' haca' naj Isaac heyehi, uninale halbilcano yu Comam Dios ta chipitzc'ahi. 29Yet payxa tu' naj mach c'aybalc'ule yu ispitzc'ahi, caw caj yil naj naj pitzc'a yu yip Comam Espíritu Santo. Haca' yu iscajlax naj Isaac yu naj Ismael, hac tu' xin yepaxo tinan̈. 30Yaja' ¿tzet ẍi yul Yum Comam Dios? Wal xin chal haca' ti': “Tzumbeto ix chejab yeb yunin, yuto naj yunin ix tu', caw mach chu yak'ni cabo isba naj yin̈ tzettaj chischah naj yunin ix mach chejaboj,” ẍiayoj. 31Yuxin, hex wuẍtaj, hex wanab, wal han̈on̈ ti' mach yuninalo ix chejab jehi, to yuninal ix mach chejaboj.

will be added

X\