G'ALATAS 4

1Ha' ch'elicoj tzet ẍwal ti'an: K'inaloj ay hunuj ni'an unin schab' sunil tzetet ay smam tu', yahaw chub'coj yin̈ sunil tzet schab' tu', yaja' yulb'al ni'anto, maẍto yetoj, haca'to chejab' yeyi. 2Yulb'al ni'anto, aycoj mac ẍtan̈eni b'oj mac ẍcuyni masanto ch'apnoj stz'ayicalil b'ay chala' smam ta ch'ocoj yahawoj. 3Hactu' jeyi. Yet yalan̈to, ayon̈tocoj yalan̈ schejb'anil satyib'an̈k'inal ti'. 4Yaja' yet xijni sb'a b'oj x'apni stz'ayicalil, xatij Comam Dios Sc'ahol, xpitzc'a yin̈ hune' ix ix, b'oj x'ehc'oj yalan̈ sley ya' Moisés. 5Ha' xcon̈ iniloj yul sk'ab' ley tu', yun̈e on̈ schani Comam Dios yuninaloj. 6Yun̈e syeni Comam ta yuninalxa Comam jeyi, xatij Yespíritu Sc'ahol yin̈ janma, yuxin yu Yespíritu tu' sunil co c'ul ẍjalni: ¡Mam! yin̈ Comam Dios. 7Yuxin tinan̈, matxa chejab'ojon̈, to yuninalxa Comam jeyi. Yuxin hayon̈ hun ẍco chab' tzet ch'a'a Comam jet. 8Yet yalan̈to, yet maẍto cheyohtajn̈e Comam Dios, chejab'to heye tet hej tzetet chal anma sdiosoj, yaja' yin̈ caw yeli mat diosoj. 9Tinan̈ heyohtajxa Comam, mato k'a' t'in̈an jalni ta ohtajb'ilexxa yu Comam, ¿tzet yuxin chex meltzo yin̈ hunk'aan cuywab'al mach yelapnoj yeyi? ¿mato cheyoche he can schejab'oj hunecxa? 10Hexti' chim heyala ta chex can c'ulal yul sat Comam Dios yet cheyec'tzen hunk'aan stz'ayicalil hej k'in̈, hacana sk'in̈ x'ahaw, b'oj sk'in̈ yet shelni sb'a yib'an̈k'inal, b'oj hej k'in̈ ch'ec' hunun hab'il. 11¡Caw ẍtac hin c'ulan ẍwalnian, wac'am nab'an̈e xquin munla te xolan! 12Hex wuẍtaj hex wanab', yuch'antioẍ chin k'an teyetan, lahan cheyute he nab'al haca' hin nab'alan, haxca yet xquin ec' te xolan xquin ec' wia' tzet ye he nab'alan.Matoj ay hunuj tx'oj xeyu win̈an, yuxin ẍwalan. 13Tijab' yin̈ he c'ul ta yu hune' yab'il x'oc win̈an yuxin xquin apni te xolan. Hactu' xu walni tzoti' yet colb'anil teyet yin̈ sb'ab'elalan. 14Hune' tzet we tu'an haca' hune' ilweb'al xu ya'lax teyet, yaja' mach xquin he yahan, machca xquin he pahtojan, to ha' heyet haca' hune' yángel Comam Dios xu hin he chanian, mato haca' caw Comam Cristo Jesús. 15¿Tzet yuxin matxa hune' tzalalal tu' yin̈ heyanma tinan̈? Yin̈ caw yeli nan wuan, ta xu heyu, mam heyiltij sb'ak' he sat xeya'ni wetan. 16Tinan̈ ¿tomxa hin he cajan haxca ẍwal st'in̈anil teyetan? 17Hunk'aan anma chex monten tu' caw chex yacoj yin̈ sc'ul jilni, yaja' mat c'uluj nab'il yu. Ton̈e choche hex spoholoj win̈an yun̈e heyanicoj heyanma yin̈ heb'naj. 18Caw c'ul ta chin heyacoj yin̈ he c'ulan, yaja' tan̈e c'ul nab'il heyu b'oj ta stohb'alk'inal hactu' cheyute, mat han̈c'aoj yet ayin te xolan. 19Hex xahan ay wu ti'an, caw ch'ec' ya' wanma hunecxa heyuan, haca' hune' ix ix toxa ẍwatx'oj sc'ul, hactu' wean, yaja' ẍto wab'e' hune' sya'il tu'an masanto ẍlahc'oj he nab'al haca' snab'al Comam Cristo. 20Oẍimi ayin te xol tinan̈an yun̈e hin sayni hunujxa tzet chu walni teyetan. Tinan̈ xin, caw b'isc'ulal we heyuan. 21Hex chex meltzo pax he yijye' tzet chal ley heyalni, ¿tox mach b'ay cheyab'e tzet chal hune' ley tu'? 22Chala ta cawan̈ sc'ahol ya' Abraham ẍb'ina ti': Hune' naj yet ya' b'oj hune' ix chejab', hune'xa naj b'oj caw yixal ya'. Ix tu', mat chejab'oj ix. 23Naj yunin ix chejab' tu', haca' chu co pitzc'a satyib'an̈k'inal ti' xu spitzc'a naj. Wal yunin ix mat chejab'oj tu', xpitzc'a naj yu yijni sb'a tzet halteb'ilcan yu Comam Dios. 24- 25Ha yelapnoj ye heb'ix cawan̈ ti', yechel cab' lahc'ulal ye heb'ix. Ix chejab' Agar yechel lahc'ulal xt'in̈ican b'et switzal Sinaí ye ix. Hune' witz tu' b'et Arabia aya, yechel con̈ob' Jerusalén ay tinan̈ yeyi. Mactaj aycoj yin̈ hune' lahc'ulal tu', yalan̈ chejb'anile ẍpitzc'ayi haxca anma ah Jerusalén aycoj yalan̈ ley ab'il b'et switzal Sinaí. 26Walon̈ hayon̈ ti' hon̈ yet-xa hune' con̈ob' Jerusalén ay yul satcan̈. Yuxin matxa yalan̈oj schejb'anil hune' ley tu' ayon̈coj. 27Chal Yum Comam Dios: Hach ixach mach hawunin chawil yin̈, tzalaan̈.Awan̈ yin̈ ip, hach machawab'e sya'tajil spitzc'a unine tawin̈,haxca k'a' tx'ihal yunin ix ix tin̈chab'ilcanoj chila' yin̈ sataj ix ay yichamil. 28Hex wuẍtaj hex wanab', haca' naj Isaac jeyi. Uninale halteb'ilcan yu Comam Dios jeyi. 29Yet payxa, naj c'ahole xpitzc'a haca' co pitzc'a satyib'an̈k'inal ti', caj xil naj naj c'ahole xpitzc'a yu scan̈il ye Espíritu. Haca' xu yet payxa tu', hactu' ye pax tinan̈. 30Yaja' nawejtij tzet chal Yum Comam Dios: Tzumb'etoj ix chejab' tu' b'oj yunin, haxca naj yunin ix tu', mach yoc naj yin̈ tzetet ay smam. Haxca naj yunin ix mat chejab'oj tu' ha' naj ay yet sunil. 31Yuxin hayon̈ ti' hex wuẍtaj hex wanab', maton̈ yuninoj ix chejab', to yunin ix mat chejab'oj jeyi.


Copyright
Learn More

will be added

X\