G'ALATAS 3

1¡Tzet he sucal hex ah Galacia hexti'! ¿mac xhul a'noj somk'aojtoj yul he wi'? ¿tox mat hab'anoj xu syelax scamical Comam Cristo Jesús teyet, Comam x'alaxcan̈ yin̈ culus? 2Han̈c'a ti' chin k'amb'e teyetan: ¿Tom xe cha Yespíritu Comam Dios yu he yijyen sley ya' Moisés, mato yu heya'ni yuluj he c'ul yin̈ tzoti' yet colb'anil xeyab'e? 3Caw ẍpalc'on he sucal. Yet xquex ichitij, yin̈n̈e Yespíritu Comam xcawxi he c'ul, haxa tinan̈ che tz'ajb'a he colb'anil yu tzetet cheyu heyalni. 4Toxc'anab' nab'a'n̈e xquex ec' ya' yu he chani tzoti' c'ul yet colb'anil. ¡Oẍimi mat nab'a'oj! 5Yet xa'ni Comam Dios Yespíritu teyet, xa'ni c'ayb'alc'ule te xol, ¿tzet yuxin hactu' xute Comam? Matoj haxca che yijye tzet chal ley, machoj, to haxca che ya' yuluj he c'ul yin̈ tzoti' yet colb'anil xhal-lax teyet. 6Hactu' xa'le ya' Abraham, xa' ya' yuluj sc'ul yin̈ Comam Dios, yuxin xal Comam ta ẍcan ya' c'ulal yul sat Comam. 7Tinan̈ yilal heyohtajn̈eni ta mactaj cha' yuluj sc'ul yin̈ Comam, yic'al ya' Abraham yeyi. 8Yalan̈to stz'ib'n̈elaxcan yul Yum Comam Dios to hex mat israeloj hexti', chex canoj c'ulal yul sat Comam haxca cheya' yuluj he c'ul yin̈ tzet xal Comam. Yuxin yalan̈to x'a'lax hune' tzoti' c'ul tet ya' Abraham chalni: Sunil hej con̈ob' b'ay ẍwa'a' sc'ulch'anil hin c'ul hawuan, ẍi. 9Yuxin mactaj cha' yuluj sc'ul yin̈ tzet xal Comam, scha sc'ulch'anil sc'ul Comam, haca' xu schani ya' Abraham, haxca ha' ya' b'ab'el ya'naj yuluj sc'ul yin̈ tzet xal Comam. 10Mac yin̈n̈e syijyen sley ya' Moisés ẍcawxi sc'ul, ẍcan yalan̈ stz'acti' Comam Dios, haxca chal Yum Comam: Tz'acti'n̈eb'il mac mach chilanoj syijyen sunil tzet ahayoj yul te' Hum yet ley. 11Yuxin hab'an yeyi to mach mac ẍcan c'ulal yul sat Comam Dios yu syijyen tzet chal hune' ley tu', haxca chal Yum Comam: Mac ch'a'ni yuluj sc'ul yin̈ Comam Dios ẍcan c'ulal yul sat Comam, yuxin ay sk'inal mach stan̈b'al. 12Haxca sley ya' Moisés machala ta yilal ẍja' yuluj co c'ul cat ya'ni co k'inal. To ha' chala: Ta che yijye tzet chal ley, che cha he k'inal yu. 13Yaja' Comam Cristo xcon̈ colni tet tz'acti' chal ley, haxca ha' Comam x'ijni hune' tz'acti tu' co heleloj, haxca chal Yum Comam: Tz'acti'n̈eb'il sunil mac ch'alaxcan̈ camoj yin̈ hune' te' te'. 14Hactu' xa'le Comam Jesús yun̈e stzujchapax sc'ulal sc'ul Comam yu anma mat israeloj, hune' halteb'il tet ya' Abraham. Hactu' x'elpaxcoj yun̈e co hunil ẍco cha Yespíritu Comam Dios halteb'il jet yu ja'ni yuluj co c'ul yin̈ Comam. 15Hex wuẍtaj hex wanab', caw scomonaln̈e chu hin tihniloj hune' ti' teyetan. Yet ẍco t'in̈b'ancan hunuj lahc'ulal tinan̈, ẍja'canoj firmar hune' te hum tu', matxa mac chu yanicoj yak'b'il, ni yiniloj. 16Hactu' xu st'in̈b'acan Comam Dios hune' lahc'ulal b'oj ya' Abraham b'oj tet yic'al. Machal Yum Comam Dios, hej hawic'al, haxca mat tx'ihaloj, to hune'n̈e, ha' chute yalni, hawic'al, ẍi. Ha' hune' chaltu', ha' Comam Cristo. 17Ha' yelapnoj ye hune' ẍwal ti'an: To xa' Comam Dios lahc'ulal b'oj ya' Abraham, st'in̈b'ancan Comam. Cuatrocientos treinta hab'ilxa swatx'encan Comam lahc'ulal tu' yet xto hul sley ya' Moisés. Yuxin machu sc'ayniloj ley tu' lahc'ulal xa' Comam tu', chiniloj yip tzet halteb'il tet ya' Abraham yu Comam. 18K'inaloj ta yu co yijyen ley cha' Comam Dios tzet halteb'il jet, matxam chu jalni ta sab'eal tzet xalte Comam tu'. Yaja' yeli halteb'ilcan yu Comam ya'ni tet ya' Abraham tu' ta mataniln̈e yeyi. 19¿Tzet xin smunil sley ya' Moisés chaltu'? X'a'lax tzujanilxa yu syeniltoj to tx'ojaln̈e chu anma. X'a'laxi masanto chul yic'al ya' Abraham, hune' mac yet ay schani tzet halteb'il yu Comam. Hune' ley tu' ángeles x'a'ni tet con̈ob', ya' Moisés aycoj xolb'al tzoteloj. 20Yaja' mach yeẍtooj ay mac ch'oc xolb'al tzoteloj ta halteb'il hunuj tzetet, haxca han̈c'a Comam Dios xhalteni. 21¿Tom scajque sb'a sley ya' Moisés tu' yin̈ tzet halteb'ilcan yu Comam Dios? Machoj. Haxca ta ẍc'oji ley ya'ni co k'inal, chim hon̈ can c'ulal yul sat Comam Dios yu co yijyen ley tu'. 22Yaja' ha' chute Yum Comam yalni to sunil mac aycan yalan̈ mule. Yuxin mactaj cha' yuluj sc'ul yin̈ Comam Jesucristo scha colb'anil halteb'ilcan yu Comam Dios. 23Yet maẍto chul mac b'ay ẍja' yuluj co c'ul, ib'ilon̈to yu hune' ley tu', lan̈an jechmanc'oj syelax mac b'ay ẍja' yuluj co c'ul tu'. 24Haca' ye naj chejab' ch'initoj niẍtej unin tet naj cuywaom, hactu' xu hon̈ yinitoj ley tet Comam Cristo, yun̈e chu ja'ni yuluj co c'ul yin̈ Comam cat co can c'ulal yul sat Comam Dios. 25Yaja' tinan̈ xax ja' yuluj co c'ul yin̈ Comam, yuxin matxaon̈coj yul sk'ab' hune' ley chon̈tic'a b'eytzen tu'. 26Haxca yu heya'ni yuluj he c'ul yin̈ Comam Cristo Jesús, yuxin yuninalxa Comam Dios heyeyi haca' jean. 27Yuxin yet xeyi'ni ha' x'ixtan̈wicanoj to haca'xa ye Comam Jesús, hacxatu' heye haca' jean. 28Matxa yoc yin̈ ta israelon̈ mato mat israelojon̈. Matxa yoc yin̈ ta chejab'on̈ mato jin̈ co b'a. Matxa yoc yin̈ ta winaj mato ix, haxca huninajon̈xacoj yin̈ Comam Cristo Jesús, hune'xan̈e je yin̈ Comam. 29Yuxin ta hex yet-xa Comam Cristo, yic'alxa ya' Abraham heyeyi haca' jean, hexxa hun yin̈ tzet halteb'ilcan yu Comam Dios tet mac yic'al ya' Abraham tu'.


Copyright
Learn More

will be added

X\