G'ALATAS 2

1Yin̈xa iscan̈lahon̈eb habil intohan bey Jerusalén yeb juẍta Bernabé, yebpaxo juẍta Tito. 2Quinbeyc'ojan, yuto Comam Dios halni wetan tato chintohan. Hayet ayinan bey Jerusalén tu', cocutxbanayo cobahan̈ yeb ebnaj chiijbali xol ebnaj juẍtaj, walnihan tet ebnaj yin̈ cuybanile yet colbanile chiwalic'ojan xol anma mach Israeloj. Walan hune' ti' tet ebnaj yun̈e isnanilo ebnaj tato t'in̈an wehicojan, yeb xin ta mach nabn̈eho chinmunlahan. 3Ha' hun juẍta Tito tzujan jintajan̈ waxan̈ca griego yic'al naj, yaja' machi hunu mac ischilba yalni tato masan chiyak' circuncidar isba naj. 4Waxan̈ca xin ay huntek'an ebnaj ton̈e chal isba yuninalo Comam Dios, oc ebnaj coxolan̈ yun̈e yoc ebnaj yilno hune' cocolbanil yin̈ Comam Jesucristo; yuto yoche ebnaj chon̈meltzohan̈ hunelxa yalan̈ isya'tajil isley naj Moisés. 5Yaj xin, caw maẍtic'a nino jabetojan̈ tzet yal ebnaj yuto caw chijochehan̈ ta ayn̈etic'aco isyelal hune' Tzoti' c'ul yet colbanile ti' teyin̈. 6Yet walnihan sunil cuybanile tu', caw machi hunuxa ac' ak'laxcano incuyu'an yu ebnaj ijbalom tu'. Ha' tzet ye ebnaj yet yalan̈tocanoj, caw machi wocan yin̈, yuto yul sat Comam Dios caw lahanon̈n̈e cosunil. 7Machi hunuxa nan cuybanile ahti yul isti' ebnaj, wal xin caw istxum ebnaj tato ha' Comam Dios ak'n̈e hune' inmunilti'an yin̈ walnic'ojan Istzoti' Comam Dios xol anma mach Israeloj, haca' yu yalaxico naj Pedro munlaho xol wet con̈ob Israelan. 8Ha'tic'a Comam Dios ak'n̈e ishelanil naj Pedro yoc cuywal xol anma Israel, ha'tic'apaxo Comam ak'n̈e inhelanilan wocan cuywal xol anma mach Israeloj. 9Yuxin juẍta Jacobo, yeb juẍta Pedro, yeb xin juẍta Juan, ayco ijbalo yin̈ ebnaj ayxaco yul isk'ab Comam, caw txumchalo yu ebnaj tato Comam Dios ak'n̈e hune' inmunilti'an yin̈ weltojan walnoc'ojan Istzoti' Comam Dios xol anma mach Israeloj. Ha' hune' ti' yeniloj tato con̈ischahan̈ ebnaj yetbihoj. Yak'ni ebnaj isk'ab wetan yeb xin tet juẍta Bernabé, caw xin chitzala isc'ul ebnaj ta chon̈munlahan̈ xol anma mach Israeloj, walpaxo ebnaj xin xol anma Israel cancano ebnaj munil. 10Cachan hune' ti' yal ebnaj jetan̈, tato yilal conanitijan̈ ebnaj meba', hune' tu' nabiltic'a wuhan inwatx'enan. 11Yet yapni juẍta Pedro yul con̈ob Antioquía, incachan juẍta yin̈ sat sunil ebnaj juẍtaj, yuto maẍtaj istoholal chiswatx'e juẍta tu'. 12Yuto yet yalan̈to maẍto chiapni huntek'an ebnaj chejbil yu juẍta Jacobo, juẍta Pedro tu' chiwa' xol ebnaj ayxaco yul isk'ab Comam Dios mach Israeloj. Haxa yet yapni ebnaj tu' xin, niẍtejal ishitzilo naj, ispohnilo isba naj xol ebnaj mach Israelo tu' yu xiwcan̈ naj tet ebnaj chalni ta yilal yak'lax circuncidar ebnaj mach Israeloj. 13Aypaxo xin ebnaj juẍta Israel oc tzujno yinta tzet isbeybaln̈e juẍta Pedro tu', hacpax tu' juẍta Bernabé isbeybaln̈epaxo naj hune' sucal tu'. 14Yuxin hayet wilnihan tato mach chisyije ebnaj haca' yalni Tzoti' yet colbanile, walnihan tet juẍta Pedro yin̈ sat sunil ebnaj cutxanico tu': “Wal hach ti' Israel hach, yaja' chachec' haca' anma mach Israeloj, yaja' tinan̈ xin ¿tzet yin̈ yuxinto chawal tet ebnaj mach Israeloj tato yilal chic'o ebnaj isbeybal anma Israel?” quinchiyan tet juẍta tu'. 15Wal han̈on̈ Israel jic'al ti', mach yic'alo huntek'anxa nan con̈obal chihallax mulumal jehi. 16Yaj xin johtaj tato machi hunu mac chican c'ulal yul sat Comam Dios yu isley naj Moisés, wal xin chican anma c'ulal, yaja' cachann̈e yu yanico yanma yin̈ Comam Jesucristo. Hacon̈ tu' han̈on̈ ti' xajayto yul janma yin̈ Comam Jesucristo yuxin xacon̈can c'ulal yul sat Comam Dios, maẍtaj yu coyijen tzet chal ley. Wal xin caw machi hunu mac chican c'ulal yul sat Comam Dios yu isyijen tzet chal isley naj Moisés. 17Tato chicosay joc c'ulal yul sat Comam Dios yu yip Comam Jesucristo, chal yelapnoj ta mulumon̈ haca' anma mach Israeloj. Yaja' ¿tom ha' Comam Jesucristo chon̈anico mulumal? ¡Machoj! 18K'inalo tato chinmeltzohan wintajan, lahwi tu' cat wocan inwatx'enpaxojan sunil tzet bejbilcano wuhan yet payxa, han-caw-inan chiwaco inmulan yin̈ haca' tu'. 19Wal haninti'an camnajinxalojan yin̈ ley. Ha' hune' ley tu' quinak'ni camojan yun̈e caw witzitzbilojan yin̈ Comam Dios. 20Wal tinan̈, ha' yul sat Comam Dios, t'un̈aninxacan̈an yin̈ te' culus, yuxin matxatajinan itzitzinan tinan̈, haxa Comam Jesucristo itzitz win̈an. Ha' tzet chinwatx'ehan tinan̈ xin cachann̈e wanico wanmahan yin̈ Isc'ahol Comam Dios, ha' chiwuhan. Caw isyelo Comam ta xahan ayinan yu, yuto yak' camo isba win̈an. 21Mach chicoyah isc'ulch'anil isc'ul Comam Dios. Wal xin ta yu coyijen ley yuxin chon̈can c'ulal yul sat Comam Dios, caw nabn̈em cam Comam Jesucristo chal tu'.

will be added

X\