G'ALATAS 2

1Can̈lan̈eb'xa hab'il tu' xquin b'ey pax Jerusalén b'oj ya' Bernabéan, tzujan ya' Tito jin̈an. 2Xquin b'eyc'ojan haxca Comam Dios xyeni wetan ta chin toan. Yet ayin Jerusalén tu'an, xco yamb'a co b'a b'etu' co chuquil b'oj heb'ya' ab'ilcoj swi'aloj iglesiaan. Xwalni tet heb'ya'an tzet chu hin cuywa yin̈ tzoti' yet colb'anil chin pujb'ac'oj xol anma mat israeloj. Xwalan tzet chu hin cuywaan yun̈e wilnian ta t'in̈an wecojan haxca taj nab'an̈e xquin munlaan. 3Waxan̈ca mat israeloj ya' Tito tu', mach schilb'a heb'ya' yalaxc'oj circuncisión yin̈ ya'. 4Xco yamb'an co b'aan haxca yet ayxana tu' ay hunk'aan heb'naj switz'icoj sb'a co xolan. Chalni heb'naj ta xax ya' heb'naj yuluj sc'ul yin̈ Comam, yaja' ton̈e' choche heb'naj yab'eloj tzet yuxin colb'ilon̈xaloj yalan̈ sley ya' Moisés yu Comam Cristo Jesúsan. Yocheb'al heb'naj, xcon̈ meltzo yalan̈ ley tu' hunecxaan. 5Yaja' mach ninoj xco yijye tzet chal heb'najan, haxca ta machoj, xmam c'aytoj st'in̈anil tzoti' yet colb'anil x'a'lax teyet. 6Mach hunujxa tzetet ac' tz'ajb'acoj heb'ya' aycoj swi'aloj tu' yin̈ cuyb'anile xwa' tet anmaan. (Yin̈ caw yeli mach wocletoj tzet smunil heb'ya'an haxca yul sat Comam Dios lahan anma sunil.) 7Mach hunujxa hin cuyb'anil xa' heb'ya'an, to ha' xuteloj sb'a to xtxumiloj heb'ya' ta Comam Dios x'a'ni hin chejb'anil hin to wa'noj tzoti' yet colb'anil xol anma mat israelojan, haca' xu yalaxcoj ya' Pedro munlaoj xol anma israel. 8Hatic'a Comam Dios x'a'ni scan̈il ye ya' Pedro yoc ẍchejab'oj xol anma israel, hatic'a Comam x'a'ni scan̈il we woc ẍchejab'oj xol anma mat israelojan. 9Yuxin ya' Jacobo, ya' Pedro b'oj ya' Juan, aycoj swi'aloj iglesia yalb'anil, xtxum heb'ya' to Comam Dios x'a'ni hin chejb'anil hin to walnojc'oj tzoti' yet colb'anil xol anma mat israelojan. Syeb'aniloj ta ẍcon̈ scha heb'ya' yetb'iojan, xa' heb'ya' sk'ab' wet b'oj ya' Bernabéan. Xalni heb'ya' ta ẍco lah co munla xol anma mat israelojan, wal heb'ya', xol anma israel xcan heb'ya' munlaoj. 10Han̈c'a ti' stak'e heb'ya' jetan, ta ẍco natij anma meb'a'an, ha' hune' ti' aytic'acoj yin̈ hin c'ul wunian. 11Yaja' yet xhul ya' Pedro yul con̈ob' Antioquía, xin may ya' yin̈ sat heb'ya' yamanc'oj b'etu'an, haxca mat st'in̈aniloj xu ya'. 12Yet maẍto chul hunk'aan heb'ya' yetb'i ya' Jacobo, xwa' ya' xol heb'ya' ayxacoj yin̈ Comam mat israeloj. Yaja' yet xhul heb'ya' tu', sb'ejcan ya' swa' xol heb'ya'. Xnanon ya' haxca heb'ya' tu' schilb'a heb'ya' yalaxc'oj circuncisión yin̈ heb'ya' mat israeloj. 13Ay hunk'aanxa heb'ya' israel x'oc tzujnuj yin̈ hune' tzet mat st'in̈aniloj xu ya' Pedro tu', hasta ya' Bernabé x'oc tzujnuj ya' yin̈. 14Yuxin yet xwilnian to mach syijye heb'ya' haca' yalni tzoti' yet colb'anil, xwalni tet ya' Pedro yin̈ sat sunil heb'ya' yamanc'oj tu'an: Hachti' israelach, yaja' hawalto ha wuniloj tzetet chu heb'ya' jetb'i mat israeloj. ¿Tzet yuxin haxa tinan̈ cha chilb'a ta ch'ec' heb'ya' yi'a' tzet chu heb'naj israel? quin chi tet ya'an. 15Hayon̈ti' israel jic'al, mat yic'aloj nancon̈ob'al ẍhalot ahmulal jeyi. 16Johtaj ta mach mac ẍcan c'ulal yul sat Comam Dios yu syijyen sley ya' Moisés, to yu ya'ni yuluj sc'ul yin̈ Comam Jesucristo. Yuxin hactu' je pax hayon̈ ti' xja' yuluj co c'ul yin̈ Comam Jesucristo yun̈e co can c'ulal yul sat Comam Dios, mat yuuj co yijyen tzet chal ley, haxca mach mac ẍcan c'ulal yul sat Comam Dios yu syijyen sley ya' Moisés. 17Yet xco sayni co can c'ulal yul sat Comam Dios yu Comam Cristo, ch'ixtan̈wi to ahmulon̈tic'a, ¿tox lan̈an yalni ta yu Comam Cristo yuxin ahmulon̈? ¡Machoj! 18K'inaloj ta xax wetatoj hunuj tzetetan yaja' chin meltzo pax hin watx'e'canan, chin ta'wecoj hune' tu' hin mulujan. 19Sley ya' Moisés tu' xhalni ta yilal hin caman, yuxin yul sat ley tu' camnaj hinxaan yun̈e witzitzb'ican̈ yu wanicoj smay Comam Diosan. 20Yul sat Comam Dios ayincan̈ yin̈ culus b'oj Comam Cristoan, yuxin matxa itzitzojinan, to haxa Comam itzitz win̈an. Hune' k'inal aycoj win̈ ti'an, yin̈xa chin ehc'ojan yun̈e ay scawxob'al hin c'ul yin̈ Sc'ahol Comam Diosan, Comam xquin ochenan, xanicoj sb'a yul sk'ab' camical wuan. 21Mach ẍwalan ta matzet chaliloj sc'ulch'anil sc'ul Comam Dios; yaja' ta yu co yijyen ley chu co can c'ulal yul sat Comam Dios, nab'a'n̈em xcam Comam Cristo ju chaltu'.


Copyright
Learn More

will be added

X\