G'ALATAS 1

1Hanin Pablo inti'an, ischejab Comam Jesucristo wehan. Mach anmaho chejn̈einan yeb ak'n̈e hune' inmunilti'an, to ha' Comam Jesucristo yeb xin Comam Dios Mame, Comam ak'ni itzitzbocan̈ Comam Jesucristo xol camom. 2Ha' hun ebnaj juẍta ayc'o inc'atan̈an chitz'ibn̈ento hune' carta ti' wintajan teyet hex ayexxaco yul isk'ab Comam yul ismajul tx'otx' Galacia. 3Yak'ab Comam Dios Mame yeb Comam Jesucristo isc'ulch'anil isc'ul yeb ak'anc'ulal teyet. 4Yaco isba Comam Jesucristo yin̈ camical yu comul, yun̈e con̈iscolni tet istx'ojal hune' yul sat yiban̈k'inal ti', yuto hac tu' yoche isc'ul Comam Dios Mame. 5Jala'we tzoti' c'ul yin̈ Comam yin̈ sunilbal tiempo. ¡Hacojab tu'! 6Caw chic'ay inc'ulan yuto pet heyilo heba yin̈ Comam Dios, Comam quexawten yu isc'ulch'anil isc'ul Comam Jesucristo, heyoc tzujno yinta hune'xa cuybanile nan chu yalni yin̈ tzet chu cocolchahi. 7Wal xin, matolo ay hunoxa cuybanile bay chon̈colchahi, machoj, walxinto ay mac chiak'ni etanoto henabal, chishelni cuybanile yet colbanile chiyak' Comam Jesucristo. 8Yaja' xin tato ay hunuxa mac chi'ak'ni hunoxa nan cuybanilehal teyet yin̈ tzet chu cocolchahi, mach lahano yeb hune' ak'bilcano teyet juan̈, caw yak'abayo Comam Dios ishowal yiban̈, waxan̈ca han̈on̈an̈, maca hunu naj ángel ay yul satcan̈. 9Wal xin xatic'a walan hune' ti' teyet, yaj chiwalpaxojan hunelxa, tato ay hunu mac chiec' halno hunuxa nan cuybanile texol yin̈ tzet chu cocolchahi, mach lahano xin yeb hune' chabilxa heyu, ayojab istz'acti' Comam Dios yiban̈ hune' mac lek'ti' tu'. 10Yet chiwalnitojan hune' ti', mach chiwocan yin̈ tato chitzala anma win̈an maca mach xin, walxinto ha' istzala Comam Dios win̈an ha' chinsayan, yuto ta ha' istzala anma win̈an ha' chinsayan, mach ischejabo Comam Jesucristo wehan yin̈ haca' tu'. 11Hex wuẍtaj hex wanab, chiwak'canojan heyohtan̈eloj tato hune' cuybanile yet colbanile chiwalic'ojan, mach anmaho ay yet. 12Mach anmaho ak'n̈e wetan, yeb xin mach yin̈o hunu anma cuybililo wuhan, wal xin ha' Comam Jesucristo ak'n̈e wohtan̈elojan. 13Hex ti', heyabemi yallaxi tato yet yalan̈tocanoj, yet ayintocojan yin̈ isreligión ebnaj wet con̈ob Israelan, caw ec'ya' macta ayxaco yul isk'ab Comam Dios wuhan. Caw xin wak'lenan intan̈tzenilojan. 14Yin̈ isreligión ebnaj wet con̈obtu'an, haninan caw ec'na ayincan̈an yiban̈ sunil ebnaj wet ch'iboman, yuto caw ec'na chinyijehan sunil tzet iswatx'e ebnaj jichmam. 15- 16Yaj xin, ha' sak'alil isc'ul Comam Dios quinsic'nilojan yet yalan̈to maẍto chinpitzc'ahan, quinyawtenicojan Comam munlaho yin̈ ismunil. Haxa yet yapni istiempohal haca'tic'a chal isc'ul Comam, yak'ni Comam isc'ahol wohtan̈elojan yun̈e walnic'ojan Tzoti' yet colbanile xol anma mach Israeloj. Yet hunel tu' xin, machi hunu mac tet quinbeyan ink'ambe'an. 17Mach quinbeypaxic'ojan bey yul con̈ob Jerusalén ink'ambe'an tet ebnaj ischejab Comam Jesús babel ocna insatajan. Wal xin caw yin̈ an̈e quintohan yul ismajul tx'otx' Arabia, lahwi tu' xin inpaxtijan yul ismajul tx'otx' Damasco. 18Yet lahwi oxeb habil xin, intohan wilnojan naj Pedro yul con̈ob Jerusalén; holan̈eb tz'ayic ayinan isc'atan̈ naj bey tu'. 19Yet hunel tu', machi hunuxa ebnaj ischejab Comam Jesús wilan yin̈, cachann̈ech'an naj Jacobo, naj yuẍta Comam Jesús. 20Yin̈ sat Comam Dios chiwalan teyet tato caw yel tzet chintz'ibn̈etojan teyet ti'. 21Lahwi tu' xin, intohan yulaj ismajul tx'otx' Siria yeb yul ismajul tx'otx' Cilicia. 22Wal ebnaj juẍta ay yul hunun con̈ob yul ismajul Judea tu', maẍto ohtabilojinan yu ebnaj. 23Isk'umalixto chiyabe ebnaj haca' ti': “Hune' naj caw chicajwa jin̈ yet yalan̈tocanoj, tinan̈ chiec' naj yala'c'o cuybanile yin̈ tzet chu janayto yul janma yin̈ Comam Dios, hune' yoche isc'ul naj istan̈tzeloj,” ẍi ebnaj. 24Yu hune' tu' yuxinto caw chitzala isc'ul ebnaj yin̈ Comam Dios wuhan.

will be added

X\