G'ALATAS 1

1Hayin Pablo hin ti'an, apóstolinan, yaja' mat anmaoj xquin anicojan, to ha' caw Comam Jesucristo b'oj Comam Dios co Mamwej, Comam xpitzc'ancan̈ Comam Jesucristo xol hej camom. 2Ha'hun heb'ya' juẍtaj ay tin c'atan̈ ti'an, ẍco tz'ib'n̈etoj hune' hum ti' teyet hex ayexcoj yin̈ yiglesia Comam ay b'et Galacia. 3Ya'ab' Comam Dios co Mamwej b'oj Jahaw Jesucristo sc'ulch'anil sc'ul b'oj ak'anc'ulal teyet. 4Xacoj sb'a Comam yul sk'ab' camical yu co mul, haca' chal sc'ul Comam Dios, yun̈e hon̈ scolni tet hej xtx'ojal ay satyib'an̈k'inal ti'. 5Jala'wej tzoti' c'ul yin̈ Comam stohb'alk'inal. Amén. 6Ha' Comam Dios quex awten yu sc'ulal sc'ul Comam Cristo. Yaja' caw ẍc'ay hin c'ulan haxca pettic'a xeyiloj he b'a yin̈ Comam Dios tu', xquex oc tzujnuj yin̈ hune'xa cuyb'anile nan chu yalni yin̈ tzoti' yet colb'anile. 7Yaja' matxa hunujxa tzoti' yet colb'anil. Machoj, to ha' ti' ay mac ch'a'ni somk'aojtoj yul he wi' shec'ni tzoti' yet colb'anil yet Comam Cristo. 8Yaja' ta ay mac ch'a'ni hunujxa tzoti' yet colb'anil mat lahanoj b'oj hune' ẍjal teyet ti'an, ayojab' stz'acti' Comam Dios yib'an̈, mach yoc yin̈ maca, ta hayinan, mato hunuj ángel speto satcan̈. 9Xax wal hune' ti'an, yaja' chin cayec'n̈e pax hunecxaan: Ta ay hunuj mac ch'ec' halnoj hunujxa tzoti' yet colb'anil nan ye sataj hune' xax he cha ti', ayojab' tz'acti' Comam Dios yib'an̈. 10Yet ẍwalni hune' ti'an, mach woc yin̈ tzet chal anma win̈an, tan̈e t'in̈an wecoj yul sat Comam Diosan. Ta ton̈e ẍwoche chin can c'ulal yul sat anmaan matxam schejab'oj Comam Cristo wean. 11Ẍwa' heyohtajn̈e'an hex wuẍtaj hex wanab', ta hune' tzoti' yet colb'anil ẍwalic'oj ti'an, mat anmaoj x'ichencan̈. 12Matcataj tet anma xin chaan b'oj xin cuyilojan, to ha' caw Comam Jesucristo x'a'ni wohtajn̈e'an. 13Hexti' ay mi b'ay xeyab'e yalot ta yet payxa, yet ayintocoj yin̈ sreligión wetcon̈ob' israelan, caw x'ec' ya' yiglesia Comam Dios hin cajnian, hasta xwa' yilal hin c'aynilojan. 14Yin̈ hune' religión tu' hayin k'a' ec'b'alinto sataj heb'naj ẍwetcuywian, haxca k'a' caw ẍto hin yijye hej scuywab'al jichmaman. 15Yaja' yu sc'ulch'anil sc'ul Comam Dios xquin sic'lenan yalan̈to maẍto chin pitzc'aan. Yuxin ha' x'apni stz'ayical b'ay chal sc'ul Comam, xquin yawte yin̈ smunilan. 16Xa'ni Comam Sc'ahol wohtajn̈e'an, yun̈e hin pujb'anc'oj tzoti' yet colb'anil xol anma mat israelojan. Yet hunec tu' mach hunuj mac b'ay xquin b'ey hin k'amb'e' hin b'aan. 17Machca xquin b'ey Jerusalén hin k'amb'e' tet heb'ya' apóstol ayxacoj yin̈ smunil yalan̈to maẍto chin ocan. Ha' wetan, lemb'il xquin to b'et Arabiaan, lawitu' xquin meltzo yul con̈ob' Damascoan. 18Lawi yel syoxeb' hab'il, xquin to yul con̈ob' Jerusalén wila' ya' Pedroan, holan̈eb' tz'ayic xquin can sc'atan̈ ya'an. 19Yet hunec tu' mach hunujxa heb'ya' apóstol xwilan. Han̈c'a ya' Jacobo yuẍtaj Jahaw Jesús xwilan. 20Yin̈ sat Comam Dios ẍwal teyetan ta caw yel hune' chin tz'ib'n̈e teyet ti'an. 21Lawitu' xquin to yul hej con̈ob' yet Siria b'oj Ciliciaan. 22Wal heb'ya' ayxacoj yin̈ yiglesia Comam Cristo ay b'et Judea, maẍto hin yohtajoj heb'ya'an. 23Ton̈e chab'e heb'ya' yal-laxi: Naj ẍtic'a cajwa jin̈, tinan̈ xa ec' naj yala'c'oj cuywab'al b'ay xja' yuluj co c'ul, hune' xal naj sc'aya'loj, ẍi heb'ya'. 24Yu hune' tu' caw chacoj heb'ya' smay Comam Dios wuan.


Copyright
Learn More

will be added

X\