EFESIOS 6

1Hex uninale, yijyom cheyute he b'a tet he mam he mi yu chex nanon tet Comam Jahaw, haxca hactu' caw st'in̈anil. 2Ha' b'ab'el mandamiento i'n̈e tzet xalte Comam Dios yin̈ co yijyeni, ha' chala': Xahan cheyil he mam he mi, 3yun̈e sc'ulch'anil cheyila, b'oj nahatil chex ehc'oj sat tx'otx'otx' ti', ẍi. 4Hex mame mi'e, mache ya'tij showal heyuninal, to che cuyu, che cachni, yun̈e snanon tet Comam Jahaw. 5Hex chejab', yijyom cheyute he b'a tet mac heyahaw sat tx'otx'otx' ti'. Chex nanon tet, b'oj sunil he c'ul che yijyen tzet chala, haca'ojtam ha' Comam Cristo che yijye. 6Mat yin̈ojn̈e sat he yahaw sak'al he munlayi yun̈e he can c'ulal yul sat, to majab' t'an̈anojcoj chex munlayi. Che yijyen haca' chal sc'ul Comam Dios, hacojtam Comam Cristo lan̈an he yijyeni. 7Sunil he c'ul che yijyen he munlayi, haca'ojtam Comam Jahaw b'ay lan̈an heyijyeni, matn̈etaj tet anma. 8Heyohtajxa ta wal chejab'on̈ mato jet co b'a, hantajtic'a c'ul chul jub'c'uj, hactu' spaj ẍco chab' tet Comam Jahaw. 9Hex yahaw munil hex, haca' walni tet hej he chejab' ti'an, hactu' cheyute pax he b'a. Mache yican̈ he k'ab' yin̈ he chejab', haxca lahan ayexcoj yalan̈ schejb'anil Comam Jahaw ay satcan̈, haxca mach mac xahan hinan yul sat Comam. 10Tinan̈ hex wuẍtaj hex wanab', co lin̈b'a co b'a yin̈ Comam Jahaw, yu yip Comam caw ay scan̈il yeyi. 11Haca' tz'ajb'an hune' naj sto yin̈ howal hej tzetet ch'ocnicoj yu yun̈e chu scolni sb'a yin̈ howal tu', hactu' co chani pax tzet cha' Comam Dios jet yun̈e chu co colni co b'a yin̈ hune' howal lan̈an ja'ni b'oj naj matzwalil, haxin̈wal machon̈ sub'chayi cat jayc'ay yul sk'ab' naj. 12Haxca mat caw anmaoj b'ay lan̈an ja'ni howal, to yin̈ hej espíritu tx'oj ch'ec' satcan̈, hunk'aan mac k'a' yahaw, hej autoridad, b'oj mac yahaw yecoj yin̈ sk'ejholoal satyib'an̈k'inal ti'. 13Yuxin co chab'wej tzet cha' Comam Dios jet, yun̈e yet cha'ni naj matzwalil howal jin̈, ẍtecha ju. Yet lawi stan̈c'ojcan howal tu', lin̈anon̈n̈etic'a. 14Co lin̈b'awej co b'a. Haca' scawxencoj naj soldado cincho yictaj, hactu' co cawxencoj st'in̈anil stzoti' Comam yin̈ janma. Haca' chu yanicoj naj soldado coraza yin̈, hactu' janicoj stoholal cha' Comam Dios jet. 15B'oj haca' yanicoj naj xan̈ab' yin̈ yoj, hactu' janicoj yin̈ janma co toh jalnojc'oj tzoti' c'ul ch'a'ni ak'anc'ulal. 16Cawxojab' co c'ul yin̈ Comam yun̈e chu co pahni hej ilweb'al chatij naj matzwalil jin̈. Haca' spahni heb'naj soldado tz'itte' ẍchaw k'a' yin̈ chul yin̈ naj, hactu' ẍjute. 17Haca' yanicoj naj soldado casco yin̈ swi' yet scolni sb'a naj, hactu' co colni co b'a yu colb'anil cha' Comam jet. Haca'tic'a yi'ni naj soldado yespada, ẍto naj yin̈ howal, hactu' ji'ni stzoti' Comam Dios cha' Comam Espíritu Santo jet. 18Mach co b'ejcan ja'ni joración. Ayon̈n̈etic'acoj co k'anni tet Comam Dios tzet chal Comam Espíritu jet. Nann̈etic'a ju, machon̈ pax jin̈taj, ja'awej joración yin̈ sunil mac yet-xa Comam Dios. 19A'wej pax heyoración win̈an yun̈e yet chin tzotelan cha' Comam Dios stz'ajanil hin c'ulan b'oj wip walni haca' caw yean, yun̈e wa'ni ohtajn̈elaxoj tzoti' yet colb'anil yeb'il jet yu Comam Diosan. 20Waxan̈ca ayincoj presuan, Comam Dios xquin anitij schejab'ojan yun̈e walni hune' tzoti' ti'an. Yuxin a'wej heyoración win̈an haxin̈wal machin xiw walni haca' yet ay walnian. 21Ha' ya' juẍtaj Tíquico caw yijyom ẍcolwa yin̈ smunil Comam Jahaw, ha' ya' ch'inojtoj tzoti' teyet tzet wecojan, b'oj tzet lan̈an wunian. 22Yuxin ẍwatoj ya' hex yila'an, ha' ya' ẍhalnoj teyet tzet jecoj b'eti'an, haxin̈wal chu ya'ni ya' yak'lob'al he c'ul. 23Ya'ab' Comam Dios co Mamwej b'oj Jahaw Jesucristo ak'anc'ulal teyet. Ya'ab' pax Comam tzet chu heyochen he b'a 24b'oj tzet chu cam heya'ni yuluj he c'ul. Ya'ab' Comam sc'ulch'anil sc'ul tet mactaj ch'ochen Jahaw Jesucristo yin̈ stohb'alk'inal.


Copyright
Learn More

will be added

X\