EFESIOS 5

1Haxca hon̈ yuninalxa Comam Dios ocheb'il yu, ehojon̈c'oj haca' ye Comam. 2Ehojon̈c'oj yin̈ jochen co b'a haca' xu hon̈ yochen Comam Cristo, xa'ni camoj sb'a ju haca' hune' xahanb'al ch'a'lax tet Comam Dios caw xuk' sam, caw sak'al yul sat Comam. 3Haxca hon̈ yet-xa Comam Dios, matxa yetoj ay ẍja' b'inaoj ixloj mato sayni heb' ix ix swinaj, hej tzet quistal b'oj hej pek'al. 4Mach ẍjal tzoti' tx'ixwub'al yal-laxi, sucal tzoti' b'oj maxil tzoti' tx'oj yoqui, haxca hunk'aan tzoti' ti', mat yetoj ay jalni, to ha' jet, ha' ja'ni yuch'antioẍ tet Comam Dios. 5Haxca johtajxa ta mactaj ch'ixli mac sayni swinaj, mach'ocoj yul sk'ab' Comam Cristo b'oj Comam Dios, pax mactaj chu hej tzetet quistal, mato pek' yin̈ hej tzetet. Haxca hune' ti', ha'xam hunk'aan tu' ch'occan sdiosoj. 6Mach mac tet ẍja' sub'u co b'a yu hej sucal tzoti' ẍhalot jet, haxca yu hunk'aan tx'ojal ti', ẍtij sya'tajil cha' Comam Dios yib'an̈ anma mach ẍyijyen tzet chal Comam. 7Yuxin mach co mohn̈etoj tzet chal anma tu'. 8Yet x'ec'can tu', ayon̈coj xol sk'ejalholo, wal tinan̈ ayon̈xacoj yin̈ Comam Jahaw, yin̈xa sajilk'inal ayon̈. Yuxin ehojon̈xac'oj yin̈ stoholal, haxca yin̈xa sajilk'inal ayon̈. 9Haxca ayon̈xacoj yin̈ sajilk'inal, c'ulch'an ẍjute co c'ul, stoholal ẍju, b'oj st'in̈anil ẍjala. 10Ja'a'wej yilal johtajn̈en b'aytet choche Comam Jahaw. 11Mach joc yin̈ hej tx'ojal chu anma aytocoj yin̈ k'ejholo, ha' jet yu sajilk'inal ib'il ju, ji'aloj yen̈el tx'ojal chu anma tu'. 12Tx'ixwub'alxa jalni tzet chu hunk'aan anma tu' yin̈ ewantaj. 13Yaja' yet ch'el yen̈el hunuj tzetet yu sajilk'inal, hab'an chucanoj. 14Ha' sajilk'inal tu' ch'a'ni ixtan̈woj sunil. Yuxin ẍhalot: Hach haca' lan̈an ha wayi, iloj ha wayan̈.Hach ayachcoj xol anma haca' camnaj, iloj ha wayan̈, cat hach ya'noj mujluj Cristo. 15Yuxin nann̈e ju, co tan̈e co b'a yin̈ tzet ẍju. Mat sucoj ja'ni, to tz'ajan ẍjute co c'ul. 16Mat nab'a'oj ch'ec'toj tz'ayic ju, haxca yin̈xa hunk'aan tz'ayic b'ay ayon̈ ti', hoyb'ilon̈xa yu hej tx'ojal. 17Mat sucalojn̈e ẍju, ji'a'tij janma jin̈ co txumni b'aytet choche Comam Jahaw ta ẍju. 18Mach juc' te uq'ue, haxca yu hune' uc'uj tu' mach scachnab'al juni hej xtx'ojal, yuxin ha' jet, ja'a'coj co b'a yalan̈ schejb'anil Comam Espíritu Santo. 19Ẍco b'itn̈ewej salmo co xol, hej himno b'oj hunk'aanxa b'it yet Comam, b'oj sunil co c'ul ẍjanitoj b'it ch'anicoj smay Comam Jahaw. 20Ayon̈n̈etic'acoj ja'ni yuch'antioẍ tet Comam Dios co Mamwej, yu sunil hej tzetet cha' Comam jet, yin̈ sb'ih Jahaw Jesucristo. 21Huncuentan̈e ẍjute co b'a co xol hununon̈ yu co nanon tet Comam Cristo. 22Hex ixale, yijyom cheyute he b'a tet heyichamil, haca' co yijyen Comam Jahaw. 23Haxca naj winaj, swi'al naj yin̈ ix ixale, haca' Comam Cristo swi'al yin̈ iglesia, hatic'a Comam Scolomal iglesia, haxca haca' snimanil Comam ye iglesia tu'. (Ha' hune' yiglesia tu', ha' hayon̈ ti'.) 24Haca' syijyomal iglesia tet Comam Cristo, hactu' heb'ix ix yijyom chute sb'a heb'ix tet yichamil yin̈ sunil. 25Hex ichamile, ochewej heyixal haca' xu yochen Comam Cristo yiglesia. Xa'ni camoj sb'a Comam yu. 26Hactu' xute Comam, yun̈e yoccanoj yetoj. Xtx'ahni yu ha'ha', sajn̈encan yu stzoti', 27haxin̈wal yet ẍchanoj Comam iglesia tu' yixaloj caw eltich'an yilni, mach ninoj tz'ilal, machca ninoj xtx'ojal yilot, tz'ajan lahan yeyi. 28- 29Mach mac ẍyahni snimanil, to ya' lan̈b'il yu, ya' ilb'il yu. Haca' syan̈en naj winaj snimanil, yet aya hactu' syan̈en naj yixal haxca hactu' ye Comam Cristo b'oj yiglesia. Mac xahan chil yixal, sya'iln̈e sb'a chaltu'. 30Ha' iglesia tu' snimanil Comam yeyi. Hayon̈ hun yin̈ hune' snimanil tu'. 31Haca' yalni Yum Comam: Chacanoj naj winaj smam smi' yu shunb'an sb'a naj b'oj yixal, hune'xan̈e anmail chucan scawan̈il, ẍiayoj. 32Hune' ti' caw ay yelapnoj yeyi, yaja' hune' tzet ẍwal ti'an, ha' tzet ye Comam Cristo b'oj yiglesia, ha' ẍwalan. Hayon̈ ti' hune' iglesia tu'. 33Haquex tu', hex ichamile hex, ochewej heyixal haca' heyan̈en he b'a, b'oj hex ixale, chex nanon tet heyichamil.


Copyright
Learn More

will be added

X\