EFESIOS 4

1Yu hune' tu' presu we sya'iloj Comam Jahawan, chin k'an teyetan ta c'ul cheyute he b'a haca' caw yeyi, haxca awteb'ilexxa yu Comam Dios. 2Huncuentan̈e cheyute he c'ul, c'ulch'an he tzotel tet anma, niman cheyute he c'ul, che nanitoj heyetb'i yu heyocheni. 3Cheya'ni yilal yehc'oj ak'anc'ulal te xol yun̈e mache pohtoj he b'a, haxca Comam Espíritu quex hunb'ancoj. 4Hune'n̈e nimanileal jeyi, hune'n̈e Espíritu x'a'lax jet, yin̈ xcon̈ yawte Comam yun̈e hunlahan scawxi co c'ul yin̈ tzet chu jehojc'oj. 5Hune'n̈e Comam Jahaw aya, hune'n̈e b'ay ẍja' yuluj co c'ul, hune'n̈e b'iheal b'ay ẍji' ha', 6hune'n̈e Comam Dios Mame jin̈ co hunil, ha' Yahaw jin̈, ẍmunla jin̈ b'oj aycoj jin̈ co hunil. 7Yaja' nanann̈e tzet xa' Comam jub' hununon̈ haca' choche Comam Cristo ya'a' jet. 8Yuxin chal Yum Comam Dios: Yet x'ahtoj, tx'ihal mac presu ye xihtoj yin̈,xa'ni hej tzetet c'ul tet anma. 9¿Tzet chaliloj hune' x'ahtoj tu'? Ha' chala ta b'ab'el x'aytoj yul tx'otx'otx' ti'. 10Ha' Comam x'aytoj yul tx'otx' ti', ha'tic'a x'ahtoj b'ay ay Comam Dios b'ay k'a' nahat-xa yecan̈, yun̈e sunil ẍmajlo yu. 11Ha'tic'a x'a'ni schejb'anil anma: Ay mac apóstol, ay mac yet ay ya'ni tzoti' ẍtit tet Comam Dios, ay mac ẍpujb'anc'oj tzoti' yet colb'anil, ay mac stan̈eomal yet iglesia, ha'tic'a cuywaom paxoj. 12Hactu' xu ya'lax scuyb'anil mactaj yet-xa Comam yun̈e yoc yin̈ munil, yu cam sch'ib'iloj snimanil Comam Cristo 13masanto stzujcha ju co hunitoj, yu hunlahan ja'ni yuluj co c'ul, b'oj hunlahan johtajn̈en Sc'ahol Comam Dios. Hactu' chu stzujcha co yihlan haca' stz'ajanil ye Comam Cristo. 14Yin̈ hactu', matxa haca'oj niẍtej unin lemb'il smeltzona snab'al ẍjute co b'a. Matxa ẍco hec' co nab'al yu hej nan cuywab'al, haca' yinitoj cak'e' hunuj tzetet, haxca ay mac caw tz'ajan sc'ul sub'ni anma, chinitoj yin̈ cuywab'al tx'oj. 15To ha' jet yin̈ st'in̈anil chon̈ ehc'oj ẍjochen jet-anmail, hactu' chu co ch'ib'i, haxin̈wal lahan chon̈ elicoj haca' ye Comam Cristo. Haxca ha' Comam swi'al ye jin̈. 16Walon̈ haca' snimanil Comam jeyi. Haca' co nimanil ti' yaman ye yu hej co tx'an̈al, caw c'ul ye swatx'eb'anil hunun majan, hactu' je yu Comam Cristo, haxca ha' Comam ch'a'ni jip co hunil. Yet chon̈ munla hununon̈ yu jochen co b'a, ẍcam co lin̈b'a co b'a co hunil. 17Ha' ti' ẍwal teyetan, chin chilb'anan hacojtam ha' Comam Jahaw ẍhalni: Ta matxa chex ehc'oj haca' anma mat ohtajn̈eoj Comam Dios, hunk'aan mac ch'ehc'oj yin̈ squewa'il, 18haxca k'ejholo ye snab'al. Hunk'aan tu', nan yeloj yin̈ sk'inal Comam Dios, haxca caw yanma, mat yohtajoj hej tzetet yet Comam. 19Mach tx'ixwi sat, yuxin cha'can sb'a yul sk'ab' tx'ojal, matxa yecheb'anil yuni hej tzetet quistal. 20Wal hexti' mat hacoj tu' xu heyi'ni he cuyb'anil tet Comam Cristo, 21haxca xeyab'e tzet xu yehc'oj Comam b'oj xe cha he cuyb'anil yin̈, haca' st'in̈anil syenaj Comam. 22Yet yalan̈to, quex etaxtoj yu heyijyen hej tzetet tx'oj xeyoche. Yuxin awejcanoj tzet xu heyehc'oj yalan̈to tu', 23yun̈e sheli he nab'al b'oj he yanma. 24Ec'an̈wej heyi'a' hune' b'elwub'al helinajxa, haxca watx'eb'ilon̈ yu Comam Dios yu jehc'oj haca' ye Comam yin̈ stoholal b'oj mach ninoj xtx'ojal aycoj yin̈, yin̈ caw st'in̈anil yeyi. 25Yuxin tinan̈, matxa ẍjacoj lek'ti'al, to st'in̈anil ẍjala chon̈ tzotel b'oj hej jetb'i, haxca co hunilon̈ hune'xan̈e nimanileal jeyi. 26Ta ay hunecoj ẍtit co howal, lemb'il ẍco mak'tan̈oj yun̈e mach jacoj co mul, 27mach ẍja' eloj yin̈ naj matzwalil. 28Mac ẍtic'a elk'ani sb'ejab'can yelk'ani, ocojab' munlaoj, haxin̈wal ay smunil b'ay ẍcawxi sc'ul b'oj chu scolwa yin̈ mac matzet aya. 29Mach jal yajla-ab'ix, to ha' tzoti' c'ul ẍjal tet anma, haxin̈wal chon̈ colwa yin̈, yun̈e slin̈b'a sb'a, b'oj yun̈e ja'ni yak'lob'al sc'ul mac ch'ab'eni. 30Mach ja' tacoj sc'ul Comam Espíritu Santo, hune' mac ab'ilxa jet yu Comam Dios syeb'aniloj to hon̈ yet-xa Comam masanto stz'ajb'a'can Comam co colb'anil. 31Co b'eja'xacan ẍchiwa co c'ul, stit lemna ẍjila, stit co howal, co pohli, jalni tzoti' tx'oj b'oj sunil tzet tx'ojal xju tu' ja'acanoj. 32Ha' jet, c'ulch'an ẍjute co c'ul, stz'a' co c'ul yin̈ hej jetb'i, co nahuln̈etoj tx'ojal chu anma jin̈, haca' xu snahuln̈entoj Comam Dios co mul yu Comam Cristo.


Copyright
Learn More

will be added

X\