EFESIOS 3

1Yu hune' ti' ẍwa' woración teyin̈an, hayin Pablo hin ti'an, presu we sya'iloj Comam Cristo Jesús yu sc'ulaloj heyet hex matex israeloj ti'. 2Heyohtajxami ta yu sc'ulch'anil sc'ul Comam Dios, xa'ni Comam hune' munil wetan yu walnic'oj tzoti' c'ul te xol yu sc'ulaloj heyetan. 3- 4Sye Comam Dios wetan tzet nab'il yu, hune' ewantic'a ye yalan̈to, hune' xaxtic'a wal hanic' teyetan. Yet cheyilnoj te' hum ti', che txumnuj to wohtaj tzet nab'il yu Comam tu'an, tzetet xij sb'a yin̈ Comam Cristo. 5Hune' tzet nab'il yu Comam ti', mach xa' Comam ohtajn̈elaxoj tet anma yalan̈to haca' chu ya'ni ohtajn̈elaxoj tinan̈. Yu Yespíritu Comam sye hune' ti' jet hayon̈ sic'leb'il hon̈xa chon̈ oc schejab'oj b'oj hayon̈ ẍjalicoj Stzoti' Comam ti'an. 6Hune' tzet nab'il yu Comam tu', ha' chaliloj ta yu tzoti' yet colb'anil, hex matex israeloj hex ti', hun che chab' tzet cha' Comam teyet haca' ẍco chab' hayon̈ israelon̈ ti'an. Ay heyoc yin̈ hune' nimanile b'ay ayon̈cojan, b'oj ay heyoc yin̈ tzet halteb'ilcan yu Comam Dios jetan, yu Comam Cristo Jesús. 7Yu sc'ulch'anil sc'ul Comam Dios b'oj yu scan̈il yeyi, xa' Comam in chejb'anil walnic'oj tzoti' yet colb'anil ti'an. 8Waxan̈ca hayinn̈e k'a' sn̈ehal we xol mac yet-xa Comam Diosan, yaja' xa' Comam hune' sc'ulch'anil ti' wetan. Yuxin chin ec' walac'oj teyet hex matex israeloj ti', ta mach sb'ih hantaj sc'ulal Comam Cristo. 9Comam swatx'eomal sunil tzetet, ha' x'a'ni hin munil hin yeni tzet chu yijni sb'a tzet nab'iltic'a yu. Hune' ti' ewantic'a ye yu Comam yettax xichitij. 10Yaja' tinan̈, yu yiglesia ch'a'lax yohtajn̈e' hej mac k'a' yahaw b'oj hej autoridad ay satcan̈ to mach sb'ih hayeb'ta majan ye stz'ajanil sc'ul Comam Dios. 11Xijni sb'a hune' ti' yin̈ Jahaw Cristo Jesús haca' nab'iltic'a yu Comam Dios yettax x'ichitij. 12Yu ja'ni yuluj co c'ul yin̈ Comam Jesús, sunil co c'ul chon̈ hitzcoj sc'atan̈ Comam Dios. 13Yuxin chin k'an teyetan, mach ẍcab'concan̈ he c'ul yu hej tzetet b'ay lan̈an yec' ya' wanma ti'an, to sc'ulaloj heyet yeyi, ha' ch'elicoj he mayoj yeyi. 14Yu hune' ti' chin ay jahnoj yin̈ sat Comam Dios co Mamwej. 15Ha' Comam Smameal ye yin̈ sunil hej mame ay satcan̈ b'oj sat tx'otx'otx' ti'. 16Chin k'an tet Comaman ta yu yeltich'anil sc'ulch'anil sc'ul, ch'a'ni scan̈il heye yin̈ heyanma yu Yespíritu, 17cat yehc'oj Comam Cristo yin̈ heyanma yu heya'ni yuluj he c'ul yin̈, haxin̈wal haca' hune' te'te' caw c'ul yeytoj xe' yul tx'otx', hactu' cheyucanoj yu heyochen Comam. 18- 19Yun̈e chu he txumniloj, b'oj sunil mac yet-xa Comam, ta mach sb'ih hantaj chon̈ yoche Comam Cristo, to k'a' ec'b'altocanoj sataj hej tzetet chu co txumni. Yin̈ hactu' caw yeli tz'ajancoj Comam Dios teyin̈. 20Ja'a'coj smay Comam haxca yu scan̈il ye ẍmunlacoj jin̈, chu yuni hej tzetet k'a' ec'b'al sataj ni'an ẍco k'an tet mato tzet ch'ec' yin̈ co c'ul. 21Hayon̈ ayon̈xacoj tz'ajoj yiglesia ti', hunxa jecoj yin̈ Comam Cristo Jesús, ja'acoj smay Comam Dios yin̈ stohb'alk'inal. Amén.


Copyright
Learn More

will be added

X\