EFESIOS 3

1Yuton hune' tu', yuxin chintxahlihan teyin̈. Hanin Pablo inti'an, caw preso wehan yu ismunil Comam Jesucristo, yu isc'ulalo teyin̈, hex mach Israelo hex ti'. 2Wal xin heyohtaxa tato yu isc'ulal isc'ul Comam Dios, yuxin yak' hune' inmunilti'an yin̈ walnihan Istzoti' Comam texol hex mach Israelo hex ti', yun̈e hewatx'ico yin̈ isc'ulal. 3Caw isye Comam tzet nabil yu wetan, yak'ni wohtan̈elojan hune' ewantic'a ye yet payat. Ha' xin tz'ibn̈ebilxa nich'an teyet wuhan yul hune' hum ti'. 4Yet cheyilni xin cat istxumchalo heyu tato wohtajan tzet ewantic'a ye yin̈ Comam Jesucristo. 5Ha' hune' tzet ewantic'a ye tu', maẍtic'a ak'lax yohtan̈elo anma yet payat tu', yaja' tinan̈ xin xayak' Comam Dios johtan̈elojan̈ yu Yespíritu, han̈on̈ sic'bilon̈ilojan̈ ischejabo Comam Jesús, yeb huntek'anxa ebnaj ischejab Comam chihalni tzoti' chitit tet Comam Dios. 6Hune' ewantic'a ye tu' chala tato yu hune' cuybanile yet colbanile hex hunex mach Israelo hex ti', chechah hune' hematan chicochahan̈ han̈on̈ Israel on̈ti'an̈. Hac tu' xin hunxa je yin̈ Comam, caw ay heyocpaxo yin̈ hune' haltebilcano jetan̈ yu Comam Dios yin̈ Comam Jesucristo. 7Yu isc'ulch'anil isc'ul Comam Dios, yuxin yak' inmunilan walnic'ojan Tzoti' c'ul yet colbanile xol anma yu yip Comam caw munlaco win̈an. 8Haninan xin islahobal wecanojan xol anma ayxaco yul isk'ab Comam Dios, yaj xin yak' Comam isc'ulch'anil isc'ul wetan, yuxinto chinec'an wala'c'ojan teyet, hex mach Israelo hex ti', tato hantan̈ecano isc'ulal isc'ul Comam Jesucristo chak'cano jet. 9Comam Dios watx'en̈e sunil sat yiban̈k'inal ti', ha' ak'n̈e hune' inmunilti'an yun̈e wak'nihan heyohtan̈elo yin̈ tzet chiyu yijni isba tzet nabil yu Comam, hune' ewantic'a ye yet yalan̈tocanoj. 10Yuxin tinan̈, ha' yuninal Comam Dios chiak'ni ohtan̈elo sunilal ishelanil Comam tet ebnaj yahawil yeb ebnaj ijbalom ay yul satcan̈. 11Yaj yijcano isba hune' ti' yin̈ Comam Jesucristo haca'tic'a nabil yu Comam Dios yettaxtic'a maẍto chiwatx'i yul sat yiban̈k'inal ti'. 12Yu hunxa je yeb Comam Jesucristo, yuxinto xayu cohitzico isc'atan̈ Comam Dios yin̈ sunil coc'ul, yuto xajayto yul janma yin̈ Comam. 13Caw chiwalan teyet machojab chicabconcan̈ hec'ul yin̈ hune' bay lan̈an yec'ya' wanmati'an, to yu isc'ulalo teyin̈, yuxin hac tu' chiwak'lehan. Wal xin ha' caw chianico heyip. 14Yuton hune' ti', yuxinto caw chinay jahnojan yin̈ sat Comam Dios, Comam Ismam Comam Jesucristo Jahawil. 15Ha' Comam Dios caw Mame, ha' chiyeni isbeybal ebnaj mame yul sat yiban̈k'inal ti' yeb yul satcan̈. 16Chink'anan tet Comam Dios ta yu hanta issak'alil isc'ul, chak' yip heyanma yin̈ Comam yu Comam Espíritu Santo, 17cat yehic'o Comam Jesucristo yul heyanma yu heyanico heyanma yin̈, yun̈e isch'ib hexahann̈en Comam, haxinwal haca' isnahatil yehayto xe' hunu te te' yul tx'otx', hac tu' hexahann̈en heba. 18Hac tu' xin chu istxumchalo heyu, yeb xin sunil anma yetxa Comam yehi, tato mach isbi hantacano issak'alil isc'ul Comam Jesucristo. 19Chink'anpaxojan tato cheyohtan̈elo isc'ulch'anil isc'ul Comam tu'. Hune' isc'ulch'anil isc'ul Comam Jesucristo tu' caw ec'bal yiban̈ tzet chijohtan̈eloj. Hac tu' xin caw tz'ajan chucanico isc'ulal Comam Dios teyin̈. 20Bitn̈elaxojab isbi Comam yuto caw ec'balto chiyu iswatx'en yiban̈ niẍte tzet chicok'an tet, yeb tzet chicotxumu. Hac tu' chute Comam yu ishelanil xayak' jet. 21Bitn̈elaxojab isbi Comam Dios yin̈ sunilbal tiempo yu sunil anma ayxaco yul isk'ab Comam Jesucristo. ¡Hacojab tu'!

will be added

X\