EFESIOS 2

1Hex mat israeloj hexti', yet yalan̈to camnaj hexxatic'a yu hej xtx'ojal xeyu yet xeyanicoj he mul. 2Haxca tzujanex yin̈ xtx'ojal chu anma mat tzujanoj yin̈ Comam, xeyijyen b'aytet chal sc'ul naj yahaw ch'ec' xol cak'e' b'oj ẍmunlacoj yin̈ anma ẍman̈c'on tzet chal Comam Dios. 3Hayon̈ israelon̈ ti'an hactu' xu jehc'oj yet payxaan yet tzujanon̈ yin̈ hej tzetet tx'oj xochetoj co nimanilan, b'oj xco yijye tzet chal janmaan. Haxca ahmul xu co titcojan, yuxin yettic'a aya xhul sya'tajil jib'an̈ yu Comam Diosan haca' anma mat israeloj. 4Yaja' mach sb'ih hantaj stz'a' sc'ul Comam Dios jin̈ xcon̈ yocheni, 5yuxin hun xu ya'ni Comam co k'inal b'oj Comam Cristo yet ayon̈tocoj yul sk'ab' camical yu hej co mul. (Haxca yun̈e sc'ulch'anil sc'ul Comam xco cha co colb'anil.) 6Hun xcon̈ spitzc'acan̈ Comam b'oj Comam Cristo Jesús, hun chon̈ ayoj stz'on̈noj b'oj Comam b'et satcan̈ haxca ayon̈coj yin̈ Comam Cristo. 7Yu hantaj sc'ulch'anil sc'ul Comam Dios cha' jet yin̈ Comam Cristo, syeb' Comam yulb'alto ẍto co sataj ti' to mach sb'ih hantaj sc'ulch'anil sc'ul. 8Haxca yu sc'ulch'anil sc'ul tu' colb'ilon̈xa, yu ja'ni yuluj co c'ul yin̈ Comam Cristo. Mat hayon̈oj xjichecan̈ hune' ti', to ha' Comam Dios sani jet. 9Mat yuuj tzetet c'ul xju chon̈ colchayi, haxca ta hactu' chim jal co b'a c'ulal. 10Yaja' yeli swatx'eb'al Comam Dios je yin̈ Comam Cristo Jesús, xcon̈ swatx'e Comam yu juni hej tzetet c'ul t'in̈b'ab'ilcan yu yalan̈to, yu co yijyeni. 11Yuxin tijab' yin̈ he c'ul tzet heye payxa. Mat hex yic'aloj anma israel chab'il circuncisión yu, yuxin chex sb'aha. Chalni heb'jetb'i teyin̈ ta mat scon̈ob'oj Comam heyeyi. Yaja' hune' circuncisión b'ay ẍloloncoj heb'jetb'i tu' yin̈n̈e nimanile ch'alaxcoj. 12Yet payxa tu' maẍto heyoc yin̈ tzet cha'a Comam Cristo, mache yoc yin̈ con̈ob' israel, machca heyoc yin̈ slahc'ulal Comam Dios, b'oj tzet halteb'ilcan yu. Yet tu' matzet b'ay ẍcawxi he c'ul satyib'an̈k'inal ti', haxca maẍto tzujanoj hex yin̈ Comam Dios. 13Yet yalan̈to, nahattic'a heyeloj, yaja' wal tinan̈ tzujanexxa yin̈ Comam Cristo Jesús, xquex hitzlaxcoj yu scamical Comam. 14Xacoj Comam Cristo ak'anc'ulal co xol. Hune'xan̈e con̈ob'al xcon̈ yute Comam, hayon̈ israelon̈ ti'an b'oj hex mat hex israeloj ti', haxca yet xcam Comam sc'ayniloj Comam hune' cajqueb'ail aycoj co xolb'al. 15Xa'ni tan̈oj Comam sley ya' Moisés i'n̈e chejb'anil b'oj syijyeb'anil, yun̈e yin̈ cab' con̈ob'al ti', hune'xan̈e con̈ob'al ac' swatx'ecan Comam, shunb'ancoj yin̈. Xanicoj Comam yin̈ ak'anc'ulal. 16Yu scamical Comam yin̈ culus xa'nican tan̈oj howal aycoj co xol, he con̈ob' b'oj co con̈ob'an xanicoj scab'il yin̈ ak'anc'ulal b'oj Comam Dios, hune'xan̈e nimanileal xjucanoj. 17Comam Cristo xhul a'noj tzoti' c'ul yet ak'anc'ulal teyet hex nahattic'a heyeloj yin̈ Comam ti', b'oj hayon̈ cawil jecoj yin̈ Comaman. 18Yuxin yu Comam Cristo, hexti' b'oj hayon̈ ti'an, hune'n̈e Comam Espíritu chon̈ hitznicoj sc'atan̈ Comam Dios Padre. 19Yuxin hexti' matxa nancon̈ob'aloj hex, matxa ton̈eoj chex ec' coloyi, tinan̈ ayxa he yoc yin̈ mac scon̈ob'xa Comam Dios, hexxa hun ayexcoj stz'ajoj yuninal Comam. 20Hexti' haca' hune' n̈ah ab'ilcan̈ yib'an̈ hune' xealn̈ah heyeyi, hayon̈ apóstolon̈ ti'an b'oj heb'ya' schejab'lom Comam Dios, haca' hune' xealn̈ah tu' jean, Comam Jesucristo, haca' hune' ch'en ch'en aycoj scawxeb'aniloj xtxiquinb'al te n̈ah, hactu' yeyi. 21Haca' yah hunuj te n̈ah, hactu' chon̈ yute' Comam Jahaw, chon̈ shunb'ancoj masanto chon̈ oc yatutoj Comam Dios yetn̈e yeyi. 22Yin̈ Comam Jahaw huninaj hexcoj yun̈e heyoc yatutoj Comam Dios haca' jean, yun̈e yehc'oj Comam jin̈ co hunil yu Yespíritu.


Copyright
Learn More

will be added

X\