EFESIOS 2

1Wal xin, hex mach Israelo hex ti', yak'cano Comam Dios hek'inal yu yip Comam Jesucristo, yuto yet yalan̈tocanoj camnajextic'a yu hemul yeb yu istx'ojal chewatx'e. 2Yuto han̈c'an̈e yinta istx'ojal tzet ayayo yul sat yiban̈k'inal ti' bay tzujanex; heyijen tzet chal isc'ul yespíritu naj chimunla xol jak'ek', hune' chianico yip anma chiman̈c'on tzet chal Comam Dios. 3Hacon̈paxtu'an̈, han̈on̈ Israel on̈ti'an̈, caw hac tu' jute cobahan̈ yet payxa. Tzujanon̈an̈ yinta tzet choche conimanilan̈, chicoyijenan̈ tzet chal conimanilti'an̈, coyijenpaxojan̈ tzet chal conabalan̈. Caw mulum yu cotiticojan̈, yuxin ha' hunon̈an̈ ayon̈tic'actojan̈ yalan̈ isya'tajil chati Comam Dios, haca' anma mach ohtan̈eho Comam. 4Yaj wal Comam xin, caw hantacano chitz'ay isc'ul Comam jin̈, yeb caw xahan ayon̈ yu. 5Yu isc'ulch'anil isc'ul Comam, yuxinto cochahcano hune' cocolbanil, hun xin yu yak'nicano Comam cok'inal yeb Comam Jesucristo yet ayon̈toco yul isk'ab camical yu sunil comul. 6Caw hun yu jitzitzbican̈ yinta Comam Jesucristo yu Comam Dios, hunpaxo yu con̈istz'on̈ban Comam Dios yeb Comam Jesucristo bey yul satcan̈. 7Yun̈e isyenilo Comam yin̈ hune' tiempohal chul cosataj tato caw xahan ayon̈ yu, yeb ta caw hanta isc'ulch'anil isc'ul Comam jin̈ yu Comam Jesucristo. 8Yuto yu isc'ulal isc'ul Comam Dios, yuxin colbilon̈ yu jaco janma yin̈ Comam. Maẍtajon̈ jichecan̈ hune' ti', to ha' Comam san̈e jet. 9Maẍtaj yu isc'ulal chicowatx'e yuxinto chon̈colchahi, machoj, yuto ta hac tu' chimjal coba c'ulal. 10Wal xin ha' Comam Dios con̈watx'eni, con̈yanico yin̈ Comam Jesucristo yun̈e cowatx'en sunil isc'ulal. Yuto hac tu' el yin̈ isc'ul Comam yet yalan̈tocanoj. 11Wal tinan̈ xin, nawetij ta hayet yalan̈tocanoj hex mach Israelo hex ti' chexhallax man̈circuncisiónal yu ebnaj Israel. Ebnaj tu' chal isba ebnaj circuncisiónal, yuto ayxaco hune' yechel circuncisión yin̈ isnimanil ebnaj. 12Wal yet payxa tu' caw machijexico yul isk'ab Comam Jesucristo; machi heyoc yin̈ con̈ob Israel, yeb yin̈ hune' trato ak'bilcano yu Comam Dios, yeb yin̈ tzet haltebilcano yu Comam. Yuxinto machi baytet yin̈ chicawxi hec'ul, machipaxo hediosal yul sat yiban̈k'inal ti'. 13Yet payxa tu', nahat heyehilo yin̈ Comam Dios, wal tinan̈ xin ayexxaco yul isk'ab Comam Jesucristo, yuxinto caw hitznajexico isc'atan̈ Comam Dios yu iscamical Comam Jesucristo. 14Ha' iscamical Comam ak'nicano ak'anc'ulal coxol han̈on̈ Israel on̈ti'an̈ yeb hex mach Israelo hex ti'; hunxan̈e con̈obal jucanoj. Istan̈tzencanilo Comam hune' cajlebahil haca' peyab yeco coxol, han̈on̈ Israel on̈ti'an̈ yeb hex mach Israelo hex ti'. 15Yet iscam Comam Jesucristo istan̈tzencanilo hune' isley naj Moisés ik'n̈e chejbanile yeb yin̈ tzet chu isyijelaxi. Iswatx'encanayo Comam hune' ac' con̈ob yin̈ cabeb con̈ob tu', hunxan̈e xin yucanayo yin̈ Comam, hac tu' yu yanicanico Comam ak'anc'ulal xol. 16Yu iscamical Comam Jesucristo yin̈ te' culus yuxinto yak'cano tan̈o Comam hune' howal ayco coxol, con̈yanico Comam yin̈ ak'anc'ulal yeb Comam Dios, hunxan̈e nimanilehal con̈yutecanayoj. 17Comam Jesucristo hul ak'no Tzoti' c'ul yet ak'anc'ulal teyet, hex caw nahattic'a heyehilo yin̈ Comam Dios, yeb xin jetan̈ han̈on̈ cawiltic'a jecojan̈ yin̈ Comam. 18Yuton Comam Jesucristo, yuxin han̈on̈ Israel on̈ti'an̈ yeb hex mach Israelo hex ti', xayu cohitzico isc'atan̈ Comam Dios Mame, hune'n̈e xin Comam Espíritu Santo chon̈hitznicoj. 19Yuxin hex ti', caw matxa nan con̈obalojex tinan̈, matxa ton̈e chexec' cólohi, ayxa heyoc yin̈ iscon̈ob Comam Dios, ayexxapaxico istz'ajo yuninal Comam. 20Hex ti' lahanex haca' hunu te' n̈a watx'ebilcan̈ yiban̈ xe'al. Haxa han̈on̈an̈ ischejab Comam Jesucristo jeti'an̈ xin yeb ebnaj chihalni tzoti' chitit tet Comam Dios, haca' xe' hune' n̈a tu' jehan̈. Haxa Comam Jesucristo xin haca' ch'en ch'en caw niman yelapno ayayto xe'o istxiquin te' n̈a, hac tu' ye Comam. 21Haca' hunu n̈a lan̈an islatz'laxcan̈ isloc'al, caw xin c'ulch'an ischahlen isba islatz'banil masan chijcano isba iswatx'icanoj, hac tu' je yin̈ Comam Jesucristo, yatutxa Comam jehi. Caw yeton̈xa yu hunxa je yebi. 22Ha' tinan̈ hunxan̈e jehi yu xaquexoc yatuto Comam Dios yun̈e yehic'o Comam Dios yul heyanma yu Comam Espíritu Santo.

will be added

X\