EFESIOS 1

1Hayin Pablo hin ti'an yapóstol Comam Cristo Jesús wean haxca hactu' ch'el yin̈ sc'ul Comam Dios. Chin tz'ib'n̈etoj hune' wum ti' teyet hex yet-xa Comam ay yul con̈ob' Éfeso, hex yijyom hex tet Comam Cristo Jesús. 2Ya'ab' Comam Dios co Mamwej b'oj Jahaw Jesucristo sc'ulch'anil sc'ul b'oj ak'anc'ulal teyet. 3Ja'a'coj smay Comam Dios Smam Jahaw Jesucristo, yu mach sb'i hantaj sc'ulal Comam xa' yin̈ janma, hunk'aan xtit satcan̈ xa'ni jet haxca ayon̈xacoj yin̈ Comam Cristo. 4Yalan̈to maẍto xwatx'i satyib'an̈k'inal ti', xcon̈ sic'le Comam Dios yin̈ Comam Cristo yun̈e jehc'oj yin̈ sat Comam, pohb'ilon̈xaloj yetoj Comam yin̈ mach ninoj co tx'ojal. Yu hon̈ yochen Comam, 5yuxin xcon̈ sic'le yettax payxa tu' yu joc yuninaloj yu Comam Jesucristo, haxca hactu' x'el yin̈ sc'ul Comam Dios ta hactu' chu. 6Yu hune' ti' ẍtic'a jacoj smay Comam, haxca mach sb'ih hantaj sc'ulch'anil sc'ul Comam xatij jib'an̈ yu Sc'ahol caw ocheb'il yu. 7Yin̈ Sc'ahol tu' hat aycoj co colb'anil haxca smaltoj schiq'uil xa'nican tan̈oj co mul. 8Mach sb'ih hantaj sc'ulch'anil sc'ul Comam xa' jet. Yu stz'ajanil sc'ul Comam 9xa' johtajn̈e tzet nab'il yu, hune' ewantic'a ye yu, hune' sc'ulal nab'ilxatic'a yu yijni sb'a yin̈ Comam Cristo. 10T'in̈an yijnoj sb'a hune' ti' yin̈ stz'ayical b'ay halb'ilcan yu Comam, ta shunb'a'coj sunil tzetet ay satcan̈ b'oj tzetet ay sat tx'otx'otx' ti' yalan̈ schejb'anil Comam Cristo tu'. 11Yalan̈to tu' xcon̈ sic'len Comam Dios, yun̈e co chanoj tzet cha'a Comam jet, haxca hun je yin̈ Comam Cristo haca'tic'a nab'il yu Comam Dios, Comam ch'a'ni yija' sb'a hej tzetet haca' chal sc'ul. 12Hactu' xute Comam yun̈e ta hayon̈ b'ab'el xcawxi co c'ul yin̈ Comam Cristoan, chon̈ ehc'oj smayoj scan̈il ye Comam Diosan. 13Haquexpax tu', lawi heyab'en st'in̈anil tzoti' x'a'ni he colb'anil, xeya'ni yuluj he c'ul yin̈ Comam Cristo. Yu Comam, x'a'lax Comam Espíritu Santo halteb'il jet co hunil, yu syeniloj to hon̈ yet-xa Comam Dios haca' yalaxcoj yechel hunuj tzetet syeniloj sb'a mac ay yet. 14Yu Comam Espíritu Santo xa' Comam jet, ha' xyeni to yeli ẍco chab' tzet cha' Comam jet. Hune' tu' chija' sb'a yet ch'ixtan̈woj co colb'anil hayon̈ hon̈ yet-xa Comam ti', yun̈e janicoj smay Comam Dios. 15Haxca xwab'ean ta caw cheya' yuluj he c'ul yin̈ Jahaw Jesús, b'oj cheyoche yak'b'il heb'ya' jetb'i yet-xa Comam, 16yuxin ha' yet ẍwa'ni woraciónan, ayinn̈etic'ac'oj wa'ni yuch'antioẍ tet Comam heyuan. 17Chin k'an tet sDiosal Jahaw Jesucristoan, co Mam caw ay smay, ta cha' Comam stz'ajanil he c'ul xtit yin̈ Yespíritu, yun̈e chu he txumni tzet cha' Comam ohtajn̈elaxoj, haxin̈wal cheyohtajn̈e Comam yin̈ c'ul. 18Chin k'an tet Comaman ta shajtoj yul he wi' yun̈e heyohtajn̈en hune' scawxob'al co c'ul cha' Comam b'ay awteb'ilon̈, b'oj yu he txumni yeltich'anil tzet cha' Comam jet hayon̈ hon̈ yet-xa ti'. 19Chin k'anan ta che txumpaxoj ta mach sb'ih hantaj scan̈il ye smay Comam ẍmunlacoj jin̈ hayon̈ ẍja' yuluj co c'ul yin̈ Comam ti'. Hatic'a hune' scan̈il ye ti', ha' xmunla yin̈ caw ip yu Comam 20yet spitzc'ancan̈ Comam Comam Cristo, xanicoj yin̈ swatx' sc'atan̈. 21Xanipaxcoj Comam yib'an̈ hantaj mac k'a' yahaw, hej autoridad, hej mac ay scan̈il yeyi, b'oj yib'an̈ yak'b'il mac yahaw, matn̈etaj tinan̈, hacpaxtu' schab'toj ti'. 22Sunil tzetet xacoj Comam Dios yalan̈ yoj Comam Cristo. Ha' Comam x'oc swi'aloj yin̈ sunil tzetet, yu sc'ulaloj yet yiglesia. 23Iglesia tu' haca' snimanil Comam Cristo yeyi. Ha' ẍyeni yin̈ tz'ajan tzet ye Comam, ha' Comam stz'ajb'an sunil tzetet.


Copyright
Learn More

will be added

X\