COLOSENSES 3

1Tinan̈ xin, haxca xax con̈ pitzc'a yin̈ Comam Cristo, ja'acoj co nab'al yin̈ hej tzetet ay satcan̈, b'ay tz'on̈an Comam yin̈ swatx' Comam Dios. 2Ha' hej tzetet yet satcan̈ tu' ẍjacoj yin̈ co c'ul, mataj tzetet sat tx'otx'al ti'. 3Yet xcam Comam Cristo haca'tic'a hayon̈ hun xcon̈ cam yin̈ yul sat Comam Dios. Tinan̈ hun c'uan co k'inal b'oj Comam Cristo yin̈ Comam Dios. 4Ha' yet ẍyelaxoj Comam Cristo, Comam i'n̈e co k'inal, hayon̈ hun chon̈ yewoj pax b'oj Comam yin̈ yeltich'anil smay. 5Yuxin tinan̈ awejxacan hej tzetet yet sat tx'otx'al xeyu yet yalan̈to: Hej ixloj, he sayni e winaj, hej tzetet quistal, hej tzetet tx'oj ẍpalc'on jochentoj, b'oj pek'al yin̈ tzetet, haxca hunk'aan tzetet ti' ha'xam ch'oc co diosoj. 6Anma ch'uten hacti', cha'atij Comam Dios sya'tajil yib'an̈. 7Hunk'aan ti' xeyu yet yalan̈to yet xquex ehc'oj xol anma ch'uten hunk'aan tu'. 8Tinan̈ awejpaxcan stit lemna cheyila, stit he howal, mato schiwa he c'ul, he yuchnicoj anma, b'oj halo' yajla ab'ix. 9Machex lek'ti'wi teyet hununex, haxca xax quex colcha tet hej xtx'ojal xeyu yet yalan̈to. 10Ak'n̈ewej heyet yin̈ ac' k'inale, haxca Comam Dios swatx'eomal jet lan̈an hon̈ yak'n̈en Comam haca' yeyi yun̈e cam johtajn̈eni. 11Yuxin matxa yoc yin̈ mac jic'al, ta israelon̈ mato machoj, ta chab'il circuncisión ju mato machoj, waxan̈ca nancon̈ob'alon̈ mato comonaln̈e jeyi, ta jet co b'a, mato txon̈b'ilon̈ chejab'oj, mach yoc yin̈. Han̈c'a Comam Cristo caw ay yelapnoj yeyi b'oj aycoj Comam jin̈ co hunil. 12Tinan̈ xa on̈ yoche Comam Dios, xax con̈ sic'le Comam yetoj. Yuxin tz'a'ojab' co c'ul yin̈ jet-anmail, c'ul ẍjute co b'a, chon̈ ay ni'anb'ail, huncuentan̈e ẍjute co c'ul, b'oj ẍja' techaoj sya'tajil. 13Niman ẍjute co c'ul jin̈ hununon̈ ẍja'ni nimanc'ulal ta ay mac semc'o jet. Haca' xu snahuln̈entoj Comam Jahaw co mul, hactu' co nahuln̈entoj smul mac tx'oj chu jin̈. 14Ha' ti' k'a' yilal, ta ẍjochewej heb'ya' jetb'i, haxca ha' hune' ti', ha' chon̈ hunb'an yin̈ c'ul. 15Haxca xcon̈ yawte Comam Dios jehc'oj co yamanil yin̈ ak'anc'ulal, ja'a' yilal yijb'alax co nab'al yu hune' ak'anc'ulal cha' Comam Cristo jet. Ayon̈n̈etic'acoj ja'ni yuch'antioẍ tet Comam Dios. 16Ẍwochean ta caw huneln̈e chucancoj stzoti' Comam Cristo jin̈. Yin̈ stz'ajanil co c'ul co cuyquetoj co b'a b'oj co cachawej co b'a. Yu ab'al yuch'antioẍ tet Comam Dios co b'itn̈etoj Salmo, himno b'oj b'it cha' Comam Espíritu Santo jet. 17C'ul ẍjute co b'a yin̈ sunil tzet ẍju, ẍjalah, haxin̈wal c'ul ẍhala' yin̈ Comam Jahaw Jesús. Ẍja'ni yuch'antioẍ tet co Dios co Mam yu Comam Jesús. 18Hex ixale, awejcoj he b'a yalan̈ schejb'anil he yichamil haxca ayexxacoj yin̈ Comam Jahaw. 19Hex ichamile, ochewej he yixal, machex howb'i yin̈ heb'ix. 20Hex uninale, yijyewej sunil tzet chal he mam he mi' haxca ha' tu' choche Comam Jahaw. 21Hex mame mi'e, macheya' tij showal heyuninal, haxin̈wal mach ẍcab'concan̈ sc'ul. 22Hex chejab' hexti', yijyewej sunil tet heyahaw ay sat tx'otx'al ti', matn̈etaj yet t'an̈ancoj heb'naj teyin̈ sak'al he munlayi yun̈e he can c'ulal yul sat heb'naj, to sunil he c'ul cheyuni, chex nanoni haxca yin̈ sat Comam Jahaw ayexcoj. 23Sunil tzet cheyu sunil he c'ul cheyuni, hacojtam Comam Jahaw lan̈an he yijyeni, mataj anma. 24Johtaj to ha' spaj cha'a' Comam Jahaw jet, ha' tzet halteb'il yu tet mac ayxacoj yin̈, haxca ha' Comam Cristo Jahaw lan̈an co yijyeni. 25Yaja' mac xtx'ojal chu, tx'oj schab' spajoj, haxca wal Comam Dios, mach xahan shinan Comam.


Copyright
Learn More

will be added

X\