COLOSENSES 3

1Wal tinan̈, yu xacon̈itzitzbican̈ yeb Comam Jesucristo yul sat Comam Dios, yuxin cosaya'welo cowatx'en tzet ye tu' yet yul satcan̈ yehi, bay tz'on̈an Comam Jesucristo yin̈ iswatx'k'ab Comam Dios yin̈ sunil yip. 2Caw yilal janico conabal yin̈ tzet ay yul satcan̈, matxahojab chijaco conabal yin̈ tzettaj ye tu' ay yul sat yiban̈k'inal ti'. 3Hayet iscam Comam Jesucristo, han̈-hun-on̈ con̈campaxo yintaj, yuxin coac' k'inal yeb Comam Jesucristo caw c'uwan yu Comam Dios. 4Ha' Comam Jesucristo cok'inal yecoj, yuto yet chul Comam cat julpaxo yintaj. Hac tu' chiyu istz'ajnacanilo coc'ulal haca' isc'ulal Comam. 5Wal tinan̈ xin, awecano sunil beybale yet yul sat yiban̈k'inal ti', haca' ixloj, maca winajloj, yeb sunil tzettaj caw machiswalil, yeb tzettaj istx'ojal chi-la-heyochecoj. Mach cheyaco heyanma yin̈ k'alomal, yuto hune' tu' chu yoc hediosalo selelo Comam Dios. 6Mac chito watx'en huntek'an tu', caw chitit ishowal Comam Dios yiban̈, yuto mach chisyije yin̈ tzet chal Comam. 7Sunil huntek'an ti' hewatx'e yet yalan̈tocanoj, yet ayextoco xol anma chi-la-watx'en huntek'an tu'. 8Yaj wal tinan̈ xin, bejwepaxcano sunil huntek'an ti'; ischiwa hec'ul, yeb istit hehowal, yeb henanico istx'ojal yin̈ hunuxa heyet anmahil, yeb hebuchwahi, yeb tzoti' tx'oj chielti' yul heti'. 9Caw mach cheyaco lek'ti'al teyet hununex, wal xin caw matxa ayexocto yalan̈ yip hune' icham beybal ik'biltic'a heyu yeb huntek'an istx'ojal chewatx'e yet yalan̈tocanoj. 10Yaja' wal tinan̈ xin, haxa hune' ac' beybale ik'bil heyu, lan̈an istoholbico henabal, yun̈e lahanxa chexelico yeb Comam Dios, Comam con̈watx'eni, cat heyohtan̈enilo Comam yin̈ caw c'ul. 11Wal xin machi yoc yin̈ mac anmahil, waxan̈ca Israel maca machoj, waxan̈ca chabilxa circuncisión yin̈ isnimanil maca machoj. Waxan̈ca nan con̈obal, waxan̈ca xin mach cuywomoj, waxan̈ca yet isba ischuquil, maca c'amte'; caw mach chiyoc huntek'an tu' yin̈, ha' hune' caw yilal to yeton̈xa Comam Jesucristo cosunil, Comam ec'bal niman yelapnoj, caw xin ayco Comam yul janma. 12Wal xin, caw ochebilex yu Comam Dios, saybilex yu Comam yu heyoc yuninaloj. Caw tz'ayojab hec'ul yin̈ heyet anmahil, caw c'ulch'anojab cheyute hec'ul, chewchotan̈eojab cheyute heba, machojab chexhowbi, ayojab henimanc'ulal. 13Caw nimanojab cheyute hec'ul teyin̈ hununex, ak'we nimanc'ulal teyin̈. Tato ayex cheyaco hemul teyet, haca'ojab yu yak'ni nimanc'ulal Comam Jesucristo Jahawil yin̈ sunilal comul, hacojab tu' chu heyak'nipaxo nimanc'ulal teyin̈ hununex. 14Ha' hune' caw yilal yehi, xahan cheyil heyet anmahil, yuto ha' hune' coxahann̈en coba, ha' chon̈hunbanayo yin̈ isc'ulal Comam. 15Ha'ojab hune' ak'anc'ulal chiyak' Comam Cristo chiijban heyanma, yuto yu hune' tu' yuxin awtebilex yu Comam Dios, yun̈e hune'xan̈e nimanile cheyucanoj. Ak'we yuch'andiosal tet Comam Dios yin̈ sunilbal tiempo. 16Caw chiwochehan tato caw huneln̈e chucanico Istzoti' Comam Jesucristo yul heyanma. Yin̈ojab caw helanil checuylecanto heba, cat hecachni heba. Bitn̈ewe isbi Comam Dios yu Salmos, himnos yeb bit chipitzc'ati yul heyanma. 17Sunil tzet chewatx'e yeb sunil tzet cheyalpaxoj lahanojab haca' tzet choche Comam Jesucristo. Ak'we yuch'andiosal tet Comam Dios yu Comam Jesucristo. 18Hex ixale, yijewe tzet chal heyichamil, yuto caw ayexxaco yul isk'ab Comam Jesucristo. 19Yebpaxo hex ichamile, xahan cheyil heyixal, mach howo cheyute heba yin̈ ebix. 20Yebpaxo hex uninale, yijewe yin̈ sunil tzet chal hemam hemi', yuto caw chitzala Comam Dios yin̈ haca' tu'. 21Hex mame mi'e hex ti', mach cheyak'tij ishowal heyuninal yin̈ isnabn̈ehal, haxinwal machi cabconcan̈ isc'ul. 22Haxa hex camte' hex, yijewe yin̈ sunil tzet chal heyahawil yul sat yiban̈k'inal ti'. Machojabn̈etaj yet t'an̈anico ebnaj teyin̈ sak'al hemunlahi, yun̈e caw c'ul cheyucano yul sat ebnaj. Wal xin sunilojab heyanma chexmunlahi, xiwan̈wej yuto caw chil Comam Jesucristo tzet chewatx'e. 23Sunilojab tzet chewatx'e, yin̈ sunil heyanma chewatx'eni, hacojtam ha' tet Comam bay lan̈an heyijeni, maẍtaj tet anma. 24Caw johtaxa tato chiyak' Comam comatan han̈on̈ yuninalon̈xa ti', yuto ayon̈ico cowatx'en haca' tzet choche isc'ul Comam Jesucristo, Comam Jahawil. 25Wal mac chiwatx'en istx'ojal xin, chischah ispaj sunil tzet machiswalil chiswatx'e tu' tet Comam Dios. Yuxin tzet chi-la-iswatx'e hunun anma, hac tu' ispaj chiak'lax tet yu Comam Dios.

will be added

X\