COLOSENSES 2

1Ẍwochean ta cheyohtajn̈e ta caw aycoj yin̈ hin c'ul hin munla heyuan, yu pax heb'ya' ay Laodicea, b'oj yu hantaj heb'ya' maẍto chin ohtajn̈enan. 2Caw chin munlaan yun̈e he chani yip heyanma, haxin̈wal hun cheyute heyanma yin̈ heyochen he b'a. Ẍwochean ta tz'ajan ẍcawxi he c'ul yin̈ he txumni tzet ewantic'a ye yu Comam cat heyohtajn̈eni, hune' tu', ha' Comam Cristo. 3Ha' Comam ch'a'ni johtajn̈e' sunil stz'ajanil sc'ul b'oj yohtajb'al Comam Dios ewan yeyi. 4Ẍwal hune' ti' teyetan yun̈e macheya' sub'u' he b'a tet mac ch'ec' smonte' anma. 5Waxan̈ca machin texolan, yaja' wal wanmaan ay texol, caw chin tzalaan haxca c'ulch'an cheyute he b'a b'oj caw lin̈anex yin̈ heya'ni yuluj he c'ul yin̈ Comam Cristo. 6Yuxin haca' xu he chani Comam Cristo Jesús he Yahawoj, ehan̈wejc'oj yin̈ Comam yin̈ ẍtoj co sataj ti'. 7Haca' hunuj te' te' caw c'ul yeytoj xe' yul tx'otx', hactu' cheyute heyanma yin̈ Comam Cristo. Lin̈anex yin̈ heya'ni yuluj he c'ul haca' xu ya'lax he cuyb'anil, b'oj ayexn̈eticoj heya'ni yuch'antioẍ tet Comam Dios. 8Nann̈e heyu, taj cheya' ayoj he b'a tet mac chal hex sub'nuj, scuyni hej tzetet mat st'in̈aniloj ye teyet, hunk'aan ti' mach yelapnoj yeyi, haxca mat yin̈oj scuywab'al Comam Cristo tzujan, to scuywab'al ichmame chab'etoj b'oj haxa tzet nab'il yu anma yet satyib'an̈k'inal ti' ib'il yu. 9Sunil tzet ye Comam Dios tz'ajancoj yin̈ snimanil Comam Cristo. 10Yuxin tz'ajan lahan je tinan̈, haxca hun je yin̈ Comam Cristo, Comam swi'al yin̈ hej espíritu caw ay yelapnoj yeyi b'oj ay yautoridad. 11Haxca hun jecoj yin̈ Comam Cristo, yuxin xcon̈ a'lax circuncidar, yaja' mataj hune' circuncisión ch'oc yin̈ co nimanil ti' ẍwalan, to ha' tzet xu co colchacan yu Comam Cristo yul sk'ab' hej tzetet xju yet yalan̈to tu'. 12Ha' xji'ni ha' hun, xcon̈ mujican b'oj Comam Cristo, b'oj hun xcon̈ pitzc'alaxcan̈ b'oj, haxca xja' yuluj co c'ul yin̈ scan̈il ye Comam Dios xpitzc'ancan̈ Comam Cristo xol hej camom. 13Yet yalan̈to tu', camnaj heyanma yu he mul, machexcoj yin̈ scon̈ob' Comam Dios, yaja' tinan̈, xa' Comam Dios he k'inal b'oj Comam Cristo yet xa'nican tan̈oj Comam Dios he mul haca' xu ya'ni tan̈oj Comam co mulan. 14Haxca aytic'acoj hune' co c'as jib'an̈, haxca mach xco yijye chejb'anile. Yaja' Comam Dios xb'ut'nitan̈oj co c'as tu', spahnicoj yin̈ culus, syeniloj to xax tan̈canoj co c'as tu'. 15Yu scamical Comam Cristo yin̈ culus x'ay hej espíritu caw ay yelapnoj yeyi, b'oj ay yautoridad. Syeni Comam yin̈ sat sunil anma to xax ay hunk'aan tu' yu. 16Yuxin tinan̈, mach heyocletoj mac xtxok'ni he sat yin̈ tzet che lo b'oj tzet cheyuc'u, b'oj ta mache yec'tze k'in̈ ch'ec'tzelax hunun ab'il b'oj k'in̈ yet xpitzc'a x'ahaw b'oj ta mache yijye tz'ayic xewb'al. 17Haxca sunil hunk'aan ti' yen̈eln̈e tzet chija' sb'a yin̈ Comam Cristo xu ya'laxi, yaja' tinan̈, xax yij sb'a haxca xax hul Comam. 18Machca cheyab'etoj tzet chal mac ẍpahni he chani tzet ch'a'laxoj teyet tu', hunk'aan mac chex schilb'an heyanicoj he b'a yin̈ sya'tajil, b'oj he hak'en hej ángeles. Chala to ay tzet sye sb'a tet, caw chacoj lolo'al yin̈ yu hunk'aan tu', yaja' sucaln̈e ye scuywab'al tu'. 19Haxca mach cha' yilal yanicoj Comam Cristo yin̈ scuywab'al. Sucaln̈e yeyi haxca Comam swi'al yecoj jin̈, ha' Comam ch'a'ni jip, ha' Comam chon̈ hunb'ancoj co hunil haca' hune' nimanile c'alq'ueb'il sb'a xijil yu hej xtx'an̈al, yuxin chon̈ ch'ib'iloj haca' chal sc'ul Comam Dios. 20Haxca camnaj hexxa yin̈ Comam Cristo, matxa hexcoj yalan̈ cuywab'al comonaln̈e ye yet satyib'an̈k'inal ti', ¿tzet yuxin ẍto he yijye hunk'aan chejb'anil ẍhalni: 21Xahan yocnicoj hune' tu' heyu, ẍi, xahan he loni hune' tu', xahan he tzab'ni hune' tu', ẍi? 22Yaja' tzetet b'ay chon̈ cachlax tu', ẍtan̈iloj yu yocnicoj ju. Hunk'aan ti' schejb'anil b'oj scuywab'aln̈e anma yeyi. 23Waxan̈ca hunk'aan chejb'anil ti' st'in̈anil ye ẍjab'e, haxca schilb'a co hak'en hunuj mac mat yetoj ay co hak'eni b'oj jay nianb'ail tet, b'oj ẍjacoj co nimanil yin̈ sya'tajil, yaja' mach ẍcolwa yin̈ janma yiniloj hej tzetet tx'oj chochetoj co nimanil.


Copyright
Learn More

will be added

X\