COLOSENSES 2

1Caw chiwochehan cheyohtan̈eloj tato caw lahbiloco wuhan inmunlahan heyu, yeb yu ebnaj juẍta ay yul con̈ob Laodicea. Yebpaxo yu macta ayxaco yul isk'ab Comam maẍto bay chilico win̈an huneloj. 2Caw chinmunlahan yun̈e yik'ni yip heyanma, yeb yun̈e hunlahanxan̈e hexahann̈en heba hesunil. Chiwochehan caw helan chexelcanico yin̈ yet Comam Dios, yun̈e caw heyohtan̈encanilo mac hune' mach ohtabilo yet yalan̈tocanoj, ha' ton xin Comam Jesucristo. 3Ha' yin̈ Comam Cristo chiilchalo sunilal isc'ulal helanilehal yeb nabale. 4Chiwaltojan huntek'an ti' teyet yun̈e machi mac chexak'ni subchaho yu montebal tzoti', yuto ay mac ti' caw helan chutecano isba. 5Waxan̈ca machijinan texol, yaja' ayexico yin̈ inc'ulan, haca'ojtam ayinicojan texol. Caw chintzalahan yet chiwabenan tato caw c'ul hebeybaln̈en tzet choche isc'ul Comam, caw cheyapaxico heyanma yin̈ Comam Jesucristo. 6Yuxin haca'tic'a yu hechahni Comam Jesucristo yul heyanma, hac tu' xin cheyutepaxo hebeybaln̈en tzet chal Comam. 7Haca' hunu te te' caw caw yecanayto xe' yul tx'otx', hac tu' cheyute heba yin̈ Comam Jesucristo, lin̈bawe heba heyanico heyanma yin̈ Comam haca' yu yak'laxcano hecuybanil, cat xin heyak'ni yuch'andiosal tet Comam Dios yin̈ sunilbal tiempo. 8Cheyil heba xin, mach cheyak' subchaho heba tet ebnaj choche quexyak'a' subchahoj, chalni ebnaj helanile yet yul sat yiban̈k'inal ti', yeb cuybanile maẍtaj yecoj, yuto maẍtaj yin̈ Comam Jesucristo chilo ebnaj huntek'an tu'. Wal xin han̈etic'a iscuywabal yichmam ebnaj chi-la-yala, yeb cuybanile yet yul sat yiban̈k'inal ti'. 9Wal xin caw tz'ajan yecanico isc'ulal Comam Dios yin̈ Comam Jesucristo, 10yuxin caw tz'ajan yecanayo isc'ulal Comam Dios jiban̈ tinan̈, yuto hunxa je yeb Comam Jesucristo. Ha' Comam ayco yahawilo yiban̈ huntek'an ayco yahawiloj yeb ay yip, huntek'an mach chijilico yin̈. 11Yuxin caw ayxaco circuncisión teyin̈ tinan̈, yuto caw hunxa heye yeb Comam Jesucristo. Yaj maẍtaj hune' circuncisión chioc yin̈ conimanil chiwalan, wal xin hune' circuncisión chitit yin̈ Comam Jesucristo yin̈ con̈iscolni yul isk'ab istx'ojal ayco jin̈. 12Hayet yahcano ha' hewi', caw hun yu hemujlax yeb Comam Jesucristo yul sat Comam Dios. Yebpaxo xin hun yu heyitzitzbican̈ yinta Comam, yuto caw heyayto yul heyanma yin̈ Comam Dios ak'n̈i itzitzbican̈ Comam Jesucristo. 13Hayet yalan̈tocanoj, camnajexilo yul sat Comam Dios yu hetx'ojal yeb yu mach circuncidado heyehi. Yaja' tinan̈, caw hun yu yak'nicano Comam Dios hek'inal yeb Comam Jesucristo. Yuxin yu Comam Jesucristo yuxin yak'cano tan̈o Comam Dios sunilal comul. 14Ay hune' coc'as ayco jiban̈ yet yalan̈tocanoj yuto machi coyije huntek'an ley. Yaja' Comam Dios ak'ni tan̈o hune' coc'as tu'; yilo Comam jiban̈ yuto pahlaxico Comam yin̈ te' culus yu ch'en lawuẍ. 15Hayet iscam Comam Jesucristo yin̈ culus tu' xin, yak'ni ayc'ayo Comam huntek'an yahawil yeco yu naj matzwalil. Isyenicanilo Comam yin̈ sat anma tato elcano ispixan huntek'an tu' yin̈ huneln̈e. Hac tu' yu isyenilo Comam tato k'oji Comam yin̈ naj matzwalil. 16Yuxin, ta choche ebnaj Israel cheyije isnabal ebnaj haca' yin̈ tzet chilolaxi, yeb yin̈ tzet chic'uxlaxi, yeb yin̈ tz'ayic caw txahul yul sat ebnaj, maca yet chipitzc'a ixahaw, maca yin̈ tz'ayic xewilal; caw mach chechah heyabe. 17Yuto sunil huntek'an tu' yecheln̈e yin̈ tzet xahul coxol, ha' isyelal yechel tu', ha' ton Comam Jesucristo. 18Mach cheyak' hamanil hecachlax hechahni hematan chak' Comam Dios, yu heyabento tzet chiyal ebnaj teyet. Chal ebnaj tu' ta caw yijem ebnaj, chiyo isba ebnaj tet ebnaj ángel, caw comon chaco isba yin̈ tzet ye tu' mach chijilico yin̈. Caw comonn̈etic'a chisnime winajn̈e isba ebnaj yin̈ tzettaj chiec' yin̈ isnabal. 19Ha' ebnaj tu' mach hune'n̈eho ye ebnaj yeb Comam Jesucristo, Comam iswi'ehal yeco jin̈. Ha' Comam Cristo chiak'ni jip, chon̈ishunbacano cosunil haca' hunu nimanile tzablebil isba isxijil yu istx'an̈al; chon̈yak'ni ch'ibo Comam, yuto hac tu' chiel yin̈ isc'ul. 20Walex hex ti', camnajexxa yinta Comam Jesucristo yul sat Comam Dios, yuxin matxa ayexicto yalan̈ chejbanile yet yul sat yiban̈k'inal ti'. Yaja' ¿tzet yin̈ yuxinto haca' to anma yet yul sat yiban̈k'inal ti' cheyute heba? Chebeybaln̈en huntek'an cuybanile chalni haca' ti': 21“Txahul yocnico hune' ti' heyu, maca xahan heloni huntek'an ti', maca hetzabni huntek'an ti',” ẍi. 22Wal xin huntek'an cuybanile tu' yet anman̈e yehi, niẍtejal istan̈iloj yet chiocnico ju. 23Yeli huntek'an cuybanile tu', cochantan̈e ha' yehi, yuto chala ta chijiyo coba, cat cocachni coba yin̈ej tzet ye tu', yeb cocachni conimanil yin̈ej tzet ye tu', yaja' mach chicolwa yin̈ janma yinilo istx'ojal chocheto conimanil.

will be added

X\