COLOSENSES 1

1Hayin Pablo hin ti'an, yapóstol Comam Cristo Jesús wean, haxca hactu' x'el yin̈ sc'ul Comam Dios. Ha'hun ya' juẍtaj Timoteo ẍwet tz'ib'n̈en hune' wum ti' teyetan, 2hex caw hex yet-xa Comam Cristo, hex wuẍtaj hex wanab' yijyom ay yul con̈ob' Colosas. Ya'ab' Comam Dios co Mamwej sc'ulch'anil sc'ul b'oj ak'anc'ulal teyet. 3Yet ẍja'ni joración teyin̈an, ẍtic'a ja' yuch'antioẍ tet Comam Dios Smam Jahaw Jesucristo, 4haxca xjab'e sk'umalan to caw cheya' yuluj he c'ul yin̈ Comam Cristo Jesús, b'oj caw xahan cheyil heb'ya' jetb'i yet-xa Comam. 5Sunil ti' cheyu, yu ẍcawxi he c'ul he chanoj tzetet cha'a Comam teyet, hunk'aan majb'ilxaloj teyet b'ay ay Comam Dios. Hune' scawxob'al he c'ul ti' stzujcha heyu yet xeyab'en st'in̈anil tzoti' c'ul yet colb'anil. 6Hune' tzoti' x'a'lax teyet ti', sunilxa satyib'an̈k'inal ti' pujan, haca' hunuj te' satnom te' caw c'ul chu sch'ib'i b'oj caw c'ul satni, hactu' yeyi. Hacpaxtu' x'elicoj te xol yettax xeyab'en yal-lax hantaj sc'ulch'anil sc'ul Comam Dios, b'oj xe cha yin̈ st'in̈anil. 7Ha' hune' ti' scuy ya' juẍtaj Epafras teyet, ya' caw ocheb'il. Ya' ti' ẍjet munlaan, ha' ya' ti' chejab' caw yijyom yin̈ Comam Cristo yu sc'ulaloj heyet. 8Ha' ya' xhalni jetan hantaj cheyoche heb'ya' jetb'i yu Comam Espíritu Santo. 9Yettax xjab'en hune' tu'an, mach co b'ejcan ja'ni joración teyin̈an. Ẍco k'anni tet Comam Diosan, ta ch'a'lax stz'ajanil he c'ul yu Yespíritu Comam, yun̈e' he txumniloj b'aytet choche Comam che watx'e. 10Ta hactu' chex elicoj haca' co k'anni tu'an, chex ehojc'oj haca' choche Comam, cheyunuj hantaj tzetet c'ul, haxca hactu' yet ay heyuni, haxin̈wal lahan cheyucanoj haca' hunuj te'te' c'ul satni, hactu' chu cam heyohtajn̈enoj Comam Dios. 11Ẍco k'annian ta yu scan̈il smay Comam cam ch'oc heyip, haxin̈wal ẍtechaapnoj sunil yin̈ nimanc'ulal heyu yin̈ tzalalal. 12Cheya' pax yuch'antioẍ tet Comam Dios co Mamwej yin̈ tzalalal, haxca xcon̈ swatx'eloj Comam yun̈e ay joc yin̈ tzet cha'a' tet mac yet-xa, b'ay ay sajilk'inal sc'atan̈ Comam. 13Xcon̈ scol Comam Dios yul sk'ab' naj yahaw k'ejholo, xcon̈ yanic'oj yul sk'ab' Sc'ahol caw ocheb'il yu. 14Ha' Sc'ahol Comam xcon̈ colni, xa'nican tan̈oj co mul. 15Comam Dios mach ẍjil yin̈ Comam, yaja' Comam Cristo ẍyeniloj tzet yeyi. Xol tzetet watx'eb'il yu Comam, matzet ẍc'ojic'oj yin̈ Comam Cristo. 16Ha' Comam Dios x'a'ni swatx'e' Comam Cristo sunil tzetet ay yul satcan̈ b'oj tzetet ay sat tx'otx'otx' ti', hej tzetet ẍjil yin̈ b'oj tzet mach ẍjil yin̈, haca'na hunk'aan ẍwala' ti'an: Mac tz'on̈an yul sdespacho, mac aycoj yahawoj, mac k'a' ay yelapnoj yeyi, b'oj mac ay yautoridad. Sunil hunk'aan ti' xwatx'i yu Sc'ahol Comam, yu yanicoj smay Comam. 17Comam Cristo ti', ayxatic'a Comam yalan̈to maẍto ẍwatx'i hej tzetet. Yu Comam lin̈an sunil tzetet. 18B'oj hunxa, ha' Comam swi'al yin̈ iglesia, snimanil Comam ye iglesia ti'. Ha' Comam yichob'anil yin̈ sunil hej tzetet, ha' b'ab'el xpitzc'acan̈ yin̈ camical yun̈e ha', ah b'ab'el yin̈ sunil tzetet. 19Haxca xoche Comam Dios ta sunil tzet ye Comam, tz'ajancoj yin̈ Comam Cristo. 20Xoche Comam Dios smeltzo'tij sunil hej tzetet yin̈ yu Comam Cristo, hej tzetet ay sat tx'otx'otx' ti', b'oj hej tzetet ay satcan̈. Yu schiq'uil Comam Cristo smaltoj yin̈ culus, xanicoj Comam sunil hej tzetet yin̈ ak'anc'ulal b'oj. 21Yet yalan̈to, machexcoj yin̈ Comam Dios yu hej tzetet tx'oj xeyu, haxca ẍcajconcoj he yanma yin̈ Comam. 22Yaja' tinan̈, yu scamical Comam Cristo yin̈ snimanil, xquex yacoj Comam Dios yin̈ ak'anc'ulal b'oj. Xu Comam hune' tu' yun̈e heyehojc'oj yin̈ sat, caw hex yet-xa, matxa ninoj he tx'ojal, matxa tzet chu yal-laxcoj yin̈ he sat. 23Yaja' chija' sb'a hune' ti' ta lin̈anexn̈etic'a yin̈ cuywab'al b'ay xja' yuluj co c'ul, ta lahan cheyute he b'a haca' hune' n̈ah c'ul yeyoj xe' yib'an̈ hune' samch'en, ta mache pohiloj he b'a yin̈ stzoti' yet colb'anil x'oc scawxob'aloj he c'ul yet xeyab'en tzoti' c'ul xpujb'alaxc'oj sunil satyib'an̈k'inal ti'. Hayin hun xquin oc ẍchejab'oj yin̈ spujb'alaxc'ojan. 24Tinan̈ chin tzala yu hantaj ch'ec'ya' wanma heya'ilojan. Ẍwil sya'tajil yin̈ hin nimanil ti'an yun̈e chin tz'ajb'a hantajto sya'tajil mach xil Comam Cristo co ya'iloj hayon̈ yiglesia on̈xa ti', hayon̈ ti' snimanilxa Comam jeyi. 25Comam Dios xquin anicoj schejab'oj yiglesiaan, yun̈e tz'ajan ẍwal stzoti' Comam teyetan. 26Ha' hune' stzoti' ti' mat ohtajb'iloj, ewantic'a ye yu Comam yettax x'ichitij, yaja' tinan̈ xa' Comam johtajn̈e' hayon̈ hon̈ yet-xa ti'. 27Nab'ilxatic'a yu Comam ta hayon̈ hon̈ scon̈ob' ti', ẍjohtajn̈e hune' tzoti' mach sb'ih hantaj yeltich'anil, ewantic'a ye yalan̈to. Ha' hune' tzoti' tu', xalni ta aycoj Comam Cristo jin̈, cha' scawxob'al co c'ul to ay joc yin̈ yeltich'anil cha'a' Comam Dios jet. 28Yuxin ha' Comam Cristo ẍjalic'ojan, ẍja'ni sc'uluj hunun anmaan, ẍco cuyni yu stz'ajanil co c'ulan, haxca ẍjoche ja'acoj sunil mac yihxa snab'al yin̈ yet Comam Cristo yin̈ sat Comam Diosan. 29Yu hune' ti', ẍwitij wanma win̈ hin munla yu sunil scan̈il ye yip Comam Cristo ẍmunlacoj win̈an.


Copyright
Learn More

will be added

X\