HECHOS 9

1Yet hune' tiempohal tu', maẍtic'a isbej naj Saulo issayni ebnaj ayxaco yul isk'ab Comam Jesús, chal naj ispotx'o' camo ebnaj. Isto naj islahti'n̈eno isba yeb ebnaj yahawil yin̈ ebnaj sacerdote ah Israel. 2Isk'anni naj hune' carta yun̈e yoc naj yulaj iscapilla ebnaj Israel bey con̈ob Damasco yun̈e istzabniti naj sunil ebnaj ayxaco yin̈ hune' ac' cuybanile. Sunil ebnaj winaj yeb ebix ix xayaco yanma yin̈ Comam Jesús, beh yinito naj yul preso bey yul con̈ob Jerusalén yalni. 3Hac tu' yu isto naj bey Damasco tu'. Yet ayco naj yin̈ isbel tu' xin, yet lan̈anxa yapni naj yayilo jopla hune' issajilk'inal yin̈ naj. 4Caw yin̈ an̈e xin ayc'ay naj sat tx'otx', yaben naj hune' yul nuk'e halni haca' ti': —Saulo, Saulo, ¿tzet yin̈ yuxin chinhatzumbec'ojan? ẍi. 5Isk'amben naj: —Mamin, ¿mac anmahil hach? ẍi naj Saulo tu'. Istak'wi hune' yul nuk'e tu' tet naj: —Haninti'an Jesús inan, caw ayachico quinhatzumbenic'ojan, yaj ton̈e chawak' lahwo haba haca' chu islahwi hunu no' wacax chixan̈wa yin̈ hunu te te' k'ak'i' iswi', ẍi hune' tu'. 6Caw xin chiluylun naj Saulo tu' yu xiwquilal, yalni naj xin: —Mamin, ¿tzet chawoche chinwatx'ehan? ẍi naj. Yalni Comam tet naj: —Ahan̈wanoj cat hato yul con̈ob tu', ha' tu' chihallaxo tawet tzet wal hawuni, ẍi Comam Jesús tu' tet naj. 7Wal ebnaj yetbi naj Saulo tu', caw sucbicanilo isc'ul ebnaj yuto caw yabe ebnaj istzotel hune' yul nuk'e tu', yaj mach hunu mac yilico ebnaj yin̈. 8Lahwi tu' xin, yahwano naj Saulo tu'. Yet ishajni sat naj matxa yu yilni naj, yuxin haxa ebnaj yetbi naj tu' oc xecnoto naj yul con̈ob Damasco. 9Yet yapni naj bey tu', oxeb tz'ayic mach chu yilni naj, mach wa' naj, matzet yuc'paxo naj. 10Yul con̈ob Damasco tu' xin, ay hune' naj ayxaco yul isk'ab Comam, chiyij Ananías. Yalni Comam Dios yul iswayic naj yin̈ sajsatil haca' ti': —Ananías, ẍi Comam. —¿Tzet chawal Mamin? ẍi naj. 11Yalni Comam: —Ahan̈wanoj cat hato yul hune' beh, Tohol isbi. Hayet chaẍapno bey yatut naj Judas, cat hak'amben naj Saulo ah con̈ob Tarso, lan̈an istxahli naj bey tu'. 12Ay hune' tzet manyehan yila' naj tato chaẍapno isc'atan̈ naj, cat hawanayo hak'ab yiban̈ iswi' naj. Hacn̈e tu' chiyu ishajchaho sat naj, ẍi Comam tet naj Ananías. 13Yalni naj Ananías hac ti': —Mamin, yaj tx'i'al tzet xawabehan yin̈ naj Saulo tu'. Caw hanta anma ayco yul hak'ab bey Jerusalén, caw ch'ec'ya' yanma yu naj. 14Tinan̈ xin, xahul naj bey ti', xaak'lax hum yul isk'ab naj yu naj yahawil ebnaj sacerdote yin̈ ebnaj Israel. Chul naj istzaba'to anma ayxaco yul hak'ab, ẍi naj tet Comam. 15Yalnipaxo Comam tet naj: —Asi' isc'atan̈ naj Saulo tu' yuto sic'bilxalo naj wuhan. Ha' naj chihalnoc'o intzoti'an xol anma mach Israeloj, yeb tet ebnaj yahawil ebnaj, yeb tet ebnaj Israel hawet con̈ob. 16Yeb chinyehan yila' naj hanta isya'tajil chak'le naj yu yalni Intzoti'an, ẍi Comam tet naj. 17Hac tu' yu isto naj Ananías bey hune' n̈a tu'. Yet yapni naj yocto naj yul n̈a, yanayo isk'ab naj yiban̈ iswi' naj Saulo, yalni naj haca' ti': —Wal tinan̈ wuẍta Saulo, Comam Jesucristo isyecan̈ isba yul habeh bay macachtita, ha' maquinchejnitijan tac'atan̈ yun̈e ishajlo hasat ti' hunelxa, cat xin hachahnicano Comam Espíritu Santo yin̈ hawanma, ẍi naj tet naj Saulo tu'. 18Hunepixto xin yayc'ay huntek'an haca' ismelyaẍil istz'umal no' cay ayco yen̈elo sat naj Saulo tu', hac tu' yu yilnipaxocan̈ naj hunelxa. Lahwi tu' xin, yahcano ha' iswi' naj. 19Iswa'paxocan̈ naj, yik'ni yip naj hunelxa. Tx'i'alto tz'ayic cancano naj isc'atan̈ ebnaj ayxaco yul isk'ab Comam bey yul con̈ob Damasco tu'. 20Lahwi tu' xin, yec' naj Saulo yalnoc'o yulajla iscapilla ebnaj Israel, chalni naj tato caw yeli Isc'ahol Comam Dios ye Comam Jesucristo. 21Ha' anma aben tzet chal naj, caw c'aycanocan̈ isc'ul yabeni. Yalni haca' ti': —¿Tom maẍtaj naj ti' chitan̈tzenilo anma chichahni Comam Jesucristo yul yanma, bey yul con̈ob Jerusalén? ¿Tom maẍtaj naj ti' chihul c'alnoto ebnaj ayxaco yul isk'ab Comam, cat yinito naj tet ebnaj yahawil sacerdote? ẍi anma tu' yin̈ naj. 22Caw ahcanocan̈ naj Saulo tu' yalni Istzoti' Comam yun̈e yohtan̈enilo anma tato caw yeli ha' Comam Jesús ha' ton Cristo echmabil yuli. Yuxin ebnaj Israel ay yul con̈ob Damasco tu', mach chitxumcha yu ebnaj yin̈ tzet chiyu ispajtzen ebnaj tet naj Saulo. 23Lahwi yec'to hayeb tz'ayic xin iscutxban isba ebnaj yahawil ebnaj Israel, islahti'n̈en isba ebnaj tato chipotx'lax camo naj Saulo tu'. 24Caw hunun tz'ayic yeb hunun ak'bal ismajni ebnaj naj Saulo yul ispultahil ch'en c'ub hoyanico yin̈ con̈ob tu' yun̈e ispotx'lax camo naj, yaj xin yabelo naj Saulo hune' tu'. 25Yuxin ha' ebnaj ayxaco yul isk'ab Comam inilti naj yet ak'balil, alaxayto naj yul hune' niman motx, lahwi tu' xin yalaxilto naj yul isventanahil hune' niman c'ub tu'. Hac tu' xin yu iscolcha naj Saulo. 26Haxa yet yapni naj Saulo yul con̈ob Jerusalén, yoche naj ishunba isba yeb ebnaj ayxaco yul isk'ab Comam yul con̈ob tu', yaj caw xiwcan̈ ebnaj tet naj. Yuto maẍtic'a yayto ebnaj yul yanma tato yeli ayxaco naj Saulo tu' yul isk'ab Comam. 27Haxa naj Bernabé, inito naj Saulo isc'atan̈ ebnaj ischejab Comam Jesús, yalni naj tet ebnaj: —Caw yeli naj Saulo ti' yil naj Comam Jesús yul beh, istzotel Comam tet naj. Yuxin caw machi xiw naj yalnic'o Istzoti' Comam Jesús yul con̈ob Damasco, ẍi naj Bernabé tu' tet ebnaj. 28Hac tu' yu iscancano naj Saulo yeb ebnaj ayxaco yul isk'ab Comam ay bey yul con̈ob Jerusalén. Chi-xin-ec' naj yinta ebnaj, chalnic'o naj Istzoti' Comam Jesús yin̈ sunil yanma yul con̈ob. 29Caw cuywacanto naj yin̈ ebnaj Israel chihalni tzoti' chiyij griego, cat xin isteyelen isba naj yeb ebnaj. Yaj caw ay yala' ebnaj ti' tzet chu iscam naj. 30Yet yaben ebnaj ayxaco yul isk'ab Comam hune' tu', yinito ebnaj naj Saulo bey yul hune' con̈ob chiyij Cesarea. Tzujan tu' xin, ischejlaxcanto naj yu ebnaj bey yul con̈ob Tarso. 31Yin̈ hune' tiempohal tu' xin ak'anc'ulalxan̈e ye macta ayxaco yul isk'ab Comam Jesús ay yul ismajul Judea yeb xin bey Galilea yebpaxo bey Samaria. Caw yik'canocan̈ yip ebnaj yu colwa Comam Espíritu Santo yin̈ ebnaj, yeb xin caw ay yelapno ye Comam yul sat ebnaj. Caw ahcanocan̈ isch'ib isbisil macta chaco isba yul isk'ab Comam. 32Yet hune' tiempohal tu' ec' naj Pedro yul huntek'an con̈ob, hac tu' yu istuclen naj ebnaj ayxaco yul isk'ab Comam bey yul hune' con̈ob chiyij Lida. 33Yul hune' con̈ob tu' xin apni naj Pedro isc'atan̈ hune' naj chiyij Eneas. Caw waxajebxa habil isto naj Eneas tu' sat tx'at yuto caw yan̈yon̈e isnimanil naj yu hune' yabil. 34Yalni naj Pedro tu' tet naj: —Eneas, Comam Jesucristo chaẍak'ni cawxoj, yuxin ahan̈wano tinan̈, ican̈ hawaybal ti', ẍi naj Pedro tu' tet naj. Hac tu' xin yu yahwano naj. 35Sunil anma ay yul con̈ob Lida, yeb sunil anma ay yul hune'xa con̈ob chiyij Sarón ilni hune' tu' yet iscawxican̈ naj, hac tu' yu yanicanico isba anma yul isk'ab Comam Jesucristo. 36Yul con̈ob Jope, ha' tu' ay hune' ix ayxaco yul isk'ab Comam chiyij Tabita, ha' yin̈ abxubal griego, Dorcas isbi ix. Tx'i'al tzettaj ye tu' c'ul iswatx'e ix, caw xin colwa ix yin̈ anma meba'. 37Yaj ay hune' yabil caw how oc yin̈ ix, iscam ix. Yet camomxa ix tu', yaẍn̈elaxcano ix, yilaxahto ix yul hune' cuarto yin̈ iscab piso. 38Hune' con̈ob chiyij Jope tu', iscawilal Lida aycoj. Yet yaben ebnaj ayxaco yul isk'ab Comam tato ha' bey Lida ay naj Pedro ischejnito ebnaj cawan̈ ebnaj yalno tet naj: —Ton̈ jintajan̈ bey yul con̈ob Jope tinan̈ yaj yin̈ an̈e, ẍi ebnaj tet naj Pedro tu'. 39Isto naj Pedro yinta ebnaj. Yet yapni naj xin, yilaxahto naj yul hune' cuarto tu' bay ay isnimanil ix Dorcas. Ay huntek'an ebix hunix ayc'o isc'atan̈ ix camom tu', caw ch'ok'canico ebix yin̈ ix. Ay xil isk'ap ebix sabil yu ix Dorcas tu', chi-la-isye ebix tet naj. 40Lahwi tu' xin, ischejlaxayti sunil anma yul hune' cuarto yu naj Pedro. Yay jahno naj istxahli naj tet Comam Dios. Lahwi istxahli naj tu' xin, yalni naj tet ix Dorcas haca' ti': —Tabita, ahan̈wanoj, ẍi naj tet ix. Yet lahwi yalni naj tu' xin, ishajni sat ix, hayet yilni ix naj Pedro tu', yah tz'on̈no ix. 41Yoc tzabno naj yin̈ isk'ab ix, yah lin̈no ix. Yawtenahto naj Pedro sunil ebnaj ayxaco yul isk'ab Comam ay bey tu' yebpaxo ebix hunix. Isyeni naj tet sunil anma ta hulcan̈ isc'ul ix Dorcas tu'. 42Caw sunil anma ay bey Jope tu' aben isk'umal hune' tu', yuxin tx'i'al anma chahni Comam Jesucristo yul yanma. 43Wal naj Pedro cantocano naj hayebxa tz'ayical yul con̈ob Jope tu' bey yatut hune' naj watx'emilo tz'um, Simón isbi.

will be added

X\