HECHOS 9

1Naj Saulo tu', maẍtic'a sb'ejcan naj sayni anma ayxacoj yul sk'ab' Comam Jahaw, masan ẍcam heb'ya' yalni naj. Xto naj sk'ana tet naj swi'al yin̈ heb'naj sacerdote 2yun̈e ya'ni naj hunuj hum b'ay ch'a'lax schejb'anil naj Saulo sto yulaj capiya ay Damasco yu stzab'nitij naj sunil heb'ya' aycoj yin̈ scuywab'al Comam, wal ix maca winaj, chitij naj presu b'et Jerusalén. 3Yuxin xto naj, yaja' lan̈anxa yapnoj naj yul con̈ob' Damasco yet xhoyotay naj yu hune' sajilk'inal x'ayiloj satcan̈. 4Ha' x'ay naj sat tx'otx', xab'en naj hune' tzoti' chalni yin̈ hacti': —Saulo, Saulo, ¿tzet yuxin chawa' ec'oj ya' wanmaan?. 5—¿Mac hach Mamin? ẍi naj. —Hayin ti' Jesús hin, lan̈an hawa'ni ec'oj ya' wanmaan. 6Ahan̈lin̈noj yin̈ lemb'il cat ha to yul con̈ob'. Hat ẍhal-laxoj tawet tzet chawub'. 7Heb'naj tzujan yin̈ naj sucb'icanoj heb'naj yu xiwquilal. Xab'en heb'naj hune' yul nuk'e tu', yaja' mach xil heb'naj mac stzoteli. 8Lawitu' x'ah lin̈noj naj Saulo. Yet shajnitoj naj sat, matxa chu yilni naj. Yuxin haxa heb'naj tzujan yin̈ naj x'oc yin̈ sk'ab', x'iotictoj naj yul con̈ob' Damasco. 9Yet x'apni naj b'etu', oxeb' tz'ayic machu yilni naj. Yulb'al hayeb' tz'ayic tu', mach xwa' naj, machca tzet xuc' naj. 10Yultic'a con̈ob' Damasco tu' ay hune' ya' ẍcuywi yin̈ Comam Jesús, Ananías sb'ih. Xal Comam tet ya' haca' yul wayique: —Ananías, —Ayinan Mam Wahaw. 11—Chin̈e ha lema, as yul hune' calle Tohol Stoyi, hactu' sb'ih. Yet chach apnoj yatut naj Judas, cat ha k'amb'enoj naj Saulo ah Tarso. Lan̈an ya'ni naj yoración. 12Xax yil naj yin̈ haca' yul wayic ta ay hune' naj Ananías sb'ih ch'apni sc'atan̈ naj, cat yanojcoj ya' sk'ab' yin̈ swi' naj yun̈e xa hu yilnoj naj., ẍi Comam tet ya' Ananías 13Xalni ya' Ananías tet Comam: —Mam Wahaw, tx'ihal tzet ẍwab'e yin̈ naj Saulo tu'an, hantaj anma tzujanxa tawin̈ ay yul con̈ob' Jerusalén caw cha' naj ec'oj ya' yanma. 14Tinan̈ xhul naj b'eti', xax a'ot schejb'anil naj yu heb'naj swi'al yin̈ heb'naj sacerdote yu yul stzab'nojtoj mactaj chach hak'eni. 15Yaja' xal Comam tet ya': —Asi', haxca xax hin sic'leiltoj naj ocnojcoj wuan yun̈e sto naj hin yalnojc'oj xol anma mat israelojan, b'oj heb'naj rey, b'oj hawet con̈ob' israel. 16B'oj hayin caw chin yeb' yila' najan hantaj sya'tajil chila' naj hin ya'ilojan. 17Yuxin xto ya' Ananías tu'. Lawi yapni ya' x'octoj ya' yul n̈ah. Xanicoj ya' sk'ab' yin̈ swi' naj Saulo, xalni ya': —Wuẍtaj Saulo, ha' Jahaw Jesús sye sb'a tawet yul b'eh yet xcach tit b'eti', hatic'a Comam xquin anitijan yun̈e xa yu hawilni, cat ha can yalan̈ schejb'anil Comam Espíritu Santo. 18Yin̈n̈ena tu' x'ay wejna hunk'aan haca' smelyu cay yin̈ sat ya' Saulo, xwatx'ican sb'ak' sat ya'. X'ah lin̈noj ya', xi'ni ya' ha'. 19Lawitu' xwa' ya', x'oc yip ya', xcan ya' hayeb' tz'ayical xol heb'ya' xax ya' yuluj sc'ul yin̈ Comam Jesús yul con̈ob' Damasco. 20Lawitu' x'ec' ya' Saulo yala'c'oj yulaj capiya to ha' Comam Jesús, ha' Sc'ahol Comam Dios. 21Mactaj x'ab'en yalni ya' hune' tu', xc'ayiloj sc'ul, chalni heb'jetb'i: —¿Tox mataj naj ti' chal tan̈tzenojiloj anma ẍhak'en naj Jesús yul con̈ob' Jerusalén? Tinan̈ xhul naj stzab'atoj heb'jetb'i yu yinitoj yin̈ sat heb'naj swi'al yin̈ heb'naj sacerdote. 22Wal ya' Saulo, k'a' caw sunil sc'ul ya' chalni ya' to caw yeli, ha' Comam Jesús ha' Cristo Echmab'il. Yuxin heb'naj israel ay yul con̈ob' Damasco tu', mach xtxumcha yu heb'naj tzet chu spajtzen heb'naj tzet chal ya'. 23Ayxana tu', syamb'an sb'a heb'naj israel, x'oc heb'naj sk'umlanoj sb'a ta spotx'o' heb'naj ya' Saulo. 24Hunun tz'ayic hunun ak'b'al smajni heb'naj sti' spultail muro hoyn̈e con̈ob' tu', hat spotx'o' heb'naj ya' yalni. Yaja' xab'eloj ya' tzet nab'il yu heb'naj. 25Yuxin x'iotiloj ya' yet ak'b'alil yu heb'ya' ẍcuywi yin̈ ya', xaniaytoj heb'ya' ya' yul hune' niman motx, st'un̈chanaytij heb'ya' ya' yul swentanail muro tu'. Hactu' xu scolcha ya'. 26Yet x'apni ya' Saulo yul con̈ob' Jerusalén, xto ya' ya'acoj sb'a xol heb'ya' xax ya' yuluj sc'ul yin̈ Comam Jesús ay b'etu', yaja' xiw heb'ya' tet ya', macha' heb'ya' yuluj sc'ul ta ayxacoj ya' yul sk'ab' Comam Jesús. 27Haxa ya' Bernabé xto b'oj ya', xalni ya' tet heb'ya' apóstol:—Ya' Saulo ti' xil ya' Comam Jesús yul b'eh, b'oj stzotel Comam b'oj ya', yuxin sunil sc'ul ya' chalnic'oj ya' tzet xa'le Comam Jesús tet anma ay yul con̈ob' Damasco, ẍi ya'. 28Hactu' xu scan ya' Saulo xol heb'ya', ch'ec' ya' b'oj heb'ya' sunil yul con̈ob' Jerusalén. Caw sunil sc'ul ya' ch'ec' ya' yalnojc'oj tzet xa'le Comam Jahaw. 29Steyen sb'a ya' b'oj heb'naj israel ẍhalni griego. Yaja' heb'naj tu' xchiwacan̈ sc'ul heb'naj yin̈ ya', yuxin sk'umla sb'a heb'naj tzet chu spotx'noj heb'naj ya'. 30Ha' xab'en heb'ya' ayxacoj yul sk'ab' Comam Jesús ta hactu' yeyi, xto heb'ya' swab'anoj ya' b'et con̈ob' Cesarea yun̈e sto ya' yul scon̈ob' Tarso. 31Hactu' xu yoc ak'anc'ulal xol heb'ya' ayxacoj yul sk'ab' Comam ay b'et Judea, b'oj Galilea, b'oj Samaria. B'elay yi'ni heb'ya' yip b'oj caw ẍnanon heb'ya' tet Comam Jahaw. Yu ẍcolwa Comam Espíritu Santo ẍch'ib' sb'isil heb'ya'. 32Wal ya' Pedro sunil yulaj con̈ob' ch'ec' ya' yala' stzoti' Comam. X'apni ya' xol heb'ya' ayxacoj yul sk'ab' Comam ay yul con̈ob' Lida. 33Hat ay hune' naj Eneas sb'ih. Waxajeb'xa hab'il yay naj yu hune' yab'il, mach yip snimanil naj. 34Xalni ya' Pedro tet naj: —Eneas, Comam Jesucristo chach an̈teni, yuxin ahan̈wanoj, watx'ecan̈ ha wayb'al. Yin̈n̈ena tu' x'ahwanoj naj. 35Sunil anma ay yul con̈ob' Lida b'oj anma ay yac'alil Sarón x'ilni to xwatx'ican̈ naj. Yuxin xacan heb'jetb'i xtx'ojal, x'occan yul sk'ab' Comam Jahaw. 36Yul con̈ob' Jope ay hune' ya' comi' ayxacoj yul sk'ab' Comam Jesús, Tabita sb'ih. (Yul ab'xub'al griego Dorcas sb'ih ya', chaliloj hune' tu' sajche.) Tx'ihal tzetet c'ul chu ya', ẍcolwa ya' yin̈ meb'a'. 37Yaja' yet ayc'oj ya' Pedro b'et yul con̈ob' Lida, ha' tu' stzab'lo ya' Dorcas tu' yu hune' yab'il, xcam ya'. Lawi yaẍn̈elax snimanil ya', x'ilaxatoj yul hune' cuarto ay yin̈ scab' piso. 38Hune' con̈ob' tu' scawilal Lida aycoj. Ha' xab'en heb'ya' ayxacoj yul sk'ab' Comam to hat ay ya' Pedro b'et Lida, xanitoj heb'ya' cawan̈ heb'ya' yala' tet ya': —Tinan̈ ton̈ yul con̈ob' Jope. 39Yuxin xto ya' Pedro yin̈ heb'ya'. Ha' x'apni ya' b'et Jope, x'ilaxatoj ya' yul cuarto b'ay ay snimanil ya' Dorcas. Yamanxac'oj heb'ya' co mi' camnajxa yichamil. Ch'ok' heb'ya', syeni heb'ya' tet ya' Pedro hunk'aan xil k'ape, hej camiẍe watx'eb'il yu ya' Dorcas yet c'ulto ye ya'. 40Lawitu' schejniaytij ya' Pedro heb'ya' sunil, x'ay jahnoj ya', xa'ni ya' oración. Xt'an̈xicoj ya' yin̈ ya' Dorcas, xalni ya': —Tabita ahan̈wanoj. Hunip tu' shajnitoj ya' sat. Ha' xilni ya' ya' Pedro, x'ah tz'on̈noj ya'. 41Stzab'niay ya' Pedro sk'ab' ya', xinican̈ ya' ya', lawitu' x'awtenatoj ya' Pedro heb'ya' comi' b'oj heb'ya' ayxacoj yul sk'ab' Comam. Syeni ya' Pedro tet heb'ya' to xax spitzc'acan̈ ya'. 42Sunil yul con̈ob' Jope, x'ab'cha hune' tu', yuxin caw tx'ihal mac xa' yuluj sc'ul yin̈ Comam Jahaw. 43Nahatilto xcan ya' Pedro yul con̈ob' Jope, yatut hune' ya' tz'ahom tz'um chij pax Simón


Copyright
Learn More

will be added

X\