HECHOS 8

1Ha'hun naj Saulo tu' lahc'ulal yeyi ta ẍc'ojlaxcamoj ya' Esteban. Yin̈tic'a hune' tz'ayic tu' x'ichican̈ hune' niman sya'tajil yin̈ heb'ya' ayxacoj yul sk'ab' Comam yul con̈ob' Jerusalén. Xpujnatoj heb'ya' b'et Judea b'oj Samaria, haxanc'a heb'ya' apóstol mach x'elcan̈. 2Lawi scam ya' Esteban tu', xb'ey mujlaxoj ya' yu hunk'aan heb'ya' aycoj yanma yin̈ Comam Dios. Caw x'ok' heb'ya' yin̈ ya'. 3Naj Saulo, chilanxaloj yin̈ sc'ul naj sto stan̈tzenojiloj heb'ya' xax ya' yuluj sc'ul yin̈ Comam. X'oc naj yulaj n̈ah, starniltij naj winaj b'oj ix, xanitoj naj presu. 4Heb'ya' xpujnatoj tu', x'oc heb'ya' spujb'ac'oj stzoti' Comam Dios b'aytaj ch'apni. 5Ha' x'apni ya' Felipe yul con̈ob' Samaria x'oc ya' yalnojc'oj Comam Cristo tet anma. 6Ha' xab'en anma tzet chal ya', b'oj chilni sunil c'ayb'alc'ule chu ya', xanicoj yin̈ sc'ul yab'entoj tzet chal ya'. 7Tx'ihal anma xiloj ya' Felipe yespíritu naj matzwalil yin̈. Caw ch'awi espíritu tu' yin̈ ip yet ch'elcanoj yin̈ anma tu' yu ya'. Ay anma camnajiloj hanic' snimanil b'oj anma cotxlan̈e yeq'ui, xwatx'ican yu ya'. 8Yu tzet xu ya' tu', caw stzala anma yul hune' con̈ob' tu'. 9Yul hune' con̈ob' tu' ay hune' naj Simón sb'ih. Ahb'elom naj. Ayxa yichitij naj sub'ni anma, cha'ni naj c'ayoj sc'ul anma. Caw can̈ ye naj yalni. 10Sunil anma ch'ab'entoj tzet chal naj, mac comon anman̈e b'oj mac ayxa smay, chalni heb'jetb'i:—Ha' naj Simón ti', hune' Scan̈il ye Comam Dios, ẍi anma ah Samaria yin̈ naj 11Sunil anma xax sub'cha yu naj, haxca payxa x'ichitij naj yab'eli xol anma. 12Haxa yet xalni ya' Felipe tzoti' c'ul yin̈ tzet chu joc yul sk'ab' Comam Dios, b'oj tzoti' c'ul yin̈ Comam Jesucristo, ay heb'naj b'oj heb'ix xa' yuluj sc'ul yin̈ tzet xal ya'. Lawitu' xi'ni ha'. 13Hasta naj Simón xa' naj yuluj sc'ul, xi'ni pax naj ha'. Lawi yi'ni naj ha', matxa ẍhitziloj naj sc'atan̈ ya' Felipe, haxca caw ẍc'ay sc'ul naj yilni sunil hej c'ayb'alc'ule ẍyeni scan̈il ye Comam Dios chu ya'. 14Ha' xab'en heb'ya' apóstol ay yul con̈ob' Jerusalén to xa' heb'ya' ah Samaria yuluj sc'ul yin̈ stzoti' Comam Dios, xanitoj heb'ya' ya' Pedro b'oj ya' Juan b'etu'. 15Ha' x'apni heb'ya', xa'ni heb'ya' oración yun̈e schanican heb'ya' tu' Comam Espíritu Santo, 16haxca maẍto hunuj mac b'ay ch'ayiloj Comam Espíritu Santo yin̈ yanma, to ton̈e yi'naj ha' yin̈ sb'ih Jahaw Jesús. 17Lawitu' xanicoj ya' Pedro b'oj ya' Juan sk'ab' yin̈ swi' heb'ya', ẍchanican heb'ya' Comam Espíritu Santo. 18Ha' xilni naj Simón tu' ta x'a'lax Comam Espíritu Santo tet anma yet xanicoj heb'ya' sk'ab' yin̈ swi', xalten naj ch'en melyu tet heb'ya', xalni naj: 19—A'wej hune' scan̈il heye tu' wetan, haxin̈wal yet ẍwanicoj hin k'ab' yin̈ swi' anmaan, ẍchab' anma Comam Espíritu Santo. 20Ha' xab'en ya' Pedro yalni naj hune' tu', xalni ya' tet naj: —Tan̈ojab'iloj ha melyu tu' cat ha tan̈paxiloj, ham hawalni ta tzetet cha' Comam Dios jet, chu co lok'ni yu ch'en melyu. 21Hachti', mach hawoc yin̈ hune' ẍju ti'an, haxca mat c'uluj nab'il hawu yul sat Comam Dios. 22Acanoj hune' xtx'ojal nab'il hawu tu', cat ha ta'wencoj ha mul tawib'an̈ tet Comam Jahaw, ta ẍto sje' sc'ul Comam sb'ut'utan̈oj tzet nab'il hawu tu'. 23Haxca caw ẍwilan to schiwacoj ha c'ul hawilni tzet ẍjuan, ha' hune' xtx'ojal tu' c'aln̈eachayoj. 24Xalnican̈ naj Simón tu': —Ok'ojab' he c'ul win̈an, k'anwej tet Comam Jahaw yun̈e mach'ay tz'acti' xawal ti' wib'an̈an,. 25Lawi yalni heb'ya' cawan̈ apóstol tu' hej tzetet xil yin̈ Comam Jesucristo, b'oj yalni heb'ya' stzoti' Comam Jahaw, xmeltzo heb'ya' Jerusalén. Ha' ch'ec' heb'ya' yulaj swayan̈b'alil Samaria, chalni heb'ya' tzoti' c'ul yet colb'anil. 26Lawi tu' xalni hune' yángel Comam Jahaw tet ya' Felipe: —As b'et hune' b'eh ch'el Jerusalén, ch'ayapnoj Gaza. (Yul hune' b'eh tu' matxa jichanoj ch'ec' anma.) 27Man̈e yab'e ya' Felipe, xtona ya'. C'uxan aycoj ya' yin̈ hune' b'eh tu' yet stzujcha hune' naj ah Etiopía yu ya'. Naj tu' caw aysmay naj, yul sk'ab' naj aycoj sk'alomal ix yahaw Etiopía tu'. Xhulc'uj naj Jerusalén shak'e' Comam Dios. 28Ahatoj naj yul scarruaje yet xpaxtoj naj yul scon̈ob', lan̈an yalni naj tzet tz'ib'n̈eb'il yu ya' Isaías, schejab'lom Comam Dios. 29Xalni Comam Espíritu Santo tet ya' Felipe: —Hitzan̈icoj sc'atan̈ hune' carruaje tu'. 30Xto ya' yin̈ an̈e, xitzicoj ya' sc'atan̈ hune' carruaje tu'. Xab'en ya' tato tzet tz'ib'n̈eb'il yu ya' Isaías tu' lan̈an yalni naj. Sk'amb'en ya' Felipe tet naj: —¿Chim ha txum tzet chalayoj sat te' Hum ti'? . 31Xta'wi naj: —Tzic'anab' chu hin txumnian ta mach mac ẍtihniloj wetan. Lawitu' xalni naj ta ch'ahtoj tz'on̈noj ya' Felipe sc'atan̈. 32Ha' hune' tzet lan̈an yilni naj tu', ha' chala: Haca' hune' no' canelu ch'ilaxtoj potx'laxoj, hactu' chu yilaxojtoj camoj.Haca' hune' ni'an canelu mach ẍb'ili yin̈ sat mac ẍlot'niloj xil, hactu' chute sb'a, machca ch'awi. 33Caw x'iotiloj spixan, mach hunuj mac ẍcolni tet ley. Mach hunuj mac chu yalni ta ay yic'al ẍcani, haxca xpotx'laxi, ẍi Yum Comam Dios. 34Sk'amb'en naj tet ya' Felipe: —Hal wet tinan̈an mac ay yet ye tzet xal ya' schejab'lom Comam Dios ti', ¿tom ha' ya' chal sb'a, mato nan mac chal ya'?. 35Yuxin x'oc ya' Felipe shiltx'o'loj mac chal te' Hum tu', chalni ya' tzoti' c'ul yin̈ Comam Jesús. 36Aycoj heb'ya' yin̈ b'el yet x'apni heb'ya' b'ay ay ha' ha', xalnican̈ naj ah Etiopía tet ya': —Ay ha' ha' b'eti', la. ¿Tzet ẍcachni wi'ni ha'an? 37- 38Lawitu' ẍchejni naj lin̈b'alaxoj scarruaje, x'aytoj heb'ya' yul ha'ha', xi'nican naj ah Etiopía ha' yu ya' Felipe. 39Lawi yahtij heb'ya' yul ha'ha', x'ilaxnatoj ya' Felipe yu Yespíritu Comam Jahaw, matxa x'ilotna ya' yu naj ah Etiopía tu'. Caw stzala naj x'ahtoj naj yul scarruaje, x'oc naj yin̈ b'eh hunecxa. 40Haxa xilnitij ya' Felipe, hat-xa ay ya' yul con̈ob' Azoto. X'oc ya' spujb'anojc'oj tzoti' yet colb'anil yulaj con̈ob' masanto x'apnican ya' yul con̈ob' Cesarea.


Copyright
Learn More

will be added

X\