HECHOS 7

1Lawitu' x'oc naj swi'al yin̈ heb'naj sacerdote sk'amb'e' tet ya' Esteban: —¿Tom yeli xawal hunk'aan ti'? 2Xta'wi ya' Esteban: —Hex wetcon̈ob' b'oj hex swi'con̈ob', ab'ewej tzet ẍwal ti'an. Sye sb'a Comam Dios caw ay sk'ak'al smay tet jichmam Abraham yet ay ya' b'et Mesopotamia, yet maẍto ch'apni ya' ehoj Harán. 3Xalni Comam tet ya': Acanoj ha con̈ob' ti' b'oj mac ayto hawu ha b'a b'oj, cat ha to sat hune' tx'otx'otx' ẍto hin yeb' tawetan, ẍi Comam. 4Lawitu' x'el ya' yul scuenta Caldea, xto ya' ehoj b'et Harán. Lawi scamtoj smam ya', x'iotpaxtij ya' yu Comam Dios sat tx'otx'otx' b'ay ayon̈ ti'. 5Yaja' mach ninoj tzet x'a'ot tet ya' yu Comam yin̈ hune' tx'otx'otx' ti', ni hun c'uchub'oj. Yaja' xtic'a haltelaxcan tx'otx' tet ya' b'oj hayon̈ yic'al ti', to ẍjetn̈e' tx'otx' yet ẍcamoj ya'. Maẍto hunuj yuninal ya' yet xalni Comam hune' tu'. 6Xalnipax Comam tet ya': Hej hawic'al haca' con̈ob'laj chu yehoj sat tx'otx' comon tx'otx' yul hunujxa con̈ob', cat yocoj schejab'oj hune' con̈ob' tu', caw ch'ec'oj ya' yanma yulb'al can̈eb' ciento hab'il. 7Yaja' hune' con̈ob' ch'a'noj ec'oj ya' yanma hawic'al tu', ẍwa'a' pax ec'oj ya' yanmaan. Lawitu' cat yeloj hawic'al tu' yul hune' con̈ob' tu', cat hin shak'enoj b'et hune' witz ti'an, ẍi Comam tet ya'. 8Xa'ni Comam circuncisión yecheloj hune' tzoti' t'in̈b'ab'ilcan yu tet ya' jichmam Abraham yun̈e yanicoj ya' yin̈ snimanil. Yuxin yet xpitzc'a ya' Isaac, xa'lax circuncidar ya' yin̈ shujk'in̈ spitzc'ayi. Hactu' xute pax ya' Isaac tu' sc'ahol Jacob. Hactu' xute pax ya' Jacob hej sc'ahol, ha' heb'ya' cab'lan̈wan̈ tu', jichmam hayon̈ israelon̈ ti'. 9Heb'ya' jichmam tu', caw ẍchiwacoj sc'ul heb'ya' yin̈ yuẍtaj José, yuxin xtxon̈toj heb'ya' yuẍtaj tu' tet hunk'aan heb'naj b'elwom xto Egipto. Yaja' mach xtin̈chaotcan ya' yu Comam Dios, 10to xcolotiloj ya' yul sk'ab' hej b'isc'ulal. Ha' yet x'apni ya' yin̈ sat naj sreyal Egipto, xa'ni Comam sc'ulch'anil sc'ul tet ya' b'oj stz'ajanil sc'ul. Yuxin x'aotcoj ya' gobernadoral yin̈ hune' con̈ob' tu', b'oj yin̈ sunil tzet ay naj rey tu'. 11Haxa x'ay hune' niman wahil b'etu' b'oj b'et Canaán ti', caw b'isc'ulal, matxa b'ay chi' hej jichmam tzet slo. 12Ha' xab'en ya' jichmam Jacob to caw ay ixim trigo b'et Egipto, xanitoj ya' heb'ya' jichmam slok'o ixim trigo yin̈ sb'ab'elal. 13Haxa xto heb'ya' scayel, xalniloj sb'a ya' José tet heb'ya' yuẍtaj tu'; hactu' xu yohtajn̈en naj rey sfamilia ya' José. 14Lawitu' xanitij ya' José ab'ix tet smam b'oj sunil mac ayto yu sb'a b'oj, ta ẍto heb'ya' ehoj Egipto. Setenta y cinco chil sb'a heb'ya' sunil. 15Hactu' xu sto ya' jichmam Jacob b'oj hej yuninal b'etu'. Hat xcam heb'ya'. 16Lawitu' x'ilaxtij snimanil heb'ya' b'et con̈ob' Siquem, xmujlax yul hune' n̈ahch'en lok'b'ilcan yu ya' jichmam Abraham tet heb'naj sc'ahol naj Hamor. 17Yet lan̈anxa yuluj stz'ayical b'ay chija' sb'a tzet halb'ilcan yu Comam Dios tet ya' Abraham, caw xch'ib'iloj sb'isil hej jetcon̈ob' israel b'et Egipto. 18- 19Yaja' ha' x'oc hune'xa naj rey b'et Egipto tu', sayni naj tzet chu yayc'ay co con̈ob', x'oc naj yetanoj hej jichmam, haxca matxa xohtajn̈e naj ya' José, to payxa xcam ya'. Xanicoj naj hune' ley ta chiltij heb'ya' niẍtej winaj unin yin̈taj n̈ah yun̈e scami, yun̈e mach ẍcam pohcha heb'ya'. 20C'uxan yin̈ hunk'aan tz'ayical tu' xpitzc'a ya' Moisés, caw eltich'an yilot ya' yin̈ stz'ulal. Oxeb' x'ahaw eb'ab'il ni'an tz'ul tu' yul yatut smam smi'. 21Lawitu' xanaytoj heb'ya' sti' ha niman Nilo, haxa ix scutz'in naj rey x'inican̈, xa'ni ch'ib'oj ix, xanicoj ix yuninoj. 22Yuxin caw c'ul xu scuywi ya' yin̈ stz'ajanil sc'ul heb'naj egipcio, caw tz'ajan sc'ul ya' yin̈ tzet chala b'oj caw can̈ ye ya' yin̈ tzet chu. 23Yet stz'ajna ya' cawinaj hab'il, x'oc yin̈ sc'ul ya' sto yilnoj hej jetcon̈ob' israel ay b'etu'. 24Ha' xilni ya' to lan̈an yetalax hune' jetcon̈ob', x'oc ya' scolnoj, spotx'ni ya' naj egipcio ch'etan jetcon̈ob' tu'. 25Ham yalni ya' ta xtxumu' jetcon̈ob' ta ha' ya' cha'a'coj Comam Dios scolomaloj yet heb'ya', yaja' mach xtxum heb'ya'. 26Haxa hunxa tz'ayic xto ya' ilwal hunecxa, c'uxan lan̈an ya'ni cawan̈ jetcon̈ob' howal. Xoche ya' ya'a'coj heb'naj yin̈ ak'anc'ulal: Ab'ewej hex wetcon̈ob', hexti' heyuẍtaj he b'a, ¿tzet yuxin che mak'me he b'a? ẍi ya'. 27Naj ẍmak'wa tu', xtentoj naj ya' Moisés tu', xalni naj: ¿Mac cach anicoj yahawoj b'oj juezal co xol ti'an? 28¿Mato chawoche chin ha potx' camoj haca' xawute ha potx'ni naj egipcio yet ewi? ẍi naj tet ya'. 29Ha' xab'en ya' tzet xal naj, x'el ya' b'et Egipto, hat x'apni ya' ehoj haca' con̈ob'laj xol heb'jetb'i ah Madián. Yet ay ya' b'etu' xi'ni ya' yixal, xpitzc'a cawan̈ sc'ahol ya'. 30Scawinajxa hab'il ch'ec'toj, syeni sb'a hune' ángel tet ya' xol hune' k'a' k'a' ch'ah lon̈la yin̈ hune' k'uyan te' txoy b'et tajin witz ac'al aycoj yich witz Sinaí. 31Xc'ayiloj sc'ul ya' Moisés yilni yah lon̈la k'a', yuxin xhitzicoj ya' sc'atan̈ k'a', yu yilni ya' tzet ye hune' tu'. Yaja' xab'e ya' stzotel Comam Jahaw, chalni yin̈ hacti': 32Hayin ti' sDios hej ha mamichaman, ya' Abraham, ya' Isaac b'oj ya' Jacob, ẍi Comam. Xan̈e b'ayla yah ya' xiwquilal, yuxin matxa ẍt'an̈xican̈ ya'. 33Xalni Comam tet ya': Iloj ha xan̈ab', haxca hune' b'ay ayach ti', xiquiltaj yeyi haxca ayin b'eti'an. 34Ẍwil stz'a'b'alc'ule hin con̈ob' israel b'et Egiptoan, ẍwab'e yok' yanmaan, yuxin xquin ayiloj hin colo'an. Tinan̈, ab'e tzet ẍwal ti'an, haxca chach hin cheja' meltzooj Egiptoan, ẍi Comam Dios tet ya'. 35Ha' ya' Moisés ti' spahtoj heb'ya' jetcon̈ob' tu', yet xalni tet ya': ¿Mac cach anicoj yahawoj b'oj juezal co xolan? ẍi tet ya'; yaja' c'uxan ha' ya' xatoj Comam Dios yahawoj b'oj scolomaloj jetcon̈ob' tu'. Ha' yángel Comam xwaycan̈ xol k'a' k'a' tu' ha' xcolwa yin̈ ya'. 36Ha' ya' Moisés tu', x'iniloj hej jichmam b'et Egipto, sye ya' hej c'ayb'alc'ule ẍyeni sc'an̈il ye Comam Dios b'etu', b'oj sti' ha' mar Rojo, b'oj yul tajin̈ witz ac'al b'ay x'eh heb'ya' yulb'al cawinaj hab'il. 37Ya' Moisés tu' xhalni tet heb'ya' jetcon̈ob' Israel: Ay b'ak'in̈ chi'a'can̈ Comam Dios hunuj schejab'lom xol jetcon̈ob' ti' haca' xu hin yanicoj te xol ti'an, ẍi ya'. 38Ha'tic'a ya' Moisés tu' aycoj b'oj heb'ya' jichmam yaman b'et tajin̈ witzac'al. Ha'tic'a hune' ángel stzotel tet ya' b'et swi' witz Sinaí, ha'tic'a aypaxcoj yetb'ioj ya'. Ha' ya' ẍchani hune' tzoti' ch'a'ni k'inal yun̈e ya'ni pax ya' jet. 39Yaja' heb'ya' jichmam tu' mach syijyetoj heb'ya' tzet xal ya' Moisés, to ha' yet heb'ya', xpaq'uicoj heb'ya' yin̈ ya', ẍmeltzo heb'ya' Egipto yalni. 40Xalni heb'ya' tet ya' Aarón: Ẍjochean ta cha watx'e hej co tioẍ chon̈ ijb'anan, haxca mat johtajojan tzet xucantoj naj Moisés xcon̈ iniloj Egipto, ẍi heb'ya'. 41Yet hune' tz'ayical tu' x'oc heb'ya' stz'aja' hune' yechel ni'an wacax, xalten heb'ya' no' nok' xahanb'alil tet, caw sk'in̈n̈e heb'ya' tzet swatx'e tu'. 42Yu tzet xu heb'ya' tu' xiloj Comam Dios yanma yin̈ heb'ya', xtin̈chaotcan heb'ya' yuni b'aytet chal sc'ul, yin̈ shak'en sunil hej tx'umel. Hactu' yeyoj yul yum heb'ya' schejab'lom Comam Dios, chalni yin̈ hacti':Hex Israel, yulb'al cawinaj hab'il xe potx' he nok' xeyanicoj xahanb'alil yet ayex b'et tajin̈ witzac'al, yaja' mat wetoj xeya' hune' tu'an. 43To tet he tioẍ Moloc xeya'a, hune' ch'ec' ijon heyu b'oj yechel hune' tx'umel syeniloj he tioẍ Refán. Tet yechel hunk'aan tzetet xe watx'e tu', hat quex ec' jahlayi. Yu tzet xeyu tu', chex wa'a' ilaxojtoj satojtoj Babiloniaan, ẍi Comam Dios yul Yum. 44Ib'il mantiado ẍyeni ta aycoj Comam Dios xol heb'ya' yet ay heb'ya' b'et tajin̈ witzac'al. Watx'eb'il hune' mantiado tu' yu ya' Moisés haca' xu syeni Comam Dios yechel tet ya'. 45Hune' mantiado tu', xcan tet heb'ya' jichmam. Ib'il yu heb'ya' yet x'ay hunk'aan hej con̈ob' yu ya' Josué. Anma ay yul hunk'aan con̈ob' tu' stzumb'eloj Comam Dios yun̈e haxa heb'ya' xcan b'etu'. Hune' mantiado tu' ib'il yu heb'ya' masanto x'oc ya' David reyal. 46Ya' rey David tu', caw ocheb'il ya' yu Comam Dios. Sk'an ya' tet Comam ta chacan̈ ya' yatut Comam b'ay chu shak'elax Comam yu yic'al ya' jichmam Jacob. 47Yaja' haxa ya' rey Salomón x'anican̈ hune' yatut Comam ti'. 48Comam Dios Ec'b'al Yib'an̈ Sunil Tzetet, yuxin mat yetoj ay yehc'oj yul hune' n̈ah watx'eb'il yu anma, haca' xute Comam yalni yu hune' schejab'lom: 49Satcan̈, hin tz'on̈ob'al yean, tx'otx'otx', haca' xan̈ob'al woj ye tx'otx'an. ¿Tzet n̈ahil cheya'a'can̈ wet heyalnian? ¿B'aytet hunuj c'ul b'ay wal hin xewan? 50¿Tox mat hayinoj xin watx'e sunil hunk'aan tzetet ti'an? ẍi Comam Jahaw. 51Yaja' hexti', wac'a' scawil heyanma, haca' yanma mac mat ohtajn̈eoj Comam Dios. Caw chacan̈ex tet stzoti' Comam Dios. Ton̈c'a che man̈c'o tzet chal Comam Espíritu Santo. Lahanex b'oj jichmam. 52Sunil heb'ya' schejab'lom Comam Dios x'ec' ya' yanma yu jichmam tu'. Ha' heb'ya' tu' xhalni ta chuluj mac caw tohol yanma, yaja' xpotx'ot heb'ya' yu hej jichmam. Haxa xhul hune' mac tohol yanma tu', hexxa xeyacoj yul sk'ab' camical. 53Waxan̈ca ángel x'anic'oj sley Comam Dios jet, yaja' mache yijyecoj. 54Ha' xab'en heb'naj sunil tzet xal ya' Esteban, k'a' xto ahcan̈ showal heb'naj yin̈ ya'. Sajquewiloj sat heb'naj yu showal. 55Wal ya', aycoj ya' yalan̈ schejb'anil Comam Espíritu Santo, yuxin ha' xt'an̈xican̈ ya' satcan̈, xilni ya' smay sk'ak'al Comam Dios. Xilni ya' lin̈ancan̈ Comam Jesús yin̈ swatx' Comam Dios. 56Xalni ya': —Ilwej c'anab'i, shajtoj sb'a satcan̈. Ẍwil Comam Ab'iltij yu Comam Dios xol jet-anmailan, lin̈ancan̈ Comam yin̈ swatx' Comam Dios. 57Ha' xab'en heb'naj hune' tu', x'ah xayna heb'naj smajchen heb'naj xtxiquin, xto somnaj heb'naj yin̈ ya'. 58Xiniloj heb'naj ya' xtxam con̈ob' sc'ojnicamoj heb'naj ya'. Heb'naj xa' sb'a yin̈ lek'ti'al scawxencoj smul ya' Esteban tu', xacanayoj heb'naj xil sk'ap sc'atan̈ hune' naj, Saulo sb'ih. 59Yet lan̈an sc'ojni heb'naj ya' Esteban, xalni ya' tet Comam: —Wahaw Jesús cha hin pixan ti'an. 60Lawitu' sjahb'anay sb'a ya' xalni ya' yin̈ caw ip: —Mam Wahaw, machawacoj hune' ti' stz'ajoj smul heb'naj ti'. Lawi yalni ya' hune' tu', xcamiloj ya'.


Copyright
Learn More

will be added

X\