HECHOS 7

1Naj yahawil ebnaj sacerdote Israel, oc naj isk'ambe' tet naj Esteban: —¿Yelmi sunil tzet challax tawin̈ ti'? ẍi naj. 2Istak'wi naj Esteban xin: —Hex wet con̈ob yeb hex iswi'ehal yeco yin̈ con̈ob Israel ti', abewe tzet chiwalan. Wal Comam Dios, caw aycano yip Comam, isye isba Comam tet jichmam Abraham yet aytoc'o icham bey ismajul Mesopotamia, yet maẍto chito icham bey con̈ob Harán. 3Yalnicano Comam Dios tet icham haca' ti': —Bejcano hatx'otx' ti' yeb sunil hawic'al, cat hato bey hune' tx'otx' chinyecanojan tawet, ẍi Comam tet icham. 4Lahwi tu' xin isto icham yul ismajul tx'otx' Caldea, yapni icham yul con̈ob Harán, ha' tu' xin ehayo icham. Haxa yet iscam ismam icham xin, yilaxti icham yu Comam Dios sat tx'otx' bay ayon̈ ti'. 5Machi nino istx'otx' icham ak'lax tet yu Comam bey ti', yaj xin yal Comam tet icham haca' ti': —Chiwak'an hune' hatx'otx', yaja' yet chaẍcami cat iscancano tx'otx' yul isk'ab hawuninal, ẍi Comam tet icham. 6Yalnipaxo Comam Dios tet icham haca' ti': —Wal hawuninal chipohchacan̈ xin, chitocano ebnaj yul hune'xa nan con̈obal, chioc ebnaj ischejabo anma tu'. Caw can̈eb ciento habil chiyak'le ebnaj isya'tajil. 7Yaj chiwatijan isya'tajil xol anma nan con̈obal bay ch'oc ebnaj chejaboj. Chilahwi tu' xin cat winilojan ebnaj yul hune' con̈ob tu', yun̈e yinayo isba ebnaj wetan sat hune' tx'o tx'otx' ti', tx'otx' chiwak'an tet ebnaj, ẍicano Comam Dios tet icham Abraham. 8Yak'nipaxcano Comam Dios istrato tet icham Abraham, yalnicano Comam tet icham tato chioc yechel isnimanil icham. Hune' yechel tu', ha' ton hune' chiyij circuncisión, yuxin hayet ispitzc'a hune' isc'ahol icham Abraham chiyij Isaac, waxajebxa tz'ayic ispitzc'ahi, yoccano yechel isnimanil. Hacpax tu' xin yet ispitzc'a isc'ahol naj Isaac chiyij Jacob, ocpaxo yechel tu' yin̈ naj. Wal naj Jacob tu' xin, cablahan̈wan̈ isc'ahol naj yocpaxo hune' yechel isnimanil ebnaj. Wal ebnaj cablahon̈wan̈ tu' xin, caw ichmame yeco ebnaj jin̈, han̈on̈ Israel hon̈ ti'. 9Ebnaj cablahon̈wan̈ ti' xin, ay hune' yuẍtaj ebnaj chiyij José; caw yaco ebnaj ishowal yin̈ naj José tu'. Yapni hune' tz'ayical xin, yet istxon̈nito ebnaj hune' yuẍta tu' bey Egipto. Yaj xin caw ayco Comam Dios yetbiho naj José. 10Comam Dios coln̈elo naj xol sunil isya'tajil ec'le yiban̈, caw yak' Comam ishelanil tet naj, yebpaxo xin caw ayco Comam yetbiho naj, yuxin caw c'ul isbeybal naj sata naj rey Faraón. Yu isc'ulal naj tu' yuxinto oc naj gobernadoral yin̈ tx'otx' Egipto yu naj Faraón, Yocpaxo naj yahawil yin̈ sunil tzet ay naj Faraón tu'. 11Lahwi tu' xin yapni hune' tiempohal yet yay hune' wahil yiban̈ ebnaj ah Egipto yeb ebnaj ah Canaán. Caw xin oc yin̈ isc'ul ebnaj yin̈ hune' wahil tu', matxatic'a bay chiyik' ebnaj tzet chislo. 12Yet yaben naj Jacob tato ay ixim trigo bey Egipto, ischejnito naj ebnaj isc'ahol ik'o trigo; ha' ton ebnaj tu' xin, jichmam. Hac tu' yu isbeyc'o ebnaj islok'o' ixim babelal. 13Haxa yet ischejlaxtoj ebnaj yet iscayel xin, isyenilo isba naj José tet ebnaj tato caw yuẍta isba ebnaj. Hac tu' yu yohtan̈enilo naj Faraón mac anmahil naj José yu ebnaj yuẍta naj. 14Ischejniti naj José tu' yilaxoti ismam, ha' ton icham Jacob yeb sunil yuẍta naj José tu', yebpaxo yixal ebnaj, yeb sunil yuninal ebnaj. Yin̈ sunil mac tu' caw setenta y cinco isbisil. 15Hac tu' yu yapnicano icham Jacob bey Egipto. Ha' bey tu' xin camto ebnaj jichmam tu'. 16Hayet payxa tu' xin, ilaxto isnimanil ebnaj jichmam tu' bey yul con̈ob Siquem. Ha' tu' occanto isnimanil ebnaj yul hune' ch'en ch'en holbil lok'bilcano yu icham Abraham yet yalan̈tocanoj tet yuninal naj Hamor ay bey tx'otx' Siquem. 17Yet toxa ch'apni istiempohal yijni isba tzet yal Comam Dios tet icham Abraham, ispohcan̈ yuninal icham bey Egipto tu'. Hac tu' yu isch'ibcan̈ isbisil ebnaj. 18Yet hune' tiempohal tu' xin, oc hune'xa naj reyal yin̈ tx'otx' Egipto tu', yaj matxa ohtabilo naj José tu' yu naj, yuto caw payxa camto naj José. 19Caw xin etalax ebnaj jichmam yu hune' naj rey tu'. Yalni naj tet sunil ebnaj israelita tu' tato sunil niẍte isc'ahol chipitzc'ahi chisbejcano ebnaj yun̈e iscamiloj, haxinwal matxa chipohcha ebnaj. 20Yulbal hune' tiempohal tu' xin, pitzc'a naj Moisés. Caw c'ulch'ancano hune' naj nich'an tu' yul sat Comam Dios. Yulbal oxeb ixahaw ak'lax ch'ibo naj yu ismi' yeb yu ismam. 21Lahwi tu' xin, yebalaxilo naj yu ismam yeb yu ismi' tu' tet hune' ley ayco yu naj rey tu'. Haxa ix iscutz'in naj rey tu' bey ilchanoti naj nich'an tu', yanico ix naj yuninoj, yak'lax ch'ibo naj yu ix. 22Yuxin caw cuylax naj Moisés yin̈ sunil tzet yohta ebnaj ah Egipto tu'. Yuxinto caw helan elcanico naj yin̈ sunil tzet chala yeb yin̈ tzet chiswatx'e. 23Yet ayxaco naj Moisés yin̈ cuarenta habil, yoc yin̈ isc'ul naj isto yilno ebnaj yet con̈ob Israel ay bey tu'. 24Haxa yet yilni naj ta lan̈an yetalax hune' naj jet con̈ob yu hune' naj ah Egipto, yoc naj iscolnilo naj jet con̈ob tu', ismak'nicano camo naj hune' naj ah Egipto tu'. 25Ha' yute isnani naj Moisés tu' to txumchalo yu ebnaj jet con̈ob tu' tato ha' Comam Dios an̈eco naj yun̈e iscolnilo naj ebnaj yul isk'ab isya'tajil, yaj maẍtic'a txumchapaxilo yu ebnaj. 26Haxa yet hune'xa tz'ayical xin, yilni naj Moisés yak'len howal cawan̈xa ebnaj jet con̈ob, yu yoche naj yak'aco ebnaj yin̈ ak'anc'ulal yuxin yal naj haca' ti' tet ebnaj: —¿Tzet yin̈ yuxin cheyak'le howal? Caw heyet con̈ob heba, ẍi naj tet ebnaj. 27Istenlaxilo naj Moisés yu hune' naj lan̈an yak'len howal yeb hunxa naj tu', yalni naj tet naj Moisés: —¿Mac macachanico jahawilojan̈ yuxin chaẍhul cachwal jin̈an̈? 28¿Tom chawoche chinhamak' camojan haca' hawute naj ah Egipto yet ewi hawalni? ẍi naj tet naj Moisés tu'. 29Yet yaben naj Moisés yalni naj haca' ti', yelcan̈ naj. Isto naj xol ebnaj nan con̈obal bey hune' tx'otx' chiyij Madián. Ha' bey tu' xin, pitzc'a cawan̈ isc'ahol naj. 30Cuarenta habilxa yapni naj bey tx'otx' Madián, isyenican̈ isba hune' naj ángel tet naj xol xaj k'a k'a' yin̈ hune' te' tx'ix bey tx'otx' desierto yich witz Sinaí. 31Yet yilnito naj hune' tu', caw c'aycan̈ isc'ul naj yu. Haxa yet ishitzico naj iscawilal te', yaben naj istzotel Comam Dios Jahawil haca' ti': 32—Haninan isDiosal sunil ebnaj hawichmam, isDiosal naj Abraham, yeb naj Isaac, yebpaxo naj Jacob, ẍi Comam tet naj. Caw xin c'ayilo isc'ul naj Moisés tu' yu xiwquilal, yuxin matxa t'an̈xico naj yin̈ hune' k'a' tu'. 33Yalni Comam Dios tet naj: —Ilo haxan̈ab yin̈ hawoj, yuto hune' bay ayayo hawoj ti' caw txahul, yuto ha' bey ti' lan̈an intzotelan tawet. 34Ebnaj incon̈oban ay bey Egipto, chiwilan tato caw ayco ebnaj yin̈ isya'tajil, yuxin manayilojan wala'an tawet tato chincolilojan ebnaj xol isya'tajil tu'. Wal xin asi', haninan chaẍinchejtojan bey Egipto, ẍi Comam Dios tet naj Moisés tu'. 35Waxan̈ca isyah ebnaj naj Moisés yet yalni ebnaj tet naj haca' ti': —¿Mac macachanico jahawilojan̈? ẍi ebnaj. Yaj xin Comam Dios anico naj yahawilo ebnaj Israel tu', yeb xin yu iscolwa naj Moisés tu' yin̈ ebnaj yu yip naj ángel isyecan̈ isba tet naj xol k'a' k'a' yin̈ te' tx'ix tu'. 36Ha' naj Moisés inilti jichmam sat tx'otx' Egipto, yak'nipaxo c'aybalc'ule yila' ebnaj bey Egipto, yeb bey ha' mar Rojo, yebpaxo sat tx'otx' desierto yin̈ cuarenta habil. 37Yal naj Moisés tu' tet ebnaj jet con̈ob Israel haca' ti': —Chissiq'uilo Comam Dios hune' ischejab xol ebnaj jet con̈ob ti', haca' yu quinissic'nilojan Comam ti'. Caw xin chehajba hetxiquin yin̈ tzet chal naj, ẍicano naj tet ebnaj. 38Yet yec'le naj Moisés tu' xol ebnaj jet con̈ob Israel tu' bey tx'otx' desierto, ay hune' naj ángel isye isba tet naj, bey iswi' witz Sinaí. Ha' tet naj Moisés tu' yak' naj ángel cuybanile yet cok'inal mach istan̈bal yu Comam Dios, haxa naj Moisés an̈ecano jet han̈on̈ ti'. 39Yaj machi yoche isc'ul ebnaj jichmam tu' isyije tzet yal naj Moisés, yuxin yilo ebnaj naj yul yanma, yu hune' tu' xin yoche paxo'to isba ebnaj hunelxa bey tx'otx' Egipto. 40Yalni ebnaj tet naj Aarón: —Watx'e ej cotioẍalan̈ cat yoc cosatajan̈, yuto ha' naj Moisés con̈iniltijan̈ sat tx'otx' Egipto, mach johtajojan̈ tzet yucanto naj, ẍi ebnaj tet naj Aarón tu'. 41Yoc ebnaj iswatx'eno yechel hune' yunin wacax; ha' hune' yechel yunin wacax tu' yalico ebnaj isDiosaloj. Ispotx'ni camo ebnaj huntek'an no nok' yanico ebnaj xahanbalil tet ch'en wacax tu', yec'tzen ebnaj hune' k'in̈ tet istioẍ tu'. 42Yu hune' tu', yuxinto yilo isba Comam Dios xol ebnaj. Isbejlaxcano ebnaj ischuquil yu Comam yun̈e yinayo isba ebnaj tet ej tx'umel. Haca' yu istz'ibn̈encano hune' naj ischejab Comam Dios bay chala: Hex ah Israel, cuarenta habil hepotx' no nok' yin̈ xahanbalil bey tx'otx' desierto, yaja' ¿tom wetan heyak' no' xahanbalil? ¡Machoj! 43Walxinto ha' tet hune' hetioẍ cheyijic'oj, hune' chiyij Moloc, yeb hune' yechel tx'umel yeb hediosal chiyij Renfán. Tet huntek'an yechel hewatx'e tu', ha' tet caw heyiyo heba; yu hune' tu' yuxinto chexwilojan sat hune' tx'o tx'otx' ti', cat quexwanitojan yintato tx'otx' Babilonia, ẍicano Comam Dios yul Hum tz'ibn̈ebilcano tu'. 44Yaj yet yec' ebnaj jichmam sat tx'otx' desierto tu', yetbic'o ebnaj hune' k'ap mantiado, watx'ebilayo n̈ahil, chiyeniloj ta ayco Comam Dios yetbiho ebnaj. Watx'ebil hune' mantiado tu' yu naj Moisés haca'tic'a yu isyeni Comam yechel tet naj. 45Ha' hune' mantiado tu', ak'laxcano yul isk'ab huntek'anxa ebnaj jichmam, ik'bil xin hune' mantiado tu' yu ebnaj yet isk'oji ebnaj yin̈ huntek'an con̈ob yu naj Josué. Ha' anma ay yul huntek'an con̈ob tu', istzumbelo Comam Dios yun̈e yanicano ebnaj huntek'an con̈ob tu' tet ebnaj jichmam; hune' mantiado tu' ik'bilto yu ebnaj masanto oc naj David reyal. 46Naj rey David tu' xin, tzalacano Comam Dios yin̈ naj. Isk'anni naj tet Comam Dios ta chiswatx'e naj hune' yatut Comam bay chiyiyo isba anma titna yin̈ jichmam Jacob. 47Yaj xin haxa naj Salomón watx'en hune' yatut Comam tu'. 48Comam Dios, Comam caw aycano yip, machi ehayo yul huno n̈a chiwatx'elax yu anma. Hac tu' yute yalni Comam tet hune' ischejab yet payxa yet yalnicano Comam haca' ti': 49Yul satcan̈, ha' tu' ay incapilan yeb intz'on̈obalan, haxa yul sat yiban̈k'inal ti', isbatxobal wojan yehi yuto ayco yalan̈ wipan. Yuxin ¿tzet n̈ahil cheyacan̈ wetan heyalni? ¿Aymi hunu bay c'ul inxewan? Machoj. 50¿Tom maẍtajinan watx'en̈e sunil tzettaj ye tu' xin? ẍicano Comam Dios, tet naj Isaías. 51Yalnipaxo naj Esteban tet ebnaj tu': —Walex hex ti', caw hip yecanilo heyanma haca' yanma anma mach ohtan̈eho Comam Dios. Caw ay hetxiquin yaj mach cheyabe tzet chal Comam. Ton̈etic'a cheman̈c'o tzet chal Comam Espíritu Santo, yuxin caw lahanex yeb heyichmam tu'. 52Ebnaj ischejab Comam Dios yet payxa, caw etalax ebnaj yu ebnaj heyichmam tu', ispotx'laxpaxo ebnaj yu ebnaj. Ha' ebnaj ischejab Comam halnicano tato chihul hune' naj caw toholcano yanma, haxa yet yul hune' naj tu' xin, hesaynican̈ lek'ti'al yin̈ naj yu heyak'nipaxo camoj. 53Waxan̈ca yak'cano naj ángel hune' ischejbanil Comam Dios teyet, yaj caw mach heyije tzet chala, ẍi naj Esteban tu' tet ebnaj. 54Yet yaben ebnaj sunil tzet yalcano naj Esteban tu', caw chin̈etx'la yeh ebnaj yu ishowal. 55Yaj naj Esteban tu', caw occano naj yalan̈ yip Comam Espíritu Santo, yah t'an̈no naj satcan̈, yilni naj isk'ak'al yip Comam Dios, yilni naj tato lin̈anico Comam Jesús yin̈ iswatx'k'ab Comam Dios. 56Yalni naj haca' ti': —Ilwec'anabi lah, hajan yul satcan̈. Caw chiwilan yin̈ Comam Jesucristo, Comam Ak'bilti coxol yu Comam Dios, lin̈anico Comam yin̈ iswatx'k'ab Comam Dios, ẍi naj Esteban tu'. 57Hayet yaben ebnaj hune' tu' yah wejna ebnaj yel yaw yin̈ caw ip, ismajchen ebnaj istxiquin, isto bulna ebnaj yin̈ naj Esteban tu'. 58Yinito ebnaj naj istxam con̈ob, wal ebnaj balnican̈ tzoti' yin̈ naj Esteban yet yalan̈tocanoj, ha' ebnaj k'ojnico ch'en ch'en yin̈ naj. Yet maẍto chisk'oj camo ebnaj naj Esteban tu', yacano ebnaj huntek'an xilk'ape chishucbaco yiban̈ xil isk'ap istan̈e' hune' naj tzeh chiyij Saulo. 59Hayet lan̈an isk'ojni camo ebnaj naj Esteban tu', istxahli naj tet Comam Dios haca' ti': —Mam Jesús, chachaba' wanmati'an, ẍi naj tet Comam. 60Yaypaxo jahno naj, istxahlipaxo naj yin̈ caw ip haca' ti': —Mamin, mach chawaco hune' ti' ismulo ebnaj, ẍi naj. Yet lahwi yalnicano naj hune' ti', iscamilo naj.

will be added

X\