HECHOS 6

1Yin̈ hunk'aan tz'ayic tu', aycoj sch'ib'iloj sb'isil mac cha' yuluj sc'ul yin̈ Comam Jesús, hunk'aan heb'ya' tu' ẍalni ab'xub'al griego x'ah yaw heb'ya' yin̈ heb'ya' ẍalni ab'xub'al arameo haxca yet ch'itxk'a ch'en melyu hunun tz'ayic, mat tz'ajanoj ch'a'lax stohol tzet slo heb'ya' camnajxa yichamil yetcon̈ob' heb'ya' griego. 2Yuxin syamb'acoj heb'ya' cab'lan̈wan̈ apóstol hantaj heb'ya' xax ya' yuluj sc'ul yin̈ Comam, x'oc heb'ya' yalnoj tet heb'ya': —Walon̈an, mat yetoj ay co b'ejnican co pujb'anc'oj stzoti' Comam Diosan, cat jilni tzet chu stohol tzet slo heb'ya' jetb'i ti'. 3Yuxin, saywej hujwan̈oj heb'ya' c'ul yalot yin̈ te xol, ay tz'ajanil sc'ul b'oj aycoj yalan̈ schejb'anil Comam Espíritu Santo, yun̈e janicoj hune' munil ti' yul sk'ab'an. 4Walon̈an, jetwanoj ja'ni joraciónan b'oj co pujb'anc'oj stzoti' Comam ti'an. 5Sunil heb'ya' xtzala yin̈ hune' tu', yuxin sic'leltoj heb'ya' ya' Esteban. Ya' tu' caw cha' ya' yuluj sc'ul yin̈ Comam Dios, b'oj aycoj ya' yalan̈ schejb'anil Comam Espíritu Santo. Sayni pax heb'ya' ya' Felipe, ya' Prócoro, ya' Nicanor, ya' Timón, ya' Parmenas b'oj ya' Nicolás ah Antioquía, ocnaj yin̈ sreligión anma israel. 6Lawitu' x'alaxc'oj heb'ya' tet heb'ya' apóstol, x'oc heb'ya' ya'noj oración yin̈ heb'ya' hujwan̈ tu', xanicoj heb'ya' sk'ab' yin̈ swi' heb'ya'. 7Wal stzoti' Comam Dios, caw aycoj spujna xol anma, b'oj aycoj ẍch'ib'iloj sb'isil heb'ya' chacoj sb'a yin̈ Comam yul con̈ob' Jerusalén. Hasta heb'naj sacerdote, tx'ihal heb'naj xa' yuluj sc'ul yin̈ Comam Jesús. 8Wal ya' Esteban, caw aycoj sc'ulch'anil sc'ul Comam Dios b'oj scan̈il ye smay Comam yin̈ ya', yuxin tx'ihal c'ayb'alc'ule syeniloj scan̈il ye Comam chu ya' yin̈ anma. 9Yaja' ay hunk'aan heb'naj ah Cirene, ah Alejandría, ah Cilicia, b'oj heb'naj ah Asia, b'oj hunk'aanxa heb'naj syamb'a sb'a yul hune' capiya yet mac yin̈xa sb'a. Sunil heb'naj ti', x'oc heb'naj steye' sb'a b'oj ya' Esteban. 10Yaja' mach xc'oji heb'naj spajtzen tzet chal ya', haxca caw ay stz'ajanil sc'ul ya' yu Comam Espíritu Santo. 11Yuxin stohla heb'naj hunk'aan heb'naj, yun̈e yalni heb'naj to caw tx'oj chal ya' yin̈ ya' Moisés b'oj yin̈ Comam Dios. 12Hactu' xu yoc heb'naj ya'noj sc'uluj sunil anma, heb'naj ijb'alom b'oj heb'naj cuywaom yin̈ sley ya' Moisés. X'oc lemna heb'naj yin̈ ya' Esteban, x'iottoj ya' yin̈ sat heb'naj swi'con̈ob' lahti'wom. 13Shob'nican̈ heb'naj lek'ti'al yin̈ ya', xalni heb'naj: —Naj ti' ton̈c'a chal naj tx'oj yin̈ yatut Comam Dios b'oj yin̈ sley ya' Moisés. 14Xjab'e yalni najan to shucha'ayoj naj Jesús ah Nazaret yatut Comam Dios b'oj sc'aya'loj naj chejb'anile ab'ilcan yu ya' Moisés jet. 15Sunil heb'naj swi'con̈ob' lahti'wom tz'on̈an b'etu', ha' xt'an̈xicoj heb'naj yin̈ sat ya' Esteban, haca' sat ángel jilni xuluj sat ya'.


Copyright
Learn More

will be added

X\