HECHOS 6

1Yet hune' tiempohal tu' xin caw yin̈ an̈e ch'ibcan̈ isbisil ebnaj juẍtaj yeb ebix janab, yaj ebnaj griego ayxaco yul isk'ab Comam iscajlecan̈ isba ebnaj yeb huntek'anxa ebnaj chihalni abxubal arameo, yuto yet chiak'lax huntek'an colwal yin̈ hunun tz'ayic yin̈ ebix hunix, mach tz'ajano ch'ak'lax tet ebix hunix griego. 2Yuxin cutxbalaxico sunil ebnaj ayxaco yul isk'ab Comam yu ebnaj cablahon̈wan̈ ischejab Comam Jesús tu', yalni ebnaj tet ebnaj: —Mach c'uloj tato chicobejan̈ jalnic'ojan̈ Istzoti' Comam Dios, cat jocan̈ jilnihan̈ tzettaj chiocnico yu ebix janab hunix ti'. 3Wal tinan̈ hex wuẍtaj, saywelo hujwan̈o ebnaj juẍta texol, caw c'ul tzet chiswatx'e, yeb ay ishelanil yeb ayco yalan̈ yip Comam Espíritu Santo, cat yoccano ismunil yilni hune' munil ti'. 4Wal han̈on̈ti'an̈ caw chicolahicojan̈ cotxahlihan̈ yeb jalnic'ojan̈ Istzoti' Comam Dios, ẍi ebnaj cablahon̈wan̈ tu'. 5Wal xin, caw tzalacan̈ isc'ul sunil ebnaj ayxaco yul isk'ab Comam yet yaben ebnaj hune' tu'. Hac ti' xin isbi ebnaj sic'laxilo tu'; naj Esteban, naj juẍta tu' caw ayco yanma naj yin̈ Comam Dios, yebpaxo caw ayco naj yalan̈ yip Comam Espíritu Santo. Hune'xa naj chiyij Felipe, yebpaxo naj Prócoro, yeb naj Nicanor yeb naj Timón, yeb naj Parmenas, yeb naj Nicolás, naj ah Antioquía, naj yaco isba yet yalan̈tocanoj yin̈ isreligión ebnaj Israel. 6Yet lahwi issic'laxilo ebnaj tu', yilaxto ebnaj sata ebnaj ischejab Comam Jesús, istxahli ebnaj ischejab Comam yin̈ ebnaj, yanayo ebnaj isk'ab yiban̈ iswi' ebnaj yu isyeniloj ta ischah ebnaj hujwan̈ tu' ismunil yin̈ yet Comam. 7Wal Istzoti' Comam xin, caw pujnacan̈ xol anma. Caw ec'na ch'ibcanocan̈ isbisil ebnaj ayxaco yul isk'ab Comam bey yul con̈ob Jerusalén tu'. Xol anma tu' caw tx'i'al ebnaj sacerdote yin̈ ebnaj Israel yaco isba yul isk'ab Comam. 8Wal naj Esteban, caw ayayo isc'ulal Comam Dios yiban̈ naj, caw aypaxico yip Comam yin̈ naj, yuxin caw hantan̈e c'aybalc'ule yeb yip Comam Dios isyecanilo naj xol sunil anma. 9Yaj ay hun majan ebnaj Israel chiscutxba isba yul hune' capilla chihallax yetxa isba ischuquil. Xol huntek'an tu' xin ay ebnaj ah Cirene yeb ebnaj ah con̈ob Alejandría, aypaxo ebnaj ah Cicilia, yeb ebnaj ay bey Asia. Istzabnico ebnaj tu' isteyelen isba yeb naj Esteban. 10Yaj machi k'oji ebnaj yin̈ istzoti' naj Esteban tu' yuto ha' Comam Espíritu Santo chiak'ni ishelanil naj. 11Yuxin istohla ebnaj huntek'an ebnaj yun̈e yalni ebnaj tato caw tx'oj istzotel naj Esteban yin̈ naj Moisés haca' ti': —Caw jabehan̈ isbahwa naj Esteban ti' yin̈ naj jichmam Moisés, yeb xin yin̈ Comam Dios, ẍi ebnaj. 12Hac tu' xin yu yak'ni somchahoto ebnaj isnabal sunil anma, yeb ebnaj ichamta winaj ak'bil ismunil xol ebnaj Israel, yebpaxo ebnaj chicuyni anma yin̈ isley naj Moisés. Yapni bulna ebnaj yin̈ naj Esteban, istzablaxayo naj yu ebnaj, yilaxto naj sata ebnaj yahaw con̈ob Israel. 13Lahwi tu' xin, issayni ebnaj haywan̈ ebnaj nanican̈ lek'ti'al yin̈ naj Esteban, yalni ebnaj haca' ti': —Naj Esteban ti', caw mach chisbej nino naj isbahwa yin̈ yatut Comam Dios, hune' caw yet Comam yehi. Yeb xin chibahwapaxo naj yin̈ isley naj Moisés. 14Jabenpaxojan̈ yalni naj haca'ti': —Naj Jesús ah Nazaret, chiyuchc'ayo naj hune' yatut Dios ti', cat ishelni naj cobeybal ak'bilcano yu naj Moisés, ẍi ebnaj isnanican̈ ebnaj lek'ti'al yin̈ naj Esteban tu'. 15Hayet ist'an̈xico ebnaj iswi'ehal yin̈ lahti' yin̈ naj Esteban tu', yilni ebnaj tato caw lahan yillax sat naj Esteban tu' haca' jilni sat hunu yángel Comam Dios.

will be added

X\