HECHOS 5

1Ay hune' ya' Ananías sb'ih, Safira sb'ih yixal. Xtxon̈toj heb'ya' hune' xtx'otx'. 2Xinitoj ya' Ananías stohol tx'otx' tet heb'ya' apóstol yalni, yaja' mat tz'ajanoj xa' ya' stohol tx'otx', haxca xto yican ya' hanic'xa ch'en melyu. Hune' tu' yohtaj yixal ya'. 3Yuxin xal ya' Pedro: —Ananías, ¿tzet yuxin xa chacoj naj matzwalil yin̈ hawanma, xaweb'an tet Comam Espíritu Santo hawalni, xawinicanoj hanic' stohol ha tx'otx' xa txon̈toj tu'? 4Hawet tx'otx', ta xal ha c'ul mach xa txon̈toj tx'otx'. Taca xa txon̈toj tx'otx', ¿tox mat hawetoj ch'en melyu xa cha yin̈ tx'otx' xin? ¿Tzet yuxin x'oc yin̈ ha c'ul hawuten hune' tx'oj ti'? Mataj anma chaweta, to ha' Comam Dios. 5Ha' xab'en ya' Ananías tzet xal ya' Pedro, x'ec' pac'na ya', hatic'a tu' xcamnaloj ya'. Yet xab'en anma tzet xu tu', caw xiwcan̈. 6Ay hunk'aan heb'naj tzehtaj x'apni, spichnicoj heb'naj k'ape yin̈ ya' camom Ananías tu', xto heb'naj smujnuj ya'. 7Ay xam oxeb'oj hora yuni hune' tu', x'ocapnoj yixal ya' camom Ananías tu', mat yohtajoj ya' tzet xu yichamil. 8Sk'amb'en ya' Pedro tet ya': —¿Tom yeli hactu' xto tx'otx' he tx'otx' xe txon̈toj tu'? ẍi ya' tet ya' Safira. —Ho', yeli, hactu' xto tx'otx'. 9Xalni ya' Pedro tet ya': —¿Tzet yuxin xe k'umla he b'a quex oc heyilwenoj Yespíritu Comam Jahaw? Tinan̈, lan̈an yoquiloj heb'naj xb'ey mujnuj hawichamil; hatic'a heb'naj ẍtoj hach mujnuj., ẍi ya' Pedro tet ya' Safira 10Man̈e yab'e ya' hune' tu', x'ec' pac'na ya' yich yoj ya' Pedro, xcamiloj ya'. Haxa x'ocapnoj heb'naj tzehtaj, camnajxa ya'. Xinipaxtoj heb'naj ya' mujlaxoj sc'atan̈ yichamil. 11Wal heb'ya' yak'b'il xax ya' yuluj sc'ul yin̈ Comam, b'oj mactaj x'ab'en tzet xu tu', caw xiwi. 12Tx'ihal c'ayb'alc'ule xu heb'ya' apóstol yin̈ sat anma yul con̈ob' tu'. Sunil heb'ya' ẍtic'a syamb'a sb'a sti'n̈ahil yatut Comam Dios b'ay ayc'oj sb'ih ya' rey Salomón. 13Hej anma machcoj yin̈ Comam, waxan̈ca c'ul stzotel yin̈ heb'ya', yaja' ẍnanon yapni xol heb'ya' yet syamb'an sb'a heb'ya'. 14Mactaj cha' yuluj sc'ul yin̈ Comam Jahaw, caw ẍch'ib'iloj sb'isil, tx'ihal heb'naj winaj, hactu' eb' ix ix. 15Yuxin hasta yulaj calle chaltij anma syawub' ahatoj sat xtx'at b'oj sat b'atxb'al, waxan̈ca yen̈elaln̈e ya' Pedro ch'ec' yib'an̈, ẍwatx'icanoj. 16Caw tx'ihal anma speto yulaj con̈ob' ay shoyanil Jerusalén, xitoj syawub' tet heb'ya', b'oj mac ch'ec' ya' yanma yu hunk'aan yespíritu naj matzwalil. Sunil ch'an̈chacan yu heb'ya'. 17Yaja' naj swi'al yin̈ heb'naj sacerdote b'oj sunil yetb'i, heb'naj aycoj yin̈ spartido heb'naj saduceo, xican̈ sb'a heb'naj yin̈ heb'ya' apóstol, ẍchiwa sc'ul heb'naj haxca tx'ihal anma ch'ab'entoj tzet chal heb'ya'. 18X'oc heb'naj stzab'noj heb'ya', xanictoj heb'naj heb'ya' yul presu. 19Yaja' hune' yángel Comam Dios x'apni ak'b'alil shajni spultail te' presu, x'iotiltij heb'ya'. Lawitu' xalni tet heb'ya': 20—Aswej yamak'il yatut Comam Dios cat heyalni sunil tzet ch'elicoj hune' k'inal ac' ti', ẍi yángel Comam Dios tu'. 21Yuxin haxa sajb'iloj hunxa tz'ayic, syijyen heb'ya' tzet xal ángel tu'. Xto heb'ya' yamak' yatut Comam Dios, x'oc heb'ya' scuynuj anma. Haxa x'apni naj swi'al yin̈ heb'naj sacerdote, b'oj heb'naj yetb'i yul capiltu, syamb'an heb'naj heb'naj swi'con̈ob' lahti'wom. Xchejni heb'naj ilaxojiltij heb'ya' apóstol yul presu. 22Ha' x'apni heb'naj policío yi'a'iltij heb'ya' yalni, matxactoj heb'ya'. Xmeltzo heb'naj yalnoj, xalni heb'naj: 23—Yet xcon̈ apnian caw c'ul yecoj slaweal te' presu, ay paxc'oj heb'naj stan̈en sti', yaja' yet xco hajni te'an, matxa mac ayic'toj. 24Ha' xab'en naj swi'al yin̈ heb'naj ẍtan̈en yatut Comam Dios, b'oj heb'naj swi'al yin̈ heb'naj sacerdote, xc'ayiloj sc'ul heb'naj, x'oc heb'naj yalnoj tet hunun: —¿Tzet taxca ẍtan̈ojcan hune' ti'? . 25Lan̈an b'in stzoten heb'naj hune' tu', x'apni lemna hune' naj yalnoj: —Heb'naj xe majche, ayxapaxictoj heb'naj yamak' yatut Comam Dios scuyni anma. 26Man̈e yab'e heb'naj hune' tu', xto naj swi'al yin̈ heb'naj stan̈en yatut Comam Dios b'oj heb'naj policío, xb'ey heb'naj yinojtij heb'ya', yaja' yin̈ ak'anc'ulal, haxca xiw heb'naj tet anma ta ay tzet chu sc'ojlaxcamoj heb'naj. 27Yet x'ilaxtoj heb'ya' tu', x'aotcoj heb'ya' yin̈ sat heb'naj swi'con̈ob' lahti'wom. Xalni naj swi'al yin̈ heb'naj sacerdote tet heb'ya': 28—Hayon̈ ti'an quex co cachan ta matxa che cuy anma yin̈ scuywab'al hune' naj tu', yaja' macheyab'e. K'a' quex to niman he pujb'anc'oj scuywab'al naj tet sunil anma yul con̈ob' Jerusalén ti', b'oj ay heyala' ch'oc scamical naj co mulujan. 29Xta'wi ya' Pedro b'oj hunk'aanxa heb'ya' apóstol: —Walon̈an, k'a' yilalto co yijyen tzet chal Comam Diosan, sataj co yijyen tzet cheyalan. 30Ha' co Diosal b'oj hej jichmam, ha' xpitzc'ancan̈ Comam Jesús, Comam xe pahcoj yin̈ culus, xeya'ni camoj. 31Ha' Comam Dios xanicoj smay Comam Jesús tu', xanicoj yin̈ swatx' k'ab' Yahawoj, b'oj Scolomaloj yet anma. Hactu' xute yun̈e stac co c'ul yin̈ tx'ojal xju hayon̈ Israel hon̈ ti' haxin̈wal stan̈tzelaxcan co mul. 32Hayon̈ caw xjilan, ẍja' co b'a yin̈ hunk'aan tzet xu tu'an. Hactu' Comam Espíritu Santo ab'il jet yu Comam Diosan b'oj tet mactaj ẍyijyen tzet chala. 33Ha' xab'en heb'naj yalni heb'ya' hune' tu', caw xtit lemna chil heb'naj, xal heb'naj spotx'o' heb'ya'. 34Yaja' xol heb'naj ay hune' naj fariseo Gamaliel sb'ih, cuywaom naj yin̈ sley ya' Moisés, caw ay smay naj yul sat sunil anma. X'ah lin̈noj naj xol heb'naj, ẍchejni naj elojtij heb'ya' yin̈taj hunip k'inanil. 35Lawitu' x'oc naj yalnoj: —Hex wetcon̈ob', nann̈e heyu yin̈ tzet cheyub' yin̈ heb'naj ti'. 36Tijab' yin̈ he c'ul tzet xa'le naj Teudas- yet x'ec'can ti'. Xalni naj to caw can̈ ye naj; ay mi 400 heb'naj x'oc tzujnuj yin̈ naj. Yaja' yet xpotx'ot naj, mach sb'ih tzet xucantoj heb'naj yetb'i naj, mach xijsb'a tzet nab'il yu naj. 37Haxa hunecxa, yet x'ah sb'isil anma, xipaxcan̈ sb'a naj Judas ah Galilea. Tx'ihal anma smontecoj naj yin̈, yaja' xpotx'otpax naj, hantaj mac x'oc tzujnuj yin̈ naj tu' xpaxtiẍnayi. 38Yuxin ẍwal teyetan, ja'a'wejcan heb'naj ti' haxca hune' tzet chu heb'naj b'oj tzet scuy heb'naj ti', ta yet comon anma yeyi, ẍtan̈ojpaxayoj. 39Yaja' ta yet Comam Dios, machon̈ c'ojoj co b'ut'nitan̈oj, tajca yin̈ Comam Dios ẍja'coj howal. 40Sunil heb'naj x'ab'entoj tzet xal naj Gamaliel tu'. Lawitu' xawtenictoj heb'naj heb'ya' apóstol, xhatelax heb'ya', scachnicantoj heb'naj heb'ya' to matxa chalc'oj heb'ya' Comam Jesús. Lawitu' xchejottoj heb'ya' pax yu heb'naj. 41Toxan̈e stzala heb'ya' x'eltij heb'ya' yin̈ sat heb'naj yahaw tu', haxca x'aot ec'oj ya' yanma heb'ya' yilni tx'ixwilal syayiloj Comam Jesús. 42Yaja' hunun tz'ayic scuyni heb'ya' anma yamak' yatut Comam Dios, b'oj yulaj n̈ah; chalnic'oj heb'ya' tzoti' c'ul yet Comam Jesús to ha' Cristo Echmab'il.


Copyright
Learn More

will be added

X\