HECHOS 4

1Lan̈anto stzotel ya' Pedro b'oj ya' Juan tet anma, yet x'apni b'oc'na heb'naj sacerdote, b'oj naj swi'al yin̈ heb'naj stan̈en yatut Comam Dios, b'oj heb'naj saduceo. 2Caw lemantij chil heb'naj yin̈ heb'ya', haxca lan̈an scuyni heb'ya' anma, ta yeli ẍpitzc'acan̈ anma yin̈ camical haxca xpitzc'acan̈ Comam Jesús. 3Yuxin x'iottoj heb'ya' presu yu heb'naj. Haxca k'ejb'ixa, toxan̈e xmaji heb'ya' masanto ẍhajlo capiltu hunxa tz'ayic. 4Xol hantaj mac x'ab'en tzet xal heb'ya' tu', tx'ihal anma xa' yuluj sc'ul yin̈ Comam Jesús. Yuxin xam syam sb'a howeb'oj mil mactaj xax ya' yuluj sc'ul yin̈ Comam . 5Haxa hunxa tz'ayic syamb'an sb'a sunil heb'naj swi'alcon̈ob' b'et Jerusalén, heb'naj ijb'alom, b'oj heb'naj cuywaom yin̈ sley ya' Moisés. 6Xol heb'naj aycoj naj Anás, naj swi'al yin̈ heb'naj sacerdote, naj Caifás, naj Juan, naj Alejandro b'oj sunil heb'naj ayto yu sb'a b'oj naj Anás tu'. 7Lawitu' schejni heb'naj ilaxojtij ya' Pedro b'oj ya' Juan yin̈ sat, x'oc heb'naj sk'amb'enoj tet heb'ya': —¿Tzet xeyute heyan̈ten yoj naj ti'? ¿Mac x'a'ni scan̈il heye heyuni?. 8Yaja' aycoj ya' Pedro yalan̈ schejb'anil Comam Espíritu Santo, xalni ya' tet heb'naj: —Hantaj hex swi'con̈ob' hexti', b'oj hex ijb'alom, 9che k'amb'e jet yin̈ hune' sc'ulal xu yin̈ naj jet-anmail maẍtic'a chu yec' ti', tzet xu swatx'i naj. 10Tinan̈ yilal heyab'eniloj b'oj yak'b'il anma israel, to xwatx'i naj yu scan̈il ye Comam Jesucristo ah Nazaret, yuxin cheyila lin̈anxacan̈ naj. Ha' Comam Jesús ti', xeya' camoj yin̈ culus, yaja' xpitzc'acan̈ yin̈ camical yu Comam Dios. 11Hexti' haca' naj aomcan̈ n̈ah heyeyi, Comam Jesús haca' ch'en ch'en halb'ilcan yul Yum Comam Dios yeyi, yaja' hex xe b'ejiloj ch'en, tan ha' ch'en caw yilal yoc scawxeb'aniloj xtxiquinb'al te' n̈ah. 12Han̈c'a Comam Jesús, b'ay halb'ilcan yu Comam Dios ta chu ya'ni co colb'anil, mach hunujxa mac ay satyib'an̈k'inal ti' chu hon̈ scolni, to han̈c'a Comam Jesús. 13Caw xc'ayiloj sc'ul heb'naj yab'en stzotel ya' Pedro b'oj ya' Juan haxca mach xiw heb'ya' stzoteli, waxan̈ca comon anma yilot heb'ya', b'oj mat cuywinajoj heb'ya'. Xtxumniloj heb'naj ta xcuywi heb'ya' yin̈ Comam Jesús. 14Waxan̈ca caw ẍchiwa sc'ul heb'naj yin̈ heb'ya', yaja' matzet stz'aj heb'naj yala', haxca ha' hun naj tx'ojtic'a ye yoj tu' lin̈ancan̈ xol heb'naj. 15Lawitu' xchejotiltij heb'ya' yu heb'naj, x'oc heb'naj slahtin̈enoj sb'a. 16Chalni heb'naj: —¿Tzet wal juten heb'naj ti'? Haxca sunil con̈ob' Jerusalén ohtajn̈e hune' c'ayb'alc'ule xu heb'naj ti', machu jeb'ani. 17Tinan̈, yun̈e matxa ẍcam pujna hune' ti' xol anma, co xib'te' heb'naj yun̈e matxa chalicoj heb'naj naj Jesús tu'. 18Lawitu' xawtenictoj heb'naj heb'ya', xalni heb'naj: —Matxa che lah he tzoten naj Jesús tu', b'oj matxa che cuy anma yin̈ scuywab'al naj. 19Xta'wi ya' Pedro b'oj ya' Juan: —Txumwejc'anab'i ta k'a' c'ul yul sat Comam Dios co yijyen tzet cheyalan, mato co yijyen tzet chal Comam Diosan. 20Haxca walon̈an machu co b'ejnican jalni tzetet hayon̈ caw xjilan b'oj xjab'ean. 21Lawitu' ton̈e xcam xcachotcan heb'ya' yu heb'naj, chejotiltij heb'ya'. Haxca sunil anma ch'anicoj smay Comam Dios yu hune' tzet xu tu', yuxin mach b'ay stzab'i heb'naj yin̈ tzet chu shatelax heb'ya'. 22Haxca naj b'ay xu hune' c'ayb'alc'ule ti', ec'b'alxa naj cawinaj hab'il. 23Lahwi schejottoj paxoj ya' Pedro b'oj ya' Juan, xto heb'ya' b'ay yaman heb'ya' yetb'i, x'oc heb'ya' yalnoj sunil tzet xhalot tet yu heb'naj swi'al yin̈ heb'naj sacerdote b'oj heb'naj ijb'alom. 24Ha' xab'en heb'ya' yamancoj tu', hunxan̈e xute heb'ya' yoración, xalni heb'ya' tet Comam Dios: —Mam Jahaw, hach xa watx'e satcan̈, tx'otx'otx', ha' mar, b'oj sunil tzet ib'il yu hunun majan. 25Yu Comam Espíritu Santo, xawa'ni yala' jichmam David ha chejab':¿Tzet yuxin ch'ah b'oc'na hej nancon̈ob'al yin̈ Comam Dios? Ch'oc sucal yu ẍpaq'uicoj yin̈ Comam yalni. 26Syamb'a sb'a heb'naj rey, heb'naj aycoj yahawoj satyib'an̈k'inal ti', ẍpaq'uicoj heb'naj yin̈ Comam Dios yalni, b'oj yin̈ Mac Sic'leb'il yu, ẍiayoj. 27Yeltic'a, xij sb'a tzet xawal tu' haxca yul hune' con̈ob' ti' syamb'a sb'a naj Herodes, naj Poncio Pilato b'oj hunmajanxa anma mat israeloj, b'oj jetcon̈ob' israelan, yun̈e ya'ni camoj Comam Jesús, hune' ha' Chejab' ab'ilxacoj sb'a yul ha k'ab', Sic'leb'ilxa hawu. 28X'oc heb'naj yunuj tzet nab'ilxatic'a hawu ta chij sb'a yu scan̈il haweyi. 29Tinan̈ Mam Jahaw, ilc'anab' tzet chu stit showal heb'naj jin̈an, yuxin ẍco k'an tawetan chawa' yip janmaan yun̈e machon̈ xiw co pujb'anc'oj ha tzoti', hayon̈ ha chejab' ti'an, 30cat ha yeniloj scan̈il hawe jin̈an yun̈e swatx'i anma tx'oj ye sc'ul, cat ya'lax hej c'ayb'alc'ule yu scan̈il ye ha Chejab' Jesús Ab'ilxacoj sb'a yul ha k'ab'. 31Ha xtan̈c'o heb'ya' ya'ni yoración, xb'ilican̈ hune' n̈ah b'ay yaman heb'ya' tu'. Yin̈n̈ena tu', xcan heb'ya' sunil yalan̈ schejb'anil Comam Espíritu Santo, matxa xiw heb'ya' sto spujb'anojc'oj stzoti' Comam Dios tet anma. 32Sunil heb'ya' xa' yuluj sc'ul tu', hunxan̈e nab'alil xucan heb'ya', matxa hunuj mac chal yetoj tzet aya, to comonxa xucan xol heb'ya'. 33Hactu' heb'ya' apóstol, caw sunil sc'ul heb'ya' chalnic'oj to xpitzc'acan̈ Jahaw Jesús yin̈ camical. Syeni Comam Dios sc'ulch'anil sc'ul yin̈ heb'ya' sunil. 34- 35Matxa mac ch'ec' ya' yanma n̈ohchalal xol heb'ya', haxca mactaj ay xtx'otx' mato yatut xtxon̈toj, chanic'oj stohol tet heb'ya' apóstol. Haxa heb'ya' ch'itxk'antoj tet mactaj man̈ tzetal yeyi. 36Ay hune' ya' yic'al ya' Leví, José sb'ih, pitzc'anaj b'et Chipre, Bernabé xacoj heb'ya' apóstol sb'ihoj ya' tu'. Ha' chaliloj hune' tu', A'om yak'lob'al sc'ul anma. 37Ya' tu', xtxon̈toj ya' hune' xtx'otx', xanic'oj ya' stohol yul sk'ab' heb'ya' apóstol.


Copyright
Learn More

will be added

X\