1 Hayet lan̈an istzotel naj Pedro yeb naj Juan xol anma tu', yapni ebnaj sacerdote yin̈ anma Israel, yeb xin ebnaj caw yahawil yeco istan̈en yatut Comam Dios, yebpaxo ebnaj saduceo; apni huntek'an ebnaj tu' sunil yin̈ ebnaj cawan̈ tu'. 2 Caw tit ishowal ebnaj yin̈ ebnaj yuto cuywa ebnaj yin̈ anma tato yeli chiitzitzbican̈ anma camom haca' yu yitzitzbican̈ Comam Jesús. 3 Yuxin tzablaxayo ebnaj cawan̈ tu', yalaxicto ebnaj yul preso yu ebnaj. Yaja' yu k'ejbiyalxa yuxin toxan̈e maji ebnaj masanto yet ishajcha capil yin̈ hunxa tz'ayic. 4 Yaja' caw xin hantan̈e anma aben Istzoti' Comam Dios, yanayto anma Istzoti' Comam Jesús yul yanma. Caw xin ahcan̈ isbisil yuninal Comam Dios hanic'xan̈e mach howebo mil isbisil ebnaj winaj. 5 Haxa yet hune'xa tz'ayic xin, iscutxbanico isba ebnaj yahawil yin̈ anma Israel bey con̈ob Jerusalén, yeb ebnaj ichamta winaj ay ismunil xol anma tu', yebpaxo xin ha' hun ebnaj chicuyni anma yin̈ isley naj Moisés. 6 Xol ebnaj tu' xin ayco hune' naj chiyij Anás, yahaw yeco yin̈ ebnaj sacerdote yin̈ anma Israel, aypaxicto naj Caifás, yeb naj Juan yeb hune'xa naj chiyij Alejandro, yeb sunil mac ay bey yatut naj yahaw yeco yin̈ ebnaj sacerdote yin̈ anma Israel tu'. 7 Ischejni ebnaj yilaxoti naj Pedro yeb naj Juan sata ebnaj. Hayet yapni ebnaj sata ebnaj tu', isk'amben ebnaj tet ebnaj cawan̈ tu' haca' ti': —¿Mac ak'ni heyip heyak'ni cawxo yoj naj tu'? yebpaxo xin, ¿mac yin̈ isbi hewatx'e huntek'an ti'? ẍi ebnaj tet ebnaj cawan̈ tu'. 8 Wal naj Pedro tu' xin, ayco naj yalan̈ ischejbanil Comam Espíritu Santo, yuxin yal naj tet ebnaj haca' ti': —Hex iswi'ehal con̈ob, yeb hex ichamta winaj yul con̈ob Israel ti', 9 caw cheyak' hek'ambebal jetan̈ yin̈ hune' isc'ulal cowatx'ehan̈ yin̈ hune' naj maẍtic'a chiyu isbelwi ti' yuto cheyoche heyohtan̈eloj yin̈ tzet yu iscawxican̈ naj. 10 Yuxin chijalan̈ hune' ti' yu chijochehan̈ chiyohtan̈elo sunil ebnaj jet con̈ob Israel tato ha' naj ayc'o coc'atan̈ ti', cachann̈e yu yip Comam Jesucristo ah Nazaret, yuxin cawxican̈ naj. Ha' Comam Jesús tu' xin heyacan̈ yin̈ te' culus, yaj itzitzbican̈ Comam xol anma camom yu Comam Dios. 11 Hex ti', lahanex haca' huno naj watx'em n̈a, haxa Comam Jesús xin, lahan Comam haca' huno ch'en ch'en machi ocnico yin̈ ismunil heyu, yaja' hune' ch'en tu', ha' ch'en caw ay yelapno yoc xe'o n̈a. 12 Machi hunoxa mac chiyu con̈iscolni, yuto matxa hunoxa mac yul sat yiban̈k'inal ti' ak'bil yip yu Comam Dios yu yak'ni cocolbanil; caw han̈c'an̈e Comam Jesús chiyu con̈iscolni, ẍi naj Pedro tet ebnaj tu'. 13 Hayet yilni ebnaj iswi'ehal yin̈ lahti' yin̈ con̈ob Israel tu' tato caw mach chixiw naj Pedro yeb naj Juan istzoteli, waxan̈ca mach iscuyu ebnaj cawan̈ tu' yebpaxo caw comon anma ebnaj, yuxin caw c'aycan̈ isc'ul ebnaj yin̈ ebnaj cawan̈ tu'. Isnanipaxo ebnaj tato ec' tzujtzun ebnaj yinta Comam Jesús. 14 Waxan̈ca caw chichiwa isc'ul ebnaj yin̈ ebnaj cawan̈ tu', yaj matzet tz'aj yala' ebnaj yin̈ ebnaj yuto ha' hun naj cawxican̈ tu' lin̈anico isc'atan̈ ebnaj. 15 Yuxin yal ebnaj yahawil con̈ob tu' tato ch'el naj Pedro yeb naj Juan tu' xol ebnaj, iscancano ebnaj yahawil tu' tzotelo ischuquil. 16 Yalni ebnaj tet hunun: —¿Tzet wal juten ebnaj cawan̈ tu' heyalni? Caw sunil anma yul con̈ob Jerusalén ti' ohtan̈e hune' c'aybalc'ule iswatx'e ebnaj, yuxin mach chu jalni tato lek'ti' ebnaj. 17 Tinan̈ xin, matxahojab chispujbac'o ebnaj hune' ti' xol anma, yuxin coxibte'we isc'ul ebnaj, haxinwal matxa chiyalic'o ebnaj iscuybanil naj Jesús tu' xol anma, ẍi ebnaj yahawil tu' yin̈ ebnaj cawan̈. 18 Lahwi tu' xin, yawtelaxpaxto ebnaj cawan̈ tu' hunelxa, yalni ebnaj haca' ti': —Matxa cheyalic'o iscuybanil naj Jesús tu' tet anma, yeb matxa checuy anma yin̈ tzet yelapno ye naj, ẍi ebnaj. 19 Istak'wi naj Pedro yeb naj Juan tet ebnaj: —Yul sat Comam Dios, ¿c'ulmi tato chicoyijehan̈ tzet cheyala mato coyijehan̈ tzet chiyal Comam? 20 Wal xin, caw mach chu cobejnicanojan̈ jalnihan̈ tzettaj jilan̈ yeb xin tzet abebil juhan̈, ẍi ebnaj tet ebnaj cutxanico tu'. 21 Ton̈e oc ebnaj yahawil con̈ob tu' isxibte' ebnaj, yaja' bejtzolaxto ebnaj. Machi xin txumcha yu ebnaj tzet wal isbalnican̈ ebnaj yin̈ ebnaj cawan̈ tu' yun̈e yay isya'tajil yiban̈ ebnaj, yuto sunilxa anma caw c'ul istzotel yin̈ Comam Dios yu hune' isc'ulal iswatx'e ebnaj tu'. 22 Wal hune' naj watx'ilo yoj yu yip Comam Jesús tu', ec'balxa cuarenta ishabilal naj. 23 Haxa yet bejtzobilxa naj Pedro yeb naj Juan tu', isto ebnaj isc'atan̈ huntek'anxa yetbi. Yalni ebnaj sunil tzet hallax tet ebnaj yu ebnaj yahawil sacerdote yeb yu ebnaj ichamta winaj yin̈ anma Israel tu'. 24 Yet yaben ebnaj sunil tzet yal ebnaj cawan̈ tu', istxahli ebnaj tet Comam Dios, yalni ebnaj yin̈ istxah haca' ti': —Mamin, hach coDiosal, caw hach hawatx'e satcan̈ yeb sunil tzet ay bey tu', yeb tx'o tx'otx' yeb ha' mar, yeb sunil tzet ay xol ha', yeb sunil tzet ay yul sat yiban̈k'inal ti'. 25 Yu yip Comam Espíritu Santo hawak' yala' jichmam David hachejab yet yalni naj haca' ti': ¿Tzet yin̈ yuxinto chihawejna ej con̈ob yin̈ Comam? ¿Tzet yin̈ yuxin chisnapaxo anma iswatx'en huntek'an tzet mach c'ulu yin̈ Comam? 26 Wal xin iscutxba isba ebnaj iswi'ehal xol anma yeb ebnaj yahaw con̈ob yu yanico ebnaj howal yin̈ Comam Dios Jahawil, yeb yin̈ Mac Ak'bilxa Ismunil yu, ẍi naj David tu'. 27 Mamin, caw yeli naj Herodes, yeb naj Poncio Pilato, yeb anma yulajla con̈ob, yeb ebnaj Israel iscutxbaco isba ebnaj yul hune' con̈ob ti' yu yanico ebnaj ishowal yin̈ Hac'ahol Jesucristo, hune' Mac Ak'bilxa Ismunil yul isk'ab hawu. 28 Caw yij isba yu ebnaj sunil tzet halbilcano hawu yet payxa, yuto el yin̈ hac'ul ta hac tu' chiyute isba. 29 Wal tinan̈ Mamin, caw ilc'anab tzet yal ebnaj jetan̈, yuxin ak' yip janmahan̈ haxinwal mach chon̈xiwan̈ jalnic'ojan̈ hatzoti', yuto caw hachejab jehan̈. 30 Yuhojab hawip chicawxican̈ anma ya'ay juhan̈, cat hayeni yechel hawip, yeb c'aybalc'ule yu yip Comam Jesús hachejab, Comam caw toholcanoj, ẍi ebnaj yin̈ istxah tet Comam Dios. 31 Yet lahwi istxahli ebnaj xin, istzictzoncan̈ hune' n̈a bay cutxanico ebnaj tu' yu yip Comam Dios. Yoccano sunil ebnaj tu' yalan̈ yip Comam Espíritu Santo. Caw xin, matxa chixiw ebnaj ispujbanic'o Istzoti' Comam Dios. 32 Caw lahanxan̈e isnabal sunil anma ayxaco yul isk'ab Comam tu', caw hunxan̈ech'an yute isba, machi huno mac chiyalico huno tzet ye tu' yeto ischuquil yuto caw hun ye sunil tzettaj ay ebnaj. 33 Wal ebnaj ischejab Comam Jesús tu', caw islahico ebnaj yalnic'oj tato itzitzbican̈ Comam Jesús xol camom. Caw xin, aypaxayo isc'ulal Comam Dios yiban̈ sunil anma tu'. 34 - 35 Caw machi huno mac ya'ta ch'ec' yila' xol ebnaj tu', yuto ha' mac ay istx'otx' maca yatut, chistxon̈toj, cat isbey yak'no istohol tet ebnaj ischejab Comam Jesús, haxa ebnaj chiixk'anto yin̈ mac matzet aya. 36 Ay hune' naj ti' chiyij José, yaja' xin Bernabé occano isbiho naj yu ebnaj ischejab Comam Jesús, yuto hune' bihe Bernabé, chal yelapnoj Ak'omico Yak'lobal Isc'ul Anma. Naj Bernabé tu', yuninalto naj jichmam Leví ye naj, pitzc'ana naj bey con̈ob Chipre. 37 Ay xin hune' istx'otx' naj istxon̈toj, yapni naj yak'no istohol yul isk'ab ebnaj ischejab Comam Jesús tu'.
