HECHOS 3

1Yet hune' sk'ejb'alil, yet x'apni yorail b'ay cha' heb'ya' israel oración, xto ya' Pedro b'oj ya' Juan yamak' yatut Comam Dios. 2Ay hune' naj mach yip yoj yettax xpitzc'ayi. Hune' naj tu', hunun tz'ayic sb'ey yalaxojayoj naj sk'annoj tzetet smatanoj tet anma ch'ocapnoj sti' hune' spultail yatut Comam Dios, Elti'ch'an sb'ih. 3Ha' xilni naj yocapnoj ya' Pedro b'oj ya' Juan, sk'anni naj smatan tet heb'ya'. 4Xt'an̈xicoj heb'ya' yin̈ naj, xalni ya' Pedro: —T'an̈xan̈tij jin̈an. 5X'ah t'an̈noj naj yin̈ heb'ya', ham yalni naj ta ay ch'en melyu cha'a' heb'ya' tet naj. 6Xalni ya' Pedro tu' tet naj: —Hayon̈ ti'an mach co melyuan, yaja' b'aytet ay jetan ẍja' tawetan. Yu scan̈il ye Comam Jesucristo ah Nazaret ẍwalan, ahan̈lin̈noj cat ha b'elwi. 7Lawitu' x'oc ya' yin̈ swatx' k'ab' naj, x'iotcan̈ naj yu ya'. Yin̈n̈ena tu', x'oc yip yoj naj, b'oj xtx'ih yoj naj, 8x'ahna lemna naj, ichi sb'elwi naj. Xan̈e t'ujla yec' naj tzalalal, x'octoj naj yin̈ heb'ya' yul yatut Comam Dios, chanicoj naj smay Comam. 9Sunil anma x'ilni sb'elwi naj b'oj yanicoj naj smay Comam Dios. 10Caw xc'ayiloj sc'ul yilni sb'elwi naj, haxca yohtaj ta ha' naj tu' hunun tz'ayic sb'ey yalaxojayoj cat sk'anni smatan sti' spultail yatut Comam Dios Elti'ch'an sb'ih tu'. 11Hunel stzab'icoj naj tu' yin̈ sk'ab' ya' Pedro b'oj ya' Juan. Yet ay heb'ya' sti'n̈ahil yatut Comam Dios aycoj sb'ih ya' rey Salomón yin̈, x'apni b'oc'na anma yilnoj naj, haxca caw xc'ay sc'ul yilni. 12Ha' xilni ya' Pedro yapni anma sc'atan̈, xalni ya': —Hex wetcon̈ob' israel, ¿tzet yuxin xc'ay he c'ul yin̈ hune' chu ti'? ¿Tzet yuxin t'an̈anexcoj jin̈an? Cheyalni ta yu scan̈il jean, mato yu aycoj janma yin̈ Comam Diosan, yuxin ẍb'elwican̈ hune' naj ti'. Machoj. 13To Comam Dios, sDiosal jichmam Abraham, Isaac b'oj ya' Jacob, ha' x'anicoj smay schejab' Jesús, Comam xeyacoj yul sk'ab' naj Pilato. Waxan̈ca xoche naj scolo' Comam yaja' mach xe je. 14Comam ab'ilxacoj sb'a yul sk'ab' Comam Dios b'oj stoholaln̈e chu, ha' mach xe je ta scolchayi, to ha' naj potx'waom xe k'ana ta ẍcolchatoj. 15Wal Comam ch'a'ni co k'inal, hex xe k'ana ta ẍpotx'laxi, yaja' xpitzc'aotcan̈ Comam yin̈ camical yu Comam Dios. Hune' ti' caw yeli, yin̈ co sat xuan. 16Tinan̈ naj cheyil ti', heyohtaj ta tx'ojtic'a ye yoj naj, yaja' tinan̈ c'ulxa ye naj yu scan̈il ye Comam Jesús, haxca ẍcawxi co c'ul yin̈ Comaman. Yun̈e xja' yuluj co c'ul yin̈ Comaman, yuxin xwatx'ican naj yin̈ he sat te hunil. 17Tinan̈ hex wetcon̈ob', wohtajan ta xeyu hune' tu' yu sucal he c'ul b'oj yu sucal sc'ul heb'naj jahaw. 18Yaja' hactu' xu yijni sb'a stzoti' Comam Dios halb'il yu payxa, xa'ni yala' heb'ya' schejab'lom to ẍtic'a ec'oj ya' yanma hune' mac ab'ilxa schejb'anil yu Comam. 19Yuxin tacojab' he c'ul yu he tx'ojal, meltzoan̈wejcoj yin̈ Comam Dios yun̈e sb'ut'laxtan̈oj he mul, 20haxin̈wal cha'a'tij Comam Jahaw Comam Jesús ya'a' yak'lob'al co c'ul. Ha' Comam Jesús ti', Cristo halteb'il jet yettax ayxana tu'. 21Yaja' yilal scan Comam yul satcan̈ masanto ch'apnoj stz'ayical b'ay swatx'ecan Comam Dios sunil hej tzetet ay satyib'an̈k'inal ti', haca' xu yalnican Comam yet payxa yu heb'ya' schejab'lom Comam sic'leb'il yu. 22Hactu' xute ya' Moisés yalni: Ay b'ak'in̈ chi'a'can̈ Comam Dios Jahaw hune' schejab'lom te xol, haca' xu hin yinican̈ te xol ti'an. Yilal cheyab'e'toj sunil tzet chala' teyet. 23Mac mach ch'ab'enoj tzet chal hune' schejab'lom Comam tu', mak'b'il stan̈tzelaxojiloj yul con̈ob', ẍiayoj. 24Sunil heb'ya' schejab'lom Comam Dios, yettax x'ichitij yin̈ ya' Samuel stz'ib'n̈encan tzet chuuj yin̈ hunk'aan tz'ayic ti'. 25Sunil tzet schej Comam Dios yala' heb'ya' heyetwanoj yeyi, haxca ay heyoc yin̈ hune' tzet t'in̈b'ab'ilcanoj yu Comam b'oj hej jichmam yet payxa. Xalni Comam tet ya' Abraham: Sunil anma ay satyib'an̈k'inal ti', schab' scolb'anil yu hej hawic'al, ẍi Comam. 26Yuxin yet spitzc'ancan̈ Comam schejab' Jesús yin̈ camical, hayon̈ b'ay b'ab'el xatij Comam, yun̈e ya'ni sc'ulal jet, xcon̈ spohniloj yin̈ hej co tx'ojal.


Copyright
Learn More

will be added

X\