HECHOS 28

1Xax con̈ colcha tet sya'tajil tu'an, xjab'enan to Malta sb'ih hune' isla tu'. 2Caw c'ul xcon̈ yil heb'naj ah Malta tu'an, lemb'il xanacoj heb'naj hune' k'a' yun̈e co k'aẍnian haxca caw chew b'oj cha' ha' n̈ab'. 3Hactu' ya' Pablo, xb'ey ya' scutxb'a' yak'b'il te' c'ax, ha' yet xanictoj ya' te' yul k'a', xiwiltij hune' no' lab'ah yu scajil k'a', x'oc tx'anoj no' yin̈ sk'ab' ya', xcan t'un̈nuj no'. 4Ha' xilni heb'naj ay b'etu' to x'oc tx'anoj no' yin̈ sk'ab' ya', xalni heb'naj: —Hune' naj ti', tita potx'waom naj, x'ec' sya'il scolcha naj tet ha' mar, yaja' yilal yay hune' sya'tajil ti' yib'an̈ naj yun̈e scam naj. 5Yaja' stzicay ya' sk'ab', x'ay no' lab'ah tu' xol xaj k'a', mach ninoj tzet xu ya' yu no'. 6Smajnixa heb'naj smalcan̈ sk'ab' ya' cat scamojiloj ya', caw hunay smaj heb'naj ta ay tzet chub' ya'. Ha' xilni heb'naj to matzet xu ya', shelni heb'naj tzet ẍala, xalni heb'naj: —Hune' naj ti' wac'am dios naj. 7Scawilal tu' ay xtx'otx' hune' naj swi'al xol anma ay b'etu', Publio sb'ih. Caw c'ul xu hon̈ schani najan. Oxeb' tz'ayic ayon̈ yatut najan. 8Yaja' tx'oj ye sc'ul smam naj, lan̈an scam yu hune' niman k'a' b'oj chic'uul. Yuxin x'octoj ya' Pablo b'ay hilan ya'. Ichi sk'anni ya' tet Comam Dios ta ch'an̈cha ya', xanicoj ya' sk'ab' yin̈ ya'. Hunip tu' xwatx'ican̈ ya'. 9Ha' x'ab'elax hune' tu' sunil hej yawub' ay b'etu' x'apni tet ya' Pablo, sunil x'an̈chacanoj yu ya'. 10Tx'ihal tzet sa anma jetan, haxa x'apni tz'ayical xcon̈ to yul hunexa te' barcoan, xa' anma tu' yak'b'il hej tzetet yetoj co b'ehan. 11Oxeb' x'ahaw xcon̈ ec' Malta tu'an. Lawitu' xcon̈ oc pax yul hune' te' barco speto b'et Alejandría, ton̈e txajan te' yechman stan̈c'o ya'ni c'uh. Yin̈ sataj te' aycoj yechel cawan̈ tioẍ, ha' sb'ih hune', Cástor, hune'xa Polux. Yul te' xcon̈ toan. 12Hat xcon̈ apni yul con̈ob' Siracusaan, oxeb' tz'ayic ayon̈ b'etu'an. 13Lawitu' xcon̈ to paxan, xtxamlaj ha'n̈etic'a xcon̈ toan masanto xcon̈ apni yul con̈ob' Regioan. Haxa hunxa tz'ayic, x'ichican̈ hune' cak'e' speto yin̈ sur. Yuxin cab'xan̈e tz'ayic aycoj b'el juan, xcon̈ apni yul con̈ob' Puteolian. 14Ay hunk'aan heb'ya' xax ya' yuluj sc'ul yin̈ Comam xjil b'etu'an. Xalni heb'ya' ta chon̈ can sc'atan̈ heb'ya' hunuj semanailan. Hactu' xu co canan. Lawi yec' hune' semana tu', jojxa xcon̈ to b'et Romaan. 15Ha' xhul sk'umal tet heb'ya' xax ya' yuluj sc'ul yin̈ Comam ay b'et Roma to lan̈anxa japnian, xhul heb'ya' chawal jin̈an. Ay heb'ya' hat xcon̈ chani b'et hune' niman txon̈b'al Apio sb'ihan. Ay heb'ya' xcon̈ chani pax b'et ẍhalot Oxeb' Posadailan. Ha' xilnitoj ya' Pablo heb'ya' tu', caw x'ak'locan̈ sc'ul ya', xa'ni ya' yuch'antioẍ tet Comam Dios. 16Yet xcon̈ apni Roma tu'an, mach x'octoj ya' Pablo yul presu, to nan hune' te' n̈ah b'ay x'eh ya' b'oj naj soldado x'oc tan̈enoj. 17Ca'fi japni Romaan, xawten ya' Pablo heb'naj swi'al xol heb'naj israel ay Roma tu'. Yet xhul heb'naj, xalni ya' tet heb'naj: —Hex wetcon̈ob', caw mach ninoj hin mul tet heb'naj jetcon̈ob' israel ẍwab'ean, ni tet scuywab'al heb'ya' jichmam. Yaja' xquin yactoj heb'naj yul presu b'et Jerusalénan, lawitu' xquin yanicoj heb'naj yul sk'ab' heb'naj romanoan. 18Sk'amb'en heb'naj romano tu' wetan tzet hin mulan. Yaja' mach hin mul chin a'ni camojan, yuxin ay yala' heb'naj xquin colchacanan. 19Yaja' mach sje heb'naj jetcon̈ob' tu' ta chin b'ejtzolaxan, yuxin xin k'antij hin b'a tet naj yahaw ay Roma ti'an, hato naj ẍhalnoj tzet chin tan̈ojan. Walinan matzet ẍwa' smuluj jetcon̈ob'an. 20Yu walni ti' teyetan, yuxin xquex wawtean, b'oj hunxa, yun̈e hex wilnian. Haxca ay hune' mac echmab'il yul ju hayon̈ israelon̈ ti'. Yu wanicoj wanma yin̈ hune' mac tu'an, yuxin aycoj hin cadenail ti'an. 21Xalni heb'naj tet ya': —Hayon̈ ti'an mach hunuj te' hum chul jet yu heb'naj jetcon̈ob' ah Judea tu' yin̈ tzet hawean. Machca hunuj heb'naj ay b'etu' chulc'uj halnoj hunuj tzet tx'oj tawin̈ jetan. 22Yaja' ẍjoche jab'e'an tzet ib'il yu ha c'ul, haxca xax jab'e sk'umalan to yul hunun con̈ob' caw tx'oj stzotel anma yin̈ hune' cuywab'al toto ch'ichican̈ ti'. 23Ton̈e xalcanoj heb'naj tzet tz'ayical chul heb'naj sc'atan̈ ya'. Yet xapni stz'ayical tu', k'a' tx'ihalxa heb'naj xhuli. Yet yamanxa heb'naj, x'ichi ya' Pablo stzotel yin̈ sab'sahc'alil, masanto xk'ejb'itoj sb'ejnican ya' stzoteli. Xalni ya' tzet chu joc yul sk'ab' Comam Dios. Xalni pax ya' tet heb'naj tzet tz'ib'n̈eb'il yu ya' Moisés b'oj heb'ya' schejab'lom Comam Dios, yun̈e xtxumniloj heb'naj, cat ya'ni heb'naj yuluj sc'ul yin̈ Comam Jesús. 24Ay mac xa' yuluj sc'ul yin̈ tzet xal ya', ay mac mach xa' yuluj sc'ul. 25Mach xa' lahb'a sb'a tzet chal hunun heb'naj. Yalan̈to maẍto xpaxtoj heb'naj, xalni ya': —St'in̈anil xal Comam Espíritu Santo xa'ni yala' ya' Isaías schejab'lom Comam Dios tet heb'ya' jichmam xalni ya': 26As tet hunk'aan anma ti' cat hawalni:Waxan̈ca cheyab'e yaja' matzet xtxumchaoj heyu. Waxan̈ca cheyila yaja' matzet ẍnachaoj heyu, cachi. 27Haxca hune' con̈ob'al anma ti' xcawb'iloj yanma. Xmajican xtxiquin yun̈e matxa chab'e st'in̈anil. Smutz'ican sat yun̈e machu yilni st'in̈anil, yuxin mach xtxumu, mach sje sc'ul meltzoojcoj win̈an yun̈e hin colnian, ẍi Comam Espíritu Santo. 28- 29—Tinan̈ cam cheyab'ecanoj to xax yal Comam Dios ta ẍalaxojc'oj stzoti'al colb'anil tet anma mat israeloj, haxca k'a' ẍto yab'e'toj, ẍi ya' Pablo. 30Cab' hab'il xcan ya' yul hune' te' n̈ah c'ameb'il yu. Hantaj mac ch'apni ilnoj ya', stzalalal xu schani ya'. 31Caw sunil sc'ul ya' stzotel ya', chalni ya' tzet chu joc yul sk'ab' Comam Dios, b'oj tzet caw ye Comam Jahaw Jesucristo, mach xin mac xcachwayi.


Copyright
Learn More

will be added

X\