HECHOS 28

1Yet xacon̈colchahan̈ cosunilan̈ tet huntek'an isya'tajil tu' xin, jabenilojan̈ tato Malta isbi hune' isla bay con̈apnitu'an̈. 2Ebnaj ay bey isla Malta tu' caw xahan con̈yilan̈ ebnaj, caw xin yin̈ an̈e yaco ebnaj hune' niman k'a' yun̈e cok'aẍnihan̈ yuto caw chew, caw chiyak'paxo n̈ab. 3Hac tu' xin yu yoc naj Pablo iscutx'bano cabxa yak'bil te' si' caw tajin, hayet yanicto naj te' yul k'a' xin, isxiwilti hune' no' laba xol k'a', yul no' ischino isk'ab naj, yoccano t'un̈no no' yin̈ isk'ab naj Pablo tu'. 4Hayet yilni ebnaj ah con̈ob tu' ta t'un̈anico no' laba tu' yin̈ isk'ab naj, yalni ebnaj tet hunun haca' ti': —Hune' naj ti' caw potx'om anmami naj, wal xin walca caw ya'ta mayu iscolcha naj yiban̈ ha' mar, yaj caw yilal istohlan naj ismul yuxin caw chicamo naj, ẍi ebnaj. 5Wal naj Pablo tu' xin, istzicayo naj isk'ab yiban̈ k'a', yayc'ay no' laba tu', maẍtic'a xin nich'ano tzet yu naj yu no'. 6Caw sunil ebnaj ch'echman ismalcan̈ isk'ab naj Pablo tu', maca iscamayo naj. Caw xin hunep ismaj ebnaj tato ay chu naj Pablo tu', yaja' yet yilni ebnaj tato maẍtic'a tzet yu naj, ishelni ebnaj isnabal, yichico ebnaj yalni haca' ti': —Hune' naj ti' c'uxan tato dios naj, ẍi ebnaj. 7Iscawilal tu' xin ay istx'otx' naj iswi'ehal yeco xol anma tu', Publio isbi. Ha' naj xin con̈chahnihan̈ yatut, caw c'ul con̈yilan̈ naj yin̈ oxeb tz'ayic. 8C'uxan ayto ismam naj Publio tu' sat tx'at yu hune' niman k'a' yeb xin yu chic'ul. Hac tu' xin yu yocto naj Pablo istucleno naj bay hilan tu', yoc naj txahlo xin. Lahwi istxahlicano naj Pablo tu', yanayo naj isk'ab yiban̈ naj ya'ay tu', iscawxican̈ naj. 9Yu hune' tzet yu tu' xin sunil anma ya'ay apni isc'atan̈ naj Pablo, iscawxican̈ anma sunil. 10Caw tzetc'a tzettaj ye tu' salax jetan̈ yu anma tu'. Haxa yet cotohan̈ yul barco xin yak'nipaxo ebnaj tzettaj ye tu' chiocnico juhan̈ yin̈ cobelan̈. 11Oxeb ixahaw xin ayon̈an̈ bey hune' isla Malta tu', lahwi tu' xin jocan̈ yul hune' te' barco ton̈e txajan yechman yec' n̈abil, ah Alejandría te'. Yin̈ sat te' barco tu' xin ayco yechel cabeb tioẍ, Cástor isbi hune', wal hunxa xin Pólux isbi. 12Hac tu' xin yu japnihan̈ bey yul con̈ob Siracusa, jehayojan̈ bey tu' yin̈ oxeb tz'ayic. 13Lahwi tu' xin cotopaxojan̈, japnihan̈ yul con̈ob Regio. Haxa hunxa tz'ayic xin, yichico hune' jak'ek' chitit yin̈ sur, haxa yin̈ iscab tz'ayic japnihan̈ bey con̈ob Puteoli. 14Ha' tu' chahloyo huntek'an ebnaj ayxaco yul isk'ab Comam juhan̈, yalni ebnaj jetan̈ tato chon̈cancanojan̈ hune' semanahil isc'atan̈ ebnaj. Lahwi tu' xin cotopaxojan̈ yin̈ cobelan̈ bey con̈ob Roma. 15Ebnaj xachahni Comam yul yanma ay yul con̈ob Roma tu', caw yohtaxa ebnaj tato chon̈apnihan̈ yuxin tit ebnaj con̈ischahban̈ yul beh; ay ebnaj hata bey hune' niman txon̈bal, Apio isbi, con̈yechmahan̈. Aypaxo ebnaj juẍta bey bay chihallax Oxeb Waybalil. Hayet yilni naj Pablo ebnaj tu', yak'ni naj yuch'andiosal tet Comam Dios, caw yik'ni yip yanma naj. 16Hayet japnihan̈ yul con̈ob Roma tu', yanico naj capitán ebnaj presowom yul isk'ab naj yahawil ebnaj soldado, wal naj Pablo xin nan alaxicto naj yul hune' n̈a yeb hune' naj soldado chitan̈eni. 17Iscabwihalxa japnihan̈ xin, yawten naj Pablo ebnaj iswi'ehal yeco xol ebnaj Israel ay yul con̈ob Roma tu', yet iscutxico ebnaj xin, yalni naj Pablo tu' haca' ti': —Hex wuẍtaj, walca caw machi inmulan insayicojan yin̈ ebnaj Israel yeb yin̈ iscuywabal ebnaj ichamta jichmam, yaj xin quinyacojan ebnaj yahawil Israel ti' preso yul con̈ob Jerusalén; lahwi tu' quinyanipaxicojan ebnaj yul isk'ab ebnaj romano ti'. 18Yaja' yet isk'amben ebnaj ah Roma tu' wetan tzet inmulan, caw yoche ebnaj quinisbejtzo'an yuto caw machi hunu inmulan caw tx'oj wacojan chik'anni camical win̈an. 19Wal ebnaj Israel xin caw mach isje ebnaj quinisbejtzo'an, yuxin ink'anti inbahan tet naj emperador, jahaw ay Roma ti', yun̈e ha' naj ch'ilni tzet chinelicojan. Walinan xin caw matzet chiwacojan ismulo ebnaj jet con̈ob tu'. 20Yu ton hune' ti' yuxin maquexwawtehan, yun̈e quexwilnihan cat walnihan teyet; yuto ay hune' mac echmabil yul ju han̈on̈ Israel hon̈ ti', yu ton hune' tu' yuxin c'albilinan yu ch'en cadena ti', ẍi naj. 21Yalni ebnaj tet naj Pablo tu': —Walon̈ti'an̈ maẍto hunu carta chihul jetan̈ yu ebnaj ay yul ismajul Judea tu' yin̈ tzet hawe hach ti', machipaxo hunu ebnaj juẍta israelita ay bey tu' chul halno jetan̈ yin̈ hunu tzet ye tu' tx'oj tawin̈. 22Wal tinan̈ chijochehan̈ jabehan̈ tzet ch'ec' yin̈ hanabal, yuto caw johtajan̈ tato caw sunil bay tx'oj istzotel anma yin̈ hune' cuybanile ti', ẍi ebnaj tet naj Pablo tu'. 23Hac tu' yu yalnicano ebnaj tzet tz'ayical chi'apni ebnaj isc'atan̈ naj Pablo tu'. Hayet yapni istz'ayical tu' xin, caw tzetc'a yu yapni ebnaj isc'atan̈ naj. Yichico naj yalni Istzoti' Comam Dios tet ebnaj yin̈ sac'ayalil masanta yin̈ k'ejbiyal. Yal naj Pablo tu' yin̈ tzet chu yoc ebnaj yul isk'ab Comam Dios. Tzotelpaxo naj tet ebnaj yin̈ tzet tz'ibn̈ebilcano yu naj Moisés yeb tzet tz'ibn̈ebilpaxcano yu ebnaj ischejab Comam Dios ec'lena yet payat, yun̈e yanayto ebnaj yul yanma, cat yanico isba ebnaj yul isk'ab Comam Jesucristo. 24Ay xin ebnaj anayto yul yanma yin̈ tzet yal naj Pablo tu', aypaxo xin ebnaj mach anayto yul yanma. 25Yaj yu mach lahano istxumni ebnaj yin̈ tzet yal naj Pablo tu', istzabnico ebnaj istohi. Yuxin yal naj Pablo tet ebnaj haca' ti': —Caw yeltic'a chiyal Comam Espíritu Santo yet yak'ni Comam yala' naj Isaías, ischejab Comam Dios, tet ebnaj jichmam yet payat, yet yalni Comam tet naj haca' ti': 26As hal tet huntek'an anma ti' haca' ti': “Hex ti' caw yeli cheyabe, yaj mach chitxumchalo heyu; caw cheyila, yaj mach chinachalo heyu,” cachi. 27Yuto ha' yanma sunil huntek'an anma ti' xacawbiloj, yuxin caw mach chabe isc'ulal. Caw mutz'anpaxo sat; yuxin caw mach chiyu yilni istoholal, maẍtic'a chiyabe yu istxiquin. Maẍtic'a chistxumpaxo ninoj, maẍtic'a xin chisje ishela' isbeybal yu wak'ni tan̈ojan ismul, ẍi Comam Espíritu Santo tu'. 28Tinan̈ xin caw cam cheyabecanoj tato yin̈ hune' tiempo chijicheco ti', chihallaxic'o hune' colbanile chiyak' Comam Dios ti' tet anma mach Israeloj, yaja' ec'na chiyak'ayto anma yul yanma, ẍi naj Pablo. 29Yet yalni naj Pablo hune' tu', isto ebnaj Israel, yoc ebnaj iscajlen isba yin̈ tzet yal naj. 30Wal naj Pablo xin, caw cab habil cancano naj yul hune' n̈a c'amn̈ebil yu tu'. Caw xin chitzala isc'ul naj chischahni naj anma ch'apni tuclenoj. 31Yin̈ sunil yanma naj Pablo yalic'o Istzoti' Comam Dios yin̈ tzet chu yoc anma yul isk'ab Comam, chiscuynipaxo naj anma yin̈ tzet yelapno ye Comam Jesucristo. Machi xin mac chihalni hunu tzet ye tu' yin̈ tzet chal naj Pablo.

will be added

X\