HECHOS 27

1Yet x'apni tz'ayical yanitoj heb'naj ya' Pablo Italia, x'alaxc'oj ya' b'oj hunk'aanxa heb'naj presuwom yul sk'ab' naj capitán Julio sb'ih, aycoj yin̈ batayon̈ heb'naj soldado Augusto sb'ih. 2Xcon̈ octoj yul hune' te' barco yet heb'naj ah Adramitioan. Hune' te' barco tu' ch'ec'oj te' yulaj hej puerto b'et Asia. Ha'hun ya' Aristarco ah Tesalónica ay b'et Macedonia xto jin̈an. 3Haxa hunxa tz'ayic xcon̈ apni Sidónan. Caw c'ul x'ilot ya' Pablo yu naj Julio tu' yuxin chu sto ya' yilnoj hej yamigo, schani ya' tzetet ch'a'ot tet. 4Xcon̈ el Sidón tu'an, xcon̈ ec'toj smotxic'oj Chipre b'ay chu jen̈len co b'a hanic'ojan haxca mat toholoj sb'elwi barco yu cak'e'. 5Lawitu' xcon̈ ec'toj smotxic'oj sti'laj Cilicia b'oj Panfiliaan masanto xcon̈ apni yul con̈ob' Mira aycoj yul scuenta Licia. 6Yet ayon̈ b'etu'an, sayni naj capitán hune'xa te' barco; xchalo hune' te' speto Alejandría yu naj, stohxa te' Italia. Yuxin hat xcon̈ yactoj naj yul te'an, xcon̈ toan. 7- 8Caw ya'taj xja'lean, yuxin caw tx'ihal tz'ayic xi'toj japni scawilal con̈ob' Gnidoan. Haxca caw ip smak'wa cak'e' co satajan, yuxin mach xu co to b'etu'an, to xcon̈ meltzoayojan xcon̈ ec'toj scawilal Salmónan. Xcon̈ ec'toj smotxlaj isla Cretaan haxca xcon̈ yen̈le hanic' tet hune' cak'e' tu'an. Caw lan̈o xij sb'a japni b'et Buenos Puertos aycoj scawilal con̈ob' Laseaan. 9Haxca caw nahatil xi'toj, xax ec' k'in̈ b'ay ẍk'anlax nimanc'ulal yin̈ smul con̈ob' israel, yuxin caw xiwb'alc'ulexa jeq'ui, matxa xu co toan haxca yichixacoj ya'ni c'uh. Yuxin xal ya' Pablo tet heb'naj i'n̈e te' barco: 10—Hex wetb'i, xwilan ta caw xiwb'alc'ulexa jeq'ui, haxca sub'utaj yetaxojtoj te' barco ti' cat sc'ayojtoj ijatz, chal sc'ul chon̈ camojwej. 11Yaja' mach xab'etoj naj capitán tzet xal ya' Pablo. Ha' tzet chal naj ch'inic'oj te' barco b'oj naj yahaw te', ha' syijye naj. 12B'et Buenos Puertos tu', mach b'ay c'ul scan te' barco c'untic'a yec'toj hunk'aan x'ahaw b'ay cha' cak'e'n̈ab' tu'. Yuxin ec'b'al heb'naj xalni ta mak'b'il co to Fenice b'et Cretaan. Hat ẍjechma yec'toj sya'tajil tu' yalni heb'najan, haxca b'etu' spahcha cak'e' ch'eliloj b'et b'ay ch'ahiloj tz'ayic. 13Yet tu' nanc'ulal ya'ni cak'e' speto yin̈ sur. Ham yalni heb'naj ta c'ul ch'elojcoj haca' yalni heb'naj tu', yuxin xican̈ heb'naj ch'en an̈cla, xcon̈ toan, xji'nitoj sunil sti'laj ha' mar b'et isla Creta tu'an. 14Yaja' hanic'n̈e tu' x'ayiloj hune' niman cak'e' xmak'wa yin̈ te' barco tu', xtit yib'an̈ b'ay ch'ahiloj tz'ayic, 15x'ichi yiottoj te' yu cak'e'. Yuxin mach ẍc'oji heb'naj yinitoj te' b'ay chal sc'ul, xcon̈ yinitoj te' b'ay ẍca sto cak'e' tu'an. 16- 17Ha' xcon̈ ec'toj smotxicoj hune' ni'an isla Clauda sb'ihan, xcon̈ spah hanic' cak'e'an. Te' lancha tzutancoj yin̈ te' barco, caw lan̈o xij sb'a yahtoj te' yib'an̈ te' barco tu' yun̈e mach c'aycantoj te. Lawitu' xco c'alni te' barco tu' yu hunk'aan nimej lasuan. Yaja' ẍnanon heb'naj ta c'uxan xtx'apican te' xol hunk'aan arena ẍhalot Sirteal, yuxin xiyoj heb'naj hej k'ape ẍmak'ot yu cak'e' yun̈e k'a' nanc'ulalxa ch'iottoj te' yu cak'e'. 18Haxa hunxa tz'ayic, k'a' ipto ya'ni cak'e', yuxin x'oc heb'naj sb'ejnojaytoj ijatz yul ha' mar yun̈e sank'o yijatz te'. 19Yin̈xa sca'fial ha' caw heb'naj xb'ejniaytoj sunil hej munlab'al yul ha' mar. 20Ayxana mach ẍjil tz'ayican ni tx'umel, chiancantoj asun, b'oj k'a ipto ya'ni cak'e', yuxin matxam chon̈ colchaoj jalnian. 21Ayxana stz'ayical matxa chon̈ wa'an, yuxin x'ah lin̈noj ya' Pablo xalni ya': —Hex wetb'i, ta xeyab'etoj tzet xwalan, mach xcon̈ tit b'et Creta tu'. Machmi b'isc'ulal b'oj sya'tajil ẍjila. 22Yaja' tinan̈ ẍwal teyetan, tzalaan̈wej, haxca mach hunuj mac ẍcamoj, han̈c'a te' barco ti' ẍhuchaojcantoj. 23Comam Dios ayin yetan b'oj chin hak'ean, ha' Comam xanitij yángel yala' wet ak'b'alil ti'an. 24Xalni wetan: Machach xiwi Pablo, haxca yilal hawocoj yin̈ sat naj yahaw Roma. Hawu sunil heb'naj ayictij yul barco ti' ẍcolchaoj yu Comam Dios, ẍi. 25Yuxin tinan̈ tzalaan̈wej, ẍcawxi hin c'ul yin̈ Comam Diosan to yilal yijnoj sb'a tzet xhul yángel Comam yala' wetan. 26Yaja' yilal co b'ejlaxojiloj sti' ha' mar b'ay ay hunuj isla. 27Can̈lan̈eb'xa tz'ayic chon̈ hul ec' yib'an̈ ha' mar Adria yu cak'e' tu'an. Yin̈xa chuman ak'b'al, xtxumni heb'naj ẍmunlacoj yin̈ te' barco to cawilxa jecoj yin̈ tx'otx'otx'an. 28Yuxin x'oc heb'naj smale' yich ha'. Ha' b'ab'el mal xiloj heb'naj aymi 40 varaoj yich ha'. Xcon̈ to hanic'xaan, smalen heb'naj hunecxa, 30 varaxan̈e yich ha'. 29Yaja' ẍnanon heb'naj ta ay b'ay smak'a'coj sb'a te' yin̈ ch'en nimej ch'en yul ha', yuxin sb'ejtzoaytoj heb'naj can̈eb' ch'en an̈cla yul ha' yin̈taj te' barco. Lawitu' xechman heb'naj sajb'iloj. 30Yaja' sk'umla sb'a heb'naj yel yul te' barco schuquil, yuxin x'ichi heb'naj yaniaytoj te' lancha yul ha', xanicoj heb'naj lek'ti'al ta chaytoj heb'naj yak'b'il ch'en an̈cla sataj te' barco. 31Yaja' lemb'il xal ya' Pablo tet naj capitán b'oj tet heb'naj soldado tzet lan̈an yuni heb'naj, xalni ya': —Ta ch'el heb'naj ti' yul te' barco ti', machon̈ colchaoj. 32Yuxin lemb'il xb'ey heb'naj soldado sc'upu'toj tx'an̈ lasu i'n̈e te' lancha tu', xtocan te' yul ha'. 33Yet lan̈anxa sajb'ojiloj, xalni ya' Pablo tet sunil heb'naj ta yilal ẍwa'can heb'naj, xalni ya': —Tinan̈ cab'xa semana machon̈ wa'i yu jilni tzet chon̈ tan̈i. 34Yuxin ẍwal teyetan ta yilal chon̈ wa'wejcanoj yocb'aloj jip, haxca mach hunujon̈ chon̈ camoj, hasta mach ninoj tzet ẍja'le'. 35Lawi yalni ya' hune' tu', xinican̈ ya' hune' ixim pan. Xa'ni ya' yuch'antioẍ tet Comam Dios yin̈ sat sunil heb'naj, sk'axpon ya' ixim, ichi swani ya'. 36Ha' xilni heb'naj hune' tu' x'ak'locan̈ sc'ul heb'naj, x'oc pax heb'naj wa'oj. 37276 ji'ni co b'a hayon̈ ayon̈ictoj yul te' barco tu'an. 38Lawi co wa'ilojan, sb'ejniaytoj heb'naj ixim trigo yul ha' mar, yun̈e shan̈k'o yet te' barco. 39Ha' sajb'iloj, xilnitoj heb'naj ẍmunla yin̈ te' to cawilxa yetij tx'otx'otx', yaja' mach xtxum heb'naj b'ay ayon̈an. Ay hune' sk'ab' ha' mar tu' ayictoj nab'a' arena sti'laj, yuxin xitoj heb'naj te' barco b'etu' yalni, ta c'uxan ay b'ay chu slin̈i te' sti'ha'. 40Yuxin sc'uptuj heb'naj tx'an̈ lasu i'n̈e hej an̈cla, xtocan yul ha'. Slohb'an heb'naj xtx'an̈al xtx'umb'anil ayaytoj yul ha', yun̈e chu yinitoj heb'naj te' b'ay chal sc'ul. Lawitu' xinican̈ heb'naj k'ape yul sb'eh cak'e' yun̈e c'ul sb'elwi te'. Lawitu' xetc'uln̈entoj heb'naj sti' ha'. 41Yaja' xcan tx'apnoj te' xol arena stenb'acan̈ yub'ulal ha' ha' yet ch'ec' job'layi. Sunil sataj te' xcancanoj tx'apnoj xol arena, wal te' yin̈taj hununtajil xu smak'niltoj ha' te' haxca caw ay yip yec' ha'. 42Heb'naj soldado, spotx' heb'naj heb'naj presuwom yalni yun̈e mach ẍcolpatoj heb'naj yin̈ aẍin. 43Yaja' xoche naj capitán scolo' ya' Pablo, yuxin mach sje naj ẍcam heb'naj presuwom tu'. Ha' xute naj to xal naj ta ẍb'ab'iloj mac chu yaẍni cat yapni sti' ha'ha'; 44mac machu yaẍni, yib'an̈ te ak'in ch'ahtoj cat yeli, ẍi naj capitán tu'. Ay mac yib'an̈ hunujxa ste'al te' barco tu' ch'ahojtoj cat yeloj yul ha'. Hactu' xjutean, yuxin co hunilon̈ xcon̈ colchaan, xcon̈ apnican sti' ha'an.


Copyright
Learn More

will be added

X\