HECHOS 26

1Xalni naj Agripa tet ya' Pablo: —Tinan̈ sje ha tzoteli cat ha colni ha b'a, Lawitu' xanican̈ ya'Pablo sk'ab' x'oc ya' tzoteloj: 2—Caw chin tzalaan mamin Agripa, haxca chu hin colni hin b'a yin̈ ha sat yin̈ hantaj tzet chal heb'naj jetcon̈ob' israel win̈an. 3Haxca hachti' caw hawohtaj co ley hayon̈ israelon̈ ti', hawohtaj pax tzetet ẍco tzote yin̈ co religión. Tinan̈ cha nimann̈e ha c'ul hawab'en tzet ẍwala' ti'an. 4Yohtaj sunil heb'naj jetcon̈ob' tzettic'a wean yet xquin ch'ib'tij yul hin con̈ob'an b'oj yet ayin yul con̈ob' Jerusalénan. 5Ta sje sc'ul heb'naj yala', sje yalni heb'naj, haxca yohtaj heb'naj to fariseo hintic'aan. Heb'naj fariseo tu' k'a' yijyom heb'naj yin̈ hej tzet chal co religión. 6Yaja' tinan̈, ayincoj tet ley yu heb'najan haxca ẍcawxi hin c'ulan ta yilal yijnoj sb'a tzet halteb'il yu Comam Dios, haca' xutecan Comam yalni tet heb'ya' jichmaman. 7Cab'lan̈eb' majan ye heb'ya' wetcon̈ob' israel ti'an. Sunil heb'ya' ch'echman yijni sb'a tzet halteb'il yu Comam Dios. Yuxin hunun tz'ayic ak'b'al yijyom chute sb'a heb'ya' tet Comam. Mamin rey Agripa, yu wechman yijni sb'a hune' tu'an, yuxin ch'a'wic'ule heb'naj wetcon̈ob' ti' win̈an. 8¿Tzet yuxin machu heya'ni yuluj he c'ul ta spitzc'a'can̈ Comam Dios hej camom? 9Yet yalan̈to tu', hayin hun xwitij wanma yin̈an, yun̈e mach'oc tzujnuj anma yin̈ Comam Jesús ah Nazaret. 10Hat xquin ichitij wuni b'et Jerusalénan. Xin k'an tet heb'naj swi'al yin̈ heb'naj sacerdotean ta cha' heb'naj hin chejb'anil hin tzab'ni mac xax ya' yuluj sc'ulan cat wanicoj yul presuan. Hayin hun xwalan ta ẍpotx'lax heb'ya'. 11Tx'ihal el xin chej etalaxoj heb'ya'an yun̈e yalni heb'ya' tx'oj yin̈ Comam Jesús. Sunil yulaj hej capiya xquin ec'an. Caw ẍchiwa hin c'ul yin̈ heb'ya'an, hasta xquin to yul hunk'aanxa nancon̈ob'al yu wa'ni ec'oj ya' yanma heb'ya'an. 12Ha' ti' nab'il wuan, yuxin xquin to yul con̈ob' Damascoan. Ib'il te' hum wu b'ay xa' heb'naj swi'al yin̈ heb'naj sacerdote hin chejb'anilan ta chu hin tzab'ni anmaan. 13Yaja' yet ayincoj yin̈ b'elan, mamin rey, caw chuman tz'ayic x'ay jepna hune' sajilk'inal wib'an̈ b'oj heb'naj tzujan win̈an, k'a' ayto yip sataj sk'ak'al tz'ayic. 14Xcon̈ ayc'ay co hunil yu hune' sajilk'inal tu'an. Xwab'en hunk'aan tzoti' yul ab'xub'al hebreoan chalni wetan: Saulo, Saulo, ¿tzet yuxin chawa' ec'oj ya' wanmaan? Hachtic'a chaweta' ha b'a haca' hunuj no' buey xan̈wacoj yin̈ te' te' xixi swi', ẍiaytij. 15¿Mac hach Mamin? quin chian. Xta'wi Comam Jahaw xalni wetan: Hayin ti' Jesús lan̈an hawa'ni ec'oj ya' wanmaan. 16Yaja' tinan̈ ahan̈lin̈noj, haxca yu hune' ti' yuxin ẍwa' hin b'a hawohtajn̈ean yun̈e hawoc hin chejab'ojan b'oj yu hawa'ni ha b'a yin̈ tzet lan̈anto hawilni ti', b'oj hantajto tzet chin yeb' tawetan. 17Haxca tinan̈ chach wa'a'toj xol anma mat israelojan, yaja' chach hin colo' yul sk'ab' anma tu'an, b'oj yul sk'ab' heb'naj hawetcon̈ob'. 18Chach wa'a'toj xol anma tu'an yun̈e ha toj ha hajnojtoj yul swi', yu yiniloj sb'a yin̈ sk'ejalholo cat yanicoj sb'a yin̈ sajilk'inal yet Comam Dios. Chach wa'a'paxtoj xol anma tu'an yu yel yul sk'ab' naj matzwalil cat yoc yul sk'ab' Comam Dios, b'oj yun̈e ya'ni yuluj sc'ul win̈an haxin̈wal ẍtan̈can smul yib'an̈, cat schanoj sk'a mucul xol mactaj sic'leb'ilxa yu Comam Dios, ẍi Comam Jesús wetan. 19Yuxin mach xin man̈c'o tzet xhul yala' hune' mac x'ayiloj syeb' sb'a wet tu'an, mamin rey Agripa. 20Yuxin hatic'a Damasco tu' xwichecoj hin pujb'anc'oj stzoti' Comam Diosan. Lawitu' xquin to yul con̈ob' Jerusalén wala'paxc'ojan b'oj sunil yulaj con̈ob' yul scuenta Judea. Xquin tzotel pax tet anma mat israelojan, yun̈e sb'ejnican yuni hej tzetet tx'oj, cat yanicoj yanma yin̈ Comam Dios. Xwalni paxan ta c'ul chute sb'a yun̈e syeniloj to xax yacan xtx'ojal. 21Haxca chin tzote hunk'aan ti' tet anmaan, xquin stzab'ayoj heb'naj jetcon̈ob' yamak' yatut Comam Diosan. Xalni heb'naj hin spotx'nojan. 22Yaja' yu sc'ulal sc'ul Comam Dios lin̈anin tinan̈an. Ẍwalni stzoti' Comam tet sunil anmaan, tet anma cuywinaj b'oj tet anma scomonaln̈e yeyi. Han̈c'a tzet t'in̈an yijnoj sb'a tz'ib'n̈eb'ilcan yalan̈to yu heb'ya' schejab'lom Comam Dios b'oj yu ya' Moisés, ha' chin tzotean. 23Chal heb'ya': Ta yilal yilni Comam Cristo sya'tajil cat scami. Lawi scami ha' b'ab'el xpitzc'acan̈ xol hej camom yun̈e yalnic'oj to ay scolb'anil mac israel b'oj mac mat israeloj. Hune' colb'anil xal tu', haca' sajilk'inal yeyi. 24Lan̈an yalni ya' Pablo hunk'aan tzoti' ti' scolb'aniloj, x'awican̈ naj Festo xalni naj: —Locoachxa Pablo, yuxa hantaj tzet cha cuyu chach paq'ui locoal. 25Xta'wi ya' Pablo: —Matin locoojan mamin gobernador, hej tzoti' ẍwal heyab'e' ti'an caw st'in̈anil chala b'oj caw ay yelapnoj yeyi. 26Ya' rey Agripa ti' yohtaj ya' hunk'aan ti'. Yuxin sunil hin c'ulan ẍwalni yin̈ he satan. Hunk'aan ẍwal ti'an mat ewanoj yeyi, to sunil anma ohtajn̈e. Yuxin ẍcawxi hin c'ulan ta yohtaj ya' rey Agripa hune' ti'. 27Hachti' mamin rey Agripa, wohtajan to chawa' yuluj ha c'ul yin̈ tzet xal heb'ya' schejab'lom Comam Dios,. 28Xta'wi naj: —Ham hawalni ta yun̈e hanic' chawal ti' cat wocoj Cristianoalan. 29Xta'wi ya' Pablo: —Waxan̈ca ninojn̈e xwalan mato tx'ihal, sak'almi ta haca' xu woc ti'an ch'el yin̈ sc'ul Comam Dios, hactu' chu hawoc paxoj b'oj hantaj mac ch'ab'en tzet xwal ti'an, tan̈e xin, machex c'al-lax yu ch'en cadena haca' we ti'an. 30Lawi yalni ya' hune' tu', x'ah wanoj naj rey Agripa b'oj yixal Berenice, x'ah pax wanoj naj Festo b'oj heb'naj ayictoj sc'atan̈. 31Yet lan̈an yeltij heb'naj, sk'umlan sb'a heb'naj yin̈ hacti': —Hune' naj ti' mat yetoj ay scam naj haxca mach smul naj, matca yetoj ay scan naj yul presu. 32Xalni naj rey Agripa tet naj Festo: —Yun̈e xax sk'antoj sb'a naj tet naj yahaw ay Roma, ta machoj chu co hajniltij naj.


Copyright
Learn More

will be added

X\