HECHOS 26

1Lahwi tu' xin, yalni naj rey Agripa tet naj Pablo haca' ti': —Wal tinan̈ chisje hatzoteli yu hacolni haba, ẍi naj. Yanican̈ isk'ab naj Pablo tu', yoc naj tzotelo haca' ti': 2—Caw chitzala inc'ulal yuto chawak' hamanil wetan wocan tzotelo tawet, mam rey Agripa, cat incolni inbahan yin̈ sunil tzet chiyal ebnaj jet con̈ob Israel win̈an. 3Yuto hach ti' caw hawohta coley han̈on̈ Israel hon̈ ti', yeb xin sunil tzettaj chicowatx'e. Yuxin caw chink'anan tawet tato caw niman chawute hac'ul hawaben nino tzet chiwalan, ẍi naj Pablo. 4Yalnipaxo naj Pablo: —Caw sunil ebnaj Israel ohtan̈e tzet inbeybalan yet inch'ibcan̈an yul incon̈oban yeb xin yet ayinan yul con̈ob Jerusalén. 5Caw xin yohtapaxo ebnaj, yeb xin ta chisje isc'ul ebnaj chisje yalni ebnaj ta yettaxtic'a tzehinan, caw fariseo inan. Ebnaj fariseo tu' xin, ec'na caw yijem ebnaj yin̈ tzet chal coreligión. 6Tinan̈ xin maquinyitijan ebnaj sata ley ti', yuto chicawxi wanmahan yin̈ tzet haltebilcano yu Comam tet ebnaj jichmam tato chiitzitzbican̈ anma camom yu Comam. 7Ha' ebnaj cablahon̈eb majan Israel, ha' ebnaj xin chi'echman yijni isba tzet halbilcano yu Comam; yuxin chiyiyo isba ebnaj tet Comam hunun tz'ayic yeb hunun ak'bal cat isyijen ebnaj tzet chiyal Comam. Yaj yin̈ hune' halbil yu Comam, ha' bay chicawxi wanmati'an, mam rey Agripa, ha' xin chiyaco ebnaj Israel ti' inmulojan tinan̈. 8Wal xin hex Israel hex ti', ¿tzet yin̈ xin mach cheyayto yul heyanma tato chiitzitzbican̈ anma camom? ẍi naj Pablo tu'. 9Yalnipaxo naj Pablo: —Yet yalan̈tocano tu', oc yin̈ innabalan wocan incachnojan anma yun̈e mach chischayto Comam Jesús ah Nazaret yul yanma. 10Hac tu' xin wutehan yul con̈ob Jerusalén yu hune' wipan ak'bil yu ebnaj yahawil sacerdote, yuxin hantan̈e anma chahn̈e Comam Jesucristo yul yanma, wactojan yul preso; caw xin ha' huninan walan ta chipotx'lax ebnaj. 11Caw tx'i'al el wacojan ebnaj yin̈ isya'tajil yun̈e yinilo isba ebnaj yin̈ Comam. Huntek'an ti' inwatx'ehan yul sunil iscapilla ebnaj Israel. Caw xin waco inhowalan yin̈ ebnaj yuxin quinbeypaxojan yulaj nan con̈obal wak'acojan ebnaj ayxaco yul isk'ab Comam yin̈ isya'tajil, ẍi naj Pablo. 12Yalnipaxo naj Pablo: —Ha' ton hune' tu' caw nabil wuhan yuxin quintohan yul con̈ob Damasco ik'bil te' carta yak' ebnaj yahawil sacerdote Israel wetan, yun̈e caw ay wipan wec'an. 13Yaj haxa yul beh xin mam rey, yin̈mi chuman tz'ayic, yayilo jopna hune' issajilk'inal wiban̈an yeb ebnaj tzujan win̈tajan. Caw ec'na caw ay yip isk'ak'al hune' sajilk'inal tu' yiban̈ yoj tz'ayic. 14Hac tu' xin caw cosunilan̈ con̈ayc'ayan̈ sat tx'otx'. Wabenan hune' yul nuk'e halni wetan yul abxubal hebreo haca' ti': “Saulo, Saulo, ¿tzet yin̈ yuxin chinhatzumbec'ojan? Hach caw ach, chawak' lahwo haba haca' hunu no' wacax chixan̈wa yin̈ hunu te te' k'ak'i' iswi',” ẍi wetan. 15Lahwi tu' xin walnihan: “¿Mac anmahilhach, Mamin?” quinchiyan. Yalni Comam wetan xin: “Haninti'an, Jesús inan, hune' ayachico hasaynic'oj. 16Wal xin ahan̈lin̈noj. Manyecan̈ inbahan tawet yun̈e hayijen tzet chiwalan cat xin hawalnic'o hune' maxawil ti' tinan̈, yebpaxo xin tzettaj chi-to-inyeban tawet. 17Chaẍincolan tet ebnaj Israel, yeb xin tet ebnaj nan con̈obal bay chaẍinchejtojan tinan̈. 18Chaẍwatojan xol anma tu' yun̈e hato hawak'no hajloho sat, yeb xin yun̈e matxa chislahico isbelwi xol k'ejholo, to haxa xol issajilk'inal ch'eq'ui. Yebpaxo xin yun̈e matxa chislahico isyijen tzet chiyal naj matzwalil, haxa tzet chal Comam Dios ha' chiswatx'e, cat xin quinischahnaytojan yul yanma cat yak'lax nimanc'ulal yin̈ ismul, cat ischahnipaxo ismajul xol anma saybilxa yu Comam Dios, ẍi Comam Jesús wetan,” ẍi naj Pablo tu'. 19Yalnipaxo naj Pablo: —Yuxin mam rey Agripa, maẍtic'a inman̈c'ohan hune' tzoti' tit wetan yul satcan̈ tu', yet isyenico isba yin̈ insatan yin̈ sajsatil. 20To caw babel walic'ojan Istzoti' Comam xol anma ay yul con̈ob Damasco, lahwi tu' intohan walnoc'ojan xol anma ay yul con̈ob Jerusalén yeb yul ismajul Judea, yebpaxo xol anma mach Israeloj, yun̈e isbejnicano isbeybal tx'oj ik'biltic'a yu, cat ismeltzoco iswatx'en tzet chiyoche isc'ul Comam Dios, cat yocpaxo anma tu' iswatx'en isc'ulal, ha' xin chiyeniloj tato helbilxa isbeybal anma tu'. 21Yu ton hune' tu', yuxin quinistzabayojan ebnaj Israel yul yatut Comam Dios, quinyanicojan ebnaj preso, caw xin yoche ebnaj quinispotx'o'an. 22Yaj yu iscolwal Comam Dios, yuxinto lin̈anintohan tinan̈ yin̈ walnic'ojan Istzoti' Comam tet sunil anma; tet anma comon yeb xin tet anma caw ay yelapno yehi. Caw maẍtic'a hunelo inhelan tzet walan, to han̈ech'an tzet yal ischejab Comam Dios yet payat yeb xin jichmam Moisés; huntek'an yilal yijni isba, ha' walic'ojan, 23tato caw yilal yaben Comam Jesucristo Cocolomal isya'tajil, yeb xin ta chicampaxoj. Ha' xin babel chiitzitzbican̈ xol anma camom, yun̈e yalnic'oj tato ay iscolbanil anma Israel yeb xin anma mach Israeloj. Ha' hune' yal tu', ha' ton issajilk'inal, ẍi naj Pablo. 24Yet yalni naj Pablo huntek'an tzoti' tu' iscolbaniloj, yah yaw naj Festo haca' ti': —¡Caw loco hachxa ach Pablo! Yu tzetc'axa chacuycanoj yuxin chaẍpaq'ui locohal, ẍi naj. 25Istak'wican̈ naj Pablo: —Mach locohojinan mam Festo, wal xin ha' tzet chiwalti'an caw c'ul, caw yelpaxoj. 26Ya' rey Agripa ti' caw yohta ya' sunil huntek'an ti', yuxin caw sunil wanmahan chintzotelan yin̈ sat ya', yuto caw wohtajan tato caw yohta ya' sunil tu' yuto mach ewantajo yehi. 27¿Chimhawayto yul hawanma mam rey Agripa huntek'an yal ebnaj ischejab Comam Dios payat tu'? Wal xin, caw wohtajan tato chawayto yul hawanma, ẍi naj Pablo tu'. 28Yalni naj rey Agripa tu' xin: —¿Ham hawalni ta yu nich'an tzet chawal ti' chinocan Cristianohal hawu? ẍi naj. 29Istak'wipaxo naj Pablo: —Wal xin walca yu nich'an tzoti' maca yu niman tzoti' chiwalan teyet, tzettam sak'al tato ch'el yin̈ isc'ul Comam Dios, ta maẍn̈etajach, to sunilojab anma lan̈an yaben ti' chichahnayto yul yanma, cat yoc haca' inti'an, yaja' tan̈e mach chic'allaxayo yu ch'en cadena haca' weti'an, ẍi naj Pablo. 30Lahwi yalnicano naj Pablo huntek'an tu' xin, yah lemna naj rey Agripa, yeb naj gobernador, yeb ix Berenice, yeb xin sunil anma tz'on̈an bey tu'. 31Ishec'nilo isba ebnaj tzotelo ischuquil yin̈ hune' tu', leyalni ebnaj haca' ti': —Hune' naj ti' caw maẍtic'a nich'ano ismul naj chik'anni camical yin̈, yeb caw mach yeto ay naj yocto yul te' preso, ẍi ebnaj. 32Yalni naj rey Agripa tu' tet naj Festo: —Chisje cobejtzon naj tato maẍto chisk'anto isba naj yin̈ sat ya' jahaw ay bey Roma, yaja' ha' tu' choche naj ch'illaxi tzet ch'elico naj yalni, ẍi naj.

will be added

X\