HECHOS 24

1Howeb'xa tz'ayic yapni ya' Pablo Cesarea, yet x'apni naj Ananías swi'al yin̈ heb'naj sacerdote. Tzujan hunk'aan heb'naj swi'con̈ob' yin̈ naj b'oj hune' naj licenciado Tértulo sb'ih. X'apni heb'naj yin̈ sat naj gobernador, yu ya'wic'ule yin̈ ya' Pablo. 2Ha' x'awteot ya' yin̈ sat heb'naj, stzab'nicoj naj Tértulo yalni smul ya' tet naj gobernador Félix, chalni naj: —Yuch'antioẍ tawet mamin gobernador, hawu yuxin aycoj ak'anc'ulal co xolan. Caw tx'ihal tzet xwatx'iloj yul co con̈ob' yu stz'ajanil ha c'ulan. 3Yeli caw c'ul hach mamin Félix. Sunil yul hunun con̈ob' ẍhalot ha c'ulal yu hej tzetet c'ul chawu, caw yuch'antioẍ tawet. 4Mach jochean ta hunay chon̈ tzotel b'oj hachan, to hunepoj ch'an k'inanil chawab'etoj tzet ẍjalan. 5Naj Pablo ti' caw yeli ch'etlicoj naj jin̈an, haxca sunil b'ay ch'ec' naj ya'a' sc'uluj b'oj smonte' jetcon̈ob'an. Swi'al naj yin̈ hune' spartido heb'naj Nazareno. 6- 8Xal naj yetatoj yatut Comam Dios yalni, yuxin xco tzab' najan. Ha' cha' k'amb'eloj tet naj mamin, cat yalnojiloj sb'a to yel ẍjalan. 9—Caw yel chal ya' Tértulo ti', ẍi heb'naj tzujan yin̈ naj. 10Lawitu', x'ec' sk'ab' naj gobernador tet ya' Pablo ta stzotel ya' cat scolni sb'a ya', yuxin xal ya': —Hachti' mamin gobernador, wohtajan ta caw payxa ayachcoj juezal yul hune' con̈ob' ti'. Yuxin caw chin tzalaan chin colni hin b'a yin̈ ha satan. 11Hach caw chu ha pich'niloj to caw yel hune' ẍwal ti'an. Cab'lan̈eb'ixto tz'ayic wapni Jerusalén yu hin hak'en Comam Diosan. 12Mach mac chin teye tzotelojan, machca mac xwichecoj yin̈ howal yamak' yatut Comam Diosan ni yulaj capiya ni yul con̈ob'. 13Yin̈ tzet cha' heb'naj ti' hin mulujan mach hunuj chu yalni heb'naj syelal. 14Han̈c'a ti' chin chacoj wib'an̈an mamin, to hatic'a Comam Dios shak'e hej jichmaman, ha' Comam chin hak'e haca' yalni hune' cuywab'al chal heb'naj ti', yaja' chal heb'naj to nan leyal. Yaja' chin yijye sunil tzet tz'ib'n̈eb'ilcan yu ya' Moisésan, b'oj heb'ya' schejab'lom Comam Dios. 15Ẍcawxi pax hin c'ul yin̈ Comam Diosan to yeli ẍpitzc'aojcan̈ sunil hej camom, mac c'ul b'oj mac tx'oj. Hactu' chu ya'ni pax heb'naj ti' yuluj sc'ul. 16Yuxin caw nann̈e wuan yun̈e machin mul ẍcan yul sat Comam Diosan b'oj yin̈ sat anma. 17Ay xam hayeb'oj hab'il machinc'oj yul con̈ob' Jerusalénan, tinan̈ xquin apni hunecxa yu hin colwa yin̈ anma meb'a'an, b'oj yu wa'ni wofrenda tet Comam Diosan. 18Yamak' yatut Comam Dios ayinictoj wa'ni wofrenda tu'an. Xax hin sajn̈e hin b'a haca' yalni co leyan. Huncawan̈n̈e mac ayictoj tin c'atan̈an. Mach ninoj howal ẍjuan, yet xquin stzab'ni hunk'aan heb'naj israel speto Asiaan. 19Ta ay hin mul chab'e heb'najan, yet aya chul heb'naj yala' tzet hin mulan. 20Taca machoj, yalab'ayoj heb'naj hin mul xchalo yu'an yet ayincoj yin̈ sat heb'naj swi'con̈ob' lahti'woman. 21Mato haxca xwal yin̈ sat heb'naj yin̈ ipan: Cheyi'can̈ he b'a win̈ tinan̈an haxca ẍwa' yuluj hin c'ulan ta ẍpitzc'aojcan̈ hej camom, quin chian, 22Naj gobernador Félix tu', yohtaj naj tzet ye hune' cuywab'al yet Comam Jahaw, yuxin ha' xab'en naj to hactu' yalni ya' Pablo, xalni naj: —Ẍto huluj naj comandante Lisias, catto wilnojan tzet ẍtan̈oj hune' b'ay ch'el he howal ti'. Canojab' yin̈ hacti' b'ela. 23Lawitu', xalni naj tet naj capitán ta ẍtan̈elax ya' Pablo, yaja' ta ay yamigo ya' ch'apni a'noj hunuj tzetet tet, chu yapni sc'atan̈ ya'. 24Cab' oxeb'xam semana tu' xhul pax naj Félix Cesarea b'oj yixal Drusila, ix tu' israel ix. Lawitu' xawten naj ya' Pablo, x'oc naj yab'enoj tzet chal ya' yin̈ tzet chu ja'ni yuluj co c'ul yin̈ Comam Cristo Jesús. 25Yaja' yet xalni ya' Pablo ta yin̈ stoholal chon̈ b'elwi, b'oj yilal co cachni co b'a yin̈ hej tzetet tx'oj, b'oj xal ya' to chuluj stz'ayical b'ay chila' Comam Dios tzet chon̈ tan̈oj, caw xiwcan̈ naj, xalni naj: —C'ojb'ilxa yin̈ tzet xawal ti', yet ay hin hamanilan chach wawte' paxan. 26Naj gobernador Félix tu' ay yala' naj chalte ya' Pablo hanic'oj ch'en melyu tet naj yin̈ ewantaj, yun̈em chu shajniltij naj ya' yul presu, yuxin naun̈e ch'awteot ya' tzoteloj yu naj. 27Yulb'al cab' hab'il hacn̈etic'a tu' chute naj. Lawitu' x'apni stz'ayical b'ay xtan̈canoj smunil naj, haxa' naj Porcio Festo xhul shelb'alo naj. Yaja' yun̈e scan naj Félix tu' c'ulal yul sat heb'naj israel, xto yacan naj ya' yul presu.


Copyright
Learn More

will be added

X\