HECHOS 24

1Howebxa tz'ayic yapni naj Pablo yul con̈ob Cesarea, yapnipaxo naj Ananías, yahawil yeco yin̈ ebnaj sacerdote, yeb huntek'an ebnaj iswi'ehal yeco yin̈ ebnaj Israel, yeb xin hune' naj licenciado, Tértulo isbi. Ha' ebnaj ti' xin apni yin̈ sat naj gobernador ak'oc'ule yin̈ naj Pablo. 2Hayet yilaxti naj, istzabnico naj Tértulo tu' yoc ak'oc'ule yin̈ naj Pablo tet naj gobernador Félix haca' ti': —Yuch'andios tawet mam gobernador, hawu yuxin ay ak'anc'ulal coxolan̈. Caw xin sunil tzet chawatx'e caw c'ul yu caw ay hanabal. 3Caw yeli sunil bay chijabehan̈ hac'ulal yeb xin sunil isc'ulal tzettaj chawatx'e mam Félix, caw yuch'andios tawet yin̈ sunil. 4Yaj yu machi caw chiwilojan hatiempo, caw chink'anan tawet ta chawabe tzet chiwalan hunepoj. 5Hune' naj ti', caw yeli caw ch'etlicano naj jin̈an̈ yuto caw sunil bay ch'ec' naj ak'oc'ule tet anma, ayco naj ispohnito ebnaj Israel. Caw xin iswi'ehal yeco naj yin̈ hune' majan ebnaj ayco yinta hune' naj ah Nazaret. 6Yebpaxo yetato naj yatut Comam Dios; yuto yicto naj huntek'an ebnaj mach Israelo yul yatut Comam, yuxin cotzabayojan̈ naj yun̈e yay nino isya'tajil yiban̈ naj haca' yalni coleyan̈. 7Yaj xin yaco isba naj comandante Lisias xol, istzicnilo naj naj Pablo ti' jetan̈. 8Yalni naj tato ebnaj k'ann̈e yin̈ naj ti', tawet chihul ebnaj yala'. Hach caw ach xin chisje hak'amben tet naj, cat xin hawohtan̈enilo tato caw yel chijalan̈, ẍi naj Tértulo tu'. 9Ha' hun ebnaj Israel tzujan yinta naj Tértulo chihalni tato caw yel sunil huntek'an tu'. 10Lahwi tu' xin, yak'ni naj gobernador tu' yechel tet naj Pablo yun̈e istzotel naj, yalni naj Pablo tu' haca' ti': —Mam gobernador, caw chintzalahan chincolni inbahan yin̈ hasat, yuto caw wohtajan tato hach ti' caw payxa cachoc yahawil yin̈ tx'otx' Israel ti'. 11Yaj caw chisje hak'ambeniloj ta caw yel tzet chiwalti'an; caw cablahon̈ebixto tz'ayic wapnihan yul con̈ob Jerusalén winoyo inbahan tet Comam Dios. 12Yaj machi hunu mac chiyu yalni ta inteyele inbahan yeb hunu maca nitam wijbanan hunu mac yin̈ howal yul yatut Comam Dios, maca yulajla capilla maca yul con̈ob. 13Huntek'an ebnaj ti' matzet tz'aj yak'baln̈e ebnaj tato caw yeli inmulan huntek'an chisbalcan ebnaj win̈ti'an. 14Yaj chiwalan, to ayinicojan inyijenan tzet chiyal isDiosal jichmaman̈, haca'tic'a yalni hune' ac' cuybanile, ha' xin chiyal ebnaj ti' tato nan yehi. Chiwapaxaytojan yul wanmahan sunil ley ak'bilcano tet jichmaman̈ naj Moisés, yeb sunil tzet tz'ibn̈ebilcanayo yu ebnaj ischejab Comam Dios yet payat. 15Caw xin chicawxi wanmahan yin̈ Comam Dios haca'tic'a ebnaj ti', yin̈ tato chiitzitzbican̈ anma camom, anma c'ul yeb xin anma tx'ojpaxoj. 16Yu ton hune' tu', yuxin caw ayn̈etic'aco yin̈ innabalan inwatx'enan isc'ulal yul sat Comam Dios yeb yul sat anma. 17Lahwi hayeb habil wec'an yulaj con̈ob xin, inmeltzotojan yul incon̈oban yun̈e incolwahan yin̈ anma meba' yeb xin wak'nipaxojan wofrendahan tet Comam Dios. 18Ha' huntek'an ti' lan̈an inwatx'enan yet yapni huntek'an ebnaj Israel ay yul ismajul Asia yul yatut Comam tu' yet lahwi insajn̈encano inbahan tet Comam haca' yalni coleyan̈. Haywan̈n̈e ebnaj ayicto yul yatut Comam tu', caw xin machi nich'ano howal jak'an̈. 19Ha' xin ebnaj ah Asia tu', yilal yul bey ti' yalno tzet inmulan, tato yeli aytic'a tzet chiyaco ebnaj inmulojan. 20Taca mach xin, yalab ebnaj ayc'o ti' tzet hunu inmulan wacojan yet wocan yin̈ sat ebnaj iswi'ehal yeco yin̈ lahti' xol ebnaj Israel. 21Macato yu walan yin̈ caw ip xol ebnaj haca' ti': “Tinan̈ chexoc heyila' tzet chinelicojan yuto chiwaytojan yul wanmahan tato chiitzitzbican̈ anma camomxa,” ẍi naj Pablo tu'. 22Wal naj Félix tu' xin, caw xatic'a yabe naj cuybanile yet Comam Jesucristo, yuxin hayet yaben naj tzet yal naj Pablo tu', yalni naj: —Hato yet chihul naj comandante Lisias, catto wabenojan tzet caw ye hune' hehowal ti', ẍi naj. 23Yalni naj Félix tu' tet naj capitán haca' ti': —Wal istan̈elax naj Pablo ti', yaj tato ay yamigo naj chul tuclenoj cat yak'ni hunu tzet ye tu' tet naj, caw machojab tzet chawala, ẍi naj. 24Lahwi hayeb tz'ayic xin, yapni naj Félix yeb yixal, ha' ton ix Drusila, ix tu' xin ah Israel ix. Yawtenpaxo naj naj Pablo, yoc naj yabeno tzet chute yalni naj Pablo tu' yin̈ tzet chiyu janico janma yin̈ Comam Jesucristo. 25Yaj hayet yalni naj Pablo tato caw tohol chijute cobeybal, yeb xin cocachni coba cowatx'en istx'ojal, yeb yet yalnipaxo naj yin̈ isya'tajil chiyati Comam Dios yin̈ islahobal tz'ayic, isxiwcan̈ naj Félix tu', yalni naj haca' ti': —Asi' tinan̈, haxa yet caw matzet chiwuhan cat cachwawtenojan, ẍi naj. 26Wal naj Félix tu' xin, yechma naj yalten naj Pablo hanic'o melyu tet naj yin̈ ewantaj, cat isbejtzon naj naj Pablo tu' yalni. Yu ton hune' tu' yuxin caw nawn̈e chiyawten naj naj Pablo tu', cat istzotel naj tet naj. 27Elto cab habil hacn̈etic'a tu' chiyute naj, lahwi tu' xin yel naj Félix tu' yin̈ gobernadoral, yoccano naj Porcio Festo selelo naj, yaj yun̈e iscan naj Félix tu' c'ulal yul sat anma Israel, yuxin cancano naj naj Pablo yul preso yu naj.

will be added

X\