HECHOS 23

1X'occan t'an̈noj ya' Pablo yin̈ heb'naj swi'con̈ob' lahti'wom, xalni ya' tet heb'naj: —Hex wetcon̈ob', yulb'al xquin ehc'ojan saj hin sat yul sat Comam Diosan, 2Naj Ananías, swi'al yin̈ heb'naj sacerdote, xal naj tet heb'naj aycoj scawilal ya', ta schac'coj heb'naj sti' ya'. 3Xalni ya' tet naj Ananías tu': —Hachti' haca' hune' b'itz'ab' ab'ilcoj xtxohal, cha chab' spaj hune' ti' tet Comam Dios, haxca ayach b'eti' yu hawalni ta ẍwa' tan̈oj haca' yalni leyan, yaja' cha xan̈b'a pax ley tu' cha chejni hin mak'laxojan, 4Xalni heb'naj ay scawilal ya' tu': —¿Tzet yuxin caw tx'oj ha tzotel tet naj swi'al yin̈ heb'naj sacerdote Comam Dios?. 5Xalni pax ya' Pablo: —Hex wetcon̈ob', mat wohtajojan ta ha' naj ti' swi'al yin̈ heb'naj sacerdote. Ta machoj mach mi xwalan, haxca chal Yum Comam Dios: Machawal tzoti' tx'oj yin̈ hunuj naj swi'con̈ob', ẍi Yum Comam tu', 6Yaja' xtxum ya' to xol heb'naj ayictoj b'etu', hunmajan heb'naj saduceo, hunmajanxa heb'naj fariseo, yuxin xalcan̈ ya' yin̈ ip tet heb'naj: —Hex wetcon̈ob', hayin ti'an fariseo hinan, yuninal pax fariseo wean. Cheyin̈ipaxcan̈ he b'a win̈an haxca ẍcawxi hin c'ulan to ẍpitzc'aojcan̈ hej camom. 7Ha' xalni ya' hune' tu', xa'nican̈ heb'naj fariseo b'oj heb'naj saduceo howal, yuxin spohtoj sb'a heb'naj. 8Haxca chal heb'naj saduceo to mach ẍpitzc'acan̈ anma yin̈ camical, b'oj chal heb'naj to mach ángel b'oj mach espíritu. Wal heb'naj fariseo cha' heb'naj yuluj sc'ul to ay hunk'aan tu'. 9Yuxin x'ah xayna heb'naj stzoten hune' tu', slin̈b'an pax sb'a haywan̈ heb'naj cuywaom yin̈ sley ya' Moisés yetb'i sb'a b'oj heb'naj fariseo, xchilb'an heb'naj chalni yin̈ hacti': —Mach hunuj tzet tx'oj xal naj ti'. Tita ay hunuj ángel mato hunuj espíritu x'a'ni yala' naj hunk'aan tzetet ti'. 10Yaja' xpaq'ui nimej howalil xol heb'naj, yuxin xiwcan̈ naj comandante haxca taj stzilottoj ya' Pablo yu heb'naj, yuxin xal naj tet heb'naj soldado ta ch'aytij heb'naj yi'a'loj ya' xol anma tu' cat yiniatoj heb'naj ya' yul cuartel. 11Haxa ak'b'alil, sye sb'a Comam Jahaw tet ya' Pablo, xalni Comam: —Machach xiwi Pablo, haca' chu hawa'ni ha b'a win̈ b'et Jerusalén ti'an, hactu' hawa'noj pax ha b'a win̈ b'et Romaan. 12Yet sajb'iloj hunxa tz'ayic, slahti'n̈e sb'a hunk'aan heb'naj israel, xalni heb'naj:—Ẍto camoj naj Pablo ti' ju catto jab'lenoj ita mato hunujxa tzetet. Ta machij sb'a tzet ẍjal ti', ayojab'iloj stz'acti' Comam Dios jib'an̈, ẍi heb'naj. 13Heb'naj xhalni hune' tu' ec'b'al heb'naj 40. 14Lawitu' xto heb'naj yalnoj tet heb'naj swi'al yin̈ heb'naj sacerdote, b'oj heb'naj icham winaj swi'con̈ob' israel, xalni heb'naj: —Xax ja' co tzoti' tet Comam Diosan ta mach ninoj tzet ẍjab'le'an masanto chija' sb'a scam naj Pablo tu' juan. 15Tinan̈ hexti' b'oj heb'ya' swi'con̈ob' lahti'wom, halwejtoj tet naj comandante ta chaltij naj naj Pablo tu' teyet. Halwej ta ayto tzet cheyoche he k'amb'e'loj tet naj. Yaja' majb'ilxa naj ju yul b'eh ti'an yun̈e co potx'noj najan yet maẍto chul naj b'eti'. 16Yaja' c'uxan xab'e hune' naj yunin ix yanab' ya' Pablo tzet xal heb'naj. Yuxin xto naj yul cuartel b'ay majan ya' Pablo, xalni naj tet ya' tzet xal heb'naj tu'. 17Yuxin xawte ya' hune' naj capitán, xalni ya' tet naj: —Yuch'antioẍ chin k'an tawetan, itoj naj tzeh ti' tet naj comandante, haxca ay hune' chejb'anil yilal yalni naj tet naj, 18Lawitu' xinitoj naj capitán naj tzeh tu' tet naj comandante, xalni naj: —Naj Pablo aycoj presu xhalni wetan ta ẍwitij naj ti' tawetan, haxca ay tzet chal naj tawet yalni. 19Yuxin x'oc naj comandante yalan̈ sk'ab' naj tzeh tu' shec'nitoj sb'a naj b'oj naj, xalni naj: —¿Tzet ha chejb'anil wetan? . 20Xalni naj tzeh tu': —Slahti'n̈e sb'a heb'naj swi'con̈ob' ta chawaltij ya' Pablo tet heb'naj yet hecal haxca ayto tzet sk'amb'e' heb'naj tet ya' yalni. 21Yaja' machawa' yuluj ha c'ul yin̈ tzet chal heb'naj. Haxca ec'b'al 40 heb'naj eb'ab'il sb'a yu yechman yec'ojtoj ya'. Tolob' xax yawte heb'naj Comam Dios yin̈, ta mach ninoj tzet chab'le' heb'naj masanto ẍcamoj ya' Pablo tu' yu heb'naj. Tinan̈ majb'il ya' yu heb'naj yun̈e spotx'ni heb'naj ya', toxan̈e chechma heb'naj tzet chawala. 22Lawitu' xalni naj comandante tu' tet naj: —Tinan̈ mach b'ay chawalic'oj tzet xhul hawala' wet ti'an. Schejottoj naj paxoj. 23Lawitu' xawten naj comandante tu' cawan̈ heb'naj capitán, xalni naj tet heb'naj:—Tinan̈ sic'lewejiltoj cab'oj ciento heb'naj soldado ẍto yu yoj, setenta heb'naj ẍto yib'an̈ cheh b'oj cab'ojxa ciento heb'naj chi' slanza, haxca chex to yul con̈ob' Cesarea yet hanic'oj yah ak'b'al. 24Awejcoj stz'um hayc'on̈oj no' cheh b'ay ch'ahojtoj naj Pablo. Haxca yilal cheyitoj naj yin̈ sat naj gobernador Félix. Caw cheya'iln̈e naj taj ay tzet xu naj yul b'eh, ẍi naj comandante tu'. 25Xatoj naj hune' hum tet naj gobernador tu', chalni te': 26—Hayin Claudio Lisias ti'an, ẍwatoj hune' wum tawetan, mamin gobernador Félix, ẍwapaxtoj ha cawilan. 27Ẍwatoj hune' naj chij Pablo tawetan. Heb'naj israel stzab'ni naj, xc'atzla scam naj yu heb'naj, yaja' hayin xin coliloj naj b'oj hej hin soldadoan, haxca xwab'ean to romano naj. 28Xwoche wab'ean tzet yuxin stzab'ot naj yu heb'naj israel tu', yuxin xin chej ilaxojaytij naj yin̈ sat heb'naj swi'con̈ob' lahti'wom xol heb'naj israel tu'an. 29Hactu' xu wab'enan to yu sley heb'naj yuxin stzab'ot naj Pablo ti'. Yaja' mat yetoj ay scam naj yu hune' tu' ni yoc naj presu. 30Yaja' xwab'ean to ay hunk'aan heb'naj israel tu' xax slahti'n̈e sb'a heb'naj yu spotx'ni heb'naj hune' naj ti' yin̈ ewantaj yalni. Yuxin k'a t'in̈an xwatoj naj tawetan. Xax wal tet heb'naj ẍk'anni yin̈ naj ti'an, ta hat ẍto heb'naj tawet b'etu', cat yalni heb'naj tzet ib'il yu sc'ul yin̈ naj. Ha' ti' hin chejb'anil tawetan, mamin gobernador. 31Lawitu' xinitoj heb'naj soldado ya' Pablo yet ak'b'alil yul con̈ob' Antípatris haca' xu ya'lax schejb'anil. 32Haxa hunxa tz'ayic, xmeltzo heb'naj soldado xto yu yoj, xhul heb'naj yul cuartel. Wal heb'naj yib'an̈ cheh ahatoj, x'apni heb'naj b'oj ya' yul con̈ob' Cesarea. 33Ha' x'apni heb'naj, xanic'oj heb'naj ya' Pablo b'oj te' hum tu' tet naj gobernador. 34Lawi yilni naj te' hum tu', sk'amb'en naj tzet con̈ob'al ya' Pablo. Ha' xab'en naj to ah Cilicia ya', 35xalni naj tet ya': —Hulujab' to heb'naj ẍk'anni tawin̈, catto wab'enojan tzet yeyi, hato tu' cha colo' ha b'a, . Lawitu' schejni naj tan̈elaxoj ya' yul palacio watx'eb'il yu naj rey Herodes.


Copyright
Learn More

will be added

X\