HECHOS 22

1—Hex wet con̈ob, yeb hex iswi'ehal yin̈ cocon̈ob ti', abewe nino tzet chiwalan incolbanilojan. 2Hayet yaben anma tato yin̈ yabxubal ebnaj Israel chitzotel naj, isbejni ebnaj yel yaw, matxa hunu mac tzoteli. Yalni naj Pablo tu' haca' ti': 3—Haninti'an Israel inan, quinpitzc'ahan yul con̈ob Tarso ay yul ismajul Cilicia, yaja' quinch'ibcan̈an yul con̈ob Jerusalén ti'. Ha' xin naj Gamaliel quincuynihan haca'tic'a isley ebnaj ichamta jichmam. Yuxin yin̈ sunil wanmahan inyijenan isley Comam Dios haca'tic'a cheyute hex ti' tinan̈. 4Yet yalan̈tocanoj caw ec'ya' yanma anma chihalnic'o hune' ac' cuybanile ti' wuhan. Ay bay inpotx'camojan anma tu', ay bay intzabayojan ebnaj winaj yeb ebix ix winitojan yul te' preso. 5Yaja' naj yahawil ebnaj sacerdote, yeb xin sunil ebnaj iswi'ehal con̈ob yin̈ lahti' xol ebnaj Israel, caw testigo ebnaj yin̈ hune' tu' yuto ha' ebnaj ak'ni huntek'an carta wetan yu winitojan tet ebnaj jet con̈ob ay yul con̈ob Damasco. Intohan bey tu' xin, yun̈e insaynayojan ebnaj xachahnayto Comam Jesucristo yul yanma, winitijan ebnaj bey yul con̈ob Jerusalén ti' yu yak'lax ec'oya' yanma ebnaj. 6Yaja' hayet ayinicojan yin̈ bel xin, yet lan̈anxa wapnihan yul con̈ob Damasco, yin̈mi chuman, yin̈ ha'mataj istit jopla hune' issajilk'inal win̈an yul satcan̈ caw aycano yip. 7Wayc'ayan sat tx'otx'. Lahwi tu' xin wabenan hune' yul nuk'e halni huntek'an tzoti' haca' ti': “Saulo, Saulo, ¿tzet yin̈ yuxin chawak' ec'oya' wanmahan?” ẍi wetan. 8Ink'ambenan haca' ti': “¿Mac hach anmahil Mamin?” quinchiyan. Yalni wetan xin: “Haninti'an Jesús inan ah Nazaret, hune' ayachico hawak'ni ec'oya' yanma ti',” ẍi wetan. 9Huntek'an ebnaj tzujan wintajan caw yil ebnaj hune' issajilk'inal tu', isxiwcan̈ ebnaj, yaj machi yabe ebnaj huntek'an tzoti' hallax wettu'an. 10Lahwi tu' xin ink'ambenan haca' ti': “¿Tzet wal wuten inbahan Mamin?” quinchiyan. Yalni Comam wetan haca' ti': “Ahan̈wanoj, cat xin hato yul con̈ob Damasco, ha' tu' xin chihallaxo tawet tzet wal hawuten haba,” ẍi Comam wetan. 11Yaj caw tan̈ilo inmujlubalan yu yip hune' issajilk'inal tu', yuxin haxa ebnaj wetbihan octo yalan̈ ink'aban, quinyinitojan ebnaj yul con̈ob Damasco. 12Ha' tu' xin ay hune' naj Ananías isbi, caw yijemcano naj yin̈ isley naj Moisés. Caw xin sunil ebnaj ah Israel ay yul con̈ob Damasco, caw c'ul istzotel yin̈ naj. 13Ha' xin naj Ananías tu' apni quinistucle'an. Hayet yoc lin̈no naj inc'atan̈an yalni naj wetan: “Wuẍta Saulo, hajlohojab hasat hunelxa,” ẍi naj wetan. Yin̈n̈ena tu' xin ishajlo insatan, inhacxicojan yin̈ naj. 14Yalni naj wetan: “Ha' isDiosal ebnaj jichmam, macachsaynicoj yun̈e hawohtan̈enilo tzet chiyoche yanma Comam, yeb yu hawilni Isc'ahol Comam Dios caw tohol isnabal, yeb xin hawabenpaxo yul isnuk'. 15Hach xin chawak'aco haba hawalnoc'o Comam tet sunil anma ay yul sat yiban̈k'inal ti', cat xin hawalnopaxo tzettaj hawilah yeb xin tzet hawabepaxoj. 16Wal tinan̈ xin, ¿tzet chawechma? Ahan̈wanoj, ahojab ha' hawi'. Aco hawanma yin̈ Comam Jesucristo haxinwal chitx'ahlaxcanilo sunil hamul,” ẍi naj Ananías tu' wetan, ẍi naj Pablo. 17Yalnipaxo naj Pablo: —Hayet inmeltzotijan yul con̈ob Jerusalén xin, intohan yul yatut Comam Dios txahloj, isyenico isba Comam yin̈ insatan yin̈ sajsatil. 18Wilnihan yin̈ Comam, yalni Comam wetan haca'ti': “Chalahico hawel yul con̈ob Jerusalén ti', yuto mach chiyabeto ebnaj bey ti' tzettaj chawal win̈an,” ẍi Comam. 19Lahwi tu' xin walnihan: “Mamin, caw yohta ebnaj tato caw quinec'an yulaj capilla intzabayojan anma chabil hachxa yu, cat winitojan yul te' preso, inmak'nipaxojan. 20Yeb xin yet isk'ojlax camo naj Esteban hachejab, naj caw cachhalnic'o tet anma; han-hun-inan lin̈anintojan xol ebnaj, walnipaxojan tato chipotx'lax hachejab tu'. Wocpaxojan intan̈enojan xil isk'ap ebnaj k'ojni camo naj Esteban tu',” quinchiyan tet Comam. 21Yaj xin yal Comam wetan haca' ti': “Asi' xin, yuto nahat chaẍwatojan. Hata xol ebnaj mach Israelo chaẍto quinhawalac'ojan,” ẍi Comam wetan, ẍi naj Pablo tu'. 22Ha' yin̈ tu' xin, cachna yaben ebnaj tzet yal naj Pablo, istzabnico ebnaj yalni yin̈ caw ip haca' ti': —¡Camojab naj! ¡Matxa yeto ay ischahni isk'inal naj ti' tinan̈! ẍi ebnaj. 23Yaj caw islahico ebnaj yel yaw, chistzilnilo ebnaj xil isk'ap, chispulnipaxocan̈ ebnaj pojoj cat istiẍnican̈ ebnaj satcan̈ yu ishowal. 24Yuxin yal naj comandante romano tu' tato chi'alaxicto naj yul cuartel, yalnipaxo naj tato chihatelax naj Pablo tu' yun̈e yalnahti naj tzet yin̈ yuxin hac tu' yel yaw anma Israel tu' yin̈ naj. 25Yaja' yet c'albilxayo naj Pablo tu' yun̈e ishatelax naj, yalni naj tet hune' naj capitán ayayo iscawilal tu': —¿Tom caw ay heyip quinhehatenan? Haninti'an romano inan, yebpaxo xin maẍto chek'ambe tzet inmulan, ẍi naj Pablo tet hune' naj capitán tu'. 26Hayet yaben naj capitán hune' tu', isto naj yalno tet naj comandante haca' ti': —Caw nann̈e hawu yin̈ tzet chawatx'e yuto hune' naj ti' caw romano naj, ẍi naj. 27Lahwi tu' xin istit naj comandante isc'atan̈ naj Pablo, isk'amben naj haca' ti': —¿Tom yeli romano hach? ẍi naj. Istak'wi naj Pablo: —Ho', caw romano inan, ẍi naj. 28Yalni naj comandante tu' xin: —Haninti'an, caw hanta melyu inc'aytzehan yet wocan romanohal, ẍi naj. Yalnipaxo naj Pablo tu' tet naj: —Walinan to caw romanotic'a yu inpitzc'atijan, ẍi naj. 29Yu hune' tu' xin isheq'uilo isba ebnaj soldado etza mak'ni naj Pablo tu'. Hacpax tu' xin naj comandante, yet yaben naj tato caw romano naj Pablo, isxiwcan̈ naj yuto ha' naj chejni alaxoco ch'en cadena yin̈ naj Pablo tu'. 30Haxa yet hune'xa tz'ayic xin, yoche naj comandante tu' yabe tzet caw ismul naj Pablo tet ebnaj Israel, yuxin yilo naj ch'en cadena yin̈ naj Pablo tu', yawten naj ebnaj yahawil ebnaj sacerdote yeb ebnaj iswi'ehal yin̈ lahti' xol ebnaj Israel tu'. Lahwi tu' xin yilaxilti naj Pablo yu naj, yalaxico naj sata ebnaj yu naj comandante tu'.

will be added

X\