HECHOS 22

1—Hex wetcon̈ob', hex icham winaj swi'con̈ob', ab'ewej tzet ẍwal hin colb'aniloj ti'an, 2Ha' xab'en anma to yul yab'xub'al x'oc ya' tzoteloj, k'a' ẍto xpax tz'inna sunil. Xalni ya': 3—Hayin ti'an israelin haca' hex ti'an. Hat xquin pitzc'a yul con̈ob' Tarso yet Ciliciaan. Yaja' hat xquin ch'ib' yul con̈ob' Jerusalén ti'an. Yin̈ ya' Gamaliel xquin cuywian, ha' ya' xquin cuyni yin̈ sley heb'ya' jichmaman. Yuxin caw sunil hin c'ulan chin yijyen sley Comam Dios haca' lan̈an heyuni ti'. 4Yet yalan̈to tu' caw x'ec' ya' yanma hej mac i'n̈e hune' cuywab'al ti' wuan. Tx'ihal heb'ya' xwitoj yul presuan, wal winaj wal ix. Hasta ay mac xcam yu hin mulan. 5Ya' swi'al yin̈ heb'ya' sacerdote b'oj heb'ya' swi'con̈ob' lahti'wom, ha' heb'ya' ohtajn̈e hune' ẍwal ti'an. Haxca hayin xin k'an te' hum tet heb'ya'an xwinitoj te' tet heb'naj jetcon̈ob' ay Damascoan. Lawitu' xquin to b'etu' yun̈e hin tzab'ni mactaj i'n̈e hune' cuywab'al ti', ẍwinitij presu yul con̈ob' Jerusalén ti' walnian, yu ya'lax ec'oj ya' yanma. 6Yet toxa chin apnoj yul con̈ob' Damasco tu'an yin̈ mi chuman, x'ay jepna hune' sajilk'inal wib'an̈an, caw ay yip xu yayiloj yul satcan̈. 7Xquin ec' pac'naan xquin ay sat tx'otx'an. Lawitu' xwab'en hune' tzoti' xhalni wetan: Saulo, Saulo, ¿tzet yuxin chawa' ec'oj ya' wanmaan? ẍi. 8¿Macach Mamin? quin chian. Hayin ti' Jesús ah Nazaret chawa' ec'oj ya' wanmaan, ẍi wetan. 9Mactaj tzujan win̈an xil hune' sajilk'inal tu', yaja' mach xtxum tzoti' xhalot wetan. 10Lawitu' xwalnian: ¿Tzet chawoche ta ẍwuan Mam? quin chian. Ahan̈lin̈noj cat hawoc yul con̈ob' Damasco, hat ẍhal-laxoj tawet b'aytet nab'ilxatic'a yu Comam Dios ta yilal chawu', ẍi Comam wetan. 11Haxca matxa chu wilni yu yip hune' sajilk'inal tu'an, yuxin heb'naj tzujan win̈ x'oc yin̈ hin k'ab'an, xquin yinictoj yul con̈ob' Damascoan. 12Yul con̈ob' Damasco tu' ay hune' ya' Ananías sb'ih, aycoj yanma yin̈ Comam Dios, caw yijyom yin̈ sley ya' Moisés. Caw c'ul ya' yul sat sunil jetcon̈ob' israel ay Damasco. 13Ha' xhul ya', x'oc lin̈noj ya' tin c'atan̈an xalni ya': Wuẍtaj Saulo, cha ha mujlub'al, ẍi ya' wetan. Lemb'iln̈e xwatx'inaloj sb'ak' in satan, xwilni ya' Ananíasan. 14Xalni ya' wetan: Ha sDiosal heb'ya' jichmam, co Dios paxoj, ha' Comam xcach sic'leni yun̈e hawohtajn̈eni tzet choche Comam ta chawu. Choche pax Comam ta chawil Mac Tohol Yanma, chawab'en tzet chala, ha' caw stzoteloj tawet. 15Hach chawa'a' ha b'a yin̈ Comam yin̈ sat sunil anma yin̈ tzet xawila b'oj tzet xawab'e. 16¿Tzet chawechma tinan̈? Ahan̈lin̈noj, i'canoj ha'. Awte Comam Jesucristo tawin̈, haxin̈wal ẍtan̈cantoj sunil ha mul ta wib'an̈, ẍi ya' Ananías tu' wetan. 17- 18Yet xquin hul yul con̈ob' Jerusalén ti'an, xquin b'ey wa'a woración yamak' yatut Comam Diosan. Yet lan̈an wa'ni woración tu'an, syeni sb'a Comam Jahaw wet haca' yul wayiquean. Lawitu' xalni Comam wetan: Elan̈ yul con̈ob' ti' yin̈ lemb'il, haxca mach chab'e'toj heb'naj tzet chawala' win̈an, ẍi Comam. 19Xwalnian: Mam Wahaw yohtajxa heb'naj to xquin ec' yul hunun capiya hin tzab'a'toj mactaj cha' yuluj sc'ul tawin̈ yu wanictoj yul presuan, hasta ay mac xin mak'an. 20Yet xc'ojotcamoj ya' Esteban, ya' ch'a'ni sb'a tawin̈, hayin hunan, hayin xin tan̈e xil sk'ap heb'naj sc'ojnicamoj ya'an, quin chi tet Comaman. 21Xalnipax Comam wetan: C'uycan̈ ha b'a tinan̈, haxca nahat chach wa'a'toj xol heb'naj mat israelojan, ẍi Comam, 22Han̈c'a tu' xtecha yab'en heb'naj yalni ya' Pablo, x'ah yaw heb'naj, xalni heb'naj: —Mak'b'il scam hune' naj ti'. ¡Tzetto ch'oc ayc'oj naj! . 23Xcam ah yaw heb'naj, toxan̈e stzicob'tajn̈e heb'naj xil sk'ap, spulnican̈ heb'naj pojoj satcan̈ yu showal. 24Ha' xilni naj comandante to caw x'ah b'oc'na anma, schejni naj ilaxojictoj ya' Pablo yul cuartel. Schejni naj hatelaxoj ya', yun̈e yalniloj ya' tzet yuxin ch'ah yaw heb'naj israel yin̈ ya'. 25Yet c'alb'ilxa ya' yu shatelaxoj, xalni ya': —¿Tom ay sleyal ta ton̈c'a chin mak'laxan? Haxca hayin ti'an romano hinan, b'oj maẍto ẍk'amb'elaxi tzet hin mulan, ẍi ya' tet naj capitán. 26Ha' xab'en naj hune' tu', xto naj yalnoj tet naj comandante: —Nann̈e hawu yin̈ hune' chawu ti', haxca ta'an romano hune' naj ti'. 27Lemb'il xto naj comandante tu' sk'amb'e' tet ya': —¿Tom caw yeli romano hach? —Ho', romano hinan, 28—Haquinan, romano hinan, yaja' tx'ihal melyu xin c'ay wocb'alan, —Walinan, yettax xquin pitzc'aan romano hinan, ẍiya' Pablo. 29Yin̈n̈ena tu' sb'ejtzolaxiloj ya' matxa xhateot ya' yu heb'naj soldado. Hasta naj comandante tu' xiwcan̈ naj yet xab'en naj to romano ya' Pablo, haxca ha' naj schejni ocoj ch'en cadena yin̈ ya'. 30Haxa hunxa tz'ayic xoche naj comandante yab'e'loj tzet smul ya' Pablo tet heb'naj israel. Yuxin xhajotiltij ya', xawten naj heb'naj swi'al yin̈ heb'naj sacerdote b'oj sunil heb'naj swi'con̈ob' lahti'wom. Lawitu' x'ilaxaytij ya' yul cuartel x'alaxcoj ya' yin̈ sat heb'naj.


Copyright
Learn More

will be added

X\