HECHOS 21

1Hayet janicanojan̈ ebnaj juẍta tu' xin, jocan̈ yul hune' te' barco, wiyom cotohan̈ bey yul ismajul hune' isla, Cos isbi. Haxa yet hunxa tz'ayic xin japnihan̈ bey yul ismajul Rodas. Lahwi tu' xin japnipaxojan̈ bey con̈ob Pátara. 2Ha' bey Pátara tu' xin chaloyo hune' barco juhan̈ chito bey yul ismajul Fenicia, hac tu' xin yu jocan̈ yul te' cotohan̈ xin. 3Hayet ayon̈icojan̈ yul te' barco tu', jilnihan̈ iscancano tx'otx' Chipre ayayo xol ha' mar yin̈ comecan̈. Wal te' barco tu' xin, ec' te' bey ismajul Siria yak'a'cano huntek'an ijatz bey yul hune' con̈ob chiyij Tiro, yuxin ha' tu' con̈canan̈. 4Ha' bey tu' xin jilayo cobahan̈ yeb huntek'an ebnaj juẍtaj. Caw xin hujeb tz'ayic con̈ec'an̈ isc'atan̈ ebnaj. Yalni ebnaj tet naj Pablo ta mach chito naj bey Jerusalén, yuto hac tu' yu yalni Comam Espíritu Santo tet ebnaj. 5Yaja' yet yec'to hujeb tz'ayic tu' xin, jelan̈ bey tu'. Sunil ebnaj juẍtaj yeb yixal yeb yuninal hul con̈anocanojan̈ istxam con̈ob bey isti' ha' mar, ha' tu' xin con̈ay jahnojan̈ cotxahlihan̈ tet Comam Dios. 6Colak'lenayo cobahan̈ cotak'licanojan̈ jetan̈ hununon̈an̈, lahwi tu' xin jahcantojan̈ yul te' barco, ispaxcanto ebnaj juẍta tu' yatut. 7Jelan̈ yul con̈ob Tiro, japnihan̈ yul con̈ob Tolemaida. Ha' bey tu' xin con̈elcanojan̈ yul te' barco, cok'ambehan̈ hanic' ye ebnaj juẍta sunil. Cocancanojan̈ isc'atan̈ ebnaj hune' tz'ayic. 8Haxa yet hunxa tz'ayic xin jelan̈ yeb naj Pablo bey tu', japnihan̈ yul con̈ob Cesarea, cotohan̈ yatut naj Felipe, naj chihalnic'o Istzoti' Comam Jesucristo, naj oclena diáconohal xol ebnaj hujwan̈ yul con̈ob Jerusalén, ha' bey tu' xin con̈cancanojan̈ isc'atan̈ naj. 9Wal naj Felipe tu' xin, ay can̈wan̈ iscutz'in naj maẍto yichamil, ha' ebix ti' xin chihalni cuybanile chischah tet Comam Dios. 10Hayet ayxana japnihan̈ bey tu', yapni hune' naj chiyij Agabo coc'atan̈an̈, tit naj yul ismajul Judea. Naj ti', chiyalpaxo naj tzoti' chischah tet Comam Dios. 11Hayet yapni naj con̈istucle'an̈ tu', yinilo naj istx'ambal naj Pablo yin̈ yictaj, isc'alnayo naj yoj yeb isk'ab yu hune' tx'ambale tu', yalni naj haca' ti': —Comam Espíritu Santo chihalni tato yul con̈ob Jerusalén, hac ti' chiyub isc'allaxayo naj yahaw hune' tx'ambale ti' yu ebnaj Israel, cat yalaxico naj yul isk'ab ebnaj mach Israeloj, ẍi Comam wetan, ẍi naj. 12Hayet jabenan̈ yeb ebnaj ay bey Cesarea yin̈ tzet yal naj tu', jocan̈ jalnojan̈ tet naj Pablo tato mach chito naj bey Jerusalén. 13Yaj xin tak'wi naj Pablo: —¿Tzet yin̈ yuxin chexok'i, cat heyanico bisc'ulal yin̈ wanmahan? Wal inti'an caw hinaninan, waxan̈ca chinisc'albahan ebnaj, walca xin chinmak'laxpaxo camojan yul con̈ob Jerusalén, yaj yu walnic'ojan Istzoti' Comam Jesucristo Jahawil, ẍi naj Pablo jetan̈. 14Yaj yu mach chi'ay isc'ul naj juhan̈, yuxin jalan̈ tet naj haca' ti': —Yubojab haca' tzet choche isc'ul Comam Dios tawin̈, con̈chihan̈. 15Lahwi yec'ayo hayeb tz'ayic cowatx'enayo jetan̈, cotohan̈ yul con̈ob Jerusalén. 16Ay xin huntek'an ebnaj juẍta ay bey con̈ob Cesarea topaxo jintajan̈. Japnihan̈ bey yatut naj Mnasón, hune' naj ti' ah Chipre naj. Payxa xin oc naj yul isk'ab Comam. Ha' isc'atan̈ naj tu' xin con̈cancanojan̈ wayoj. 17Hayet japnihan̈ yul con̈ob Jerusalén, caw tzalahilal yu con̈ischahnihan̈ ebnaj juẍtaj yin̈ Comam. 18Haxa hunxa tz'ayic xin cotohan̈ yeb naj Pablo, cotuclenojan̈ naj Jacobo. Caw xin cutxanico ebnaj juẍta anciano yet japnihan̈ bey tu'. 19Isk'amben naj Pablo tu' hanic' ye isc'ul ebnaj. Lahwi tu' xin yoc naj yalno yin̈ hununtajil yin̈ tzettaj isc'ulal iswatx'e Comam Dios xol ebnaj mach Israeloj yu ismunil naj Pablo tu'. 20Hayet yaben ebnaj tu' xin, yak'ni tzalaho yanma yin̈ Comam Dios. Lahwi tu' xin yalni ebnaj tet naj Pablo haca' ti': —Caw c'ul wuẍtaj, yaja' hawohtaj tato caw yin̈xa ismilal ebnaj jet Israel ti' xayaco isba yul isk'ab Comam Jesucristo, yaja' sunil ebnaj chihalni ta caw yilal coyijen isley naj Moisés. 21Yabe ebnaj isk'umal tato yet chaẍec' hacuyno anma Israel pujanto xol anma mach Israeloj, tolab chawala tato matxa yechtoho chisyije ebnaj tzet chal isley naj Moisés, yeb xin ta matxa yilalo ch'ak'lax circuncidar niẍte isc'ahol ebnaj, mach yilalopaxo isyijelax cobeybal, han̈on̈ Israel hon̈ ti', hawalni. 22¿Tzet xin wal juten hune' ti'? Wal tinan̈ caw chiabelaxiloj tato ayachxac'o bey ti'. 23Tinan̈ xin yije huntek'an chijalti'an̈, coxol ti' ayxac'o can̈wan̈ ebnaj caw yilal isyijen hune' tzet halbilxa yu. 24Ito ebnaj tawintaj, cat heto hesajn̈eno heba haca' yalni isley naj Moisés, cat xin hatohlan sunil tzet chocnico yu ebnaj, lahwi tu' xin, cat yak'ni elo ebnaj xil iswi'. Hac tu' xin chu istxumnilo sunil anma tato lek'ti'al sunil chihallax tawin̈ tu', walxinto chayepaxo yila' anma tato chayije isley naj Moisés. 25Wal ebnaj mach Israeloj, ebnaj xachahni Comam yul yanma, xajaltojan̈ yin̈ hune' te' carta tet ebnaj ta mach yechto chisyije ebnaj hune' ti', cachann̈e huntek'an cuybanile chihalni haca'ti'. Mach chisc'ux ebnaj chibe haltebilxa yin̈ xahanbalil tet tioẍ, yeb xin mach chislo ebnaj no' chic', yebpaxo mach chub isc'uxu' ebnaj ischibehal no nok' chishojtx'an̈e isba, maca ton̈e chiwok'laxilo isnuk'. Mach chiixli ebnaj winaj, mach chiwinajlipaxo ebix ix. Hac tu' jute jalnitojan̈ yin̈ cocartatu'an̈. 26Hac tu' xin yu yilaxto ebnaj can̈wan̈ tu' yu naj Pablo. Haxa yet hunxa tz'ayic xin, issajn̈en isba naj yeb ebnaj, haca' yalni isley naj Moisés. Lahwi tu' xin, yocto naj yul yatut Comam Dios yu yalni naj bak'in chilahwi isyijen ebnaj hune' haltebilcano yu tet Comam Dios, yeb xin tzet tz'ayical chiyak' hunun ebnaj isxahanbal tet Comam. 27Yaja' yet lan̈anxa islahwi hujeb tz'ayic xin, ay huntek'an ebnaj Israel ay yul ismajul Asia, ilni naj Pablo yul yatut Comam tu', yoc ebnaj ak'oc'ule tet sunil anma, hac tu' xin yu yah wejla anma yin̈ naj Pablo, isto lemna ebnaj istzabnoyo naj. 28Yah yaw ebnaj yin̈ caw ip haca' ti': —¡Hex wet con̈ob Israel, colwahan̈we jin̈an̈! Ha' hune' naj ti' ch'ec' cuywal yin̈ anma yulajla con̈ob. Chalni naj ta matzet ch'ocnico cocon̈ob Israel ti', yeb xin chal naj ta matzet ch'ocnico isley naj Moisés, yeb xin caw tx'oj istzotelpaxo naj yin̈ yatut Comam Dios ti'. Wal tinan̈ xin, mayicto naj huntek'an ebnaj griego yul yatut Comam ti', yuxin lan̈an yetaxto yatut Comam caw sajcano ti', ẍi ebnaj. 29Hac tu' yute yalni ebnaj yuto yil ebnaj yec' naj Pablo yet yalan̈tocano yeb naj Trófimo yul con̈ob Jerusalén; naj ti' ah con̈ob Efeso naj. Ha' yute isnani ebnaj to yicto naj Pablo hune' naj mach Israelo yul yatut Comam Dios, yaj machoj. 30Caw sunil anma ay yul con̈ob tu' ah wejnahi. Istit ebnaj yin̈ an̈e, istzabnoyo ebnaj naj Pablo tu', ishatxnilti ebnaj naj yul yatut Comam Dios. Caw yin̈ an̈e xin pebalaxcano ispultahil yatut Comam tu'. 31Caw lan̈anxa iscam naj yu ebnaj, yet yapni hune' tzoti' tet naj comandante, yahawil yeco yin̈ ebnaj soldado ah Roma tato caw sunil anma ay yul con̈ob Jerusalén ah wejnahi. 32Hac tu' xin yu iscutxbanico naj comandante tu' ebnaj soldado yeb huntek'an ebnaj oficiales, isto ebnaj yin̈ an̈e yilno bay chiwejcha anma tu'. Hayet yilni anma naj comandante yeb issoldado, isbejni ebnaj ismak'ni naj Pablo tu'. 33Ishitzico naj comandante isc'atan̈ naj Pablo, istzabnayo naj naj Pablo tu'. Yalni naj tato chic'allaxayo naj yu cabeb ch'en cadena. Lahwi tu' xin yoc naj comandante isk'amben tet anma: —¿Mac najil hune' ti'? ¿Tzet masmuln̈e naj? ẍi naj tet anma tu'. 34Wal anma tu' xin, nanantaxan̈e chiyala. Matxatic'a chiyu yaben naj comandante tzet chiyal anma tu' isyayil toxan̈e chiwejchahi. Lahwi tu', yalni naj tet ebnaj soldado ta chi'ilaxto naj Pablo yul cuartel. 35Hayet yapni ebnaj yeb naj Pablo tu' yin̈ isk'ochal cuartel, isbatxnahto ebnaj soldado naj Pablo, yuto caw aytoco ishowal anma yin̈ naj. 36Sunil anma tzujan yinta ebnaj, toxan̈e chiwejchahi, chiyalnipaxo anma yin̈ caw ip haca' ti': —Mak'bil iscam naj tinan̈, ẍixan̈e anma tu'. 37Yet lan̈anxa yanicto ebnaj naj Pablo tu' yul cuartel, yalni naj tet naj comandante, yahawil ebnaj soldado tu': —¿Chimyu intzotelninojan tawet? ẍi naj. Yalni naj comandante tu': —¿Chimyu hawalni abxubal griego? ẍi naj. 38Yalnipaxo naj: —¿Machmi taj ach ti' naj ay bey Egipto, naj anico howal yin̈ naj jahaw yet tolto ti', naj cutxbanayo can̈eb mil ebnaj potx'om anma yinito naj ebnaj bey tx'otx' desierto? ẍi naj. 39Istak'wican̈ naj Pablo tu': —Haninti'an Israel inan. Yul con̈ob Tarso quinpitzc'ahan, hune' con̈ob caw niman yelapno yul ismajul Cilicia. Wal tinan̈ xin ta chaje chintzotelninojan tet anma ti', ẍi naj tet naj comandante tu'. 40Yalni naj comandante haca' ti': —C'ultic'a, chisje hatzoteli, ẍi naj. Yah lin̈no naj yiban̈ isk'ochal cuartel tu', isyenican̈ naj isk'ab yun̈e matxa chitzotel anma. Haxa yet matxa hunu mac chitzoteli yoc naj tzotelo yul abxubal hebreo, yalni naj haca' ti':

will be added

X\