HECHOS 20

1Lahwi islin̈i hune' howal tu', yawten naj Pablo ebnaj ayxaco yul isk'ab Comam yu yiptzencano naj ebnaj. Istak'licano naj tet ebnaj, islak'lenpaxo isba ebnaj, isto naj Pablo tu' yul ismajul Macedonia. 2Caw sunil yulajla huntek'an con̈ob tu' ec' naj, yak'aco yip yanma ebnaj ayxaco yul isk'ab Comam yu tzoti' chal naj. Lahwi tu' xin, yapni naj yul ismajul Grecia. 3Ha' bey tu' ec' naj oxeb ixahaw. Lan̈anxa xin yoc naj yul hune' te' barco chito bey ismajul Siria, yet yabenilo naj tato tx'oj chisna ebnaj Israel yin̈ naj. Yu hune' tu', oc yin̈ isnabal naj ismeltzohi, yec'paxo naj yul ismajul Macedonia hunelxa. 4Ay xin huntek'an ebnaj juẍta to yinta naj Pablo; ha' ton naj Sópater ah Berea, yeb naj Aristarco, yeb naj Segundo ah Tesalónica, yeb naj Gayo ah Derbe, yeb naj Timoteo, yebpaxo cawan̈ ebnaj ay bey Asia, naj Tíquico yeb naj Trófimo. 5Ha' ton ebnaj juẍta ti' babito cosatajan̈, con̈yechmanan̈ ebnaj bey yul con̈ob Troas. 6Walon̈an̈ xin, yet islahwicano k'in̈ yet chiwahlax ixim pan machi yan̈al, jocan̈ yul hune' te' barco yul con̈ob Filipos, yin̈xa ishoweb tz'ayic japnihan̈ isc'atan̈ ebnaj yul con̈ob Troas, cocancanojan̈ hujeb tz'ayic bey tu'. 7Hayet babel tz'ayic yin̈ semana, cocutxban cobahan̈ yeb ebnaj ayxaco yul isk'ab Comam cowahnihan̈ ixim pan yu conanitijan̈ iscamical Comam Jesucristo. Yoc naj Pablo iscuywa yin̈ Istzoti' Comam Dios; yaj yu caw yilal isto naj yin̈ isbel yin̈ hunxa tz'ayic, yuxin caw nimajal yute naj yoj cuybanile tu', yapnicano yin̈ chuman ak'bal. 8Cutxanon̈icojan̈ yul hune' cuarto nahat yecan̈ bay caw tzetc'a ch'en lampara caj k'a' yin̈. 9Ay xin hune' naj tzeh, Eutico isbi, tz'on̈an yul wentana; yaj yu caw nimajal yute naj Pablo yoj cuybanile, yuxin tit iswayan̈ naj. Haxa yet caw chiway naj tu' xin, istitc'ay naj yin̈ yox piso tu'. Camomxa naj xin yet yilaxcan̈ naj. 10Yuxin ayti naj Pablo tu' yay pajno naj yiban̈ naj tzeh tu', yoc lak'no naj yin̈ naj, yalni naj tet ebnaj juẍta tu' haca' ti': —Mach chexxiwi, itzitz naj, ẍi naj. 11Lahwi tu' xin yahpaxto naj Pablo yul cuarto hunelxa. Isk'axponayo naj ixim pan yu conanitijan̈ iscamical Comam, cowahnihan̈ ixim cosunilan̈. Istzabnipaxico naj Pablo yalni cuybanile tu' hunelxa masanto yet issajbiloj. Lahwi tu' xin, isto naj. 12Wal naj tzeh titc'ay tu' xin; hulcan̈ isc'ul naj, yilaxto naj yatut. Caw occano tzalahilal yin̈ ebnaj juẍtaj tu'. 13Walon̈an̈ con̈babitojan̈, jocan̈ yul hune' te' barco ch'apni bey con̈ob Asón, ha' tu' xin jechmahan̈ naj Pablo yuto hactic'a tu' jute jalnihan̈, wal naj Pablo tu' belwito naj yu yoj. 14Hayet yapni naj Pablo bey Asón, yoc naj yul barco jintajan̈ cotohan̈ yul con̈ob Mitilene. 15Lahwi tu' xin jelpaxojan̈ bey tu', yin̈ hune' tz'ayic tu' xin con̈ec'an̈ iscawil con̈ob Quío. Haxa yet hunxa tz'ayic japnihan̈ bey con̈ob Samos, haxapaxo yin̈ hunxa tz'ayic xin, japnicanojan̈ bey con̈ob Mileto. 16Yaja' yal naj Pablo ta beh jec'an̈ bey Efeso yun̈e mach caw ch'ec' tiempo jiban̈an̈ yul ismajul Asia tu', haxinwal ha' bey con̈ob Jerusalén ayon̈an̈ yet ch'ayilo k'in̈ Pentecostés, tato caw chiyuhi. 17Hayet ayon̈an̈ yul con̈ob Mileto tu', yanito naj Pablo yawtemal ebnaj anciano xol ebnaj juẍta ay yul con̈ob Efeso. 18Hayet yapni ebnaj xin, yalni naj tet ebnaj: —Hex ti' caw heyohta tzet yu wec'an texol, yeb tzet yu inmunlahan yettaxtic'a wulic'ojan bey Asia ti'. 19Sunilbal tiempo yet wec'an texol, caw chewchotan̈e wute inbahan yin̈ ismunil Comam Dios. Caw quinok'an yu isya'tajil hul wiban̈an, yu tzet iswatx'e ebnaj Israel win̈an. 20Yaj maẍtic'a inbejan walnic'ojan cuybanile caw colwa teyin̈, incuywapaxojan xol anma, yeb xin yulajla heyatut. 21Waxan̈ca Israel maca mach Israeloj, lahan yu intzotelan tet. Walnihan tato yilal isbejnicano istx'ojal chiswatx'e, cat yanico isba yul isk'ab Comam Jesucristo Jahawil. 22Wal tinan̈ xin, chintohan bey con̈ob Jerusalén yuto hac tu' yalni Comam Espíritu Santo wetan; yaj caw mach wohtajojan tzet chihul wiban̈an bey tu'. 23Caw cachann̈e wohtajan tato hayet chinapnihan yul hunun con̈ob, chiyalni Comam Espíritu Santo wetan tato chihul isya'tajil wiban̈an, cat walaxictojan yul preso. 24Yaja' machi hunu ti' caw chi'ak'ni cabconocan̈ wanmahan; waxan̈ca chincaman caw matzet chal inc'ulan. Tan̈e c'uxan ay inicojan yin̈ tzalahilal yet chilahwicano inmunilti'an, hune' ak'bil wetan yu Comam Jesucristo Jahawil, hune' inmunilan walnicojan Tzoti' c'ul yet colbanile yu isc'ulch'anil isc'ul Comam. 25Caw quinec'an wala'cojan texol yin̈ tzet chu heyoc yul isk'ab Comam Dios. Tinan̈ xin, wohtajan tato matxa bak'inal chinheyilan hunelxa. 26Yuxin chiwalan teyet tato maẍtajinan ay inmulan ta ay hunujex cheyetato heba. 27Caw sunil wanmahan walicojan Istzoti' Comam Dios teyet. Machi xin hunu tzet ye tu' webahan yin̈ hesat. 28Wal xin caw cheyil heba, cat xin heya'iln̈en ebnaj ayxaco yul isk'ab Comam Dios, yuto ha' teyet yak' Comam Espíritu Santo hune' munil yin̈ heya'iln̈en ebnaj juẍtaj yeb ebix janab ayxaco yul isk'ab Comam, huntek'an mac islok' Comam Jesucristo yu ischiq'uil yet iscami. 29Wal xin caw wohtajan tato hayet chintocanoti'an chihul huntek'anxa ebnaj chi'anico pohlebahil texol, haca' chiyute no' oj yet ch'octo no' yulaj ispeyabil no' me' cat ispujnacanto no'. 30Texoltic'a ti' xin chi'aho huntek'anxa ebnaj, chihalnic'o lekti'al yun̈e yoc tzujnu mac chabilxa Comam yul yanma yinta ebnaj yalni. 31Caw cheyil heba xin; nawetij tato yin̈ oxeb habil, hunun tz'ayic yeb hunun ak'bal, caw quexwiptzenan hununex, ay tiempo caw quinok'an yet walnihan teyet. 32Wal tinan̈ xin hex wuẍtaj, caw chexwaben̈ecantojan yul isk'ab Comam Dios, yeb xin yin̈ isc'ulch'anil Istzoti' Comam, yuto ay yip Comam quexyak'ni ch'ibo yin̈ Istzoti', cat yak'nipaxo Comam hune' tzet halbilcano tet sunil mac sic'bilxalo yu Comam. 33Wal inti'an, maẍtic'a wochehan wik'alojan hunu tzet ye tu' teyet, machi melyu, machipaxo xilk'ape ink'anan tet hunu maca. 34Wal xin, caw heyohtaj tato caw quinmunlahan yun̈e wik'nihan tzet ch'ocnico wuhan yeb xin yin̈ tzet ch'ocnico yu ebnaj tzujan wintajan. 35Yebilxa wuhan teyet ta hac tu' chu comunlahi, cat cocolwa yin̈ anma matzet aya. Caw xin yilal conaniti tzet yalcano Comam Jesús, yet yalni Comam haca' ti': “Ec'na caw c'ul yet anma chi'ak'ni sata anma chichahni,” ẍi Comam, ẍi naj Pablo. 36Yet yalnicano naj Pablo hune' tu', yay jahno naj yeb ebnaj anciano tu', istxahli ebnaj tet Comam. 37Sunil ebnaj juẍta tu' ok'i, islak'lencano isba ebnaj yeb naj Pablo tu', istz'ohnipaxo ebnaj isk'otx naj. 38Caw occano bisc'ulal yin̈ yanma ebnaj yuto yal naj Pablo tato matxa bak'in chiyil ebnaj yin̈ naj hunelxa. Lahwi tu' xin, isto ebnaj yak'nocano naj Pablo bay ch'oc naj yul te' barco.

will be added

X\