HECHOS 20

1Lawi stan̈canoj hune' b'oc'chalal tu', syamb'ancoj ya' Pablo heb'ya' xax ya' yuluj sc'ul yin̈ Comam yun̈e cam ya'ni ya' scawxob'al sc'ul heb'ya'. Lawitu' xtak'lican ya' tet heb'ya', xto ya' b'et Macedonia. 2Yet x'apni ya' b'etu', txol cha' ya' yin̈ hunun con̈ob', ch'ec' ya' yilnoj heb'ya' xax ya' yuluj sc'ul yin̈ Comam, cha'ni ya' yip heb'ya'. Lawitu' xtit ya' Grecia. 3Oxeb' x'ahaw yul ya' Grecia, ẍto ya' b'et Siria yalni, yaja' xhalot tet ya' ta k'umlab'ilxa sb'a heb'naj israel yu spotx'noj ya' yet toxa ẍto ya' yul barco. Yuxin ha' xab'en ya', xto ya' shoynoj Macedonia. 4Xto ya' Sópater sc'ahol ya' Pirro ah Berea yin̈ ya', ya' Aristarco, ya' Segundo ah Tesalónica, ya' Gayo ah Derbe, b'oj ya' Timoteo. Ay pax cawan̈ heb'ya' ah Asia xto yin̈ ya', ya' Tíquico b'oj ya' Trófimo. 5Heb'ya' tu' xb'ab'itoj heb'ya', hat xcon̈ yechma heb'ya' Troasan. 6Walon̈an xto ec'canoj k'in̈ b'ay ẍwalax ixim pan mach yan̈al, xcon̈ oc yul barco b'et Filiposan. Howeb' tz'ayic ayon̈coj yib'an̈ ha' maran. Lawitu' xcon̈ apni yul con̈ob' Troas tu'an, hat to xjilay co b'a b'oj heb'ya' xb'ab'itij co sataj tu'an. Hune' semana xcon̈ can b'etu'an. 7Yet domingo, xco yamb'a co b'a b'oj heb'ya' xax ya' yuluj sc'ul yin̈ Comaman yu co wani ixim pan ẍnanitij scamical Comam Jesucristo. Xalni ya' Pablo stzoti' Comam Dios tet heb'ya'. Haxca stojxacan ya' hunxa tz'ayic, snimejaln̈en ya' yoj stzoti', masanto x'apni yin̈ chuman ak'b'al. 8Hat yamanon̈ yul hune' cuarto aycoj yin̈ syox pisoan, caw tx'ihal candil tzujb'ab'il. 9Xol heb'ya' yaman tu', aycoj hune' naj tzeh, Éutico sb'ih, tz'on̈anatoj naj yul wentaná, yaja' xwayc'oj naj haxca caw nimejal xute ya' Pablo yoj stzoti'. Caw ib'il naj yu wayan̈, xtitc'ay naj. Yet xb'ey ilaxojcan̈ naj, xax camnaloj naj. 10X'aynatij ya' Pablo, x'oc ya' yib'an̈ naj, x'oc lak'noj ya' yin̈ naj, xalni ya': —Mach ẍtac he c'ul, xax hul pax sc'ul naj, 11Lawitu' x'ahpaxtoj ya' yul cuarto tu'. Xk'axpon ya' ixim pan snab'aniltij scamical Comam, xco wani iximan. Tx'ihalto tzet xal ya' masanto sajb'iloj. Lawitu' xcon̈ toan. 12Wal naj tzeh xtitc'ay tu', xwatx'iloj sc'ul naj, x'ilaxtoj naj yatut. Yuxin caw stzala heb'ya'. 13Hayon̈ ti' xcon̈ b'ab'itijan, xcon̈ octoj yul hune' te' barcoan, xcon̈ hul yul con̈ob' Asón, b'ay xjechma yul ya' Pabloan, hactu' yecan̈oj ju' b'oj ya'an, haxca yoj ya' xtita. 14Yet xhul ya' yul con̈ob' Asón tu, x'octoj ya' co c'atan̈ yul te' barcoan xcon̈ hul yul con̈ob' Mitilenean. 15Xcon̈ oc yin̈ b'elan. Yet hunxa tz'ayic xcon̈ ec' scawilal con̈ob' Quíoan. Haxa hunxa tz'ayic xcon̈ hul yul con̈ob' Samosan. Yet hunxa tz'ayic xcon̈ titan, xcon̈ hul yul con̈ob' Miletoan. 16Yaja' xal ya' Pablo ta b'eh jec'toj Éfesoan, yun̈e mach ch'ec' co k'inal b'et Asia tu'an, haxin̈wal c'uxanto ẍjil k'in̈ Pentecostés Jerusalénan. 17Yet ayon̈to b'et Mileto tu'an, xa'nitij ya' Pablo heb'ya' yancianoal iglesia ay b'et Éfeso. 18Yet xhul heb'ya', xalni ya': —Hexti' heyohtaj tzet xwute hin b'aan yet xquin ec' te xolan, b'oj tzet xu hin munlaan yichotax wul b'et Asia ti'an. 19Huncuentan̈e xwute hin c'ulan xin yijyen smunil Comam Jahaw yulb'al ayin b'eti'an. Ay b'ay xquin ok' yu hej sya'tajil xwilan, haxca tx'ihal el xc'atzla way yul sk'ab' heb'naj wetcon̈ob' israelan. 20Yaja' heyohtaj to maẍtic'a xin b'ejcan walni stzoti' Comam Dios sc'ulaloj heyetan, xol anma b'oj yulaj n̈ah. 21Wal israel maca mat israeloj, lahan xu walnian ta yilal stac sc'ul anma yin̈ tzetet tx'oj chu, cat smeltzocoj yin̈ Comam Dios, cat ya'ni yuluj sc'ul yin̈ Jahaw Jesucristo. 22Tinan̈ chin to Jerusalén yu hin yijyen tzet chal Comam Espíritu Santoan, mat wohtajojan tzet ẍtij wib'an̈ b'etu'an. 23Han̈c'a ti' wohtajan to yul hunun con̈ob' b'ay chin ec'an chal Comam Espíritu Santo to echmab'ilin yu te presuan b'oj sunil hej sya'tajil ẍwila'an. 24Yaja' mach ẍtac hin c'ul yu hune' tu'an, waxan̈ca chin camnaan matzet chaliloj camical yul hin satan. Tan̈e c'uxan ẍtan̈can hin munil yin̈ tzalalalan, hune' tzet xa' Jahaw Jesús ti' wub'an, to yin̈ caw yeli ha' walnic'oj tzoti' yet colb'anil cha' Comam Dios yu sc'ulch'anil sc'ulan, ha' hin munilan. 25Xquin ec' walac'oj te xolan tzet chu heyoc yul sk'ab' Comam Dios. Tinan̈, wohtajan to matxa ẍjila' co b'a b'eti'. 26Yuxin ẍwalcan teyetan to matxa hin mul ẍcanan ta ay hunuj hex cheyetatoj he b'a. 27Haxca caw sunil hin c'ulan xwa'ni stzoti' Comam Dios teyetan. Mach hunuj tzetet xweb'a yin̈ he satan. 28Tinan̈ che tan̈e he b'a, cat heya'iln̈en sunil heb'ya' xax ya' yuluj sc'ul yin̈ Comam, haxca teyet xa' Comam Espíritu Santo hune' chejb'anil yin̈ heyilni yiglesia Comam Dios, heb'ya' slok' Comam yu schiq'uil Sc'ahol yet xcam ju co hunil. 29Wohtajan to yet chin tojcanojan chuluj hunk'aan heb'naj hex spoho'toj haca' chute no' oj yet ch'oc no' yulaj peyab' cat xib'tencan̈ no' no' canelu. 30Te xoltic'a ch'aoj heb'naj ch'anojcoj lek'ti'al cat smontenojtoj heb'naj haywan̈oj heb'ya' jetb'i yin̈. 31Yuxin nann̈e heyu hin k'ana'an, tijab' yin̈ he c'ul to yulb'al oxeb' hab'il, tz'ayic ak'b'al xquin ec' hex wiptze' hunun hexan, quex hin cachnian. Hasta ay b'ay xquin ok'an yet xquin ec' te c'atan̈an. 32Tinan̈ hex wuẍtaj, chex hin tak'ecan yul sk'ab' Comam Diosan. Hex stan̈eab' Comam yu stzoti' ẍyeni sc'ulch'anil sc'ul jet. Ay scan̈il ye hon̈ slin̈b'ani, b'oj ya'noj tzet cha' jet xol sunil mac sic'leb'ilxa yu. 33Hayin ti'an, mach hunecoj xwoche wi'aloj hunuj tzetet tet anmaan, ni smelyu ni xil sk'ap. 34Hexti' heyohtaj to hin k'ab' xwalan xquin munla yu wi'ni b'aytet ch'ocnicoj wuan, b'oj tzet ch'ocnicoj yu heb'ya' ẍcolwa win̈an. 35Xtic'a hin ye teyetan to yilal chon̈ munlayi, yun̈e chu co colwa yin̈ mac ya'taj ch'ec' yu. Yilal co nanitij tzet yalnaj Comam Jesús yet xalni Comam: K'a' tzalalal tet mac ch'a'ni hunuj tzetet, sataj mac ẍchani, ẍi Comam, 36Lawi yalni ya' hune' tu', x'ay jahnoj ya' b'oj sunil heb'ya' tu'. X'oc ya' ya'noj yoración. 37Lawi ya'niloj heb'ya' yoración tu' caw x'ok' heb'ya' sunil. Xlak'ni heb'ya' ya' Pablo, stz'ohni heb'ya' ya'. 38Hune' niman b'isc'ulal x'occan yin̈ yanma heb'ya' haxca xal ya' Pablo to matxa b'ak'in̈ chila' sb'a heb'ya'. Yet xto ya' sti' ha' mar xto heb'ya' swab'a' ya' masanto x'apni ya' b'ay ay te' barco.


Copyright
Learn More

will be added

X\