HECHOS 2

1Yet x'apni stz'ayical yec'tzelax k'in̈ Pentecostés, hune'n̈e b'ay yaman sunil heb'ya' xax ya' yuluj sc'ul yin̈ Comam. 2Hunip tu' xab'en heb'ya' sk'an̈ stit hune' haca' cak'e' satcan̈ caw ip ch'eq'ui; sunil yul n̈ah b'ay ay heb'ya' tu' xk'an̈i. 3Lawitu' xilni heb'ya' yayiloj hune' haca' xaj k'a'k'a' xitxk'antoj sb'a yib'an̈ hunun heb'ya'. 4Sunil heb'ya' xcan yalan̈ schejb'anil Comam Espíritu Santo, nananxan̈e ab'xub'aleal chal heb'ya' yu scan̈il ye Comam. 5Yet hune' k'in̈al tu' tx'ihal anma israel aycoj yanma yin̈ Comam Dios ayc'oj yul con̈ob' Jerusalén. Nanann̈e con̈ob'al b'ay elnajc'oj. 6Yet x'ab'en anma sk'an̈ hune' tu', tx'ihal mac xyamicoj b'ay ay heb'ya' tu', xc'ayiloj sc'ul yab'en stzotel heb'ya' yin̈ yab'xub'al hunun heb'jetb'i. 7X'oc heb'jetb'i yin̈ c'ayc'ulal, chalni tet hunun: —¿Tzet yelapnoj ye hune' ti'? ¿Tox mat ah Galileaoj heb'naj stzotel ti'? 8¿Tzet yuxin ẍjab'e stzotel heb'naj yin̈ jab'xub'al b'ay xcon̈ pitzc'a hununon̈? 9Haxca co xol hantajon̈ yamanon̈ ti' ay anma ah Partia, ah Media, ah Elam, ah Mesopotamia, ah Judea, ah Capadocia, ah Ponto, ah Asia, 10b'oj ah Frigia, Panfilia, Egipto, b'oj yul xtx'otx'al Libia scawilal Cirene. Ay mac ah Roma co xol ti', xol heb'naj ti' ay heb'naj israel, b'oj mac ocnajxa yin̈ co religión. 11Ay anma ah Creta b'oj Arabia, yaja' ẍjab'e stzotel heb'naj yin̈ jab'xub'al. Hunun hon̈ ẍjab'e yalni heb'ya' hej c'ayb'alc'ule chu Comam Dios. 12Haxca caw c'aynajiloj sc'ul heb'naj, yuxin mat tan̈b'enoj sk'amb'en tet hunun, chalni heb'naj: —¿Tzet chaliloj hune' ti'? . 13Ay pax mac x'oc tzeyenoj heb'ya', chalni: —Uc'um heb'naj ti'. 14Lawitu' x'ah lin̈noj ya' Pedro b'oj heb'ya' yak'b'il apóstol, spajtzen ya' yin̈ caw ip tet sunil anma yamanc'oj tu', xalni ya': —Hex wetcon̈ob', hex ah Judea, hantaj hex yamanexc'oj yul con̈ob' Jerusalén ti': Ab'ewej tzet ẍwal teyet ti'an, yun̈e hab'an chucan yul he sat. 15Hayon̈ ti'an, maton̈ uc'umojan, haxca yahtz'ayicalto hayon̈. 16Ha' ti', to lan̈an yijni sb'a tzet halb'il yu Comam Dios yu ya' Joel schejab'lom, yet xalni ya': 17Yin̈ slahob'al stz'ayic tu' ẍwa'a'tij Wespíritu yib'an̈ sunil anma ay satyib'an̈k'inal ti'an, yun̈e he c'ahol b'oj he cutz'in chalac'oj hin tzoti' ti'an. Chin yeb' hunk'aan tzetet tet heb'naj tzehtajan, hacojtam wayqueloj chub' heb'naj. Pax heb'naj ichamtaj, chin tzoteloj tet heb'naj yul swayican. 18Yin̈tic'a hunk'aan tz'ayic tu' ẍwa'a'tij Wespíritu yib'an̈ sunil hej hin chejab'an, wal ix maca winaj, chalac'oj hin tzoti'an. 19- 20Chin yeb' hej tzetet c'ayb'alc'ule satcan̈an. Tz'ayic ẍk'ejholojiloj. X'ahaw, ẍcaj lin̈ojiloj haca' chic'. Chin yeb' hej tzet c'ayb'alc'ule sat tx'otx'otx' ti'an. Caw ay chic' b'oj k'a' k'a', caw k'ej yahoj sn̈ub'al. Sunil hunk'aan ti' chuuj yalan̈to maẍto chul hune' tz'ayic caw nimej xiquiltaj, yet chin huluj hayin hin Heyahaw ti'an. 21Yet tu', hantaj mac chin awtenoj yin̈, hayin hin Heyahaw ti'an, ẍcolchaoj, ẍi Comam Dios. 22Hex wetcon̈ob' israel, ab'ewej tzet ẍwal ti'an. Heyohtajxa ta ha' Comam Dios x'a'ni scan̈il ye Comam Jesús ah Nazaret, yuxin xu yuni hej c'ayb'alc'ule co xol yu syeni ta ha' Comam Dios xanitij. 23Ha' Comam Jesús ti' x'aotc'oj yul he k'ab', haxca x'el yin̈ sc'ul Comam Dios ta hactu' chu. Hex xe k'an sk'ab' anma tx'oj yu yalaxcan̈ Comam yin̈ culus, xe potx'ni. 24Yaja' Comam Dios xpitzc'ancan̈ Comam, scolniloj yul sk'ab' camical, haxca mach scan̈il ye camical smajchencanoj. 25Haxca yalnaj ya' rey David yin̈ Comam Jesús, chalni ya': Mam Wahaw, wohtajan ta ayachcoj win̈ stohb'alk'inalan, ayachcoj yin̈ hin watx'an yun̈e mach hunuj tzet chin a'ni cab'conojan. 26Yuxin caw xquin tzalacan̈an, b'oj xquin tzotel yin̈ tzalalalan. Waxan̈ca camb'eal ye hin nimanilan, yaja' ẍcawxi hin c'ul tawin̈an, 27haxca mat satoj hawanojcan hin pixan b'ay ay hej camoman, machca cha chab' etaxottoj hin nimanil hayin sic'leb'ilin hawu ti'an. 28Xquin hawab'atoj yin̈ b'eh ch'a'ni k'inal mach stan̈b'alan. Caw chawa'a' tzalalal wila'an haxca chin ehojc'oj ta c'atan̈an, ẍi ya' David yul Yum Comam Dios. 29Yuxin hex wetcon̈ob', ixtan̈ yeyi tzet xtan̈can jichmam David tu', xcamtoj ya', xmuji ya', ixtan̈to jilni b'ay mujb'il ya' co xol tinan̈. 30Haxca schejab'lom Comam Dios ye ya', yohtaj ya' to ya'naj Comam stzoti' ta yin̈ yic'al ya' ch'eloj Comam Cristo cat yocoj Yahawoj sheleloj ya'. 31Yuxin yalan̈to x'a'ot yohtajn̈e' ya' ta ẍpitzc'aojcan̈ Comam yin̈ camical. Yuxin xal ya' ta mat satoj scanoj spixan Comam xol hej camom, machca ch'etaxojtoj snimanil Comam. 32Comam Dios xpitzc'ancan̈ Comam Jesús yin̈ camical. Co hunilon̈ ẍja' co b'a yin̈ hune' tu'an. 33Yet lawi yilaxcan̈, tz'on̈b'anayoj Comam Dios Comam Jesús yin̈ swatx'. Xa'ni Comam Comam Espíritu Santo tet, haca' xu yalnicanoj. Ha' Comam Jesús x'anitij tzet lan̈an heyilni ti' b'oj heyab'en ti' yun̈e syeniloj yulb'al Comam Espíritu Santo. 34Yuxin mataj ya' David tu' xto yul satcan̈, haxca xal ya': Xal Comam Dios Jahaw tet Wahawan: Tz'on̈yan̈ yin̈ hin watx' ti'an 35masanto ẍwa'a'coj mac ẍchiwa sc'ul tawin̈ yalan̈ hawojan, ẍi Comam, ẍi ya' David tu' yul Yum Comam Dios. 36Hex wetcon̈ob' Israel, yilal heyab'encanoj yin̈ caw syelal, waxan̈ca xeyacan̈ Comam Jesús yin̈ culus, yaja' Comam Dios x'anicoj Comam Yahawoj b'oj Cristoal. 37Ha' xab'en anma tzet xal ya' tu', caw xtaquiloj sc'ul, xalni tet ya' b'oj tet hunk'aanxa heb'ya' apóstol: —Hex jetcon̈ob', ¿tzet wal juten co b'a tinan̈an?. 38Xta'wi ya' Pedro: —Shelab' sb'a he nab'al cat heyi'ni ha' hunun hex cheyeniloj ta ex yet-xa Comam Jesucristo, yun̈e stan̈canoj he mul, cat ya'noj Comam Dios Comam Espíritu Santo teyet. 39Hune' ti' halb'il jet, b'oj tet juninal b'oj tet sunil anma nahatlaj aya, mac chawte Comam Jahaw co Dios ocoj tzujnuj yin̈. 40Tx'ihalto tzet xal ya', xa'ni ya' sc'uluj anma, chalni ya': —Colwejiloj he b'a tet sya'tajil chuluj yib'an̈ hunk'aan jet-anmail tx'oj yecoj ti'. 41Yet hunec tu' hantaj mac xa' yuluj sc'ul yin̈ tzet xal ya' Pedro, xi'can ha'; yuxin yet hune' tz'ayical tu' ay mi oxeb'oj mil anma x'occan yetb'ioj heb'ya'. 42Yamann̈etic'a heb'ya' yab'en scuywab'al heb'ya' apóstol, shunb'an yanma swani ixim pan snab'aniltij scamical Comam Jesús, b'oj yin̈ oración tet Comam Dios. 43Sunil anma caw ẍc'ay sc'ul yu hej c'ayb'alc'ule xyeni scan̈il ye Comam Dios chu heb'ya' apóstol. 44Hantaj mac x'a'ni yuluj sc'ul, lahc'ulal xucanoj b'oj shunb'atoj heb'ya' tzet aya. 45Xtxon̈toj heb'ya' xtx'otx' b'oj hunujxa tzet aya, xitxk'antoj stohol xol heb'ya' matzet aya. 46Hunun tz'ayic syamb'an sb'a heb'ya' yamak' yatut Comam Dios haxca hune'xan̈e nab'aleal ib'il yu heb'ya'. Wal yulaj yatut, chijb'atoj sb'a cat yitxk'antoj ixim pan yin̈. Yet ẍwa'i, caw stzalayi b'oj huncuentan̈e chute sc'ul. 47Chanicoj heb'ya' smay Comam Dios, b'oj stzala pax anma yin̈ heb'ya'. Hunun tz'ayic ayn̈etic'a mac chican̈ Comam Jahaw yun̈e sch'ib' sb'isil heb'ya'.


Copyright
Learn More

will be added

X\