HECHOS 19

1Yet ayic'o naj Apolos yul con̈ob Corinto, ay yul ismajul Acaya, lan̈an yec'paxo naj Pablo yul ismajul tx'otx' Asia. Hayet yapni naj Pablo yul con̈ob Efeso yillenayo isba naj yeb huntek'an ebnaj ayxaco yul isk'ab Comam bey tu'. 2Isk'amben naj Pablo tu' tet ebnaj: ¿Hechahmi Comam Espíritu Santo yet heyanico heba yul isk'ab Comam Jesucristo? ẍi naj tet ebnaj. Istak'wican̈ ebnaj: —Machoj, maẍtic'a bay chijabehan̈ ta ay hune' Comam Espíritu Santo, ẍi ebnaj. 3Isk'ambenpaxo naj: —¿Tzet cuybanile ilchalo heyu yet yah ha' hewi'? ẍi naj Pablo tu'. Istak'wican̈ ebnaj: —Wal xin, ah ha' cowi'an̈ haca' cuybanile yal naj Juan, ẍi ebnaj. 4Yalnipaxo naj Pablo tet ebnaj: —Wal naj Juan yacan̈ naj ha' iswi' anma yun̈e isyenilo anma tato chisna isba yin̈ ismul. Yaj xin yalpaxcano naj Juan tu' tet anma tato ay hune'xa mac tzujan yul yinta naj, yuxin caw yilal yin̈ hune'xa naj tu' chaco yanma anma, ha' ton Comam Jesucristo, ha' chal naj Juan tu', ẍi naj Pablo. 5Hayet yaben ebnaj hune' tzet yal naj Pablo tu', yahcano ha' iswi' ebnaj yin̈ isbi Comam Jesucristo. 6Lahwi tu' yanahto naj Pablo isk'ab yiban̈ iswi' ebnaj, hac tu' yu ischahnicano ebnaj Comam Espíritu Santo. Istzabnico ebnaj istzotel yin̈ nan abxubal, chalni ebnaj Tzoti' chitit tet Comam Dios. 7Aymi ebnaj cablahon̈wan̈ yin̈ sunil. 8Caw oxeb ixahaw yalilto naj Pablo Istzoti' Comam Jesucristo yul iscapilla ebnaj Israel bey tu'. Caw xin machi xiw naj yalni Istzoti' Comam. Chiscuyni naj anma yu yoc yul isk'ab Comam Dios. 9Yaja' ay huntek'an ebnaj mach ischah yabe' tzet yal naj Pablo tu'. Yalni ebnaj sata sunil anma ta mach c'ulu hune' cuybanil yet colbanile yin̈ Comam Jesucristo. Yuxin el naj Pablo xol ebnaj, yinito naj ebnaj ayxaco yul isk'ab Comam tu' bey yescuela hune' naj chiyij Tirano. Ha' tu' xin iscuy naj Pablo ebnaj tu' yin̈ hunun tz'ayic 10Caw cab habil cuywa naj yuxin sunil anma bey yul ismajul Asia aben hune' cuybanil yin̈ Comam Jesucristo; anma Israel, yebpaxo anma mach Israeloj, caw sunil anma tu' abencanoj. 11Caw isye naj Pablo huntek'an nimeta c'aybalc'ule yu yip Comam Dios yin̈ sat anma. 12Wal xin waxan̈ca payu'e maca hunuxa xilk'ape ec'lenaxa yin̈ isnimanil naj Pablo tu', chito anma cat yanico yin̈ isyawub cat iscawxican̈ anma tu'. Aypaxo anma ch'elcano ischejab naj matzwalil yin̈. 13Aypaxo xin huntek'an ebnaj Israel chiec' bey tu' chiel ischejab naj matzwalil yin̈ anma yu ebnaj. Yak'len ebnaj yawten isbi Comam Jesús yu yinilo ischejab naj matzwalil yin̈ anma. Yalni ebnaj haca' ti': —Yin̈ isbi naj Jesús, naj chiec' naj Pablo yalac'o istzoti', chijalan̈ elan̈wej, ẍi ebnaj. 14Hac tu' yute hujwan̈ isc'ahol hune' naj Israel chiyij Esceva, yahawil yeco yin̈ ebnaj sacerdote Israel. 15Yaja' yet hunel yak'le ebnaj yinilo ischejab naj matzwalil yin̈ hune' naj, istak'wican̈ ischejab naj matzwalil tu' tet ebnaj: —Naj Jesús cheyal ti', caw wohtajan naj, caw wohtapaxojan naj Pablo. Walex hex ti' xin, ¿mac anmahilex? ẍi ischejab naj matzwalil tu' tet ebnaj. 16Ha' naj bay ayco ischejab naj matzwalil tu' xin, tit lemna naj yiban̈ ebnaj, isyuk'laxayo ebnaj yu naj yin̈ sunil yip, caw xin oc islahwilal isnimanil ebnaj. T'ilanxa ebnaj yet yelcan̈ tet naj ischejab naj matzwalil tu'. 17Yet yaben anma ah Efeso isk'umal yin̈ tzet yu tu', anma Israel yebpaxoj anma mach Israeloj caw xiwcan̈ anma. Hac tu' xin yu yahcan̈ isbina isbi Comam Jesucristo xol anma. 18Caw ay anma chabilxa Comam Jesucristo yu apni bey tu', yichico yalnahti anma sunilal istx'ojal xa-le-iswatx'e yet yalan̈tocanoj. 19Yebpaxo xin ay huntek'an ebnaj ahbelomtic'a, initi islibro chiyak'baln̈e yet chitxumli tu', isn̈usnicanto ebnaj te' yul k'a' yin̈ sat sunil anma. Hayet yillaxi hanta istohol te' libro tz'ato tu', aymi cincuenta mil melyu naba platan̈e. 20Hac tu' xin yu ispujnacan̈ Istzoti' Comam Jesucristo Jahawil, isyenicanilo yip Comam xol anma. 21Yet lahwi yuni huntek'an tu' xin, yoc yin̈ isnabal naj Pablo isto yul ismajul Macedonia yeb yul ismajul Acaya, yebpaxo yul con̈ob Jerusalén. Yalni naj haca' ti': —Chilahwi intoc'ojan bey Jerusalén tu', caw yilal intohan yul con̈ob Roma, ẍi naj. 22Yuxin ischejto naj cawan̈ ebnaj yet munlawomal bey ismajul Macedonia; ha' ton naj Timoteo yeb naj Erasto. Wal naj Pablo tu' xin, cancano naj hayebxa ixahaw bey ismajul Asia tu'. 23Yin̈ hune' tiempohal tu', ah wejla anma howal yin̈ cuybanil yet colbanile yin̈ Comam Jesús bey Efeso. 24Yuto ay hune' naj chiyij Demetrio, chac'om plata naj, chiswatx'e naj yechel yatut hune' istioẍ anma chiyij Diana. Caw hantan̈e melyu chik' naj yeb ebnaj chimunla yin̈ hune' munil tu'. 25Wal xin iscutxbayo naj sunil ebnaj ismunlawom yeb huntek'anxa ebnaj chichac'ni ch'en plata, yalni naj tet ebnaj haca' ti': —Wal tinan̈ hex wet munlawomal, caw heyohtaj ta caw ay melyu chijik' yin̈ hune' comunil ti'. 26Yaj caw cheyila cat heyabenpaxo tzet lan̈an yalni naj Pablo. Tolab huntek'an tioẍ watx'ebil yu anma, caw mach diosoj. Caw xin hantaxa anma lan̈an yanico yanma yin̈ tzet chal naj. Maẍn̈etaj bey Efeso ti', wal xin caw hantaxa anma ayco yinta naj bey sunil ismajul Asia ti'. 27Caw xin ay ismay istan̈ilo hune' cotxon̈ ti', yeb ay ismay matxa yelapno ch'eloco hune' yatut cotioẍ Diana yul sat anma, yebpaxo ch'elo ispixan cotioẍ Diana ti', hune' caw ay yelapno yul sat anma ay yul ismajul Asia ti' yeb sunil yul sat yiban̈k'inal, ẍi naj tet ebnaj tu'. 28Hayet yaben ebnaj huntek'an ti', caw titcano ishowal ebnaj sic'lebil. Yah yaw ebnaj yin̈ caw ip, yalni ebnaj: —Caw aycano yelapno ix cotioẍ Diana han̈on̈ ayon̈ yul con̈ob Efeso ti', ẍi ebnaj. 29Hac tu' xin caw tit ishowal ebnaj, yah wejna anma sunil yul con̈ob tu'. Istzabnayo ebnaj hune' naj juẍta chiyij Gayo yeb hune'xa naj juẍta chiyij Aristarco. Ha' cawan̈ ebnaj ti' yul ismajul Macedonia tit ebnaj yinta juẍta Pablo. Yet istzablaxayo ebnaj tu', ishatxlaxto ebnaj yul hune' niman salón. 30Yoche naj Pablo ocoto tzotelo sata anma tu', yaj mach chisje ebnaj ayxaco yul isk'ab Comam ta ch'octo naj. 31Aypaxo haywan̈ ebnaj ayco yahawil yul ismajul Asia tu', yamigo isba ebnaj yeb naj Pablo, ha' ebnaj anito ischejab tet naj Pablo ta mach ch'octo naj isyeb isba bey hune' salón tu'. 32Ha' anma cutxanico tu' toxan̈e chiwejchahi, nanantaxan̈e chal anma yet chiawi yin̈ caw ip. Ec'bal yicta ebnaj xol anma tu' mach yohtajo tzet yin̈ yuxin iscutxbaco isba. 33Yaja' xol anma tu' ayco hune' naj chiyij Alejandro, tenlaxicto naj sata sunil anma yu ebnaj yet Israelal. Lahwi tu' xin, isyeni naj yu isk'ab tet anma tato chislin̈ba yel yaw yu yoche naj yala' tet ebnaj ta mach yuho ebnaj Israel yuxin ay hune' howal tu'. 34Yet yilni anma tato israelita naj, yah wejla anma yel yaw. Aymi cab orahil el yaw anma, chalni haca' ti': —Caw aycano yelapno ye ix Diana, cotioẍ han̈on̈ Efeso hon̈ ti', ẍi ebnaj. 35Haxa naj tz'iblom yul con̈ob tu', lin̈ban yel yaw anma, yalni naj haca' ti': —Hex wet con̈ob, sunil anma ohtan̈e tato han̈on̈ ayon̈ yul con̈ob Efeso ti', han̈on̈ ay jip jalni tzet wal yuni yatut ix cotioẍ Diana, yeb hune' yechel ix titna yul satcan̈. 36Machi hunu mac chiyu yalni tato lek'ti'al ye hune' chiwalti'an, yuxin bejwe yel heyaw. Nawe heba yin̈ tzet chewatx'e haxinwal machi huno istx'ojal cheyiti teyiban̈. 37Yuto ha' ebnaj maxeyiti ti', machi huno tzet xayelk'a ebnaj yul yatut ix codiosal ti', machipaxo huno ebnaj ti' buchwa yin̈ ix. 38Tato chiyoche naj Demetrio ti' yeb xin huntek'anxa ebnaj chac'om plata ti' yichecan̈ howal yin̈ hunu maca, chu isto ebnaj isk'ana' tet naj juez, cat iswatx'enayo ebnaj haca' chal yanma ebnaj. 39Ta ayto tzet cheyoche hewatx'e', halwe tet ebnaj yahaw con̈ob, cat islahti'n̈elaxi, cat iswatx'encano ebnaj sata sunil anma. 40Yuto haca' mayu ti', aytaxca tzet chisnacan̈ ebnaj ah Roma jin̈, lan̈antaxca copaq'uico yin̈ ebnaj, yalni. ¿Tzet ye huntek'an anma lan̈an iswejcha ti'? ta ẍi ebnaj. ¿Tzet chijute cotak'wi heyalni? Haca' tu' matxa chu cocolni coba, ẍi naj tz'iblom tu' tet anma. 41Yet lahwi yalni naj huntek'an ti' xin, istak'li naj tet anma tu', ispaxto anma sunil.

will be added

X\