HECHOS 19

1Yet ay ya' Apolos yul con̈ob' Corinto, hatu' lan̈an yec' pax ya' Pablo yul hunk'aan con̈ob' ay b'et chewal tx'otx' yul scuenta Asia. Lawitu' x'apni ya' yul con̈ob' Éfeso, schaniay sb'a ya' b'oj hunk'aan heb'ya' xax ya' yuluj sc'ul yin̈ Comam. 2Sk'amb'en ya' tet heb'ya': —¿Chab'ilxam Comam Espíritu Santo heyu yet xeya'ni yuluj he c'ul yin̈ Comam Jesús? —Machoj, maẍtic'a b'ay ẍjab'ean ta ay Espíritu Santo. 3—Yaja' yet xeyi'ni ha' ¿tzet chaliloj hune' tu' teyet? —Xji' ha' haca' yalni scuywab'al ya' Juanan. 4Yuxin xal ya' tet heb'ya': —Ho', yeli, xi' anma ha' yu ya' Juan yun̈e syeniloj to sb'ejcan anma yanicoj smul. Xalni pax ya' tet anma ta yilal ya'ni yuluj sc'ul yin̈ hune' mac tzujantotij yin̈ ya'. Hune' mac tu' ha' Comam Jesús, 5Ha' xab'en heb'ya' hune' tu', xi'ni heb'ya' ha' yin̈ sb'ih Jahaw Jesús. 6Lawitu' xanicoj ya' Pablo sk'ab' yin̈ swi' heb'ya', schanican heb'ya' Comam Espíritu Santo. Yin̈n̈ena tu' xa yal heb'ya' hunmajanxa ab'xub'al, chalni heb'ya' tzoti' chatij Comam Dios tet. 7Heb'ya' xa' yuluj sc'ul tu', ay mi heb'ya' cab'lan̈wan̈oj. 8Yulb'al oxeb' x'ahaw scuy ya' Pablo anma yin̈ stzoti' Comam Dios yul scapiya anma israel ay b'etu'. Mach ninoj xiw ya' syeniltoj tzet chu yoc anma yul sk'ab' Comam Dios. 9Yaja' ay mac caw wi'e, mach sje ya'a' yuluj sc'ul yin̈ Comam Dios. Ha' yet, to x'oc yala' tx'oj yin̈ scuywab'al Comam Jahaw yin̈ sat anma. Yuxin sheq'uiloj sb'a ya' Pablo, xinitoj ya' heb'ya' ẍcuywi yin̈ yul hune' n̈ah b'ay ẍcuywa hune' naj Tirano sb'ih. Hat scuy ya' anma hunun tz'ayic. 10Yulb'al cab' hab'il hactu' xu xcuywa ya'. Yuxin hactu' xu yab'eniloj anma stzoti' Jahaw Jesús sunil yul scuenta Asia. Ay mac israel, ay mac mat israeloj, sunil mac x'ab'en stzoti' Comam. 11Caw tx'ihal nimej c'ayb'alc'ule xa' Comam Dios b'etu' yu scan̈il ye xa' tet ya' Pablo. 12Somanta spayu' ya' Pablo b'oj xil sk'ap yet munil, chitoj anma tet hej syawub', lemb'iln̈e ẍwatx'i, b'oj anma aycoj hunk'aan yespíritu naj matzwalil yin̈, lemb'iln̈e ch'el yu. 13Ay pax hunk'aan heb'naj israel ch'ec' yulaj con̈ob', chiloj heb'naj yespíritu naj matzwalil yin̈ anma. Xilwe heb'naj yiniloj yespíritu naj matzwalil tu' yin̈ anma yin̈ sb'ih Comam Jesús, chalni heb'naj: —Yin̈ sb'ih Jesús chalic'oj naj Pablo, ẍjal teyetan ta chex el yin̈ anma ti'. 14Hactu' xute hujwan̈ heb'naj sc'ahol hune' naj israel Esceva sb'ih, swi'al yin̈ heb'naj sacerdote. Xilwe heb'naj yiniloj hunk'aan yespíritu naj matzwalil yin̈ hune' naj. 15Yaja' xta'wi hune' espíritu tu': —Wohtaj hune' mac Jesús tu'an, b'oj xax wab'e sk'umal naj Pablo tu'an, yaja' hexti', ¿mac anmail hex? ẍi hune' espíritu tu'. 16Yin̈n̈ena tu' xto lemna naj b'ay aycoj espíritu tu' yib'an̈ heb'naj. Yu hantaj yip naj b'eh xu syuk'utay heb'naj yul n̈ah tu' yu naj. T'eb'anxa heb'naj xcolpatoj heb'naj, penaxan̈e yecoj lahwilal yin̈ snimanil heb'naj. 17Sunil anma ay Éfeso, heb'jetb'i israel b'oj mac mat israeloj, ha' xab'en hune' tu' xiwcan̈, xanicoj smay Jahaw Jesús. 18Tx'ihal mac xol heb'ya' xa' yuluj sc'ul yin̈ Comam Jesús x'apni, ichi yalniatij sunil hej tzetet tx'oj xu. 19Xol heb'ya' tu' ay mac xcuyni ahb'ehal. Yuxin xitij sunil yum b'ay scuy hunk'aan tzetet tu', x'oc heb'ya' sn̈usnujtoj te' yin̈ sat anma. Ha' xb'isb'alaxtoj hantaj stohol te' hum tu', cincuenta mil plata ch'elcoj stohol te'. 20Hactu' xu spujna stzoti' Comam Jahaw, b'oj caw chi' yip yu scan̈il ye Comam. 21Lawitu' ẍto ya' Pablo Jerusalén yalni, yaja' ẍto ec'can ya' Macedonia b'oj Acaya. Xalni pax ya': —Lawitu' yilal hin toj pax Romaan, 22Yuxin xb'ab'itij cawan̈ heb'ya' Macedonia yu ya', ya' Timoteo b'oj ya' Erasto. Wal ya', xto can ya' b'et Asia. 23Yet hunec' tu', x'ah b'oc'na anma yin̈ howal yu scuywab'al Comam. 24Yul con̈ob' Éfeso tu' ay hune' naj platero Demetrio sb'ih. Swatx'e naj hunk'aan niẍtej yechel yatut ix tioẍ Artemis. Heb'naj ẍwatx'en hunk'aan echele tu', caw chi' heb'naj smelyu yin̈. 25Yuxin syamb'acoj naj Demetrio tu' heb'naj ay hune' smunil tu', b'oj hunk'aanxa heb'naj etza lahan smunil b'oj naj. Xalni naj: —Tinan̈ cho'wej, heyohtaj ta caw ay ch'en melyu ẍji' yin̈ hune' co munil ti'. 26Yaja' hex caw xeyila b'oj xeyab'e yalni naj Pablo to hunk'aan tioẍ swatx'e anma, mat diosoj. Hantajxa mac sub'cha yu naj cha'ni ayc'ayojtij sc'ul, matn̈etaj yul con̈ob' Éfeso ti', to etza sunil yul scuenta Asia b'ay chalic'oj naj hune' tu'. 27Tinan̈ taj chon̈ c'aywa yin̈ co munil ti', b'oj ix co tioẍ Artemis ti', taj matxa yelapnoj chub'can yatut ix tet anma. Ix co tioẍ ti' caw hak'eb'il ix yu anma ay b'et Asia ti' b'oj sunil sat tx'otx'otx'. Yaja' tinan̈, taj comonalxan̈e chub'can ix. 28Ha' xab'en heb'naj hune' tu', caw xchiwacan̈ sc'ul heb'naj, ichi yalni heb'naj yin̈ ip: —Caw aycanoj smay ix co tioẍ Artemis hayon̈ ah Éfesoon̈ ti', 29Sunil anma ay yul con̈ob' somk'atoj yul swi', xtit showal xto b'oc'na yin̈ heb'ya' cawan̈ yetb'i ya' Pablo ah Macedonia, ya' Gayo b'oj ya' Aristarco, xtarottoj heb'ya' b'ay syamb'a sb'a anma ilo' sajach. 30Ay yala' ya' Pablo x'octoj ya' tzoteloj xol anma, yaja' mach sje heb'ya' xax ya' yuluj sc'ul yin̈ Comam. 31Ay pax hunk'aan heb'naj yetb'i sb'a b'oj heb'naj yahaw Asia tu' yamigo sb'a b'oj ya', xapaxtoj heb'naj schejab' yala' tet ya' ta mach sye sb'a ya' xol anma b'etu'. 32Xayanxan̈e anma tu' nananxan̈e chala. Ec'b'al yictaj anma mat yohtajoj tzet yuxin ay hune' howal tu'. 33Xol anma tu' ay hune' naj chij Alejandro xtenlaxictoj naj yin̈ sat sunil anma yu heb'naj yet israelal. Yuxin xacan̈ naj sk'ab' yun̈e spax tz'inna anma. Ha' xoche naj yala tet heb'naj ta mataj yu heb'naj israel yuxin ay hune' howal tu'. 34Yaja' ha' xtxumni heb'jetb'i to israel naj Alejandro tu', xto cam ahcan̈ yawi yulb'al cab' ora, chalni heb'jetb'i: —Caw aycanoj smay ix co tioẍ Artemis hayon̈ ah Éfesoon̈ ti', ẍi anma. 35Haxa naj tz'ib'lom ay yul con̈ob' tu', niẍtejaln̈e xu spax tz'inna anma yu naj, xalni naj: —Hex wetcon̈ob', sunil anma ohtajn̈e to hayon̈ ah Éfesoon̈ ti' jetwanoj ay co tan̈en yatut ix co tioẍ Artemis caw ay smay, b'oj co tan̈en yechel ix, hune' x'ayiloj yul satcan̈. 36Mach hunuj mac chu yalni ta lek'ti'al hune' ẍwal ti'an. Tinan̈ matxa chex awi. Txumwejiloj yin̈ c'ul tzet cheyu. 37Haxca heb'naj xeyitij b'eti', mach tzet xelk'a heb'naj yul yatut tioẍ, machca hunuj heb'naj stzeyen ix co tioẍ ti'. 38Ta choche naj Demetrio ti' b'oj yak'b'il heb'naj platero yiche'can̈ howal yin̈ hunuj anma, chu sto heb'naj sk'annoj yin̈ heb'ya' tet heb'naj yahaw con̈ob'. Chu yalni heb'naj tzet chal sc'ul yin̈ hunun. 39Ta ayto tzet choche heb'naj swatx'e', yalab'atij heb'naj tet heb'naj yahaw con̈ob' yet syamb'anoj sb'a heb'naj, cat swatx'encan heb'naj yin̈ sat heb'naj. 40Haxca yin̈ hacti' tajca chal heb'naj chejb'il yu naj yahaw Roma ta yin̈ heb'naj lan̈an co paq'uicoj yu hune' lan̈anto yuhiloj ti'. ¿Tzet ye hune' tenan anma lan̈an sb'oc'xi ti'? ta ẍi heb'naj, ¿tzet ẍco tz'aj jala'? Machu co colnoj co b'a. 41Lawi yalni naj hunk'aan tzoti' tu', schejnitoj naj anma pax yatut.


Copyright
Learn More

will be added

X\