1 Lahwi tu' xin, yel naj Pablo bey yul con̈ob Atenas, yapni naj bey con̈ob Corinto. 2 Ha' bey tu' yilayo isba naj yeb hune' naj chiyij Aquila. Hune' naj tu' israelita naj, pitzc'ana naj bey yul ismajul Ponto. Wal yixal naj xin, Priscila isbi ix. Tolto apni naj yeb yixal bey Corinto tu', ispeto naj bey ismajul Italia yuto elto isbi yu naj Claudio, yahawil yeco yin̈ tx'otx' Roma, ta ch'el sunil anma Israel yul ismajul Roma. Yapni naj Pablo istuc'le' naj yeb yixal bey yatut. 3 Iscancano naj Pablo munil isc'atan̈ naj yuto lahan ismunil ebnaj, watx'em mantiado ebnaj. 4 Yin̈ hunun tz'ayical xewilal chibeyc'o naj Pablo yalno Istzoti' Comam Dios yul iscapilla anma Israel, yu iscuynicano naj anma Israel yeb anma mach Israeloj. 5 Yet yapni naj Silas yeb naj Timoteo bey yul con̈ob Corinto, ispeto ebnaj bey yul ismajul Macedonia, naj Pablo tu' xin, caw yin̈xan̈e Istzoti' Comam Dios oc naj munlahoj. Chalni naj yin̈ caw haban tato ha' Comam Jesús ha' ton Cristo Cocolomal, Comam echmabil yuli. 6 Caw xin tit ishowal ebnaj israelita yet yaben ebnaj haca' tu', istzabnico ebnaj isbuchwa yin̈ naj Pablo. Hac tu' xin yu istzicobtan̈encano naj Pablo tu' xil isk'ap yun̈e isyenicanilo naj tet anma tato caw matxa yoc naj yin̈ anma tu'. Yalni naj: —Hex cawex cheyiti isya'tajil teyiban̈, walinan caw matxa wocan teyin̈, yuxin tinan̈ intoxahan walnolojan hune' cuybanil ti' tet anma mach Israeloj, ẍi naj. 7 Lahwi yalnicano naj Pablo haca' tu', yelti naj yul iscapilla ebnaj Israel, isto naj bey yatut hune' naj chiyij Ticio Justo, hune' naj mach Israeloj, naj chiyiyo isba tet Comam Dios. Ayayo yatut naj iscawilal capilla tu'. 8 Ay xin hunxa naj caw yahawil yeco yin̈ iscapilla ebnaj Israel, Crispo isbi, yayto naj yul yanma yin̈ Comam yeb sunil mac ay yul yatut naj. Tx'i'alpaxo anma ay bey Corinto tu' hayet yaben Istzoti' Comam Dios, yanico isba yul isk'ab Comam, yahcano ha' iswi'. 9 Yin̈ hune' ak'balil xin yal Comam Dios tet naj Pablo yul iswayic haca' ti': —Mach chaẍxiwi lahico hawalni Intzoti'an xol anma ti', ẍi Comam tet naj. 10 Yalnipaxo Comam: —Wal xin, ayinic'ojan hawetbihoj, yuxin machi huno mac chu yoc caẍistzabnoyoj. Caw ayxa anma sic'bilcan̈ wuhan bey yul hune' con̈ob ti', ẍi Comam tet naj. 11 Yuxin caw yicta iscab habil ec' naj Pablo yul con̈ob Corinto iscuyni anma yin̈ Istzoti' Comam. 12 Yet ayco hune' naj romano, Galión isbi, yahawil yin̈ tx'otx' Acaya, islahti'n̈en isba ebnaj israelita yin̈ tzet wal yuten ebnaj naj Pablo. Hac tu' yu yinito ebnaj naj Pablo yul capil. 13 Yalni ebnaj haca' ti': —Hune' naj ti' chiec' naj ak'oc'ule tet anma yun̈e yinayo isba anma tet Comam Dios, yaj mach haca'o yalni ley, ẍi ebnaj yin̈ naj Pablo tu'. 14 Hayet lan̈anxa istzotelcan̈ naj Pablo, yalni naj Galión haca' ti': —Hex israelita hex ti', caw mach ch'elicti heyaw wetan bey ti', tato ay huno ismachiswalilal iswatx'e hune' naj ti', maca tato ay huno ismul naj caw nanxa islowi, wal tu' caw chimwabetojan tzet cheyala. 15 Yaja' ta yun̈e tzoti' chal naj, yeb xin yu hune' bihe chiyak' binaho naj, yeb yun̈e heley yuxin cheyaco hehowal yin̈ naj, wal xin watx'ewe hune' ti' hechuquil. Walinan mach chiwaco inbahan inwatx'ehan hune' ti', ẍi naj Galión tet ebnaj. 16 Lahwi yalni naj haca' ti', istzumbelaxilti ebnaj tu' yul capil. 17 Wal ebnaj griego ay bey tu', istzabayo ebnaj naj Sóstenes, naj ayco yahawilo iscapilla ebnaj Israel. Yoc ebnaj ishateno naj bey isti' capil, yaj ton̈e yil naj Galión hune' tu', machi nich'ano tzet yal naj. 18 Caw tx'i'alto tz'ayic ec' naj Pablo bey Corinto. Lahwi tu' xin istak'licano naj tet ebnaj ayxaco yul isk'ab Comam bey tu' yuto istzabico naj isto yin̈ isbel bey yul ismajul Siria. Istopaxo ix Priscila yeb naj Aquila. Yet yapni ebnaj bey yul con̈ob Cencrea, yinilo naj Pablo xil iswi' yun̈e yijni isba hune' tzet halbil yu naj tet Comam Dios. Lahwi tu' xin yocto ebnaj yul barco. 19 Yet yapni ebnaj yul con̈ob Efeso xin, iscancano ix Priscila yeb naj Aquila bey tu'. Octo naj Pablo yul iscapilla ebnaj Israel, istzabnico naj istzotel yeb ebnaj cutxanicoj. 20 Caw oc ebnaj yala' tet naj Pablo tato chicancano naj hayebo tz'ayicalil xol ebnaj, yaj xin mach chisje naj. 21 Yet lan̈an istak'licano naj Pablo tu' tet ebnaj, yalni naj haca' ti': —Caw yilal chintohan bey Jerusalén yin̈ k'in̈. Yaj ta ch'el yin̈ isc'ul Comam Dios chinec'an tec'atan̈ hunelxa, ẍicano naj. Hac tu' xin yu yel naj yul con̈ob Efeso, yocpaxo naj yul barco. 22 Lahwi tu' yapni naj yul con̈ob Cesarea, istopaxahto naj yul con̈ob Jerusalén tzotelo yeb ebnaj ayxaco yul isk'ab Comam Jesús bey tu'. Lahwi yec' naj bey yul con̈ob Jerusalén tu', isto naj yul con̈ob Antioquía. 23 Ha' bey tu' xin ec' naj Pablo hune' tiempohal. Lahwi tu' isto naj hunelxa yin̈ isbel. Yec' naj sunil yulaj con̈ob bey yul ismajul Galacia yeb yul ismajul Frigia, yiptzencano naj ebnaj ayxaco yul isk'ab Comam Jesucristo. 24 Ay hune' naj Israel, Apolos isbi, ah con̈ob Alejandría. Naj Apolos ti', apni naj yul con̈ob Efeso bay cancano ix Priscila yeb naj Aquila. Caw helan naj istzoteli, yeb caw yohta naj tzet ayayo yul Yum Comam Dios tz'ibn̈ebilcano yet payat. 25 Cuybilpaxo naj yin̈ cuybanile yin̈ yet Comam Jesucristo, yuxin yin̈ caw sunil yanma naj iscuy naj anma yin̈ yet Comam. Waxan̈ca han̈ech'an cuybanile yal naj Juan yin̈ yahbal ha' iswi' anma yohta naj. 26 Yet hunel oc naj yala' Istzoti' Comam Dios xol anma yul iscapilla ebnaj Israel, yin̈ caw sunil isc'ul naj yalni naj cuybanile tu'. Yet lahwi yaben ix Priscila yeb naj Aquila cuybanile yak' naj, yinito naj yeb ix naj Apolos tu' yatut. Yoc naj yeb ix yalnolo yin̈ caw haban yin̈ sunil cuybanile yin̈ Comam Jesucristo. 27 Lahwi tu' xin, yoc yin̈ isnabal naj Apolos isto bey ismajul Acaya. Yuxin yato ebnaj ayxaco yul isk'ab Comam bey Efeso tu' hune' carta bay tak'elaxto naj tet ebnaj ayxaco yul isk'ab Comam, yun̈e c'ul chu ischahlax naj bey tu'. Yet yapni naj bey yul ismajul Acaya tu', yoc naj yiptzeno sunil anma xayaco isba yul isk'ab Comam, yu isc'ulch'anil isc'ul Comam Dios. 28 Caw wiyom yoc naj yalno isyelal tet ebnaj Israel yin̈ sat anma. Chisyenilo naj baytet yin̈ maẍtaj yeco ebnaj tu', chalni naj ta ha' yul Yum Comam Dios chala ta ha' Comam Jesús, ha' Cristo Cocolomal echmabil yuli.
