HECHOS 18

1Lawitu' x'el ya' Pablo yul con̈ob' Atenas, xhul ya' yul con̈ob' Corinto. 2Hat ay hune' ya' Aquila sb'ih, israel yic'al, b'et Ponto pitzc'anaj ya'. Priscila sb'ih yixal ya'. Toto xhul heb'ya' Corinto tu', speto heb'ya' b'et Italia, haxca stzumb'eotiloj sunil anma israel yul con̈ob' Roma yu naj Claudio, yahaw Roma. X'apni ya' Pablo yila' heb'ya' yatut. 3Xcan ya' sc'atan̈ heb'ya' munlaoj haxca lahan smunil heb'ya', watx'eom mantiado heb'ya'. 4Hunun tz'ayic xewb'al sb'ey ya' Pablo tzoteloj yul scapiya anma israel, chanicoj ya' yin̈ sc'ul heb'yetb'i israel tu' b'oj heb'jetb'i mat israeloj yin̈ ya'ni yuluj sc'ul yin̈ Comam Jesucristo. 5Yet xhul ya' Silas b'oj ya' Timoteo Corinto tu', speto heb'ya' Macedonia, yin̈xan̈e stzoti' Comam Dios x'occan ya' Pablo munlaoj. Syeniltoj ya' yin̈ hab'an tet heb'yetb'i israel ta Comam Jesús ha' Cristo. 6Yaja' yet xtit showal heb'jetb'i, x'oc yalnoj tzoti' tx'oj yin̈ ya', x'oc ya' stzicnoj xil sk'ap syeb'aniloj to matxa yoc ya' yin̈ anma tu'. Xalnican ya': —Ta cheyetatoj he b'a, hex ay he mul teyin̈. Mach hin mul xcan yin̈ hune' ti'an. Tinan̈ chin to wala' stzoti' Comam Dios xol anma mat israelojan, . 7Lawi yalni ya' hune' tu', x'eltij ya' yul capiya, xto ya' yatut hune' naj ẍhak'en pax Comam Dios, Ticio Justo sb'ih. Ay yatut naj smotxic'oj capiya tu'. 8Ay hune'xa naj Crispo sb'ih, swi'al yin̈ capiya tu'. Xa' naj yuluj sc'ul yin̈ Comam Jahaw b'oj sunil mac ayictoj yul yatut. Tx'ihalto pax mac ah Corinto xab'en stzoti' Comam Dios, xa' yuluj sc'ul, xi'nican ha'. 9- 10Yet hune' ak'b'alil, haca' yul wayique xu yalni Comam tet ya' Pablo: —Machach xiwi Pablo, ayincoj hawetb'iojan. Mach mac ay tzet chach utenoj, macha b'ejcan hawalnic'oj hin tzoti'an haxca tx'ihalxa mac sic'leb'ilxa wu yul hune' con̈ob' ti'an. 11Yuxin yictaj scab' hab'il xcan ya' yul con̈ob' Corinto, chalni ya' stzoti' Comam Dios tet anma. 12Ha' yet xanicoj heb'naj romano naj Galión gobernadoral b'et Acaya, xyamb'acoj sb'a heb'naj israel yin̈ ya' Pablo, xinitoj heb'naj ya' tet naj gobernador tu' yu yilni heb'naj tzet chute heb'naj ya'. 13Xalni heb'naj: —Naj ti' ch'ec' naj ya'a' sc'uluj anma ta shak'e Comam Dios, yaja' mat haca'oj yalni ley. 14Lan̈anxa stzoteloj ya' Pablo yalni, yet xalnican̈ naj Galión tet heb'naj israel: —Machex awitij wetan. Ta ay hunuj tzet caw tx'oj xu naj, mato hunuj tzet k'a' xiquiltaj xu naj, chim wab'etoj tzet cheyalan. 15Yaja' ta yin̈n̈e tzoti' b'oj b'ihe chal naj, b'oj yu he ley, yin̈ ch'el he howal b'oj naj, elan̈wejtoj b'eti', as watx'ewej yin̈taj tu'. Mach wacoj hin b'a te xolan. 16Lawitu' schejni naj tzumb'elaxojiltij heb'naj yul capiltu. 17Ay hunk'aan heb'naj griego x'oc stzab'nojayoj ya' Sóstenes swi'al yin̈ scapiya anma israel. Xmak'ot ya' sti' sdespacho naj Galión tu', yaja' ton̈e xil naj, matzet xal sc'ul naj. 18Nahatilto xcan ya' Pablo yul con̈ob' Corinto. Lawitu' xtak'lican ya' tet heb'ya' xax ya' yuluj sc'ul yin̈ Comam, x'octoj ya' yul hune' te' barco b'et Cencrea yun̈e sto ya' b'et Siria. Xto ya' Priscila b'oj ya' Aquila yin̈ ya'. Yaja' yalan̈to maẍto ch'octoj heb'ya' yul barco, xa'ni eloj ya' Pablo xil swi' syeb'aniloj to ay tzet ta'web'il yu ya' tet Comam Dios. 19Yet xhul heb'ya' yul con̈ob' Éfeso, hat xcan ya' Priscila b'oj ya' Aquila b'etu'. Wal ya' Pablo xto to ya' yul scapiya anma israel tzoteloj b'oj heb'jetb'i ay b'etu'. 20Xal heb'jetb'i ta ẍto can ya' b'etu', yaja' matxa sta'we ya'. 21Yet lan̈an stak'lican ya' xalni ya': —Ta chal sc'ul Comam Dios, chin ec'oj te c'atan̈ hunecojxaan, Lawitu' x'oc pax ya' yul barco. 22Ha' xhul ya' Cesarea, x'el ya' yul barco xhul ya' Jerusalén yila' heb'ya' xax ya' yuluj sc'ul yin̈ Comam. Lawi yec' ya' b'etu' xto ya' Antioquía. 23Hat x'eh ya' b'et Antioquía hanic'xa, lawitu' xto ya'. Hat x'apni ya' b'et Galacia b'oj Frigia, txol cha' ya' yec' yul hunun con̈ob' ya'noj yip heb'ya' xax ya' yuluj sc'ul yin̈ Comam. 24Ay hune' ya' israel Apolos sb'ih, pitzc'anaj yul con̈ob' Alejandría. Yet hunec' tu', x'apni ya' yul con̈ob' Éfeso. Caw c'ul stzotel ya', b'oj caw helan ya' yin̈ Yum Comam Dios. 25Ya' ti' cuyb'il ya' yin̈ scuywab'al Comam Jahaw. Sunil sc'ul ya' stzotel ya', b'oj caw tohol scuyni ya' anma yin̈ tzet ye Comam Jesús, waxan̈ca han̈c'a tzet chal ya' Juan yin̈ tzet chu ji'ni ha', han̈c'an̈e b'ay k'a cuyb'il ya'. 26Ha' x'oc ya' tzoteloj yul scapiya anma israel, caw sunil sc'ul ya' stzotel ya', yaja' yet xab'en ya' Priscila b'oj ya' Aquila, xinitoj heb'ya' ya' yatut, x'oc heb'ya' cam shiltx'o'nojiloj hej tzetet yet Comam Jesús yin̈ hab'an tet ya'. 27Lawitu' ẍto ya' Apolos b'et Acaya yalni. Yuxin xatoj heb'ya' xax ya' yuluj sc'ul yin̈ Comam ay Éfeso tu' hune' hum tet heb'ya' ay Acaya yun̈e ẍchaot ya'. Yet x'apni ya' b'etu', caw xcolwa tzet xal ya' yin̈ heb'ya' ya'najxa yuluj sc'ul yin̈ Comam Jesús yu sc'ulal sc'ul Comam Dios. 28Ya' Apolos tu' caw mak'b'il stzotel ya' tet anma israel, yin̈ sat anma syeltoj ya' b'aytet mataj yecoj heb'jetb'i, haxca yul Yum Comam Dios sye ya' ta ha' Comam Jesús ha' Cristo echmab'il.


Copyright
Learn More

will be added

X\