HECHOS 17

1Yin̈ isbel naj Pablo yeb naj Silas tu' ec' ebnaj bey con̈ob Anfípolis, yeb bey con̈ob Apolonia. Lahwi tu' xin yapni ebnaj yul con̈ob Tesalónica bay ay hune' iscapilla ebnaj Israel. 2Yocto naj Pablo yul capilla tu' haca'tic'a chu naj yul hunun con̈ob. Yulbal oxeb semana yin̈ hunun tz'ayic xewilal cuywa naj yin̈ ebnaj tu'. 3Yalnicano naj Pablo yin̈ caw haban ta aycanayo yul Yum Comam Dios ta caw yilal yec'ya' yanma Cocolomal, yeb yilal iscami cat yitzitzbican̈. Yalnipaxo naj haca' ti': —Hune' mac lan̈an walnihan teyet ti', ha' Comam Jesús, ha' ton Comam Cristo Cocolomal, ẍi naj Pablo tet anma ayicto bey tu'. 4Ay huntek'an ebnaj Israel yayto yul yanma yin̈ tzet yal naj Pablo, yoccano ebnaj yetbiho naj Pablo yeb naj Silas. Caw tx'i'alpaxo ebnaj griego ayxaco yanma yin̈ Comam Dios yaco isba yul isk'ab Comam Jesucristo yu tzet yal naj Pablo, yebpaxo xin huntek'an ebix ix caw ay yelapno ye yul issat anma yul con̈ob tu' yaco isba yul isk'ab Comam. 5Yaj wal hunmajanxa ebnaj Israel mach yayto yul yanma yin̈ tzet chal naj Pablo, caw tit ishowal ebnaj yuto caw tx'i'al anma yaco isba yin̈ tzet yal naj Pablo tu'. Iscutxbanico ebnaj huntek'an ebnaj caw isa, ton̈e chi'ec' yul calle, caw mach-tic'a-iswalil. Ha' ebnaj tu' xin oc ak'oc'ule tet ebnaj yul con̈ob tu' yun̈e yah wejna ebnaj sunil. Yipicto ebnaj yul yatut hune' naj chiyij Jasón yu chisna ebnaj tato ha' tu' ay naj Pablo yeb naj Silas, yuto caw choche ebnaj istzabayo ebnaj cawan̈ tu' cat yalaxico ebnaj yul isk'ab con̈ob. 6Yu mach ilcha ebnaj yul hune' n̈a tu', yuxin haxa juẍta Jasón yeb haywan̈xa ebnaj juẍtaj ishatxto ebnaj tet ebnaj yahaw con̈ob. Yalni ebnaj yin̈ caw ip haca' ti': —Naj Pablo yeb naj Silas tu', caw sunil anma yul sat yiban̈k'inal ti' chisomchacan̈ isnabal yu ebnaj, wal tinan̈ xin xahulpaxo ebnaj coxol. 7Ha' xin naj Jasón ti', chichahni ebnaj yul yatut, ebnaj tu' caw mach chisyije ebnaj isley naj jahaw ay Roma. Chalpaxo ebnaj ta ay hune'xa naj rey, chiyij Jesús, ẍi ebnaj Israel tet ebnaj yahaw con̈ob tu'. 8Yet yaben sunil anma yeb ebnaj yahaw con̈ob tzet yal ebnaj tu', caw tit ishowal ebnaj, issomchacan̈ isnabal ebnaj. 9Wal ebnaj yahaw con̈ob tu', isk'an ebnaj melyu oc selelo ebnaj isbejtzolaxilo ebnaj. 10Haxa yet ak'balil xin, ischejlaxto naj Pablo yeb naj Silas yul con̈ob Berea yin̈ an̈e yu ebnaj juẍtaj. Yet yapni ebnaj bey tu', yoc ebnaj yul iscapilla ebnaj Israel. 11Ec'na caw c'ulto isnabal anma Israel ay bey con̈ob Berea tu' sata anma Israel ay bey con̈ob Tesalónica. Caw yaco ebnaj yin̈ isc'ul yaben Istzoti' Comam Dios yal ebnaj cawan̈ tu'. Caw xin hunun tz'ayic iscuyni ebnaj Istzoti' Comam yun̈e yilni ebnaj ta caw yel tzet chal naj Pablo tu'. 12Yuxin, caw tx'i'al anma Israel yaco isba yul isk'ab Comam Jesucristo, yeb tx'i'alpaxo ebnaj griego yeb ebix griego caw nime ix yul sat con̈ob tu' yaco isba yul isk'ab Comam. 13Yet yaben ebnaj Israel ay bey Tesalónica tato lan̈an yalni naj Pablo Istzoti' Comam Dios bey con̈ob Berea, yapni ebnaj ak'oc'ule tet anma yun̈e issomchacan̈ isnabal anma yin̈ tzet chal naj Pablo. 14Yuxin ebnaj juẍta tu' yin̈ an̈e ischejto ebnaj naj Pablo bey isti' ha' mar. Wal naj Silas yeb naj Timoteo cancano ebnaj yul con̈ob Berea tu'. 15Ha' ebnaj juẍta inito naj Pablo, hata bey yul con̈ob Atenas bey ebnaj yak'a'cano naj. Haxa yet lan̈an ismeltzo ebnaj bey Berea, yalni naj Pablo tet ebnaj: —Cheyal apno tet naj Silas yeb tet naj Timoteo ta chitit ebnaj yin̈ an̈e inc'atan̈an bey ti', ẍi naj Pablo tu'. 16Hayet ayc'o naj Pablo yechman yapni naj Silas yeb naj Timoteo bey yul con̈ob Atenas, caw tac isc'ul naj yilni tato caw tzetc'a istioẍ anma yul hune' con̈ob tu'. 17Yuxin chibeyc'o naj yul iscapilla ebnaj Israel, cat iscuywa naj yin̈ ebnaj Israel tu' yeb yin̈ ebnaj mach Israelo chiyiyo isba tet Comam Dios. Hunun tz'ayic xin, istzotelpaxo naj tet anma ch'ec' bey yul yamak' capil. 18Ay huntek'an ebnaj cuywawom chiyij epicúrio yebpaxo huntek'an ebnaj chiyij estoico tzotel yeb naj Pablo. Ay ebnaj halni haca' ti': —¿Tzettaxca chalilo huntek'an tzet chal hune' naj caw tzetc'a istzotel ti'? ẍi ebnaj. Wal hunmajanxa ebnaj xin, halni haca'ti': —Chitzotel naj yin̈ huntek'anxa nan tioẍal, ẍi ebnaj. Yal ebnaj haca' tu' yu istzoti'al Comam Jesucristo chal naj Pablo, chalnipaxo naj tato chiitzitzbican̈ anma camomxa. 19Yuxin ilaxto naj bey hune' tzalan chiyij Areópago, bay chak' ebnaj lahti', isk'amben ebnaj tet naj: —¿Chimyu hawalni jetan̈ tzet ye hune' cuybanile chawalic'oj? 20Yuto maẍto bay chijabehan̈ huntek'an ti', yuxin chijochehan̈ chijohtan̈elojan̈ tzet caw chiyal yelapnoj, ẍi ebnaj. 21Hac tu' yute yalni ebnaj yuto sunil anma ay yul con̈ob Atenas yeb anma nan con̈obal ay yul con̈ob tu', caw nantic'a isbeybal anma. Yuto yet ay huno ac' cuybanil ch'apni hallaxo xol ebnaj caw chiec' tx'i'al tiempo yiban̈, yuto caw chiyoche ebnaj ispich'alo yin̈ caw c'ul, cat iscaye'n̈e ebnaj. 22Yahwano naj Pablo xol ebnaj bey hune' Areópago tu', istzabnico naj yalni: —Wal tinan̈, hex ah con̈ob Atenas, caw chiwilan tato caw ayco henabal yin̈ ej tioẍ. 23Yet chinec'an yul con̈ob ti', chiwilnihan baytaj tet hediosal bay caw cheyiyo heba. Chiwilnipaxojan hune' ch'en yet hexahanbal bay tz'ibn̈ebilico hayeb tz'ib chalni haca' ti': —Ha' ti' chijiyo coba tet Dios mach ohtabiloj, ẍi yin̈ hune' ch'en tu'. Wal xin ha' hune' Dios mach cheyohtajo bay cheyiyo heba tu', ha' ton hune' Dios tu' chinhulan wala'an istzoti'al texol. 24Ha' hune' Dios tu', watx'en̈e yul sat yiban̈k'inal ti' yeb sunil tzet ayayo sat; caw yahawil yeco yin̈ satcan̈ yeb yul sat yiban̈k'inal ti'. Ha' hune' Dios tu', mach yulo n̈a watx'ebil yu anma aya. 25Mach yilalo ay tzet ch'ak'lax tet hune' Dios tu' yu anma. Wal xin ha' Comam ch'ak'ni cocawil cosunil, ha' Comam ch'ak'nipaxo jak'ek' cohik'a', yeb sunil tzet ayon̈. 26Ha' Comam Dios watx'en naj babel winaj; yin̈ naj tu' xin titna sunil anma ay yulaj con̈ob yul sat yiban̈k'inal ti'. Yet yalan̈tocanoj yalcano Comam bak'in chiwatx'i hunun nimeta con̈ob, yeb baytu'wal ch'ec' ismohonal hunun con̈ob tu'. 27Iswatx'e Comam Dios haca' tu' yun̈e issayni anma Comam, c'uxanta chiohtan̈elaxilo Comam yu anma. Yaj chiwalcanojan teyet tato mach nahato yelo Comam Dios jin̈, wal xin cawil yeco Comam jin̈. 28Yu Comam Dios yuxinto itzitzon̈, chon̈bili yu Comam, yu Comam yuxin ayon̈ic'o bey yul sat yiban̈k'inal ti'. Ay huntek'an ebnaj heyet con̈ob caw helan istzoteli, chalni ebnaj haca' ti': —Caw yuninal Dios jehan̈, ẍi ebnaj. 29Caw yel chal ebnaj tu' ta caw yuninal Comam Dios jehi, yuxin caw mach chu jalni tato lahan Comam haca' huntek'an ch'en tioẍ watx'ebil yu anma yin̈ ch'en oro maca yin̈ ch'en plata, maca hunoxa nan ch'enal watx'ebilayo yu anma yu ishelanil isnabal. 30Yet payxa, mach ohtan̈ebilo Comam Dios yu anma, yuxin yak' nimanc'ulal Comam yin̈ issucal anma. Wal tinan̈ xin chal Comam Dios tato caw yilal chisna isba sunil anma ay yul sat yiban̈k'inal ti', cat ismeltzoco yul isk'ab Comam. 31Halbilcano yu Comam tato ch'apni hune' tz'ayical bay chil Comam tzet chielico anma ay yul sat yiban̈k'inal ti', hatatic'a tzet chiswatx'e hunun anma. Wal xin ay hune' Isc'ahol Comam Dios sic'bililoj, ha' chiilni tzet chi'elico hunun anma. Isyelo Comam Dios tet sunil anma tato caw yel hune' ti' yet yak'ni itzitzbocan̈ Comam Dios Isc'ahol xol anma camom, ẍi naj Pablo tet ebnaj tu'. 32Yet yaben ebnaj yalni naj Pablo tato chiitzitzbican̈ anma camom, ay ebnaj buchwa yin̈ naj, aypaxo ebnaj halni: —Xacok'ambe'an̈ hune' ti' tawet yet hunoxa tiempohal, ẍi ebnaj. 33Yet lahwi yaben naj Pablo tzet yal ebnaj tu', yel naj xol ebnaj. 34Yaja' ay haywan̈ ebnaj tu' yayto yul yanma yin̈ tzet yal naj Pablo, yoc ebnaj yetbiho naj. Xol ebnaj tu' xin, ay hune' naj chiyij Dionisio, yetbi isba naj yeb ebnaj chiscutxba isba bey Areópago tu'. Aypaxo huntek'anxa anma yayto yul yanma yin̈ Comam yeb xin hune' ix ix chiyij Dámaris.

will be added

X\