HECHOS 17

1Yet x'oc ya' Pablo b'oj heb'ya' yetb'i yin̈ b'el, x'ec'toj heb'ya' yul con̈ob' Anfípolis b'oj Apolonia. Lawitu' x'apni heb'ya' yul con̈ob' Tesalónica, b'ay ay hune' capiya yet anma israel. 2- 3X'octoj ya' Pablo yul capiya tu' haca'tic'a chute. Oxeb' tz'ayic xewb'al xcuywa ya' xol heb'jetb'i. Syeniltoj ya' yin̈ hab'an to ahayoj yul Yum Comam Dios ta caw yilal yec'ya' yanma naj Cristo b'oj yilal scami, lawitu' ẍpitzc'aojcan̈ yin̈ camical. Xalni pax ya': —Comam Jesús lan̈an walni teyet ti'an, ha' Cristo, ẍi ya' Pablo tet anma. 4Ay hunk'aan heb'naj israel ẍhak'en Comam Dios b'oj caw tx'ihal heb'naj griego b'oj tx'ihal heb'ix ix caw ay smay yul con̈ob' tu' xa' yuluj sc'ul yin̈ Comam yu tzet xal ya' Pablo, x'occan heb'ya' yetb'ioj heb'ya'. 5Ha' xilni hunmajanxa heb'naj israel to tx'ihalxa anma xax ya' yuluj sc'ul yin̈ Comam Jesús yu ya' Pablo, xtit lemna chil heb'naj. X'oc heb'naj syamb'anoj heb'naj isa ton̈e ch'ec' colo yulaj calle, tx'ojaln̈e chu. X'ec' heb'naj yi'a'can̈ anma yul con̈ob', xto b'oc'na heb'naj yatut ya' Jasón, x'ipictoj heb'naj yul n̈ah saya' ya' Pablo b'oj ya' Silas, chinitoj heb'naj heb'ya' yul sk'ab' sunil anma yalni. 6Yaja' machictoj heb'ya' yul n̈ah, yuxin haxa ya' Jasón b'oj hunk'aanxa heb'ya' xax ya' yuluj sc'ul yin̈ Comam stzab'toj heb'naj, xinitoj heb'naj heb'ya' yin̈ sat heb'naj yahaw con̈ob'. Chalni heb'naj yin̈ ip: —Naj Pablo b'oj naj Silas tu', sunil b'ay ch'ec' heb'naj ya'a' somk'aojtoj yul swi' anma, tinan̈ haxa b'eti chul heb'naj. 7Pax naj Jasón ti' sak'aln̈e schani naj heb'naj yul yatut. Sunil heb'naj tu' maẍtic'a syijye heb'naj sley naj jahaw ay Roma, haxca chal heb'naj ta ay hune'xa naj rey, Jesús sb'ih, ẍi heb'naj tet heb'naj yahaw con̈ob' tu'. 8Ha xab'en con̈ob' b'oj heb'naj yahaw tu', somchatoj swi' heb'naj sunil. 9Wal ya' Jasón tu' b'oj heb'ya' yetb'i, xa' heb'ya' hune' melyu yun̈e sb'ejtzolax heb'ya'. 10Haxa x'oc ak'b'al, x'alaxtoj ya' Pablo b'oj ya' Silas yul con̈ob' Berea yu heb'ya' xax ya' yuluj sc'ul yin̈ Comam. Ha' x'apni heb'ya' b'etu', x'octoj heb'ya' yul scapiya anma israel. 11Anma ah Berea tu' k'a' c'ul schani stzoti' Comam Dios sataj anma ah Tesalónica, haxca caw chacoj yin̈ sc'ul yab'eni. Hunun tz'ayic yilni heb'naj yul Yum Comam b'ay ahayoj stzoti', chilni heb'naj ta t'in̈an ye tzet chal ya' Pablo. 12Yuxin tx'ihal anma israel x'ab'en tu' xa' yuluj sc'ul yin̈ Comam Jesucristo. Tx'ihal pax heb'ix ix griego caw ay smay xa' yuluj sc'ul yin̈ Comam, pax hunk'aanxa heb'naj griego. 13Ha' xab'entij heb'naj israel ay Tesalónica to lan̈an yalni ya' Pablo b'oj ya' Silas stzoti' Comam Dios b'et Berea, xhul heb'naj ya'a' sc'uluj anma yun̈e spaq'uicoj yin̈ heb'ya'. 14Yuxin lemb'iln̈e x'a'ottoj ya' Pablo yu heb'ya' xax ya' yuluj sc'ul yin̈ Comam b'et sti' ha' mar. Wal ya' Silas b'oj ya' Timoteo xcan heb'ya' yul con̈ob' Berea. 15Heb'ya' xtit a'wal yin̈ ya' Pablo tu', hat ta xhul heb'ya' yul con̈ob' Atenas, xalni ya' Pablo tet heb'ya': —Halwej tet ya' Silas b'oj ya' Timoteo ta ẍtit heb'ya' yin̈ lemb'il b'eti', . Lawitu' xmeltzo heb'ya' Berea. 16Yet maẍto chul ya' Silas b'oj ya' Timoteo b'et Atenas, caw ẍtac sc'ul ya' Pablo yilni to caw tx'ihal tioẍ yul hune' con̈ob' tu' 17Yuxin stzotel ya' tet anma israel yul scapiya, b'oj tet anma mat israeloj ẍhak'en Comam Dios. Hunun tz'ayic stzotel pax ya' tet anma yul parque. 18Ay hunk'aan heb'naj cuywaom ẍhalot epicúreoal b'oj heb'naj estóico. Heb'naj tu' x'oc heb'naj tzoteloj b'oj ya' Pablo. Ay mac xhalni: —¿Tzet stz'aj yala' hune' naj ak'e ti' jet?. Ay pax heb'naj xhalni: —Haca' jab'en ti', nan diosal chul naj yala' stzoti'. Hactu' yalni heb'naj haxca chalc'oj ya' Pablo Comam Jesucristo, b'oj chal ya' to ẍpitzc'aojcan̈ hej camom. 19Yuxin x'iottoj ya' yin̈ sat heb'naj swi'con̈ob' lahti'wom syamb'a sb'a b'et hune' ni'an witz Areópago sb'ih, sk'amb'en heb'naj tet ya': —Tinan̈, ẍjoche jab'e hune' ac' cuywab'al chawal ti'an. 20Haxca maẍtic'a b'ay xjab'e hune' ti'an, yuxin ẍjoche jab'e'an tzet chaliloj. 21Hactu' xute heb'naj yalni, haxca sunil anma ah Atenas tu', b'oj anma nancon̈ob'al ay b'etu', nan leyal ib'il yu. Yet ay hunuj ac' cuywab'al chul xol heb'jetb'i, han̈c'a tu' choche heb'jetb'i yab'e' b'oj yala'. 22Lawitu' x'ah lin̈noj ya' Pablo xol heb'jetb'i, xalni ya': —Mamin ah Atenas, haca' wilni ti'an chin txuman to caw aycoj heyanma yin̈ tzet che hak'e. 23Haxca yet xquin ec' yulaj callean, xwilni sunil hej tzet che hak'ean. Xwilni pax hune' altar b'ay ab'ilcoj hunk'aan tz'ib' heyuan, chalni yin̈ hacti': B'eti' ẍhak'elax hune' Dios mat ohtajb'iloj juan, ẍi tz'ib' tu'. Hune' Dios mat heyohtajoj che hak'e tu', ha' hune' Dios tu' chin hul wala' teyetan. 24Hune' Dios tu', ha' xwatx'en satyib'an̈k'inal ti' b'oj sunil tzet ay sat. Ha' Yahaw yin̈ satcan̈ b'oj satyib'an̈k'inal ti'. Hune' Dios tu' mat yuluj n̈ah watx'eb'il yu anma aya. 25Mach yeẍto ch'a'lax hunuj tzetet tet yu anma, haxca ha' x'a'ni co k'inal co hunil, yuxin itzitzon̈, xa'ni cak'e' ẍco hik'a b'oj sunil hej tzetet. 26Yin̈ naj b'ab'el winaj ha' xwatx'entoj sunil hej con̈ob', yun̈e yehic'oj anma sunil b'aytu'alicoj. Ha' xhalni pax yet yalan̈to b'ak'in̈ ch'ichican̈ hunun con̈ob' b'oj b'ay ch'ec' snajachil. 27Hactu' xute Comam yun̈e ta c'uxan ha' ch'ec' tzab'la anma ẍchalo Comam yu. Yaja' yin̈ caw yeli, mat nahatoj yeloj Comam jin̈ hununon̈. 28Yu Comam yuxin itzitzon̈, chon̈ b'ili, ayon̈c'oj satyib'an̈k'inal ti'. Haca' yalni hune' naj heyetcon̈ob' caw helan tzoteli, chalni naj: Hayon̈ ti' yuninal Comam Dios jeyi, ẍi naj. 29Caw yeli yuninal Comam Dios jeyi, yuxin matxa yetoj ay jalni ta lahan Comam Dios b'oj hunuj echele oro maca plata, mato ch'en watx'eb'ilayoj yu hunuj anma stz'ajan sc'ul. 30Yet matto yohtajoj anma Comam Dios, xa' Comam nimanc'ulal yin̈ sucal sc'ul, yaja' tinan̈ chal Comam ta yilal stac sc'ul sunil anma ay satyib'an̈k'inal ti' yu sucal sc'ul tu'. 31Haxca xal Comam ta chuluj hune' tz'ayical b'ay chila' Comam yin̈ stoholal tzet ẍtan̈oj sunil anma yin̈ tzet xhul yub'ic'oj. Ch'il-laxoj tzet ẍtan̈oj yu hune' mac sic'leb'il yu Comam xol anma. Syeni Comam tet sunil anma to caw yeli sic'leb'il hune' mac tu', yet xpitzc'ancan̈ Comam xol hej camom, 32Yaja' yet xab'en anma yalni ya' ta ẍpitzc'aojcan̈ hej camom, tx'ihal mac x'oc tzeyenoj ya'. Ay mac xhalni: —Xa cam jab'e' hunk'aan tzetet chawal ti' hunujxa tz'ayicalilan. 33Lawitu' xpaxtoj ya' Pablo. 34Yaja' aytic'a mac xa' yuluj sc'ul yin̈ Comam Jesucristo, x'occanoj yetb'ioj ya'. Yin̈ mactaj x'oc tu', ay hune' naj yetb'i sb'a b'oj heb'naj syamb'a sb'a b'et Areópago tu', Dionisio sb'ih, b'oj hune' ya' comi' Dámaris sb'ih, b'oj hunk'aanxa anma.


Copyright
Learn More

will be added

X\