HECHOS 16

1Lawi yec' heb'ya' yul con̈ob' Derbe, x'apni heb'ya' yul con̈ob' Listra. Hat xilayoj sb'a heb'ya' b'oj hune' ya' xax ya' yuluj sc'ul yin̈ Comam, Timoteo sb'ih, yunin hune' ya' comi' xax ya' yuluj sc'ul yin̈ Comam Jesús, Israel yic'al, yaja' smam ya' Timoteo tu' Griego. 2Heb'ya' xax ya' yuluj sc'ul yin̈ Comam ay yul con̈ob' Listra b'oj Iconio, c'ul yalni heb'ya' yin̈ ya' Timoteo. 3Xoche ya' Pablo yi'a'toj ya' yetb'ioj, yuxin x'a'lax circuncidar ya' yun̈e mach ẍchiwa sc'ul heb'naj israel ay b'etu', haxca yohtaj heb'naj to griego smam ya'. 4Yul hunun con̈ob' b'ay ch'ec' heb'ya' xol heb'ya' xax ya' yuluj sc'ul yin̈ Comam, cha'ni heb'ya' hej chejb'anile st'in̈b'anajcan heb'ya' apóstol b'oj heb'ya' anciano ay Jerusalén. 5Yuxin ẍcam oc yip hunun majan heb'ya', hunun tz'ayic xan̈c'a yoc yak'b'il sb'isil heb'ya'. 6Lawitu' xto ya' Pablo b'oj ya' Silas yala' stzoti' Comam Dios b'et Asia yalni, yaja' xal Comam Espíritu Santo ta mach ẍto heb'ya' b'etu'. Yuxin hat x'ec' heb'ya' Frigia b'oj Galacia, xto heb'ya' Bitinia yalni. 7Yaja' ha' x'apni heb'ya' sat smohonal Misia, xoche toj heb'ya' Bitinia, yaja' xal Yespíritu Comam tet heb'ya' ta mach ẍto heb'ya' b'etu'. 8Yuxin x'ec'toj heb'ya' sti'laj tx'otx' Misia, x'apni heb'ya' yul con̈ob' Troas aycoj sti' ha' mar. 9Haxa hune' ak'b'alil, syeni sb'a hune' naj ah Macedonia tet ya' Pablo yul swayic, xalni naj: Yuch'an tioẍ chin k'an tawetan, ton̈ Macedonia, cat ha colwa jin̈an. 10Lawi yilni ya' Pablo hune' tu', xcon̈ oc co k'uynujay jetan xcon̈ to Macedoniaan, haxca xco txuman ta Comam chon̈ initoj jala' tzoti' yet colb'anil tet anma ay b'etu'an. 11Lawitu' xcon̈ octoj yul hune' te' barco b'et Troas tu'an, tohol xu co to Samotraciaan. Haxa hunxa tz'ayic xcon̈ apni yul con̈ob' Neápolisan. 12Lawitu' xcon̈ toan, xcon̈ apni yul con̈ob' Filiposan. Hune' con̈ob' tu' watx'eb'ilcan̈ yu heb'naj ah Roma, aycoj yin̈ b'ab'el majan b'et Macedonia. Hat xcon̈ can hayeb' tz'ayican. 13Yin̈ hune' tz'ayic xewb'al, xcon̈ to colo co saya'an b'ay syamb'a sb'a anma lan̈an ya'ni yoración. Xcon̈ apni sti' hune' ha' ha' aycoj xtxam con̈ob' b'ay syamb'a sb'a anma. Yet xcon̈ apnian xcon̈ ay tz'on̈nojan, ichi jalni stzoti' Comam tet heb'ix yamanc'oj b'etu'an. 14Xol heb'ix x'ab'en tzet xjalan ay hune' ya' Lidia sb'ih, txon̈om xil k'ape cajwuk'wun̈e caw ay stohol, ah Tiatira ya'. Aycoj yanma ya' yin̈ Comam Dios. Ha' Comam x'anicoj yin̈ sc'ul ya' yab'entoj tzet chal ya' Pablo. 15Lawi yi'nican ya' ha' b'oj mac ay sc'atan̈ yul yatut tu', xalni ya': —Haxca xeyila to caw yeli xax wa' yuluj hin c'ul yin̈ Comam Jahawan, ton̈wej watutan, hat chex ehoj, Schilb'an ya' ta chon̈ can yatut tu'an. 16Yet hunec yet lan̈an co to b'ay syamb'a sb'a anma ya'ni yoración tu'an, x'oc tzujnuj hune' ix k'opo jin̈an. Aycoj hune' yespíritu naj matzwalil yin̈ yanma ix, yuxin ch'ahb'eli ix. Lok'b'il ix yu hunk'aan heb'jetb'i, caw chi' heb'jetb'i smelyu yin̈ ix haxca chaliloj ix tzet yecoj anma. 17Ix tu' x'oc tzujnuj ix jin̈an b'oj ya' Pabloan, ch'awi ix, chalni yin̈ hacti': —Hunk'aan heb'naj ti' schejab' Comam Dios Ec'b'al Yib'an̈ Sunil Tzetet, ha' heb'naj ti' ẍhalni tzoti' tzet chu he chani he colb'anil. 18Ayxana ichi yec' tzujtzun ix jin̈an, han̈c'a hunk'aan tzoti' tu' chal ix. Caw xcajtzaloj sc'ul ya' Pablo yab'en tzet chal ix, yuxin xmeltzo t'an̈na ya' xalni ya' tet hune' yespíritu naj matzwalil aycoj yin̈ ix tu': —Yu scan̈il ye Comam Jesucristo ẍwal tawetan, elan̈ yin̈ ix ti', Yin̈n̈ena tu' x'el hune' espíritu yin̈ ix. 19Ha' xilni heb'jetb'i b'ay ay ix tu' to matxa chi' heb'jetb'i smelyu yin̈ ix, xtarottoj ya' Pablo b'oj ya' Silas yul parque tet heb'naj yahaw con̈ob' yu heb'jetb'i. 20Ha' x'apni heb'ya' yin̈ sat heb'naj yahaw con̈ob' tu', xalni heb'jetb'i: —Hunk'aan heb'naj israel ti' ton̈e chul heb'naj ya'a'coj howal xol jetcon̈ob'. 21Lan̈an scuyni heb'naj anma yin̈ hunk'aan tzetet mach scha sb'a b'oj co ley, machu jab'entoj haxca hayon̈ ti' romanoon̈. 22Lawitu' xto b'oc'na anma yin̈ ya' Pablo b'oj ya' Silas. Schejni heb'naj yahaw con̈ob' tu' stzil-laxiloj xil sk'ap heb'ya', xhatelax heb'ya' yu te' xic'om te'. 23Lawi shatelax heb'ya' yin̈ c'ul, x'alaxictoj heb'ya' yul presu. Xalni heb'naj yahaw con̈ob' tu' tet naj tan̈eom presu:—Caw cha tan̈e heb'naj ti' taj ch'el heb'naj, ẍi tet naj. 24Ha' xab'en naj hune' tu', xb'ey naj yanojictoj heb'ya' yul hune' scuartoal k'a' hitznajictoj. Xanic'toj naj yoj heb'ya' yul slot'il hune' te' ak'in. 25Yet chuman ak'b'al, lan̈an ya'ni ya' Pablo b'oj ya' Silas yoración, chanicoj heb'ya' b'it tet Comam Dios, sunil heb'naj presuwom ch'ab'eni. 26C'uxan hatu' xa'ni hune' niman chixcab', sunil cimientoal yich presu xb'ilican̈. Man̈e pax lewna spultail te' presu tu' b'oj ch'en cadena aycoj yin̈ sk'ab' sunil heb'naj presuwom ayictoj b'etu', x'eltij hoc'na ch'en yul b'itz'ab'. 27Ha' x'el swayan̈ naj tan̈eom presu, xilni naj to hajanxa sti' te' presu, xiniatij naj yespada yul yatut spotx'ni sb'a naj yalni, ham yalni naj ta xax el sunil heb'naj presuwom. 28Yaja' x'awican̈ ya' Pablo, xalni ya': —Taj cha potx' ha b'a, ayon̈ b'eti' co hunilan. 29Xk'anitij naj hune' stzejtah, lemb'il x'ocnatoj naj yul presu. Toxan̈e ẍc'uyc'un naj xiwquilal, sb'ey naj sjahb'anoj ay sb'a yich yoc ya' Pablo b'oj ya' Silas. 30Lawitu' xiniltij naj heb'ya', xalni naj: —Mamin, ¿tzet wal wunian yun̈e hin chani hin colb'anilan?. 31—A' yuluj ha c'ul yin̈ Jahaw Jesús haxin̈wal cha cha ha colb'anil b'oj sunil mac ay yul hawatut tu', ẍi heb'ya' tet naj. 32Lawitu' x'oc heb'ya' yalnoj stzoti' Comam Jahaw tet naj b'oj mactaj ayictoj yul yatut. 33Hatic'a hune' ak'b'alil tu', x'oc naj xtx'ahnoj lahwilal aycoj yin̈ heb'ya'. Lawitu' xi'nican naj ha' b'oj sunil mac ay yatut tu'. 34Lawitu' x'iotictoj heb'ya' yu naj yul yatut x'a'lax wa'oj heb'ya'. Caw ay tzalalal yul hune' n̈ah tu' haxca sunil mac x'a'ni yuluj sc'ul yin̈ Comam Jesús. 35Haxa yet xax sajb'iloj, xanitoj heb'naj yahaw con̈ob' tu' heb'naj xchejab' yala' tet naj tan̈eom presu tu' ta ẍhajlaxiltij heb'ya' yul presu. 36Yuxin xal naj tet ya' Pablo: —Xhul hune' chejb'anil wet yu heb'naj yahaw con̈ob'an ta chex wiltij yul presuan cat he toyi. Matxa tzet chal he c'ul. 37Yaja' xal ya' Pablo tet heb'naj policío: —Hayon̈ ti'an romanoon̈an, maẍtic'a ninoj sk'amb'e heb'naj yahaw con̈ob' jetan tzet co mulan. Ton̈c'a schej heb'naj hon̈ hatelaxoj yu te' xic'omte' yin̈ sat anmaan xcon̈ alaxictoj presuan. Tinan̈, ¿tom ewantajxa chon̈ schejtoj paxoj heb'naj yalnian? Yaja' machoj. Hulujab' heb'naj yahaw con̈ob' tu' b'eti', ha' caw heb'naj chon̈ iniltoj yul presu ti'an, ẍi ya' Pablo tet heb'naj policío. 38Yuxin xto heb'naj yala' tet heb'naj yahaw con̈ob' ta romano heb'ya'. Ha' xab'en heb'naj, caw xiwcan̈ heb'naj. 39Yuxin ha' caw heb'naj xb'ey k'annoj snimanil sc'ul heb'ya'. Lawitu' x'iotiltij heb'ya' yul presu, xk'anni heb'naj tx'ihal yuch'antioẍ ta ch'el heb'ya' yul con̈ob' tu'. 40Lawitu' xto heb'ya' yatut ya' Lidia. Hat xilay sb'a heb'ya' b'oj heb'ya' xax ya' yuluj sc'ul yin̈ Comam, xa'ni heb'ya' yak'lob'al sc'ul heb'ya', xtocan heb'ya' yul hunexa con̈ob'.


Copyright
Learn More

will be added

X\